1. Ba pengujung pengidup rasul Peter, nama pengawa ke diberi Jehovah ngagai iya?

 BETAUN-TAUN, Rasul Peter nyembah Jehovah enggau tetap ati. Iya enggau Jesus ba pengawa nginjil. Iya ngepunka pengawa nginjil ngagai orang ari bansa bukai. Lalu udah nya, iya nyadi siku ari raban ti ngiring. Ba pengujung pengidup iya, lebuh iya nemu diri nyauka mati, Jehovah meri iya pengawa ke bukai. Ba urung kira-kira 62-64 M., Jehovah ngasuh iya nulis dua iti surat, iya nya bup 1 enggau 2 Peter. Peter ngarapka dua iti surat tu ulih nulung orang Kristian pengudah iya mati.—2 Pet. 1:​12-15.

2. Nama kebuah surat Peter ditulis ba maya ti ngena?

² Peter nulis surat iya ba maya bala menyadi Kristian benung ‘merinsa laban napi bemacham penguji.’ (1 Pet. 1:6) Orang ti jai nguji deka mai ajar ti salah sereta ulah ti kamah tama ngagai raban gempuru Kristian. (2 Pet. 2:​1, 2, 14) Lalu, orang Kristian ke diau ba Jerusalem enda lama da agi deka napi “pengujung semua utai.” Kuta Jerusalem enggau Rumah Sembiang Jehovah deka dirusak raban soldadu Rome. (1 Pet. 4:7) Surat ke ditulis Peter tentu udah nulung orang Kristian maya nya ngambika sida nemu chara sida ulih tetap ati, taja pan napi mayuh penanggul. Surat nya mega nulung sida nyediaka diri ngambika ulih napi penanggul ke deka datai. b

3. Nama kebuah kitai patut belajarka surat ke ditulis Peter?

³ Taja pan surat ke ditulis Peter dituju ngagai orang Kristian ba abad keterubah, tang Jehovah nentuka surat Peter nyadi sebagi  ari Bup Kudus. Nyadi, kitai pan tau bulih penguntung ari dua iti surat nya. (Rom. 15:4) Baka orang Kristian ke diau ba abad keterubah, kitai pan diau ba dunya ke penuh enggau ulah ti kamah. Gaya dunya ke baka tu ulih ngasuh kitai tusah deka nyembah Jehovah. Pia mega, enda lama da agi kitai deka napi penusah ti balat agi ari ke ditapi orang Judah maya Jerusalem enggau Rumah Sembiang Jehovah dirusak. Ba dua iti surat ke ditulis Peter, kitai deka tetemuka beberapa iti jaku pengingat ti penting. Jaku pengingat nya deka nulung kitai seruran nganti penatai hari Jehovah, mutarka asai takut ke mensia, sereta bebendar agi rinduka pangan diri. Jaku pengingat ke baka tu mega deka nulung bala tuai gempuru nemu, chara sida ulih nulung bala menyadi ba raban gempuru ngambika mengkang tegap ba pengarap.

4. Nitihka 2 Peter 3:​3, 4, nama utai ke ulih ngelemika pengarap kitai?

⁴ Kitai dikelingi orang ke enda pechayaka utai ke dipadah Bup Kudus pasal jemah ila. Betaun-taun, Saksi-Saksi Jehovah ngumbai pengujung dunya deka datai. Tang ketegal utai nya bedau agi nyadi, bala penyakal engka ngeleseka kitai. Indah sekeda orang madahka, pengujung dunya nya utai ti mustahil. (Bacha 2 Peter 3:​3, 4.) Enti kitai ninga utai ke baka nya ari orang ke ditemu kitai ba pengawa nginjil, ari orang ke sama gawa, tauka ari kaban belayan, pengarap kitai engka ulih nyadi lemi. Peter bisi madahka utai ke ulih nulung kitai.

5. Nama deka nulung kitai terus ngembuan runding ti betul bekaul enggau pengujung dunya? (2 Peter 3:​8, 9)

⁵ Sekeda orang engka ngumbai Jehovah lubah mai pengerusak ngagai dunya ti jai tu. Tang jaku Peter ulih nulung kitai ngembuan runding ti betul. Iya ngingatka kitai jam Jehovah enggau mensia enda sama. (Bacha 2 Peter 3:​8, 9.) Ba Jehovah, seribu taun baka sehari. Jehovah sabar laban Iya enggai siku pan orang dipunaska. Tang lebuh hari Jehovah datai, dunya ti jai tu deka nadai. Nya alai, kitai ngumbai nya basa ti besai laban kitai ulih ngena jam ke agi tinggal nginjil ngagai orang ba serata dunya.

