ARTIKEL DIPELAJAR 40
“Ngajar Orang Ngereja Utai ti Ngena”
“Sida ke udah ngajar orang ngereja utai ti ngena, deka manchar baka bintang belama iya.”—DAN. 12:3.
LAGU 151 Iya Deka Ngangau
DALAM ARTIKEL TU a
1. Nama utai ti ngagitka ati ke dianti kitai maya Seribu Taun Kristus Merintah?
LEBUH orang berengkah diangkatka idup baru ba dunya maya timpuh Seribu Taun Kristus Merintah, nya tentu deka nyadi hari ti amat ngagaka ati! Semua orang ke udah lenyau orang ti dikesayau enda sabar deka meda sida baru. Nya mega asai ati Jehovah. (Jop 14:15) Gambarka pengaga ati semua orang ba dunya lebuh orang ti dikesayauka sida diangkatka idup baru. Baka ke udah dipelajarka kitai ba artikel sebedau tu, “orang ke lurus” ti bisi nama sida ditulis dalam bup pengidup deka diangkatka idup baru, lalu bulih “pengidup ti meruan belama iya.” (SKR. 24:15; Jhn. 5:29) Engka mayuh ari orang ti dikesayauka kitai diangkatka idup baru pengudah Armagedon. b Nambahka nya, orang “ke enda lurus” ke nadai peluang ngelala Jehovah tauka nyembah Iya enggau tetap ati sebedau mati “deka diangkatka idup baru lalu diakim.”
2-3. (a) Baka ke dipadah ba Isaiah 11:9, 10, nama pengawa ngajar sereta belajar ti pemadu besai dalam sejarah mensia ke deka digaga? (b) Nama deka dikerandauka kitai dalam artikel tu?
2 Semua orang ke diangkatka idup baru patut diajar. (Isa. 26:9; 61:11) Nya alai, pengawa ngajar sereta belajar ti pemadu besai dalam sejarah mensia patut dipejalaika. (Bacha Isaiah 11:9, 10.) Nama kebuah? Orang ke enda lurus ti diangkatka idup baru patut belajar pasal Jesus Kristus, atur Perintah Petara, genselan tebus Jesus, sereta pemesai reti nama Jehovah enggau kebuah iya siku aja ke bisi hak merintah. Lalu Jehovah mega udah belubah-lubah ngajar pasal tuju Iya bekaul enggau dunya tu. Nya alai, orang ke lurus ti udah diangkatka idup baru mega patut belajarka utai tu. Sekeda ari orang ke tetap ati tu udah lama mati sebedau Bup Kudus ditembuka. Nyadi orang ke enda lurus enggau orang ke lurus bisi mayuh utai ke patut dipelajarka sida.
3 Ba artikel tu kitai deka berandauka tanya tu: Baka ni pengawa ngajar sereta belajar ti pemadu besai tu deka dipejalaika? Nama deka nyadi ngagai orang ke nitihka utai ti diajarka ngagai sida? Nama deka nyadi enti sida enggai nerima ajar nya? Saut ke semua tanya tu penting ke kitai kemayaharitu. Baka ke deka dipeda kitai, sekeda jaku benabi ti ngalitka ati ke ditulis ba bup Daniel enggau Pemandang deka nulung kitai ngaduka baru penemu kitai bekaul enggau utai ti deka nyadi ngagai orang ke diangkatka idup baru. Terubah, aram beratika utai ti dipadah dalam jaku benabi ba Daniel 12:1, 2.
“SIDA KE UDAH MATI, DEKA IDUP BARU”
4-5. Nama dipadah Daniel 12:1 pasal pengujung dunya?
4 Bacha Daniel 12:1. Bup Daniel madahka tusun utai ke deka nyadi maya pengujung dunya. Ambika chunto, Daniel 12:1 madahka Mikael, iya nya Jesus Kristus deka “nyaga bala [nembiak Petara].” Begian jaku benabi nya berengkah dikeamatka ba taun 1914 lebuh Jesus dipilih nyadi Raja ba Perintah Petara di serega.
