1. Nama utai ke engka ditanya orang ba endur kereja tauka ba sekula?

 NAMA asai ati nuan lebuh orang ke sama kereja tauka sama sekula enggau nuan nanya pasal pengarap nuan? Kati nuan berasai kesal? Mayuh ari kitai berasai baka nya. Tang tanya ke baka nya engka ulih nulung kitai nemu utai ke diperunding tauka dipechayaka sida. Enggau nya, kitai senang agi bekunsika Berita Manah enggau sida. Tang kekadang, sida engka nanya tanya ke baka nya laban sida enda setuju enggau kitai, tauka sida deka bekelikuh enggau kitai. Utai tu suah nyadi, laban sida udah ninga penemu ti salah pasal utai ti dipechayaka kitai. (SKR. 28:22) Nambahka nya, kitai benung idup ba “hari ti penudi.” Mayuh orang “enggai sepenemu enggau orang bukai,” lalu sida mega “mangah.”—2 Tim. 3:​1, 3.

 2. Nama kebuah kitai deka ngayanka penelap?

² Nuan engka berundingka tanya tu, ‘Lebuh orang bukai deka bekelikuh enggau aku pasal utai ti dipechayaka aku, baka ni aku ulih mengkang tenang lalu nyaut enggau manah?’ Nama ulih nulung nuan? Sifat penelap. Orang ti nelap ulih mengkang tenang lebuh disakal. Lalu lebuh iya enda nemu chara deka nyaut tanya ari orang bukai, iya agi ulih mengkang tenang. (J-lam. 16:32) Taja pia, nuan engka ngasaika utai tu enda senang dikereja. Nyadi, baka ni nuan ulih ngemansangka sifat penelap? Baka ni nuan ulih nyaut enggau chara ti nelap lebuh orang bukai nyakal pengarap nuan? Lalu enti nuan siku apai tauka indai, baka ni nuan ulih  nulung bala anak nuan ngetanka pengarap sida enggau chara ti nelap? Aram kitai meda.

 3. Nama kebuah kitai ulih ngumbai orang ke nelap nya kering, ukai lemi? (2 Timoti 2:24, 25)

³ Orang ke nelap enda lemi, tang kering. Iya begunaka pengering ngambika ulih mengkang tenang lebuh napi situasi ti mencabar. Sifat penelap nya sebagi ari “buah kuasa kudus.” (Gal. 5:22 nota kaki, 23) Kekadang, leka jaku Gerika ke mai reti “nelap,” dikena lebuh ngambarka kuda ti siga ke udah dilatih. Gambarka siku kuda ti siga ke udah dilatih ngambika nyadi jinak. Taja pan kuda nya jinak, tang iya agi kering. Nyadi, baka ni kitai ulih ngemansangka sifat penelap, lalu ba maya ti sama agi kering? Kitai enda ulih bepanggai ba pengering diri empu. Kitai patut besampi minta kuasa kudus ari Petara, lalu minta Iya nulung kitai ngemansangka sifat ti manah tu. Bisi mayuh orang ke udah belajarka chara ngayanka penelap. Ambika chunto, mayuh bala menyadi Kristian kitai udah ngayanka penelap lebuh orang bukai nguji bekelikuh enggau sida. Lalu sifat sida ti nelap udah nulung orang bukai ngembuan runding ti manah agi pasal Saksi-Saksi Jehovah. (Bacha 2 Timoti 2:​24, 25.) Baka ni nuan ulih nyadi orang ti nelap?

 4. Ari teladan Isak, nama ulih dipelajarka kitai pasal sifat penelap?

⁴ Bisi mayuh cherita dalam Bup Kudus ke nunjukka sifat penelap nya amat penting. Peratika teladan Isak. Lebuh iya diau ba Gerar, iya nya menua orang Pilistin, orang ba dia chemburu enggau iya. Sida ngisi semua telaga ke udah ditumbak bala ulun apai iya ngena tanah. Isak enda belaban kena ngetanka hak iya, tang iya mai diri sebilik iya pindah ngagai endur ti jauh agi. Ba dia, sida numbak telaga-telaga ti baru. (P-kal. 26:​12-18) Tang orang Pilistin madahka, ai dalam telaga ti baru nya mega enggi sida. Taja pia, Isak mengkang tenang lalu enda belaya enggau sida. (P-kal. 26:​19-25) Nama nulung Isak mengkang nelap taja pan orang bukai sengaja ngasuh iya ringat? Iya tentu udah beratika teladan apai indai iya. Iya belajar ari ulah Abraham ti nelap enggau ulah Sarah ke “enda kelalu irau sereta nelap.”—1 Pet. 3:​4-6; P-kal. 21:​22-34.