6. Baka ni kitai ulih “seruran berundingka” penatai hari Jehovah? (2 Peter 3:​11, 12)

⁶ Peter meransang kitai “seruran berundingka” penatai hari Jehovah. (Bacha 2 Peter 3:​11, 12.) Baka ni kitai ulih ngereja nya? Tiap hari kitai deka berunding pasal pemanah pengidup ba dunya baru. Gambarka nuan enseput udara ti beresi, makai pemakai ti manah ke pengerai, ngelaluka penatai orang ti dikesayau ke diangkatka idup baru, lalu ngajar orang ke idup kelia menya pasal baka ni jaku benabi Bup Kudus dikeamatka. Lebuh nuan ngambarka semua utai tu, nya deka nulung nuan keran agi nganti ke dunya baru, lalu nuan deka yakin agi, pengujung dunya ti jai tu majak semak. ‘Ketegal kitai udah nemu’ pasal jemah ila, kitai “enda dibai limpang” pengajar ti pelesu.—2 Pet. 3:17.

7. Baka ni asai takut ke mensia ulih ngachau kitai?

⁷ Ketegal kitai nemu hari Jehovah majak semak, kitai bebendar deka bekunsika Berita Manah ngagai orang bukai. Tang kekadang kitai engka berasai takut deka ngereja nya. Nama kebuah? Laban kitai takut enggau runding orang pasal kitai tauka utai ke deka digaga sida ba kitai. Tu meh utai ke nyadi ba Peter. Ba malam Jesus dipechara, Peter takut deka madahka diri siku ari murid Jesus. Iya indah bekali-kali madahka diri enda ngelala Jesus. (Mat. 26:​69-75) Tang Peter mujur muai asai takut nya, lalu udah nya, iya nyebut enggau andal: “Anang takutka utai ke ngasuh orang bukai takut, lalu anang irau.” (1 Pet. 3:14) Utai ke disebut Peter nulung kitai yakin, kitai pan ulih muai asai takut ke mensia.

8. Nama ulih nulung kitai mutarka asai takut ke mensia? (1 Peter 3:15)

 ⁸ Nama ulih nulung kitai mutarka asai takut ke mensia? Ku Peter madah: “Dalam ati kita, kita patut ngaku Kristus nya Tuan, lalu iya kudus.” (Bacha 1 Peter 3:15.) Kitai ulih belemati pasal penuduk Jesus Kristus, Raja kitai sereta kuasa ke dikembuan iya. Ambika chunto, nuan bisi peluang bekunsika Berita Manah enggau orang bukai. Tang ba maya nya, nuan engka berasai kesal tauka takut. Enti pia, kingatka meh Raja kitai. Gambarka Jesus merintah ba serega dikelingi bejuta iku bala melikat. Ingat meh, iya bisi “semua kuasa ba serega enggau ba dunya,” lalu iya ‘deka seruran enggau kitai nyentuk ngagai pengujung dunya.’ (Mat. 28:​18-20) Peter meransang kitai “seruran besedia” bejaku pasal utai ti dipechayaka kitai. Kati nuan bisi juluk ati deka nginjil ngagai orang ba endur gawa, ba sekula, tauka ba endur bukai? Enti pia, nuan ulih berunding dulu ni maya nuan ulih ngereja nya, lalu nyediaka utai ke deka disebut nuan. Nuan mega ulih besampi minta pemerani, lalu andal Jehovah deka nulung nuan mutarka asai takut ke mensia.—SKR. 4:29.

9. Bisi sekali, nama utai ke dikereja Peter ke nunjukka iya enda ngayanka pengerindu? (Peda mega gambar.)

⁹ Peter mega belajarka chara ngayanka pengerindu. Iya bisi enggau Jesus lebuh Jesus meri pesan: “Aku meri kita siti pesan ti baru:  Kita patut rinduka pangan diri. Baka aku ke udah rinduka kita, kita mega patut rinduka pangan diri.” (Jhn. 13:34) Taja pia, bisi sekali, Peter alah laban ditekan. Iya enggai makai enggau bala menyadi Kristian ke ari bansa bukai laban iya takut enggau runding bala menyadi Kristian ke bebansa Judah. Rasul Paul madahka Peter nya orang ke “pura-pura.” (Gal. 2:​11-14) Peter nerima jaku lalau ke diberi Paul, lalu belajar ari nya. Dalam dua iti surat iya, Peter nulis kitai ukai aja deka rinduka bala menyadi Kristian, tang kitai patut ngayanka pengerindu nya.

