1-2. Nama kebuah kitai patut belajar pasal cherita pengidup Samson?

 NAMA runding nuan lebuh nuan ninga nama Samson? Nuan engka berunding pasal siku lelaki ke amat kering. Taja pan nya amat, tang Samson kala ngaga pemutus ti enda manah. Ketegal nya, iya balat merinsa. Taja pia, Jehovah agi beratika penetap ati Samson ngagai Iya. Lalu Petara mega nentuka teladan Samson ditulis dalam Bup Kudus ke penguntung kitai.

² Jehovah ngena Samson ngereja sekeda utai ti ngalitka ati ngambika ulih nulung bala nembiak Iya, iya nya orang Israel. Beratus taun pengudah Samson nadai, nengah kuasa kudus, Jehovah ngasuh Rasul Paul nyimpan nama Samson dalam lis bala nembiak Petara ke ngayanka pengarap ti besai. (Heb. 11:​32-34) Teladan Samson ulih meransang kitai. Iya bepanggai ba Jehovah, indah lebuh napi situasi ti tusah. Dalam artikel tu, kitai deka berandauka utai ke ulih dipelajarka kitai ari Samson. Lalu kitai mega deka belajarka chara teladan iya ulih meransang kitai.

3. Nama pengawa ke diberi Jehovah ngagai Samson?

³ Lebuh Samson diadaka, orang Pilistin benung merintah menua Israel, lalu sida nekan bala rayat. (P-ulu. 13:1) Orang Israel balat merinsa laban orang Pilistin amat kejam enggau sida. Jehovah milih Samson “ngepunka pengawa ngelepaska orang Israel ari jari orang Pilistin.” (P-ulu. 13:5) Tang pengawa nya enda senang! Kena ngereja pengawa tu, Samson patut bepanggai ba Jehovah.

4. Baka ni Jehovah nulung Samson ngelepaska diri ari orang Pilistin? (Pengulu 15:​14-16)

 ⁴ Peratika siti chunto ke nunjukka baka ni Samson arapka Jehovah, sereta baka ni iya bepanggai ba Jehovah kena nulung iya. Bisi sekali, bala soldadu orang Pilistin datai deka nangkap Samson ba Lehi. Lehi nya engka siti endur ba menua Judah. Ketegal orang Judah amat takut, sida lalu nyerahka Samson ngagai bala munsuh. Bala Samson empu nanchang iya ngena dua iti tali ti baru, lalu nyerahka iya ngagai orang Pilistin. (P-ulu. 15:​9-13) Taja pia, ‘kuasa Jehovah ngasuh iya kering.’ Nya alai, iya ulih ngelepaska diri ari tali nya. Iya lalu “tetemuka siti tulang rang keledai,” ngambi tulang nya, lalu ngena nya munuh 1,000 iku bala soldadu orang Pilistin.—Bacha Pengulu 15:​14-16.

5. Baka ni Samson nunjukka diri bepanggai ba Jehovah?

⁵ Nama kebuah Samson ngena tulang rang keledai nyadika senyata? Nya ukai senyata ti biasa dikena orang. Tang Samson nemu, Jehovah deka nulung iya ngalahka orang Pilistin enda ngira nama senyata ke dikena iya. Lelaki ti tetap ati tu ngena sebarang utai ke bisi ngambika ulih ngereja peneka Jehovah. Endang amat, Samson ulih mujur ngalahka semua bala munsuh nya ketegal iya bepanggai ba Jehovah.

6. Nama ulih dipelajarka kitai ari Samson lebuh kitai ngereja pengawa teokratik?

⁶ Jehovah pan ulih meri kitai pengering ngambika kitai ulih ngereja pengawa ke diberi Iya, indah enti pengawa nya baka ke kelalu mar dikereja. Petara ulih nulung kitai nengah chara ti ngalitka ati. Baka Iya ke udah ngeringka Samson, andal meh, Iya mega deka nulung nuan ngereja peneka Iya seagi-agi nuan bepanggai ba Iya.—J-lam. 16:3.

