1. Nama asai ati Peter pengudah Jesus ngena kereja ajih nulung iya nangkap mayuh ikan?

 SEPEMANJAI malam Peter ngiga ikan, tang iya nadai bulih nama-nama. Tang ku Jesus madah ngagai iya: “Kayuhka perau tu ngagai ai ti dalam, lalu ulurka pukat kita ngambika bulih ikan.” (Luk. 5:4) Taja pan Peter enda pechaya iya deka bulih ikan, tang iya agi nitihka utai ke diasuh Jesus. Peter enggau orang berikan ke bukai ngulurka pukat sida. Sida bulih mayuh amat ikan nyentukka pukat sida nyau charik. Lebuh sida nemu utai ke dikereja Jesus nya siti kereja ajih, sida “balat alit ati.” Nya alai, Peter lalu nyebut: “Anang semak aku, Tuan, laban aku tu orang ke bedosa.” (Luk. 5:​6-9) Pengudah meda kereja ajih nya, Peter ngasaika diri enda layak semak enggau Jesus.

 2. Nama penguntung iya enti kitai belajarka teladan Peter?

² Utai ke dipadah Peter nya endang amat. Iya “orang ke bedosa.” Bup Kudus madahka, kekadang Peter nyebut tauka ngereja utai ke ngujungka iya berasai tusah ati. Kati nuan mega kekadang ngembuan asai ati baka Peter? Kati nuan benung nguji muai ulah ti enda manah, tang agi ga enda mujur? Tauka kati nuan benung belaban enggau pengingin ti bedosa? Enti saut nuan ya, nuan tau bulih peransang lebuh belajarka teladan Peter. Nama kebuah kitai madah baka nya? Peratika tu: Jehovah ulih milih ngambika enda nyimpan penyalah ke udah dikereja Peter dalam Bup Kudus. Taja pia, Jehovah nentuka penyalah Peter ditulis dalam Bup Kudus ngambika kitai ulih belajar ari penyalah nya. (2 Tim. 3:​16, 17) Lebuh kitai belajar pasal Peter, lalu sedar iya pan bisi pengelemi sereta ngembuan asai ati baka kitai,  nya nulung kitai nemu, Jehovah enda ngarapka kitai sempurna. Iya enggai kitai putus asa taja pan kitai patut belaban enggau pengelemi diri.

 3. Nama kebuah kitai enda patut putus asa?

³ Nama kebuah kitai enda patut putus asa? Peratika chunto tu: Lebuh sesiku orang deka belajar main gitar, iya enda tekala nya nyadi landik. Maya iya belajar, iya engka bisi nebah kord ti salah. Tang enti iya terus belatih, iya deka landik agi main gitar. Taja pan iya udah landik, tang kekadang iya engka agi main kord ti salah. Taja pia, iya enda putus asa lalu terus belatih ngambika ulih ngemansangka pengelandik iya. Baka nya mega, kitai engka ngasaika diri udah mujur mutarka sesiti pengelemi. Taja pia, kekadang pengelemi nya engka datai baru. Tang lebuh nya nyadi, kitai enda putus asa, lalu bebendar agi mutarka pengelemi nya. Semua kitai kala nyebut tauka ngereja utai ke ngujungka kitai tusah ati. Tang enti kitai enda putus asa, Jehovah deka nulung kitai terus ngaga pemansang. (1 Pet. 5:10) Kitai deka beratika teladan Peter ke enda putus asa. Lebuh kitai belajar pasal penyiru ke diayanka Jesus ngagai Peter, taja pan Peter ngereja mayuh penyalah, nya ulih meransang kitai terus nyembah Jehovah.

 4. Nitihka Luke 5:​5-10, nama utai ti disebut Peter pasal diri empu, lalu baka ni Jesus nyaut iya?

⁴ Bup Kudus nadai madahka kebuah Peter ngumbai diri “orang ke bedosa” tauka nama dosa ke diperundingka iya lebuh iya nyebut jaku nya. (Bacha Luke 5:​5-10.) Iya engka kala ngereja sekeda penyalah ti besai. Jesus nemu Peter bisi berasai takut, engka laban Peter ngumbai diri enda chukup manah. Tang Jesus mega nemu Peter ulih mengkang tetap ati. Nya alai, Jesus madah ngagai Peter “anang takut.” Lebuh Peter ngasaika Jesus andalka iya, nya ngubah pengidup iya. Peter enggau menyadi iya, Andrew, ngelengkaka bisnes berikan seduai iya, lalu nitihka Jesus ba pengawa nginjil. Ketegal pemutus ke digaga seduai iya, seduai iya nerima mayuh berekat.—Mrk. 1:​16-18.

