1-2. Nama kebuah Jehovah ngaga kitai ngambika gaga agi ati lebuh meri tauka nulung orang bukai?

 BUP KUDUS madah, kitai deka gaga agi ati lebuh meri ari nerima. Nya meh chara Jehovah ngaga kitai. (SKR. 20:35) Tang kati tu reti iya kitai enda gaga ati lebuh orang meri kitai pemeri? Enda. Semua kitai tentu gaga ati lebuh nerima pemeri. Taja pia, kitai deka gaga agi ati lebuh kitai ke meri ngagai orang bukai. Nama kebuah chara Jehovah ngaga kitai baka tu amat manah?

² Ketegal Jehovah ngaga kitai baka tu, tu reti iya pengaga ati kitai bepanggai ba diri empu. Lebuh kitai ngiga chara meri tauka ngereja utai ti manah ke orang bukai, kitai empu deka gaga ati. Endaka chara Jehovah ngaga kitai amat manah?—Mas. 139:14.

3. Nama kebuah Jehovah dikumbai “Petara ti gaga ati”?

³ Ari Bup Kudus, kitai belajar, orang ke meri deka gaga ati. Nya kebuah kitai enda tekenyit lebuh Bup Kudus madahka, Jehovah nya “Petara ti gaga ati.” (1 Tim. 1:11) Iya meh ti keterubah ke meri ngagai orang bukai, lalu nadai orang ke meri mayuh agi ari Jehovah. Rasul Paul madahka: “Kitai idup, engkebut, sereta bisi ba ditu, ketegal Iya.” (SKR. 17:28) Endang amat, “tiap iti pemeri ti manah sereta sempurna” datai ari Jehovah.—Jas. 1:17.

4. Nama deka nulung kitai ngembuan pengaga ati ti besai agi?

⁴ Semua kitai tentu deka ngasaika pengaga ati ti besai agi ke datai ari meri tauka ngereja utai ti manah ke orang bukai. Kitai  ulih ngasaika nya lebuh kitai neladan pengerah jari Jehovah. (Eps. 5:1) Dalam artikel tu, kitai deka berandauka pengerah jari Jehovah sereta belajarka utai ti ulih dikereja kitai enti kitai ngasaika orang bukai enda menghargai utai ti digaga kitai ke sida. Tu deka meransang kitai terus ngereja utai ti manah ke orang bukai sereta ngasaika pengaga ati ti besai agi.

TELADAN MEH PENGERAH JARI JEHOVAH

5. Nama sekeda utai ke diberi Jehovah ngagai kitai?

⁵ Nama sekeda chara Jehovah ngayanka pengerah jari? Peratika sekeda chunto tu. Jehovah meri utai ti diguna kitai. Sigi amat, pengidup kitai enda seruran senang. Tang Jehovah nentuka kitai seruran bisi utai ti diguna kitai. Ambika chunto, Iya nentuka kitai bisi pemakai, gari, sereta endur diau. (Mas. 4:8; Mat. 6:​31-33; 1 Tim. 6:​6-8) Kati Jehovah nyediaka semua tu semina ketegal Iya ngumbai nya tanggungjawap Iya? Enda. Nyadi, nama kebuah Jehovah ngereja nya ke kitai?

6. Nama dipelajarka kitai ari Matthew 6:​25, 26?

⁶ Jehovah nyediaka utai ti diguna kitai laban Iya rinduka kitai. Peratika utai ti dipadah Jesus ba Matthew 6:​25, 26. (Bacha.) Jesus ngena chunto utai ti digaga Jehovah, baka burung. Iya madahka: “Sida nadai betanamka utai, nadai ngetau, tauka besimpanka utai dalam setor.” Tang peratika utai ti disebut iya pengudah nya: “Apai kita ti ba serega nupi sida.” Udah nya, Jesus nanya: “Endaka kita berega agi ari burung?” Nama deka diajar Jesus ngagai kitai? Ba Jehovah, bala penyembah Iya jauh berega agi ari bala jelu. Nyadi, enti Jehovah nyediaka utai ti diguna bala jelu, kitai ulih yakin, Iya tentu deka nyediaka utai ti diguna kitai. Baka siku apai ke nyediaka utai ti diguna ruang bilik iya ketegal pengerindu iya ke sida, Jehovah mega nyediaka utai ti diguna kitai laban Iya rinduka kitai.—Mas. 145:16; Mat. 6:32.

