1. Baka ni kitai nemu sekalika kitai ulih arapka sesiku orang tauka enda?

 ORANG ti tau dikearapka seruran ngamatka semaya iya sereta nyebut utai ti bendar. (Mas. 15:4) Orang nemu sida ulih arapka iya. Kitai dekaka bala menyadi Kristian ngasaika utai ti sama pasal kitai. Nama ulih digaga kitai ngambika sida ulih pechayaka kitai?

 2. Baka ni kitai ulih nunjukka diri tau dikearapka?

² Kitai enda ulih mejal orang bukai pechayaka kitai. Orang deka pechayaka kitai ari utai ti digaga kitai. Kitai suah ninga, pechaya nya baka duit. Ngulihka duit nya tusah tang ngelenyauka duit nya senang. Jehovah tentu udah nunjukka Diri tau dikearapka. Jehovah nadai kala meri kitai kebuah enda arapka Iya laban “semua pengawa Iya endang dikereja Iya enggau ati ti tetap.” (Mas. 33:4) Lalu Jehovah dekaka kitai neladan Iya. (Eps. 5:1) Aram kitai beratika sekeda teladan nembiak Jehovah ke neladan Apai sida ti di serega sereta nunjukka sida tau dikearapka. Kitai mega deka beratika lima iti sifat ke deka nulung kitai nyadi orang ti tau dikearapka.

3-4. Baka ni nabi Daniel nunjukka diri tau dikearapka, lalu ari teladan Daniel nama patut ditanya kitai empu?

³ Nabi Daniel netapka siti teladan ti manah bekaul enggau tau dikearapka. Taja pan iya ditaban orang Babilon nyadi orang tangkap, tang iya nunjukka diri tau dipechaya sereta tau dikearapka. Orang majak arapka iya. Enggau tulung ari Jehovah, iya ulih madahka reti mimpi Nebukadnesar, raja menua  Babilon. Bisi sekali, Daniel patut madah ngagai raja pasal Jehovah ke enda gaga ati enggau raja nya. Nya ukai pesan ti deka didinga raja. Daniel begunaka pemerani kena ngenataika pesan nya laban Raja Nebukadnesar orang ke amat mangah! (Dan. 2:12; 4:20-22, 25) Betaun-taun udah nya, Daniel sekali agi nunjukka diri tau dikearapka lebuh iya madahka reti ti betul bekaul enggau pesan misteri ke bisi ayan ba dinding istana Babilon. (Dan. 5:5, 25-29) Pengudah nya, Darius orang Media enggau pegawai ke dipilih iya mega beratika Daniel “berupai landik agi.” Sida nemu Daniel “endang orang ke tau dikarapka, lalu enda ngereja utai ti salah tauka enda lurus.” (Dan. 6:3, 4) Amat, indah bala pemerintah ke enda nyembah Jehovah nemu penyembah Jehovah tu tau dikearapka!

⁴ Seraya kitai belematika teladan Daniel, kitai ulih nanya diri empu: ‘Kati aku bisi nama ti manah enggau orang ke ukai Saksi Jehovah? Ba runding orang, kati aku tu orang ke ulih ngereja tanggung pengawa sereta orang ti tau dipechaya?’ Nama kebuah kitai patut nanya diri empu ngagai semua tanya ti penting tu? Laban kitai mai mulia ngagai Jehovah lebuh kitai tau dikearapka.

 5. Nama utai ke udah nulung Hananiah nyadi orang ti tau dikearapka?

⁵ Ba taun 455 S.M., pengudah Gabenor Nehemiah ngaga baru dinding kuta Jerusalem, iya ngiga lelaki ke tau dikearapka nyaga kuta nya enggau manah. Ari semua orang, Nehemiah milih Hananiah nyadi kepala nyaga kuta. Bup Kudus nerangka, Hananiah nya “orang ke tau dikarapka, sereta nangika  Petara.” (Neh. 7:2) Hananiah rinduka Jehovah sereta enggai ngereja utai ti ngemediska ati Iya. Ketegal nya, Hananiah ulih enggau bebendar ngereja sebarang pengawa ke diberi ngagai iya. Sekeda sifat tu mega deka nulung kitai nyadi orang ke tau dikearapka ba sembah kitai ngagai Petara.