 5. Nama berekat ke diasaika Peter ketegal iya enda nejuka asai ati iya ti takut nagang iya ari nitihka Jesus?

⁵ Ketegal Peter ngaga pemutus nyadi murid Jesus, iya nerima mayuh berekat. Iya meda Jesus ngerai orang ti sakit, muru melikat ti jai, sereta ngangkatka orang ke udah mati idup baru. b (Mat. 8:​14-17; Mrk. 5:​37, 41, 42) Peter mega meda siti genera ti ngalitka ati, iya nya Jesus deka nyadi Raja Perintah Petara ti deka datai. Utai ti dipeda Peter seruran dikingatka iya. (Mrk. 9:​1-8; 2 Pet. 1:​16-18) Enti Peter enda nitihka Jesus, iya tentu enda ulih meda semua utai tu. Tang ketegal Peter enda nejuka asai ati  iya ti takut nagang iya ari nitihka Jesus, iya ulih ngasaika semua berekat tu. Peter tentu berasai gaga ati!

 6. Kati Peter ulih terus muai pengelemi iya? Terangka.

⁶ Taja pan Peter udah nerima mayuh berekat, tang iya agi belaban enggau pengelemi iya. Peratika sekeda chunto tu. Lebuh Jesus madah iya deka diperinsa sereta mati kena ngamatka jaku benabi dalam Bup Kudus, Peter madah ngagai Jesus, utai tu tentu enda nyadi ba Jesus. (Mrk. 8:​31-33) Lalu Peter enggau bala rasul ke bukai mayuh kali bekelikuh enggau pangan diri pasal sapa ke pemadu besai. (Mrk. 9:​33, 34) Lalu ba malam sebedau Jesus dibunuh, Peter nyerang siku lelaki, lalu mutuska pending lelaki nya. (Jhn. 18:10) Ba malam nya mega, Peter nyadi amat takut pasal runding orang bukai ngagai iya nyentukka iya tiga kali madahka diri enda ngelala Jesus. (Mrk. 14:​66-72) Ketegal utai ti udah digaga Peter, iya duie-duie nyabak.—Mat. 26:75.

 7. Pengudah Jesus diangkatka idup baru, nama peluang ke diberi iya ngagai Peter?

⁷ Jesus enda putus asa enggau Peter lebuh Peter balat tusah ati. Pengudah Jesus diangkatka idup baru, iya meri Peter peluang nunjukka diri agi rinduka iya. Jesus ngasuh Peter nyaga bala bedus iya. (Jhn. 21:​15-17) Peter sedia deka ngereja utai ke diasuh Jesus. Ba hari Pengerami Pentikos, Peter bisi ba Jerusalem, lalu iya siku ari sida ke nerima kuasa kudus maya nya.

 8. Nama penyalah ti besai ke digaga Peter ba Antiok?

⁸ Taja pan Peter siku ari orang Kristian ke dipilih ke serega, tang iya agi patut belaban enggau pengelemi iya. Ba taun 36 M., Petara nganjung Peter betemu enggau Kornelius. Kornelius ukai orang bansa Judah. Ba maya nya mega, Petara milih Kornelius ngena kuasa kudus. Tu enggau terang nunjukka “Petara enda bepilih mata,” lalu Iya nerima orang ke ukai bansa Judah nyadi orang Kristian maya nya. (SKR. 10:​34, 44, 45) Pengudah nya, Peter belabuh makai enggau orang bansa bukai. Tu ukai utai ti biasa dikereja iya. (Gal. 2:12) Taja pia, bisi sekeda orang Kristian ke bansa Judah ngasaika orang Judah enda patut makai enggau orang bansa bukai. Lebuh orang ke bisi runding ti baka nya datai ngagai Antiok, Peter badu agi makai begulai enggau bala menyadi Kristian iya ke ari bansa bukai. Iya engka takut deka ngemediska ati bala menyadi Kristian ari bansa Judah. Rasul Paul meda ulah Peter ti pepura, lalu ngerara iya ba mua orang mayuh. (Gal. 2:​13, 14) Taja pan Peter udah ngereja penyalah, tang iya enda putus asa. Nama utai ke nulung iya?

 9. Baka ni John 6:​68, 69 nunjukka Peter orang ti setia?

⁹ Peter orang ti setia. Iya enda ngelakka nama-nama utai ngasuh iya badu ari nitihka Jesus. Bisi sekali, Jesus nyebut utai ke tusah deka difaham bala murid iya. (Bacha John 6:​68, 69.) Mayuh ari murid Jesus badu agi nitihka iya. Sida enda nganti Jesus nerangka utai ti disebut iya. Tang Peter ngayanka diri setia ngagai Jesus. Ku iya madah ngagai Jesus: “Jaku nuan meri pengidup ti meruan belama iya.”