 5. Beri siti chunto ke nunjukka bala apai indai Kristian ulih ngajar anak sida pasal kebuah sifat penelap nya amat penting.

⁵ Kita ke apai indai, andal meh kita mega ulih ngajar bala anak kita pasal kebuah sifat penelap nya penting. Peratika chunto Maxence, ke beumur 17 taun. Lebuh iya ba sekula enggau maya iya nginjil, Maxence betemu enggau mayuh orang ti mangah. Apai indai iya enggau sabar nulung iya ngemansangka sifat penelap. Apai indai Maxence madahka: “Maxence diatu faham, kitai senang agi jampat ringat tauka ngayanka ulah ti kasar lebuh disakal orang. Tang iya ke amat, enti iya ulih nagang diri, tu nunjukka iya kering agi.” Au, diatu Maxence udah nyadi orang ti nelap.

 6. Baka ni sampi ulih nulung kitai nelap agi?

⁶ Kekadang kitai betemu enggau orang ke nyebut utai ti jai pasal Jehovah tauka Bup Kudus. Nama ulih digaga kitai lebuh napi situasi ke baka nya? Kitai patut besampi ngagai Jehovah, minta kuasa kudus enggau penemu-dalam ari Iya ngambika kitai ulih ngayanka penelap. Tang baka ni enti kitai sedar, kitai enda ngayanka penelap lebuh napi situasi ke baka nya? Kitai ulih besampi baru pasal situasi nya. Lalu kitai ulih berundingka chara kitai ulih ngayanka penelap enti situasi nya nyadi baru. Udah nya, Jehovah deka meri kitai kuasa kudus Iya ngambika kitai ulih nagang diri lalu ngayanka penelap.

 7. Baka ni ngafal sekeda ayat Bup Kudus ulih nulung kitai lebuh napi situasi ti tusah? (Jaku-Dalam 15:1, 18)

⁷ Mayuh ayat Bup Kudus ulih nulung kitai bejaku enggau nelap lebuh napi situasi ke  ulih ngasuh kitai ringat. Kuasa kudus Petara ulih nulung kitai ingatka ayat Bup Kudus ke baka nya. (Jhn. 14:26) Ambika chunto, prinsip ke ditulis dalam bup Jaku-Dalam ulih nulung kitai ngayanka penelap. (Bacha Jaku-Dalam 15:​1, 18.) Bup Jaku-Dalam mega madahka penguntung ke deka diulih kitai enti kitai mengkang tenang sereta ngayanka penelap lebuh napi situasi ke ulih ngasuh kitai stres.—J-lam. 10:19; 17:27; 21:23; 25:15.

 8. Nama kebuah kitai patut berundingka kebuah sesiku orang nanya sekeda tanya pasal utai ti dipechayaka kitai?

⁸ Pemereti ati tauka penau berundingka utai enggau dalam mega ulih nulung kitai. (J-lam. 19:11) Orang ke nemu berunding enggau dalam ulih nagang diri lebuh utai ti dipechayaka sida disakal. Kesuah iya, lebuh orang nanya kitai tanya, sida enda madahka kebuah tauka tuju sida ngereja nya. Nyadi, sebedau nyaut, kitai patut sedar, kitai engka enda nemu kebuah ke bendar sida nanya tanya nya.—J-lam. 16:23.

 9. Baka ni Gideon ngayanka pemereti ati enggau penelap lebuh nyaut tanya orang Epraim?

⁹ Peratika chara Gideon nyaut orang Epraim. Sida ringat ngagai Gideon, lalu nanya kebuah iya enda mai sida belaban enggau munsuh orang Israel. Nama kebendar iya ke ngasuh sida ringat? Sida engka pedis ati. Enda ngira nama kebuah iya, Gideon bebasaka asai ati sida, lalu nyaut sida enggau nelap. Nama asil iya? Bup Kudus madahka, lebuh Gideon nyebut  nya, “sida lalu badu agi ringat ngagai iya.”—P-ulu. 8:​1-3.