 6. Baka ni Tikikus nunjukka diri nyadi kaban ti tau dikearapka rasul Paul?

⁶ Peratika teladan Tikikus, siku menyadi ke amat dikearapka rasul Paul. Lebuh Paul ditan ba rumah, iya bepanggai ba Tikikus lalu nyebut Tikikus nya “ulun ti taluk.” (Eps. 6:21, 22) Paul pechaya Tikikus ukai semina deka nganjung surat ngagai bala menyadi ba Epesus enggau Kolosi tang Tikikus mega deka meransang sereta ngelantangka ati sida. Tikikus ngingatka kitai pasal bala menyadi lelaki ti tetap ati sereta tau dikearapka ke ngintu utai ke diguna kitai ba pengarap kemayaharitu.—Kol. 4:7-9.

 7. Nama ulih dipelajarka nuan ari bala tuai gempuru sereta penulung gempuru ba raban gempuru nuan bekaul enggau tau dikearapka?

⁷ Kemayaharitu, kitai amat beterima kasih ngagai bala tuai gempuru sereta penulung gempuru ti tau dikearapka. Baka Daniel, Hananiah, enggau Tikikus, sida bebendar ngereja tanggung pengawa sida. Ambika chunto, lebuh kitai datai ngagai gempuru tengan minggu, kitai nemu semua begian ba program gempuru nya udah diberi ngagai bala menyadi. Bala tuai gempuru amat gaga ati lebuh bala menyadi ke bisi nerima tugas ba gempuru udah besedia lalu ngenataika begian sida. Pia mega, lebuh kitai mai pemelajar Bup Kudus kitai datai ngagai gempuru ujung minggu, kitai pechaya ba maya nya tentu bisi menyadi ke deka meri cheramah ke orang mayuh. Lalu kitai pechaya litaricha ke dikena kitai ba pengawa nginjil tentu bisi. Bala menyadi lelaki ke tetap ati tu ngintu kitai enggau manah. Lalu kitai beterima kasih ke Jehovah ketegal bisi sida ke nulung kitai. Taja pia, baka ni kitai ulih nunjukka diri tau dikearapka?

 8. Baka ni kitai ulih seimbang maya ngayanka pengibuh ngagai orang bukai? (Jaku Dalam 11:13)

⁸ Kitai rinduka bala menyadi Kristian kitai, lalu kitai ibuhka sida. Tang kitai patut seimbang sereta bebasaka privasi sida. Sekeda orang ba raban gempuru Kristian abad keterubah “rindu bejakuka orang, masuk champur enggau pengawa orang, sereta bejaku pasal utai ke enda patut.” (1 Tim. 5:13) Kitai tentu enggai nyadi baka sida. Tang baka ni enti sesiku orang madah ngagai kitai pasal sekeda utai ke bekaul enggau iya empu, lalu minta kitai enda madahka utai nya ngagai orang bukai? Ambika chunto, siku menyadi indu engka madah ngagai kitai pasal penanggul ba pengerai ke benung ditapi iya tauka sekeda penanggul bukai ba pengidup iya, lalu iya minta kitai ngambika enda madahka utai nya ngagai orang bukai. Kitai patut bebasaka peminta iya. b (Bacha Jaku Dalam 11:13.) Diatu, aram beratika sekeda situasi bukai ke nunjukka kebuah nya penting nyimpan resia.

 9. Baka ni diri sebilik ulih nunjukka diri tau dikearapka?

⁹ Nyadi orang ti tau dikearapka ba ruang bilik nuan. Tiap iku diri sebilik bisi tanggung pengawa nyaga privasi ba ruang bilik. Ambika chunto, siku menyadi indu engka bisi tebiat ti ngasuh laki iya alit ati. Tang kati laki iya deka madahka utai tu ngagai orang bukai lalu ngasuh bini iya berasai malu? Tentu enda! Iya sayauka bini iya, lalu iya tentu enggai ngereja sebarang  utai ti ulih ngemediska ati bini iya. (Eps. 5:33) Bala nembiak dekaka diri diintu enggau basa. Apai indai patut ingatka nya. Sida enda patut ngemaluka bala anak sida enggau madahka penyalah anak sida ngagai orang bukai. (Kol. 3:21) Bala anak mega patut nemu nyimpan resia, lalu enda madah ngagai orang bukai pasal utai ke ulih ngemaluka ruang bilik sida. (U-dat. 5:16) Lebuh tiap iku diri sebilik enggau naka ulih nyimpan pekara peribadi pasal ruang bilik sida, kaul sida sebilik deka majak tegap.