10. Baka ni Jesus nunjukka diri andalka Peter? (Peda mega gambar.)

¹⁰ Jesus enda ninggalka Peter. Ba malam ti penudi iya idup ba dunya, Jesus nemu Peter enggau bala rasul ke bukai deka ninggalka iya. Taja pia, Jesus madah ngagai Peter, iya andal Peter deka pulai baru lalu terus tetap ati. (Luk. 22:​31, 32) Jesus nemu “ati amat ransing, tang tubuh lemi.” (Mrk. 14:38) Nya alai, taja pan Peter madahka diri enda ngelala Jesus, tang Jesus enda putus asa ngagai Peter. Pengudah Jesus diangkatka idup baru, iya ngayanka diri ngagai Peter. Maya nya, Peter kediri aja. (Mrk. 16:7; Luk. 24:34; 1 Kor. 15:5) Maya nya, Peter amat tusah ati ketegal utai ti udah dikereja iya. Iya  tentu berasai amat diperansang pengudah Jesus datai betemu enggau iya.

11. Baka ni Jesus nulung Peter andal Jehovah deka nyaga iya?

¹¹ Jesus nulung Peter andal, Jehovah deka nyaga iya. Pengudah Jesus diangkatka idup baru, iya ngereja siti agi kereja ajih. Iya nulung Peter enggau bala rasul ke bukai nangkap mayuh amat ikan. (Jhn. 21:​4-6) Kereja ajih tu tentu nulung Peter andal agi Jehovah deka nyediaka utai ke diguna iya. Iya engka ingat jaku Jesus ke madah, Jehovah deka ngintu sida ke “ngenuluka Perintah Petara.” (Mat. 6:33) Ketegal nya, Peter ngenuluka pengawa nginjil ba pengidup iya, ukai bisnes berikan. Ba Pentikos 33 M., Peter nginjil enggau berani. Asil iya, beribu iku orang nerima Berita Manah. (SKR. 2:​14, 37-41) Iya mega nulung orang Samaria enggau orang ari bansa bukai belajar pasal Jesus sereta nitihka Jesus. (SKR. 8:​14-17; 10:​44-48) Endang amat, Jehovah udah ngena Peter enggau manah ngambika semua macham orang ulih dibai ngagai raban gempuru Iya.

12. Baka ni teladan Peter ulih nulung kitai enti kitai benung belaban enggau pengelemi ti tusah dibuai?

¹² Jehovah ulih nulung kitai enda putus asa. Kekadang, kitai engka ngasaika tusah deka terus nyembah Jehovah, kelebih agi lebuh kitai patut belaban enggau pengelemi ti tusah dibuai. Kitai engka ngasaika pengelemi kitai nya balat agi ari ke ditapi Peter. Tang Jehovah ulih meri kitai pengering ngambika enda putus asa. (Mas. 94:​17-19) Ambika chunto, sebedau nemu pemendar, siku menyadi lelaki betaun-taun ngereja ulah homoseksual. Tang pengudah iya belajarka Bup Kudus, iya ngaga ubah ba pengidup, lalu idup nitihka standard Bup Kudus. Taja pia, bisi maya iya, iya agi belaban enggau pengingin ti salah. Nama nulung iya enda putus asa? Ku iya madah: “Jehovah ulih ngeringka kitai. Enggau tulung ari kuasa kudus Jehovah . . . , aku nemu kitai ulih ngembuan pengidup ti sejalai enggau utai ti dikedekaka Jehovah . . . Jehovah udah ngena aku ngereja peneka Iya. Taja pan aku bisi pengelemi, tang Iya terus ngeringka aku.”

13. Nitihka Surat Kereja Rasul 4:​13, 29, 31, baka ni kitai ulih neladan Peter? (Peda mega gambar.)

¹³ Baka ke udah dipeda kitai, Peter bisi ngereja sekeda penyalah ti besai laban iya takut ke mensia. Tang Peter bisi besampi ngagai Jehovah minta pemerani. Asil iya, iya ulih nyadi berani. (Bacha Surat Kereja Rasul 4:​13, 29, 31.) Kitai mega ulih mutarka asai ati kitai ti  takut. Peratika utai ke nyadi ngagai siku menyadi lelaki ti biak ke benama Horst. Iya diau ba Jerman maya Perang Dunya II. Ba maya nya, orang patut nyebut siti jaku tabi ke mai reti “Hitler deka nyelamatka kitai!” Horst nemu, iya enda patut nyebut jaku tabi nya. Tang ketegal iya takut ke bala pengajar enggau orang ke sama kelas, kekadang iya nyebut jaku tabi nya. Apai indai iya enda nganu iya. Tang seduai iya besampi enggau iya, minta Jehovah meri Horst pemerani. Enggau tulung ari apai indai iya, lalu ketegal iya bepanggai ba Jehovah, Horst bulih pemerani ngambika enda nyebut jaku tabi nya agi. Nyau kelama, Horst sedar Jehovah enda kala ninggalka iya. c