10. Nama deka nulung kitai nemu chara deka nyaut orang ke nanya kitai pasal pengarap kitai? (1 Peter 3:15)

¹⁰ Orang ke sama gawa tauka sama sekula enggau kitai engka nanya kebuah kitai idup nitihka standard Bup Kudus. Kitai enggau naka ulih nerangka kebuah nitihka standard Bup Kudus nya pemadu manah. Lalu ba maya ti sama, kitai bebasaka runding iya. (Bacha 1 Peter 3:15.) Anang kelalu jampat ngumbai tanya ari iya nya ketegal deka bejaika nuan. Tang perundingka tanya iya, lalu ngena peluang nya nemu utai ti penting ba iya. Enda ngira kebuah iya nanya, kitai patut nyaut enggau nelap. Saut kitai engka ulih meransang iya berundingka baru pasal penemu iya. Taja pan chara iya bejaku kasar tauka baka ke ka ngelese, tang chara kitai nyaut patut seruran nelap.—Rom. 12:17.

11-12. (a) Nama patut diperundingka kitai sebedau nyaut tanya ti tusah? (Peda mega gambar.) (b) Baka ni tanya ari orang ulih muka jalai ngagai randau ti manah? Beri siti chunto.

¹¹ Ambika chunto, orang ke sama gawa enggau kitai engka nanya, ‘Nama kebuah nuan enda ngintu hari pengada?’ Enti pia, perundingka tu: Kati iya ngumbai pengarap kitai nagang kitai ari ngereja utai ti ngerinduka ati? Tauka kati iya ngumbai enti kitai enda ngintu hari pengada, tu deka ngasuh orang bukai ke sama gawa enggau kitai enda nyamai ati? Kitai ulih ngurangka pengirau iya. Baka ni kitai ulih ngereja nya? Kitai ulih muji iya laban iya ibuhka orang bukai ke sama gawa enggau iya. Lalu kitai pan ulih madah, kitai mega rindu ngereja utai ti ngerinduka ati ba endur gawa. Enti kitai ngereja nya, tu engka meri kitai peluang ngambika tau bisi randau ti manah enggau iya pasal utai ti dipadah Bup Kudus bekaul enggau hari pengada.

¹² Kitai ulih ngereja utai ti sama lebuh orang bukai nanya kitai tanya ti tusah. Orang ke sama sekula engka madah, ‘Saksi-Saksi Jehovah patut ngubah runding sida, lalu nerima pengawa orang ke homoseksual.’ Kati iya nyebut baka nya laban iya enda entu faham pasal utai ti dipechaya Saksi-Saksi Jehovah bekaul enggau pengawa homoseksual? Tauka kati iya bisi kawan tauka kaban belayan ke homoseksual? Kati iya ngumbai kitai begedika orang ke homoseksual? Baka ni kitai ulih nyaut iya? Kitai ulih madahka, kitai rinduka semua orang, lalu kitai mega bebasaka hak tiap iku orang kena ngaga pemutus ke diri empu. b (1 Pet. 2:17) Enggau nya, kitai engka ulih madah ngagai iya pasal utai ti dipadah Bup Kudus, lalu baka ni nitihka ajar ari Bup Kudus udah nulung kitai ngembuan pengidup ti lantang agi.

13. Baka ni nuan ulih nulung orang ke enda setuju enggau ajar ke madahka Petara nya bisi?

¹³ Lebuh bisi orang balat nyakal utai ti dipechayaka kitai, kitai enda patut terus ngumbai diri nemu utai ti dipechayaka iya. (Tit. 3:2) Ambika chunto, orang ke sama kelas enggau nuan engka madahka, ‘Orang ke pechayaka Petara nya beli.’ Kati nuan terus ngumbai iya pechayaka evolusi lalu amat landik ba pekara nya? Kebendar iya, iya engka semina nyebut baru utai ti didinga iya. Ari ke berandau pasal evolusi, nuan engka ulih ngiga chara kena muka runding kawan nuan. Nuan engka ulih nunjuk ngagai iya tauka nganjung ngagai iya link ari jw.org pasal utai ke ditempa. Udah nya, iya engka sedia agi deka berandau pasal artikel tauka video ke bisi ba laman web nya. Lebuh kitai ngayanka basa enggau chara ke baka tu, iya engka deka agi nemu pasal utai ti dipadah Bup Kudus.

14. Baka ni Niall ngena laman web kitai nulung siku kawan ke sekelas enggau iya mutarka runding ti salah pasal Saksi-Saksi Jehovah?

¹⁴ Siku nembiak ke benama Niall ngena laman  web kitai mutarka runding ti salah pasal Saksi-Saksi Jehovah. Ku iya: “Siku nembiak ke sama kelas enggau aku selalu nuduh aku enda pechayaka sains. Iya ngumbai aku ka agi pechayaka Bup Kudus ke penuh enggau cherita, ari ke pechayaka fakta.” Nembiak nya enda meri Niall peluang nerangka utai ti dipechayaka iya. Nyadi, Niall ngasuh nembiak nya meda begian “Sains enggau Bup Kudus” ba jw.org. Udah nya, Niall ulih beratika nembiak nya bisi macha utai ke bisi ba laman web kitai. Lalu Niall ulih berandau enggau iya pasal pun penatai pengidup. Nuan pan engka bulih asil ti sama.