7. Beri siti chunto ke nunjukka kebuah nya penting ngiga iring ari Jehovah.

⁷ Mayuh bala menyadi ke nulung ba pengawa nirika bengunan teokratik udah nunjukka diri arapka Jehovah. Suba, bala menyadi ngaga pelan bengunan sereta nirika Palan Gempuru enggau bengunan teokratik ke bukai. Tang, majak mayuh orang dibaptisa. Nya alai, gerempung Jehovah patut ngaga sekeda ubah. Bala menyadi lelaki ke ngiring, besampi minta  iring ari Jehovah. Sida nguji chara ti baru, baka meli bengunan lalu renovate bangunan nya. Robert, ke gawa ba mayuh projek nirika bengunan teokratik ba serata dunya madahka: “Terubah iya, sekeda menyadi ngasaika tusah deka nerima ubah ti baru tu. Chara tu amat bebida ari utai ke dikereja kami ngelama tu. Tang bala menyadi sanggup ngaga ubah, lalu nitihka chara ti baru. Lalu kami ulih meda bukti ke nunjukka Jehovah merekatka ubah tu.” Tu semina siti chunto ke nunjukka Jehovah ngiring bala nembiak Iya ngereja peneka Iya. Kekadang, semua kitai patut nanya diri empu: ‘Kati aku bisi ngiga iring ari Jehovah, lalu sanggup ngaga ubah ngambika ulih nyembah Iya enggau chara ti pemadu manah?’

8. Nama digaga Samson maya iya amat aus?

⁸ Nuan engka udah kala macha pasal pengawa bukai ke digaga Samson ti ngalitka ati. Iya munuh siku singa, lalu udah nya munuh 30 iku orang Pilistin ba Askelon. Iya ngereja nya kediri aja. (P-ulu. 14:​5, 6, 19) Samson nemu iya ulih mujur ketegal tulung ari Jehovah. Tu ulih dipeda pengudah Samson munuh 1,000 iku orang Pilistin. Maya nya, iya berasai amat aus. Nama digaga iya? Iya enda bepanggai ba diri empu. Tang iya ngangauka Jehovah, lalu minta Jehovah nulung iya ngiga ai irup.—P-ulu. 15:18.

9. Nama digaga Jehovah lebuh Samson besampi minta tulung? (Pengulu 15:19)

⁹ Jehovah nyaut sampi Samson ke minta tulung. Iya ngena kereja ajih ngaga siti pun penatai ai. Lebuh Samson ngirup ari mata ai nya, “iya berasai nyamai lalu nyadi kering baru.” (Bacha Pengulu 15:19 ari nota kaki.) b Betaun-taun pengudah nya, lebuh nabi Samuel nulis bup Pengulu, mata ai nya agi bisi ba endur nya. Lebuh orang Israel meda mata ai nya, sida deka dikingatka, seagi-agi sida bepanggai ba Jehovah, Iya deka nulung nembiak Iya ti tetap ati lebuh sida begunaka tulung.

10. Nama patut digaga kitai ngambika ulih nerima tulung ari Jehovah? (Peda mega gambar.)

¹⁰ Kitai mega patut bepanggai ba Jehovah, enda ngira nama pengelandik ke dikembuan kitai tauka nama pengawa ke udah dikereja kitai dalam gerempung Iya. Kitai patut baruh ati, lalu sedar kitai semina ulih mujur enti kitai bepanggai ba Jehovah. Samson bulih pengering baru lebuh iya ngirup ai ke disediaka Jehovah. Baka Samson, kitai patut ngena semua utai ke udah disediaka Jehovah ngambika ulih mengkang tegap ba pengarap.—Mat. 11:28.