10. Nama nulung kitai “enda pura-pura rinduka pangan diri”? Terangka. (1 Peter 1:22)

¹⁰ Nama ulih nulung kitai ngayanka pengerindu ngagai bala menyadi Kristian? Peter ngasuh kitai “enda pura-pura rinduka pangan diri baka diri menyadi.” (Bacha 1 Peter 1:22.) Kitai ulih ngembuan pengerindu ke baka tu lebuh kitai “ngasika pemendar.” Pemendar tu nyengkaum ajar dalam Bup Kudus ke madahka “Petara enda bepilih mata.” (SKR. 10:​34, 35) Kitai enda ulih ngumbai diri ngasika pesan Jesus pasal pengerindu enti kitai semina rinduka sekeda aja menyadi ba raban gempuru. Endang amat, baka Jesus, kitai engka berasai semak agi enggau sekeda bala menyadi. (Jhn. 13:23; 20:2) Tang Peter madahka, kitai patut bebendar agi “rinduka pangan diri baka diri menyadi.” Pengerindu ke baka tu patut diayanka ngagai semua bala menyadi Kristian kitai laban sida sebagi ari diri sebilik kitai.—1 Pet. 2:17.

11. Nama reti iya ‘bebendar rinduka pangan diri ari ati’?

¹¹ Peter meransang kitai: “Bebendar meh rinduka pangan diri ari ati.” Dalam konteks tu, ‘bebendar rinduka pangan diri ari ati’ mai reti, terus ngayanka pengerindu taja pan tusah deka rinduka orang nya. Ambika chunto, engka bisi siku menyadi ngemediska ati kitai. Keterubah iya, kitai engka tusah deka ngayanka pengerindu laban kitai deka malas dendam. Tang Peter belajar ari Jesus, Petara enda rinduka ulah ke baka nya. (Jhn. 18:​10, 11) Peter nulis: “Anang malas penyai ngena penyai, tauka jaku kelese ngena jaku kelese. Tang, balas meh ngena jaku ti manah.” (1 Pet. 3:9) Enti nuan bebendar rinduka pangan diri ari ati, nuan deka diperansang ngayanka pemanah ati enggau pengibuh, indah ngagai orang ke kala ngemediska ati nuan.

12. (a) Enti kitai rinduka pangan diri enggau pengabis ati, nya deka nulung kitai ngereja nama? (b) Baka ke dipeda ba video Ngetanka Pemaik-Pemeri ari Jehovah, nama utai ke keran deka digaga nuan?

¹² Dalam surat iya ti keterubah, Peter ngena rambai jaku “rindu meh ke pangan diri enggau pengabis ati.” Pengerindu ti baka nya ukai aja nulung kitai ngampun beberapa iti dosa, tang “mayuh dosa.” (1 Pet. 4:8) Peter engka bisi ngenang baru utai ke diajar Jesus pasal ngampunka orang bukai. Maya nya, Peter engka ngumbai diri orang ti manah laban iya madah deka ngampunka menyadi iya “tujuh kali.” Tang Jesus ngajar Peter—nyengkaum semua kitai—kitai patut ngampun “nyentuk ngagai 77 kali.” Reti ku Jesus nya, kitai enda netapka tatak lebuh ngampunka orang bukai. (Mat. 18:​21, 22) Enti nuan tusah deka nitihka jaku lalau tu, anang meh berasai asa ati. Semua nembiak Jehovah ke enda sempurna kekadang ngasaika tusah deka ngampun. Utai ti penting nya, nuan enggau naka ulih ngereja utai ti patut ngambika nuan ulih ngampunka menyadi nuan, lalu bebaik enggau iya. c

13. Nama utai ke ngasuh bala tuai gempuru tusah deka ngiga awak meransang bala menyadi Kristian?

¹³ Pengudah Jesus diangkatka idup baru, iya madah ngagai Peter: “Ibun bala anak bedus aku.” (Jhn. 21:16) Peter tentu seruran ingatka jaku Jesus. Enti nuan siku tuai gempuru, nuan  tentu nemu, jaku Jesus nya mega dituju ngagai nuan. Taja pia, bala tuai gempuru engka ngasaika tusah deka ngiga awak ngambika ulih ngereja tanggung pengawa ti penting tu. Nya ketegal, sida patut nentuka ruang bilik sida bisi utai ke diguna kena beridup. Sida mega patut nentuka ruang bilik sida berasai dikesayau sereta tegap ba pengarap. Bala tuai gempuru mega ransing ba pengawa nginjil. Sida mega patut nyedia sereta ngenataika begian ba gempuru, gempuru besai, sereta konvensyen. Sekeda ari sida bisi tanggung pengawa ba Komiti Besilih Penemu Sepital, tauka Opis Ngaga Pelan/Nirika Bengunan. Au, bala tuai gempuru bisi mayuh tanggung pengawa.