15. Baka ni bala apai indai ulih nulung bala anak sida meri saut ti nelap lebuh pengarap sida disakal ba sekula?

¹⁵ Bala apai indai ulih ngajar bala anak sida chara meri saut ti nelap lebuh pengarap sida disakal. (Jas. 3:13) Sekeda bala apai indai bisi sesi belatih lebuh belajarka Bup Kudus ba diri sebilik. Keterubah iya, sida berandauka topik ke engka ditanya ba sekula. Udah nya, sida berandau sereta belatihka chara meri saut. Lalu sida ngajar bala anak chara meri saut enggau nelap sereta manah.—Peda kutak “ Sesi Belatih Ulih Nulung Ruang Bilik Nuan.”

16-17. Baka ni sesi belatih ulih nulung bala nembiak?

¹⁶ Sesi belatih ulih nulung bala nembiak yakin enggau pengarap diri empu, lalu ulih nerang ngagai orang bukai kebuah sida pechayaka utai nya. Siri “Tanya ari Bala Nembiak” ke ba jw.org mega bisi keretas kereja ke bala nembiak. Tu digaga kena nulung bala nembiak yakin agi enggau pengarap diri empu. Lalu tu mega deka nulung sida meri saut ngena jaku sida empu lebuh pengarap sida disakal. Lebuh diri sebilik berandauka siri tu, semua kitai ulih belajar chara ngetanka pengarap kitai enggau chara ti nelap sereta manah.

¹⁷ Siku nembiak ke benama Matthew nerangka chara sesi belatih udah nulung iya. Ba pengawa  belajarka Bup Kudus ba diri sebilik, Matthew enggau apai indai iya suah mansik topik ke engka dikerandau ba kelas iya. Ku iya madahka: “Kami berundingka utai ke engka ditanya orang bukai, lalu kami belatihka chara nyaut tanya sida bepelasarka pansik ke udah digaga. Lebuh aku faham kebuah aku arapka utai tu, aku berasai yakin agi lalu senang agi nyaut orang bukai enggau chara ti nelap.”

18. Nama ulih dipelajarka kitai ari Kolosi 4:6?

¹⁸ Taja pan kitai nerangka utai enggau chara ti terang sereta yakin, tang tu ukai reti iya semua orang deka nerima utai ti dipadah kitai. Taja pia, lebuh kitai nyaut enggau chara ti nelap sereta manah, tu ulih nulung. (Bacha Kolosi 4:6.) Bejaku enggau sesiku orang pasal utai ti dipechaya kitai, ulih disemaka baka kitai benung nikau bol ngagai orang nya. Kitai ulih nikau bol nya enggau chara ti manah tauka chara ti kasar. Lebuh kitai nikau enggau manah, orang bukai senang nangkap bol nya, lalu ulih terus main. Baka nya mega, enti kitai meri saut enggau chara ti nelap sereta manah, orang engka deka agi ninga sereta neruska randau nya. Tang, enti iya semina deka bekelikuh tauka belaya enggau kitai, kitai enda ibuh neruska randau nya. (J-lam. 26:4) Taja pia, ukai semua orang baka nya. Kebendar iya, bisi mayuh orang mega deka ninga.

19. Nama utai ke patut meransang kitai ngetanka pengarap kitai enggau chara ti nelap?

¹⁹ Endang amat, kitai bulih mayuh penguntung lebuh kitai belajar nyadi nelap. Besampi minta pengering ari Jehovah kena nulung nuan mengkang nelap lebuh nyaut tanya ti tusah, tauka lebuh orang bejaika utai ti dipechayaka nuan. Orang engka bisi runding ti enda sama enggau nuan. Tang kingatka meh, penelap nuan ulih nagang situasi nya ari nyadi laya. Lalu saut nuan ti nelap sereta bebasa engka ulih ngubah runding orang bukai pasal kitai sereta pemendar ari Bup Kudus. Kitai patut “seruran besedia nyaut” kena ngetanka utai ti dipechayaka kitai, lalu “ngereja nya enggau nelap sereta penuh enggau basa.” (1 Pet. 3:15) Au, awakka penelap nuan nyadi pengering nuan!