10. Nama reti nyadi kaban ti bendar? (Jaku Dalam 17:17)

¹⁰ Nyadi kaban ti tau dikearapka. Ba pengidup kitai, bisi maya iya kitai deka madahka pekara peribadi ngagai kaban rapat kitai. Tang kekadang nya engka enda senang. Kitai engka tusah deka madah ngagai orang pasal utai ti amat dalam ati kitai, lalu kitai tentu balat tusah ati enti kitai nemu kaban rapat kitai madahka utai nya ngagai orang bukai. Taja pia, kitai amat beterima kasih laban bisi kaban ke alai kitai ulih madahka asai ati diri, lalu nemu sida tentu enda madahka utai nya ngagai orang bukai. Iya endang “pangan” ti bendar.—Bacha Jaku Dalam 17:17.

11. (a) Baka ni bala tuai gempuru enggau bini sida nunjukka diri tau dikearapka? (b) Nama ulih dipelajarka kitai ari siku tuai gempuru ke ngereja pengawa ti resia ba raban gempuru, lalu udah nya begulai enggau diri sebilik iya? (Peda gambar.)

¹¹ Nyadi orang ti tau dikearapka bala menyadi Kristian nuan. Bala tuai gempuru ke ditemu ulih nyimpan resia nya baka “dunju ti alai orang ngenduhka diri ari ribut, enggau endur alai belalai” ke bala menyadi Kristian kitai. (Isa. 32:2) Kitai ulih bejaku ngagai bala tuai gempuru pasal sebarang utai laban kitai nemu utai ti dipadah kitai ngagai sida deka diresiaka sida. Kitai enggai mejal sida madahka utai ti patut diresiaka sida. Nambahka nya, kitai bebasaka bala bini tuai gempuru laban sida enda nguji ngulihka resia pasal orang bukai ari laki sida. Endang amat, kitai amat beterima kasih laban bala bini tuai gempuru enda dipadah  penerang peribadi pasal bala menyadi Kristian. Siku bini tuai gempuru madahka: “Aku amat beterima kasih laban laki aku enda madah ngagai aku sebarang utai pasal orang ke begunaka bantu ari bala tuai gempuru. Iya mega enda madahka nama sida. Aku amat beterima kasih laban laki aku nyimpan resia nya ngambika aku enda ibuh irau pasal penusah nya, ke endang enda ulih ditulung aku. Ketegal nya, aku ulih berasai lantang lebuh bejaku enggau semua orang ba raban gempuru, lalu aku ulih pechaya lebuh aku madah ngagai laki aku pasal asai ati tauka penusah ke ditapi aku, pekara tu mega deka diresiaka iya.” Endang amat, semua kitai tentu deka ditemu orang tau dikearapka. Aram kitai beratika lima iti sifat ke deka nulung kitai nyapai juluk ati tu.

12. Nama kebuah kitai ulih ngumbai pengerindu nya sifat ti pemadu penting ke deka nulung kitai nyadi orang ti tau dikearapka? Beri siti chunto.

¹² Pengerindu nya sifat ti pemadu penting ke deka nulung kitai nyadi orang ti tau dikearapka. Jesus madahka dua iti pesan ti pemadu besai, iya nya rinduka Jehovah sereta rinduka orang bukai. (Mat. 22:37-39) Kitai rinduka Jehovah. Nya alai, kitai deka nitihka teladan Iya ti sempurna pasal nyadi orang ti tau dikearapka. Ambika chunto, pengerindu ngagai bala menyadi Kristian meransang kitai ngambika enda madahka pekara peribadi sida ngagai orang bukai. Kitai enda patut nyebut utai ke ulih ngasuh sida berasai tusah, malu tauka pedis ati.—Jhn. 15:12.

13. Baka ni ati ti baruh ulih nulung kitai nyadi orang ti tau dikearapka?

¹³ Ati ti baruh deka nulung kitai nyadi orang ti tau dikearapka. Orang Kristian ti baruh ati enda nguji nyadi orang ti keterubah ke madahka sesiti utai ngagai orang bukai semina ketegal dekaka orang temegahka iya. (Plp. 2:3) Iya enda nguji ngasuh orang berunding pasal iya ke nemu sekeda pekara ti penting ke enda ulih dipadah. Ati ti baruh deka nagang kitai ari nyebut ngagai orang bukai pasal runding kitai empu ba sesiti pekara ke enda dipadah dalam Bup Kudus tauka dikerandauka dalam litaricha kitai.