5 Taja pia, Daniel mega dipadah pasal Jesus ke deka “pegari” maya “penusah ti besai deka nyadi. Nadai penusah ti jai agi ari nya udah kala nyadi kenyau ari penumbuh bansa ti terubah menya.” “Penusah ti besai” tu sama enggau “Penusah ti Besai” ke dipadah Matthew 24:21. Jesus deka pegari tauka ngelindung nembiak Petara ba pengujung timpuh penusah ti besai tu, iya nya ba Armagedon. Bup Pemandang ngumbai raban tu, seraban orang ti mayuh “ke selamat pansut ari Penusah ti Besai.”—Pem. 7:9, 14.
6. Nama deka nyadi pengudah seraban orang ti mayuh selamat pansut ari Penusah ti Besai? Terangka. (Peda mega “Tanya Ari Pemacha” dalam majalah tu ke bekaul enggau pengangkat ari mati ba dunya.)
6 Bacha Daniel 12:2. Suba kitai ngumbai Daniel 12:2 ditujuka ngagai pengangkat ari mati ke serega tauka pengawa kitai ti majak nambah pengudah pengawa nginjil kitai nyauka diketuka bala penyakal ba taun 1918. c Taja pia kitai diatu nemu jaku nya dituju ngagai pengangkat ari mati ke deka nyadi ba dunya ti baru ke deka datai. Pengangkat ari mati tu deka nyadi pengudah pengujung hari ti penudi sereta pengudah perang Armagedon.
7. (a) Nama reti sekeda orang deka diangkatka idup baru lalu “idup belama iya”? (b) Nama kebuah tu “pengangkat ari mati ti menyana agi”?
7 Nama reti ku Daniel 12:2 lebuh iya madah sekeda orang deka diangkatka idup belama iya? Reti iya, orang ke diangkatka idup baru deka ngelala tauka terus ngelala, sereta ngasika Jehovah enggau Jesus maya timpuh 1,000 taun nya, deka nerima pengidup ti belama iya. (Jhn. 17:3) “Pengangkat ari mati ke manah agi” tu manah agi ari pengangkat ari mati ke kala nyadi suba. (Heb. 11:35) Nama kebuah? Laban sida ke diangkatka idup baru suba deka mati baru.
8. Baka ni orang bukai ke diangkatka idup baru “deka dipechat belama iya”?
8 Tang ukai semua orang ke deka diangkatka idup baru deka nerima utai ti diajar Jehovah. Jaku benabi Daniel madah sekeda orang ke diangkatka idup baru “deka dipechat belama iya.” Ketegal sida deka ngayanka ulah ti ngelaban, nama sida enda ditulis dalam bup pengidup lalu sida enda nerima pengidup ti belama iya. Tang sida “deka dipechat belama iya” tauka dipunaska. Nya alai, Daniel 12:2 madah pasal utai ti deka nyadi ngagai semua orang ke diangkatka idup baru bepelasarka utai ti udah dikereja sida pengudah sida diangkatka idup baru. d (Pem. 20:12) Sekeda orang deka idup belama iya, tang kebukai enda.
“NGAJAR ORANG NGEREJA UTAI TI NGENA”
9-10. Nama utai bukai ke deka nyadi pengudah “penusah ti besai,” lalu sapa ke “deka manchar baka penampak langit”?
9 Bacha Daniel 12:3. Nama utai bukai ke deka nyadi pengudah “penusah ti besai”? Kelimpah ari Daniel 12:2, ayat 3 mega madahka utai ke nyadi pengudah Penusah ti Besai.
10 Sapa “deka manchar baka penampak langit”? Matthew 13:43 nulung kitai nemu sapa sida iya, lebuh iya nyebut: “Maya nya, orang ke lurus deka manchar enggau terang baka mata panas ba Perintah Apai sida.” Dalam konteks tu, Jesus benung bejaku pasal “nembiak Perintah Petara” iya nya orang ke dipilih ke serega ti sama gawa enggau iya ba Perintah Petara ba serega. (Mat. 13:38) Nya alai, Daniel 12:3 tentu dituju ngagai orang ke dipilih ngagai serega sereta pengawa ti deka dikereja sida maya timpuh Seribu Taun Kristus Merintah.
144,000 iku orang ke dipilih ngagai serega deka bekerejasama enggau Jesus Kristus kena ngiring pengawa ngajar sereta belajar ti deka dipejalaika ba dunya maya timpuh 1,000 taun nya (Peda genteran 11)
11-12. Nama pengawa ke deka dikereja 144,000 iku orang ke dipilih ke serega maya timpuh 1,000 taun nya?
