Perundingka saut Bup Kudus ngagai tanya tu.

Surat Kereja Rasul 24:15 madahka, “orang ke lurus enggau orang ke enda lurus” deka diangkatka idup baru. Orang ke lurus nya orang ke nyembah Jehovah enggau tetap ati sebedau sida mati. Lalu, nama sida bisi ditulis dalam bup pengidup. (Mal. 3:16) Orang ke enda lurus nya nyengkaum sida ke nadai peluang ngelala Jehovah sebedau sida mati. Nyadi, nama sida nadai ditulis dalam bup pengidup.

John 5:28, 29 bisi nyebut pasal dua iti raban orang ti sama enggau raban orang ke dipadah ba Surat Kereja Rasul 24:15. Jesus madahka, “Orang ke ngereja utai ti manah deka diangkatka idup baru lalu bulih pengidup ti meruan belama iya tang orang ke ngereja utai ti jai deka diangkatka idup baru lalu diakim.” Orang ke lurus nya ngereja utai ti manah sebedau sida mati. Sida deka diangkatka idup baru, lalu bulih pengidup ti meruan belama iya laban nama sida agi bisi dalam bup pengidup. Tang orang ke enda lurus nya ngereja utai ti jai sebedau sida mati. Sida deka diangkatka idup baru lalu diakim. Nama sida bedau agi ditulis dalam bup pengidup. Lalu, sida deka napi siti timpuh alai sida deka diakim. Maya timpuh nya, sida deka bisi peluang belajar pasal Jehovah sereta ngereja utai ti manah ngambika nama sida ulih ditulis dalam bup pengidup.

Pemandang 20:12, 13 madahka, semua orang ke diangkatka idup baru patut ngasika utai ti “ditulis ba semua gulung surat nya,” iya nya adat ti baru ke deka diberi Petara ngagai kitai ba dunya ti baru. Jehovah deka ngemunaska orang ke enggai ngasi.—Isa. 65:20.

Daniel 12:2 madahka, sekeda orang ke udah mati deka diangkatka idup baru lalu “idup belama iya, lalu sekeda deka dipechat belama iya.” Ayat tu madahka pasal asil ari akim ti penudi ngagai orang ke udah diangkatka idup baru. Sida deka “idup belama iya” tauka “dipechat belama iya.” Nya alai, ba pengujung timpuh 1,000 taun sekeda deka nerima pengidup ti meruan belama iya tang kebukai deka dipunaska belama iya.—Pem. 20:15; 21:3, 4.

Perundingka siti sempama tu. Situasi dua iti raban orang ke diangkatka idup baru nya ulih disemaka baka orang asing ke deka diau ba menua bukai. Orang ke lurus nya baka orang ke nerima visa pekereja tauka visa penduduk. Lalu diatu, sida bisi kebebasan ti lebih agi. Tang orang ke enda lurus nya baka orang asing ke nerima visa sementara tauka visa pelancong. Taja pia, dua iti raban tu patut bebasa sereta ngasika undang-undang ba menua nya ngambika sida ulih nyadi rayat tauka terus dikemendarka diau dia. Baka nya mega, orang ke enda lurus ti diangkatka idup baru patut ngasika Adat Jehovah sereta nunjukka diri lurus ngambika sida ulih terus diau ba Paradais. Lalu, enda ngira nama bansa visa ke diterima orang asing ke tama ngagai menua bukai, sekeda ari sida engka diterima nyadi rayat tang kebukai deka diburu pansut. Pemutus ke penudi nya deka bepelasarka ulah enggau utai ti dikereja sida ba menua ti baru nya. Baka nya mega, pemutus ti penudi ke semua orang ti diangkatka idup baru nya deka bepanggai ba penetap ati sereta utai ti dikereja sida ba dunya ti baru.

Jehovah ukai semina Petara ti bepengerindu, tang Iya mega Petara ti lurus sereta adil. (U-dat. 32:4; Mas. 33:5) Iya deka ngayanka pengerindu Iya enggau ngangkatka orang ke lurus enggau orang ke enda lurus idup baru. Tang, Iya ngarapka semua sida ngasika standard Iya pasal utai ti betul enggau utai ti salah. Semina sida ke rinduka Iya sereta ngasika standard Iya deka dikemendarka terus idup ba dunya ti baru.