14. Baka ni bala tuai gempuru ti bepengerindu ngelantangka ati sida ke asa?

¹⁴ Jehovah enggau Jesus enda sekali-kali ninggalka kitai. Pengudah Peter madahka diri enda ngelala Jesus, iya patut ngaga siti pemutus ti penting. Kati iya deka badu agi nyadi murid Jesus? Tauka kati iya enda putus asa, lalu terus nyadi murid Jesus? Jesus udah besampi ngagai Jehovah ngarika Peter ngambika Peter enda lenyau pengarap. Lalu, Jesus bisi madah ngagai Peter pasal sampi nya. Jesus mega madah iya yakin, Peter udah nya ulih ngeringka pengarap bala menyadi iya. (Luk. 22:​31, 32) Lebuh Peter ingat baru utai ti disebut Jesus, iya tentu berasai lantang. Lebuh kitai patut ngaga pemutus ti penting, Jehovah engka ngena bala tuai gempuru ti bepengerindu kena meri kitai pengelantang ke diguna kitai ngambika ulih mengkang tetap ati. (Eps. 4:​8, 11) Paul, siku menyadi ke udah lama nyadi tuai gempuru, nguji meri pengelantang ke baka nya. Iya ngasuh bala menyadi ke deka putus asa ngambika berunding pasal chara Jehovah mai sida ngagai pemendar. Udah nya, iya nulung sida yakin, ketegal Jehovah bisi pengerindu ti setia, Iya enda  sekali-kali ninggalka sida. Ku Paul madah: “Aku udah meda mayuh bala menyadi ke asa ati ulih terus nyembah Jehovah ketegal tulung ari Jehovah.”

15. Baka ni teladan Peter enggau Horst nunjukka utai ti dipadah ba Matthew 6:33 nya amat?

¹⁵ Baka Jehovah ke udah nyediaka utai ke diguna Peter enggau bala rasul ke bukai, Iya mega deka nyediaka utai ke diguna kitai lebuh kitai ngenuluka pengawa nginjil ba pengidup kitai. (Mat. 6:33) Horst, ke disebut tadi, berunding deka nyadi pengerintis pengudah Perang Dunya II. Tang maya nya, iya amat miskin. Iya kakang ati enti iya ulih ngiga kereja ke ulih melanja pengidup iya, lalu ba maya ti sama, agi gawa penuh jam ke Jehovah. Nama digaga iya? Iya ngaga pemutus deka nguji Jehovah sekalika Jehovah amat deka nyediaka utai ke diguna iya. Nya alai, iya nginjil sepemanjai minggu tuai ti ngabas datai. Ba pengujung minggu nya, iya tekenyit lebuh tuai ti ngabas meri iya siti sampul surat ke bisi duit. Tang tuai ti ngabas nya enda madah ngagai Horst sapa ke meri duit nya. Penyampau duit nya chukup kena Horst ngerintis pengelama beberapa bulan. Ba Horst, pemeri nya nulung iya yakin, Jehovah deka nyediaka utai ke diguna iya. Lalu sepemanjai pengidup iya, Horst ngenuluka Perintah Petara.—Mal. 3:10.

16. Nama penguntung iya enti kitai belajar mayuh agi pasal Peter sereta utai ke ditulis iya dalam surat iya?

¹⁶ Peter tentu amat gaga ati laban Jesus enda ninggalka iya, taja pan iya kala ngasuh Jesus ngambika enda semak iya. Jesus terus ngelatih Peter ngambika Peter ulih nyadi rasul ti tetap ati sereta teladan ti manah ke orang Kristian. Lalu, kitai ulih belajar mayuh utai ari latih ke diberi Jesus ngagai Peter. Peter nulis sekeda ari utai ti dipelajarka iya dalam dua iti surat ke nuju ngagai raban gempuru ba abad ti keterubah. Diatu, dua iti surat nya sebagi ari Bup Kudus. Ba artikel ke nangkanka tu, kitai deka berandauka sekeda jaku pengingat ari surat Peter, lalu baka ni kitai ulih ngena nya ba pengidup kitai.