11 Baka ni orang ke dipilih ngagai serega deka “ngajar orang ngereja utai ti ngena”? Orang ke dipilih ngagai serega deka bekerejasama enggau Jesus Kristus kena ngiring pengawa ngajar sereta belajar ti deka dipejalaika ba dunya maya timpuh 1,000 taun nya. 144,000 iku orang ke dipilih ke serega ukai semina deka nyadi bala raja aja tang mega nyadi bala imam. (Pem. 1:6; 5:10; 20:6) Nyadi sida deka nulung ngeraika semua bansa sereta nulung semua mensia belubah–lubah nyadi sempurna baru. (Pem. 22:1, 2; Esk. 47:12) Nya tentu ngagaka ati sida ti dipilih ke serega!
12 “Orang” ti deka diajar ngereja utai ti ngena tu nyengkaum sapa? Sida tu nyengkaum orang ke diangkatka idup baru, orang ke selamat maya Armagedon, enggau bala anak ke engka ada ba dunya ti baru. Ba ujung timpuh 1,000 taun ila, semua orang ba dunya tentu udah nyadi sempurna. Nyadi kemaya nama sida deka ditulis ngena pen, lalu ukai ngena pinsil dalam bup pengidup?
PENGUJI TI PENUDI
13-14. Nama patut dikereja semua orang ti sempurna ba dunya sebedau sida nerima pengidup ti meruan belama iya?
13 Kitai patut ingat, nyadi sempurna ukai mai reti kitai enggau automatik bulih pengidup ti meruan belama iya. Perundingka pasal Adam seduai Awa. Seduai iya sempurna, tang seduai iya patut ngasika Petara Jehovah sebedau seduai iya ulih nerima pengidup ti meruan belama iya. Tang sayau amat, seduai iya enda ngasika Jehovah.—Rom. 5:12.
14 Baka ni gaya situasi orang di dunya ba ujung timpuh 1,000 taun nya? Semua orang udah tentu nyadi sempurna. Kati semua orang ti sempurna deka nyukung pemerintah Jehovah belama iya? Tauka kati sekeda orang deka nyadi baka Adam seduai Awa ke enda tetap ati taja pan sempurna? Semua tanya tu patut disaut, tang baka ni?
15-16. (a) Kemaya semua orang bepeluang ngayanka penetap ati sida ngagai Jehovah? (b) Nama asil ari penguji ti penudi tu?
15 Sitan deka dikurung sereta dijil pengelama 1,000 taun. Lebuh maya nya, iya enda ulih nesatka sapa-sapa. Tang ba pengujung 1,000 taun nya, Sitan deka dilepaska ari endur iya dijil. Udah nya, iya deka nguji nesatka semua mensia ti sempurna. Maya penguji nya semua mensia ti sempurna ba dunya deka bisi peluang nunjukka diri enggau terang, sekalika sida bebasaka nama Petara enggau nyukung Perintah Iya tauka enda. (Pem. 20:7-10) Utai ti dikereja sida maya nya deka nentuka sekalika nama sida mengkang ditulis dalam bup pengidup tauka enda.
16 Bup Kudus madahka, sekeda orang deka enda tetap ati baka Adam seduai Awa sereta nulak pemerintah Jehovah. Nama deka nyadi ngagai sida? Pemandang 20:15 madahka: “Barang sapa ke nama iya enda ditulis ba bup pengidup, mega deka ditikau ngagai danau api.” Au, sida ke angkat ngelaban deka dipunaska belama iya. Tang mayuh ari mensia ti sempurna deka lulus ba penguji ti penudi tu. Udah nya, nama sida deka mengkang bisi ba bup pengidup.
MAYA “PENGUJUNG DUNYA”
17. Nama dipadah melikat ngagai Daniel pasal utai ke deka nyadi ba jeman kitai? (Daniel 12:4, 8-10)
17 Endang ngagitka ati lebuh berunding pasal utai ke deka nyadi jemah ila! Tang Daniel mega nerima sekeda penerang ti penting ari siku melikat bekaul enggau jeman kitai, iya nya “pengujung dunya.” (Bacha Daniel 12:4 e ari nota kaki, 8-10; 2 Tim. 3:1-5) Melikat nya madah ngagai Daniel: “Penemu ti bendar deka majak mayuh.” Amat, nembiak Petara deka meretika agi jaku benabi dalam bup iya. Melikat nya mega madahka maya hari ti penudi, “sida ke jai enda ulih mereti, tang deka majak nyadi orang ke jai.”