11. Baka ni kitai ulih bepanggai ba Jehovah, lalu nama digaga sepasang laki bini?

¹¹ Peratika teladan Aleksey, siku menyadi lelaki ari Rusia. Taja pan iya balat diperinsa, tang iya tan napi perinsa nya. Nama nulung iya tan ngenatka perinsa ti balat nya? Iya enggau bini iya bisi jadual rohani ti manah. Ku iya: “Aku enggau naka ulih nitihka jadual rohani baka belajarka Bup Kudus kediri empu, sereta macha Bup Kudus ninting hari. Tiap pagi, aku enggau bini aku berandauka ayat ninting hari, lalu besampi begulai ngagai Jehovah.” Nama ulih dipelajarka kitai ari teladan seduai iya? Anang meh bepanggai ba diri empu, tang bepanggai meh ba Jehovah. Baka ni kitai ulih ngereja nya? Kitai ulih ngereja nya enti kitai enggau tetap ngereja pengawa ke ulih negapka pengarap, baka belajarka Bup Kudus, besampi, datai ngagai gempuru, sereta nginjil. Udah nya, Jehovah deka nulung kitai ngambika kitai ulih terus nyembah Iya. Baka Iya ke udah ngeringka Samson, Iya mega tentu deka ngeringka kitai.

12. Nama pemutus ti enda manah ke digaga Samson, lalu baka ni kaul iya enggau Delilah bebida ari kaul iya enggau indu ke sebedau nya?

¹² Samson enda sempurna baka kitai. Nya alai, iya mega kala ngaga pemutus ti enda manah. Siti ari pemutus nya ngujungka Samson napi mayuh penusah. Enda lama pengudah Samson nyadi siku hakim, iya belabuh “rinduka siku indu ke benama Delilah, ti diau ba Lebak Sorek.” (P-ulu. 16:4) Sebedau tu, Samson kala betunang enggau siku indu orang Pilistin. Tang tu ketegal, Jehovah ke “udah ngasuh Samson ngereja nya.” ‘Jehovah ngiga tegal kena Iya ngelaban orang Pilistin.’ Udah nya, bisi sekali, Samson diau ba rumah siku indu pelacur ba Gaza, siti nengeri orang Pilistin. Ba maya nya, Petara meri Samson pengering ngambika iya ulih ngesan pintu kuta nya. Ketegal nya, nengeri nya senang agi diserang bala munsuh. (P-ulu. 14:​1-4; 16:​1-3) Tang lebuh Samson belabuh rinduka Delilah, kaul seduai iya enda meri peluang ngambika Samson ulih belaban enggau orang Pilistin, laban Delilah engka siku orang Israel.

13. Nama digaga Delilah ngagai Samson?

¹³ Delilah nerima penyampau duit ti mayuh ari orang Pilistin ngambika iya nyerahka Samson ngagai sida. Ketegal Samson amat rinduka Delilah, iya enda sedar nama utai ke deka digaga Delilah ngagai iya. Bekali-kali Delilah nanya Samson kebuah iya amat kering, lalu pengujung iya Samson alah laban Delilah. Sayau amat, Samson ngaga pemutus ti salah, lalu ngujungka iya lenyau pengering sereta ngerusak kaul iya enggau Jehovah.—P-ulu. 16:​16-20.

14. Nama nyadi ngagai Samson ketegal iya pechayaka Delilah?

¹⁴ Samson napi mayuh penusah laban iya pechayaka Delilah, ukai Jehovah. Orang Pilistin nangkap iya, lalu ngasuh iya nyadi buta.  Sida nepuka iya ba rumah jil di Gaza, alai iya kala nyabut pintu nengeri nya. Orang Pilistin ngasuh iya nyadi ulun ke bekereja ngindik gandum. Udah nya, sida mai Samson ngagai siti ari pengerami sida laban sida deka ngemaluka iya. Sida ngenjuk piring ti besai ngagai petara sida ke dikumbai Dagon laban sida pechaya Dagon udah nulung sida nangkap Samson. Sida mai Samson pansut ari rumah jil, lalu ngagai pengerami nya. Ku sida: “Awakka iya merindang kitai!” Tuju sida nya deka ngemaluka iya.—P-ulu. 16:​21-25.

15. Baka ni Samson nunjukka diri bepanggai baru ba Jehovah? (Pengulu 16:28-30) (Peda gambar ba mua majalah.)

¹⁵ Taja pan Samson bisi ngaga penyalah ti besai, tang iya nadai putus asa. Iya ngiga peluang ngambika ulih ngalahka orang Pilistin laban nya pengawa ke udah diberi Jehovah ngagai iya. (Bacha Pengulu 16:​28-30.) Ku Samson madah ngagai Jehovah: “Aku besampi minta Nuan meri aku pengering sekali tu agi, ngambika aku ulih malas orang Pilistin.” Jehovah nyaut sampi Samson, lalu sekali agi meri iya pengering ti luar biasa. Asil iya, Samson ulih munuh mayuh agi orang Pilistin ari ke udah dikereja iya ngelama tu.