14. Nama ulih meransang bala tuai gempuru ngibun raban bedus Petara? (1 Peter 5:​1-4)

¹⁴ Ku Peter madah ngagai bala tuai gempuru: “Ibun meh raban bedus Petara.” (Bacha 1 Peter 5:​1-4.) Kati nuan siku tuai gempuru? Enti pia, kami nemu nuan rinduka bala menyadi Kristian nuan, lalu deka ngibun sida. Taja pia, bisi maya iya nuan berasai amat sibuk tauka lelak nyentukka nuan enda ulih bejalaika tanggung pengawa nya. Nama ulih dikereja nuan? Padahka ngagai Jehovah semua pengirau nuan. Ku Peter madahka: “Enti orang nulung orang bukai, awakka iya bepanggai ba pengering ke diberi Petara lebuh ngereja nya.” (1 Pet. 4:11) Bala menyadi Kristian nuan engka benung napi penanggul ke enda ulih diputarka diatu. Tang kingatka, “ketuai pengibun bedus,” iya nya Jesus Kristus, ulih nulung sida lebih agi ari ke ulih digaga nuan. Iya ulih nulung sida diatu enggau ba dunya baru. Utai ke dipinta Jehovah ari bala tuai gempuru nya, rinduka bala menyadi Kristian, ngibun sida, sereta ‘nyadi teladan ke raban bedus.’

15. Baka ni siku tuai gempuru ngibun raban bedus Petara? (Peda mega gambar.)

¹⁵ William, siku menyadi ke udah betaun-taun nyadi tuai gempuru, nemu kebuah nya penting ngibun raban bedus Petara. Maya pandemik COVID-19 berengkah, iya enggau bala tuai gempuru ke bukai, enggau naka ulih ngiga bala menyadi ba raban nginjil sida ninting minggu. William nerangka kebuah sida ngereja nya. Ku iya: “Mayuh bala menyadi kediri-diri ba rumah. Lalu runding sida enggau jampat ulih nyadi negatif.” Lebuh bisi menyadi ke bisi penanggul, William ninga enggau manah kena nemu utai ke dikirauka sida sereta utai ke diguna sida. William ngiga litaricha tauka video ari laman web kitai ke ulih dikena meransang menyadi  nya. Ku William madah: “Tu meh maya iya raban bedus Petara patut diibun. Kitai bebendar nulung orang nemu pasal Jehovah. Nya alai, kitai patut bebendar agi nulung bala menyadi kitai mengkang ba pemendar.”

16. Baka ni kitai ulih ngena utai ke dipelajarka kitai ari surat Peter dalam pengidup kitai?

¹⁶ Kitai semina berandauka sekeda utai ke ulih dipelajarka kitai ari dua iti surat Peter. Nuan engka bisi beratika sekeda utai ke deka dikemansangka nuan. Ambika chunto, kati nuan deka suah agi belematika berekat ba dunya baru? Kati nuan bisi juluk ati deka nginjil ba endur gawa, ba sekula, tauka ba endur bukai? Kati nuan bisi tetemuka chara alai nuan ulih bebendar agi rinduka bala menyadi Kristian nuan? Bala tuai gempuru, kati kita keran deka ngibun raban bedus Jehovah, lalu ngereja nya enggau ati ti deka? Lebuh kitai meresa diri empu enggau jujur, kitai engka tetemuka sekeda pengelemi. Taja pia, anang meh asa ati. Ketegal “pemanah ati Tuan,” iya tentu deka nulung nuan ngaga pemansang. (1 Pet. 2:3) Peter nulung kitai yakin pasal utai nya: “Petara . . . deka nembuka latih kita. Iya meh ke deka ngasuh kita tegap. Iya meh ke deka ngasuh kita kering, lalu Iya meh ke deka ngasuh kita entap.”—1 Pet. 5:10.

17. Enti kitai enda putus asa lalu ngelakka Jehovah ngelatih kitai, nama asil ke deka diulih kitai?

¹⁷ Peter kala ngasaika diri enda chukup manah begulai enggau Anak Petara. (Luk. 5:8) Tang, enggau sukung ari Jehovah sereta Jesus, Peter ulih nitihka Jesus enggau tetap ati. Asil iya, Jehovah ngemendarka Peter tama nengah “jalai penama ti bemulia ke nuju ngagai Perintah ti meruan belama iya, ke diempu Tuan enggau Penyelamat kitai, Jesus Kristus.” (2 Pet. 1:11) Tu siti berekat ti chukup manah! Enti nuan enda putus asa baka Peter, lalu ngelakka Jehovah ngelatih nuan, nuan pan tau bulih pengidup ti meruan belama iya. Bup Kudus madahka: “Kita deka bulih pengelepas laban kita arap.”—1 Pet. 1:9.