14. Baka ni nemu berunding ulih nulung kitai nyadi orang ti tau dikearapka?

¹⁴ Orang Kristian ti nemu berunding deka nemu ni “maya enda bemunyi enggau maya bejaku.” (P-jar. 3:7) Bisi maya iya, manah agi kitai enda bemunyi ari ke bejaku. Nya kebuah Jaku Dalam 11:12 madahka: “Enti nuan amat pintar, nuan enda bemunyi.” Peratika siti chunto tu. Siku tuai gempuru ti bepeneleba suah dipinta nulung raban gempuru bukai ke bisi penanggul ti tusah diputarka. Peratika utai ti dipadah siku agi tuai gempuru pasal iya: “Iya seruran bejimat ngambika enda madahka penerang ti resia pasal raban gempuru bukai.” Ketegal tuai gempuru nya amat bepenemu-dalam, bala tuai gempuru dalam raban gempuru iya bebasaka iya. Sida yakin iya tentu enda madahka resia sida ngagai orang bukai.

15. Beri siti chunto kena nunjukka kebuah orang bukai deka arapka nuan enti nuan lurus.

¹⁵ Enti kitai deka orang arapka kitai, kitai mega patut nyadi orang ti lurus. Kitai arapka orang ti lurus laban kitai nemu iya seruran deka nyebut utai ti amat. (Eps. 4:25; Heb. 13:18) Semaka jaku, nuan deka nyadi pengajar Bup Kudus ti manah agi. Nyadi nuan minta sesiku orang ningaka begian nuan ba gempuru, lalu madahka chara nuan ulih ngemanahka agi chara nuan ngajar. Sapa ke deka dikearapka nuan ke deka enggau lurus meri nuan jaku lalau? Kati nuan deka ngiga orang ke semina nyebut utai ti ngerinduka ati nuan tauka orang ke deka enggau nelap madah ngagai nuan utai  ti amat? Semua kitai nemu saut iya. Bup Kudus madahka: “Manah agi ngerara orang enggau chara ti terang, ari ke nejuka iya ngumbai nuan enda ibuhka iya. Pangan nganu enggau ati ti manah, taja pen nuan pedis dianu sida.” (J-lam. 27:5, 6) Taja pan terubah iya kitai tusah deka ningaka jaku iya, tang jaku lalau ti lurus ari kaban nuan deka terus nulung nuan.

16. Baka ni Jaku Dalam 10:19 nunjukka kebuah kitai patut nemu nagang diri?

¹⁶ Nemu nagang diri nya sifat ti amat penting enti kitai deka orang arapka kitai. Sifat tu nulung kitai enda bemunyi kelebih agi lebuh kitai diuji madahka resia ke enda patut dipadah kitai. (Bacha Jaku Dalam 10:19.) Kitai engka tusah deka nagang diri lebuh kitai ngena media sosial. Enti kitai enda bejimat, kitai engka enda sengaja madahka sekeda resia ngagai mayuh orang. Lalu, enti kitai madahka sekeda penerang nengah chara elektronik, kitai enda ulih ngawal chara orang bukai ngena penerang nya tauka nama penusah ke deka nyadi ketegal nya. Sifat tu mega deka nulung kitai enda bemunyi lebuh bala penyakal nguji ngasuh kitai nyebut sekeda utai ti ulih mai penusah ngagai bala menyadi Kristian kitai. Utai tu engka nyadi lebuh kitai ditasat piak polis ba menua alai pengawa kitai ditagang. Kitai ulih nitihka prinsip Bup Kudus, lalu “enggai nyebut [nama-nama] utai” dalam situasi tu tauka situasi bukai. (Mas. 39:1) Semua orang patut ulih arapka kitai enda ngira sekalika nya diri sebilik kitai, bala kaban kitai, bala menyadi Kristian kitai, tauka orang bukai. Lalu, enti kitai deka nyadi orang ti tau dikearapka, kitai patut nemu nagang diri.

17. Nama patut digaga kitai ngambika bala menyadi Kristian ulih terus arapka kitai?

¹⁷ Kitai amat beterima kasih laban Jehovah udah mai kitai ngagai ruang bilik ke bisi orang ti bepengerindu enggau tau dikearapka. Semua kitai bisi tanggungjawap ngereja utai ke ulih ngasuh bala menyadi Kristian arapka kitai. Seraya tiap iku kitai ngemansangka sifat pengerindu, ati ti baruh, nemu berunding, lurus, sereta nemu nagang diri, kitai deka meransang bala menyadi ngambika ulih ngarapka pangan diri. Kitai patut terus bebendar nunjukka diri tau dikearapka orang bukai. Awakka kitai neladan Petara kitai, Jehovah, sereta terus nunjukka diri tau dikearapka.