7. Nama siti chara kitai ulih neladan pengerah jari Jehovah? (Peda mega gambar.)

⁷ Baka Jehovah, ketegal kitai rinduka bala menyadi, kitai mega ulih meri utai ti diguna sida. Ambika chunto, kati nuan nemu bala menyadi ke begunaka pemakai tauka gari? Jehovah ulih ngena nuan nulung menyadi nya. Bala nembiak Jehovah mega jampat nulung orang bukai lebuh sida ditinggang penusah. Ambika chunto, maya pandemik COVID-19, bala menyadi bekunsika pemakai, gari, enggau utai bukai enggau sida ke begunaka nya. Mayuh bala menyadi mega enggau gerah jari meri duit pemeri ngagai pengawa serata dunya. Lalu duit pemeri tu dikena nulung bala  menyadi ba serata dunya ke ditinggang penusah. Bala menyadi ti gerah jari tu nitihka jaku ba Hebrew 13:16 ke madahka: “Anang enda ingat ngereja utai ti manah lalu bekunsika utai ke dikemisi kita enggau orang bukai, laban Petara lantang ati enggau pemeri ke baka nya.”

8. Nama penguntung ke diulih kitai ketegal pengering ke diberi Jehovah? (Pilipi 2:13)

⁸ Jehovah meri pengering. Kati nuan kala besampi minta pengering kena ngelaban penguji, pengering ngambika ulih tan napi sesiti penusah, tauka pengering kena ngereja utai besehari-sehari? Lebuh sampi nuan disaut, nuan engka setuju enggau Rasul Paul ke madahka: “Aku ulih napi semua utai ketegal pengering ke diberi Petara ngagai aku.” (Plp. 4:13) Endang amat, kuasa Jehovah nadai tatak, lalu Iya enggau gaga ati meri pengering ngagai bala nembiak Iya ti tetap ati.—Bacha Pilipi 2:13.

9. Baka Jehovah, baka ni kitai ulih ngena pengering kitai nulung orang bukai? (Peda mega gambar.)

⁹ Enda baka Jehovah, pengering kitai bisi tatak, lalu kitai enda ulih meri pengering ngagai orang bukai, baka ke digaga Jehovah. Taja pia, kitai ulih neladan Jehovah lebuh kitai ngena pengering kitai nulung orang bukai. Ambika chunto, kitai ulih nulung bala menyadi ke tuai tauka ke sakit, ngereja utai ba rumah sida, tauka bebelika barang ke sida. Enti ulih, kitai mega tau nulung ba pengawa meresi sereta nyeruri Palan Gempuru. Enggau chara tu, kitai ulih ngena pengering kitai ngereja utai ti manah ke bala menyadi Kristian kitai.

10. Baka ni kitai ulih ngeringka orang bukai nengah jaku kitai?

¹⁰ Anang enda ingat, jaku nuan mega bisi kuasa. Engka bisi bala menyadi ke begunaka jaku peransang, jaku ti ngelantangka ati, tauka ngasaika diri enda dihargai. Enti nuan ngelala menyadi ke baka nya, ulih nuan ngiga iya lalu nulung iya? Nuan engka ulih ngabas iya, kol iya, nganjung kad, email, tauka mesej. Anang irau pasal utai ke patut disebut nuan. Menyadi nya engka semina begunaka sekeda jaku ti ngelantangka ati kena nulung iya terus tetap ati tauka ngembuan runding ti positif pasal situasi iya.—J-lam. 12:25; Eps. 4:29.

11. Baka ni Jehovah ngena penemu-dalam Iya?

¹¹ Jehovah meri penemu-dalam. Siku murid Jesus ke benama James nulis: “Enti bisi sapa-sapa ari kita ke kurang penemu-dalam, awakka iya terus minta nya ari Petara, lalu Petara deka meri nya ngagai iya laban Petara enda ngiga penyalah iya.” (Jas. 1:5; nota kaki.) Ayat tu nunjukka, Jehovah enda kedekut enggau penemu-dalam Iya. Tang, Iya enggau gerah jari bekunsika penemu-dalam Iya enggau orang bukai. James mega madahka, lebuh Jehovah  meri penemu-dalam, Iya “enda nganu,” tauka “enda ngiga penyalah” orang nya. Jehovah enda kala ngasuh kitai berasai enda nyamai lebuh minta iring ari Iya. Kebendar iya, Jehovah meransang kitai bebendar minta penemu-dalam ari Iya.—J-lam. 2:​1-6.