16. Nama ulih dipelajarka kitai ari penyalah ke dikereja Samson?

¹⁶ Taja pan Samson napi mayuh penusah ketegal penyalah ke dikereja iya, tang iya enda ngetu ngereja peneka Jehovah. Lebuh kitai ngaga penyalah, lalu nerima disiplin tauka lenyau tanggung pengawa ba gerempung Jehovah, kitai enggai ngetu nyembah Jehovah. Kingatka, Jehovah sedia deka ngampun kitai. (Mas. 103:​8-10) Taja pan kitai bisi ngereja penyalah, kitai agi ulih dikena Jehovah. Baka Jehovah ke udah ngeringka Samson, Iya mega deka ngeringka kitai kena ngereja peneka Iya.

17-18. Nama utai ke meransang nuan ari teladan Michael? (Peda mega gambar.)

¹⁷ Peratika teladan siku menyadi lelaki ti biak ke benama Michael. Iya amat sibuk ba pengawa ngagai Jehovah. Iya siku penulung gempuru enggau pengerintis biasa. Tang sayau amat, iya bisi ngereja penyalah, lalu tu ngujungka iya lenyau tanggung pengawa ba raban gempuru. Ku Michael: “Ngelama tu, aku amat sibuk ba pengawa aku ngagai Jehovah. Tang enda memukai, aku ngasaika diri enda ulih ngereja nama-nama ke Jehovah. Aku nemu Jehovah tentu enda ninggalka aku. Tang bisi maya iya,  aku mega berunding enti kaul aku enggau Jehovah ulih nyadi baka suba, tauka enti aku agi ulih dikena Jehovah ba raban gempuru baka ke sebedau tu.”

¹⁸ Taja pia, Michael enda putus asa. Ku iya nampung: “Aku bebendar ngemanahka kaul aku enggau Jehovah. Aku seruran besampi, belajarka Bup Kudus, sereta belemati.” Nyau kelama, Michael tau megai baru tanggung pengawa ba raban gempuru. Diatu, iya siku tuai gempuru enggau pengerintis biasa. Iya madahka: “Sukung enggau jaku peransang ke diterima aku, kelebih agi ari bala tuai gempuru, nulung aku sedar Jehovah agi rinduka aku. Diatu, aku ulih gawa baru ke bala menyadi enggau ati ti beresi. Utai ke nyadi tu ngajar aku, Jehovah deka ngampunka sapa-sapa ke amat nesal ati.” Taja pan kitai bisi ngereja penyalah, tang enti kitai nesal ati sereta bebendar ngaga ubah, lalu enda ngetu bepanggai ba Jehovah, kitai ulih yakin, Jehovah deka ngena kitai sereta merekatka kitai.—Mas. 86:5; J-lam. 28:13.

19. Baka ni teladan Samson ngeringka nuan?

¹⁹ Dalam artikel tu, kitai udah belajar sekeda utai ti ngalitka ati ke nyadi ba pengidup Samson. Amat, Samson enda sempurna. Tang, iya enda putus asa gawa ke Jehovah, indah pengudah iya ngaga pemutus ti enda manah pasal Delilah. Taja pan Samson bisi ngereja penyalah, tang Jehovah enda putus asa enggau iya. Petara sekali agi ngena Samson enggau chara ti ngalitka ati. Jehovah agi ngumbai iya siku lelaki ke ngembuan pengarap ti besai. Jehovah nyimpan nama Samson ba lis bala nembiak Iya ti tetap ati, ke ditulis ba Hebrew bagi 11. Kitai tentu diperansang lebuh nemu kitai nyembah Petara ke keran deka ngeringka kitai, kelebih agi lebuh kitai lemi. Nya alai, baka Samson, aram meh kitai bebendar minta Jehovah: “Kingatka aku. Aku besampi minta Nuan meri aku pengering.”—P-ulu. 16:28.