18. Nama deka nyadi ngagai orang ke jai enda lama da agi?
18 Kemayaharitu orang ke jai baka ke enda diukum ketegal utai ti jai ke dikereja sida. (Mal. 3:14, 15) Tang enda lama da agi Jesus deka ngakim orang ke disemaka baka kambin, lalu nyeraraka sida ari orang ke disemaka baka bedus. (Mat. 25:31-33) Orang ke jai enda ulih selamat pansut ari penusah ti besai. Sida mega enda diangkatka idup baru ba dunya ti baru. Nama sida enda ditulis dalam “bup” pengingat ke disebut ba Malaki 3:16.
19. Nama patut dikereja kitai diatu, lalu nama kebuah? (Malaki 3:16-18)
19 Diatu meh maya kitai patut nunjukka diri ukai sebagi ari orang ke jai. (Bacha Malaki 3:16-18.) Jehovah benung ngelumuka sida ke dikumbai Iya “pesaka,” iya nya orang ti berega ba Iya. Kitai tentu deka nyadi siku ari sida.
Kitai enda sabar deka betemu enggau Daniel, orang ti dikesayauka kitai, sereta mayuh agi ke deka “idup baru” sereta nerima upah sida ba dunya ti baru! (Peda genteran 20)
20. Nama semaya ti penudi ti dipadah ngagai Daniel, lalu nama kebuah nuan bebendar nganti pengamat semaya nya?
20 Amat kitai benung idup ba maya ti ngalitka ati. Tang maya ti manah agi deka nyadi enda lama da agi. Enda lama da agi kitai deka meda semua penyai dipunaska. Pengudah nya, kitai deka meda semaya Jehovah ngagai Daniel dikeamatka: “Nuan deka angkat idup baru lalu nerima upah nuan ba pengujung dunya.” (Dan. 12:13) Kati nuan enda sabar nganti maya Daniel enggau orang ti dikesayauka nuan “idup baru”? Enti pia, bebendar meh ngayanka diri tetap ati diatu, lalu nuan ulih andal nama nuan deka mengkang bisi ditulis dalam bup pengidup Jehovah.
LAGU 80 ‘Asaika Pemadas Jehovah’
a Artikel tu deka ngaduka baru penemu kitai ke bekaul enggau pengawa ngajar sereta belajar ti besai ke disebut ba Daniel 12:2, 3. Kitai deka meda kemaya utai tu deka nyadi sereta sapa ke deka enggau pengawa tu. Kitai mega deka beratika baka ni pengawa ngajar sereta belajar tu nyediaka orang ba dunya ke penguji ti penudi ba ujung Seribu Taun Kristus Merintah.
b Pengangkat ari mati engka berengkah enggau sida ti tetap ati ke udah mati maya hari ti penudi. Udah nya, orang ke mati sebedau sida deka diangkatka idup baru nitihka rebak sida. Enti pia, tiap iti rebak nya deka bisi peluang ngelaluka orang ti dikelala sida. Enda ngira baka ni atur iya, ayat Bup kudus madahka orang ke deka diangkatka idup baru ngagai serega deka diangkatka “begintir-gintir.” Nya alai, kitai ulih ngumbai pengangkat ari mati ba dunya mega deka nitihka chara ti sama.—1 Kor. 14:33; 15:23.
c Penerang tu deka ngaduka baru penemu kitai ke bisi ba bup Pay Attention to Daniel’s Prophecy! bagi 17, sereta ba The Watchtower 1 Julai 1987, lamb. 21-25 dalam jaku English.
d Tang rambai jaku “orang ke lurus” enggau “orang ke enda lurus” ke bisi ba Surat Kereja Rasul 24:15 enggau rambai jaku “orang ke ngereja utai ti manah” enggau “orang ke ngereja utai ti jai” ke bisi ba John 5:29 betumpu ba utai ke dikereja orang ke diangkatka idup baru sebedau sida mati.
e Daniel 12:4, NWT: “Ku iya bejaku enggau aku, ‘Nya alai, Daniel, tutup bup nya, lalu lekatka chop tambit ba iya nyentuk ngagai pengujung dunya. Mayuh orang deka bebendar ngiga iya, lalu penemu ti bendar deka majak mayuh.’”