12. Baka ni kitai ulih ngena utai ti dipelajarka kitai nulung orang bukai?

¹² Baka ni kitai ulih neladan Jehovah ke enggau gerah jari meri penemu-dalam? (Mas. 32:8) Bala nembiak Jehovah bisi mayuh peluang bekunsika utai ti dipelajarka sida. Ambika chunto, kitai suah nulung bala penginjil ti baru. Bala tuai gempuru enggau sabar nulung bala penulung gempuru enggau bala menyadi lelaki ti udah dibaptisa kena nemu chara ngereja pengawa sida ba raban gempuru. Lalu, bala menyadi ke landik ba pengawa nirika bengunan sereta nyeruri, nulung ngelatih bala menyadi ke bukai ngambika sida ulih nyaga bengunan ke dikena ba pengawa ke Jehovah.

13. Lebuh ngelatih orang bukai, baka ni kitai ulih neladan chara Jehovah bekunsika penemu-dalam Iya?

¹³ Tunda meh teladan Jehovah lebuh ngelatih orang bukai. Kingatka, Jehovah enda kedekut enggau penemu-dalam Iya. Nyadi, kitai mega deka bekunsika utai ti ditemu kitai enggau sida ke benung belajar. Kitai enggai kedekut enggau penemu kitai laban irau kitai deka diganti enggau orang ke dilatih nya. Kitai mega enggai ngembuan runding: ‘Suba, nadai meh orang ngelatih aku. Awakka iya belajar kediri empu!’ Runding ke baka nya enda patut bisi ba nembiak Jehovah. Kitai gaga ati bekunsika utai ti ditemu kitai, indah “keran deka nyerahka nyawa diri” ke sida ti dilatih kitai. (1 Tes. 2:8) Kitai mega ngarapka “sida layak ngajar orang bukai” dudi hari. (2 Tim. 2:​1, 2) Enti kitai enggau gerah jari bekunsika penemu kitai, semua kitai deka nyadi bepenemu-dalam sereta gaga agi ati.

LEBUH ORANG ENDA MENGHARGAI PENGAWA KITAI

14. Nama utai ke suah digaga orang bukai lebuh kitai ngereja utai ti manah ke sida?

¹⁴ Lebuh kitai meri tauka ngereja utai ke orang bukai, kelebih agi ke bala menyadi Kristian kitai, sida kesuah iya ngayanka diri beterima kasih. Sida engka nulis kad tauka meri terima kasih nengah chara bukai. (Kol. 3:15) Lebuh sida menghargai utai ke digaga kitai, kitai berasai gaga agi ati laban udah ngereja utai ke sida.

15. Nama patut dikingatka kitai enti sema orang enda menghargai utai ti digaga kitai?

¹⁵ Kekadang, sekeda orang enda menghargai utai ti digaga kitai. Kitai engka udah ngena awak, pengering, tauka utai ke dikemisi kitai nulung orang bukai. Tang sida baka ke enda beterima kasih. Enti utai tu nyadi, baka ni kitai ulih terus gaga ati sereta enda asa ati? Kingatka ayat tema kitai, Surat Kereja Rasul 20:35. Pengaga ati kitai enda bepanggai ba reaksi sida, sekalika sida beterima kasih tauka enda. Nyadi, baka ni kitai ulih terus gaga ati taja pan orang bukai baka ke enda menghargai pengawa kitai? Aram beratika sekeda chara.

16. Nama deka nulung kitai terus ngayanka pengerah jari enggau ati ti gaga?

¹⁶ Kingatka, lebuh nuan benung ngayanka pengerah jari, nuan benung neladan Jehovah. Iya meri utai ti manah ngagai semua orang, enda ngira sekalika sida beterima kasih tauka enda. (Mat. 5:​43-48) Jehovah besemaya, enti kitai meri lalu enda ‘ngarapka orang malas kitai ngena nama-nama utai,’ kitai “deka bulih upah ti besai.” (Luk. 6:35) Nyadi, anang asa ati enti orang enda seruran ngayanka diri beterima kasih. Kingatka, Jehovah deka seruran merekatka nuan ketegal utai ti manah ke digaga nuan ke orang bukai sereta ketegal nuan “meri enggau ati ti gaga.”—J-lam. 19:17; 2 Kor. 9:7.

17. Nama ulih nulung kitai ngembuan runding ti betul lebuh ngayanka pengerah jari? (Luke 14:​12-14)

 ¹⁷ Prinsip ba Luke 14:​12-14 ulih nulung kitai ngembuan runding ti betul lebuh ngayanka pengerah jari. (Bacha.) Endang amat, enda salah kitai mai orang makai begulai tauka ngayanka pengerah jari ngagai sida ke ulih malas pemanah kitai. Tang baka ni enti sema kitai sedar, kitai suah ngayanka pengerah jari ngagai orang bukai laban kitai ngarapka sida malas pemanah kitai? Enti pia, uji meh ngereja utai ke diasuh Jesus. Kati nuan nemu bala menyadi ke endang enda ulih malas pemanah nuan ketegal situasi ba pengidup sida? Ayanka meh pengerah jari ngagai sida. Runding ke baka tu deka nulung kitai mengkang gaga ati, taja pan orang baka ke enda menghargai utai ti digaga kitai. Lalu lebuh kitai ngereja tu, kitai deka gaga agi ati laban neladan Jehovah.

18. Nama patut diseliahka kitai, lalu nama kebuah?

¹⁸ Anang ngembuan runding ti enda manah pasal orang bukai. (1 Kor. 13:7) Enti orang enda ngayanka diri beterima kasih, kitai ulih nanya diri empu: ‘Kati sida amat enda beterima kasih, tauka kati sida semina enda ingat ngayanka diri beterima kasih?’ Engka bisi kebuah ke bukai sida enda ngayanka diri beterima kasih baka ke dikedekaka kitai. Sekeda orang engka amat menghargai utai ti digaga kitai, tang sida engka tusah deka ngayanka nya. Sekeda engka berasai malu lebuh nerima tulung. Suba, sida engka mayuh nulung orang bukai. Tang diatu, sida engka enda ulih ngereja nya agi, lalu indah patut nerima tulung ari orang bukai. Enda ngira nama situasi sida, enti kitai amat rinduka bala menyadi Kristian kitai, kitai enda ngembuan runding ti jai pasal sida. Tu deka nulung kitai terus ngayanka pengerah jari enggau ati ti gaga.—Eps. 4:2.

19-20. Nama kebuah sabar nya penting lebuh ngereja utai ti manah ke orang bukai? (Peda mega gambar.)

¹⁹ Sabar. Raja Solomon ti bepenemu-dalam nulis: “Tikauka roti nuan ngagai ai, lalu nuan deka tetemuka roti nya baru dudi hari.” (P-jar. 11:​1, NWT) Ayat tu ngajar kitai, kekadang orang semina deka ngayanka terima kasih pengudah  siti timpuh ti panjai, tauka “dudi hari.” Tu meh utai ke nyadi ngagai siku menyadi indu.

²⁰ Betaun-taun suba, bini siku tuai ti ngabas nulis siti surat kena meransang siku menyadi indu ke baru dibaptisa. Dalam surat nya, iya meransang Sandra mengkang tetap ati ngagai Jehovah. Kira-kira lapan taun udah nya, Sandra malas surat iya. Ku Sandra: “Nuan engka enda sedar, tang aku deka nuan nemu, nuan udah mayuh nulung aku sekumbang beberapa taun ti udah. Surat ke ditulis nuan amat meransang. Tang utai ke amat negu ati aku, iya nya ayat Bup Kudus ke dikunsi nuan. Aku seruran ingatka ayat nya.” a Pengudah nyebut sekeda penanggul ke ditapi iya, Sandra nampung baru: “Kekadang aku ngasaika diri deka putus asa, lalu ninggalka semua utai, indah badu agi nyadi Saksi. Tang udah nya, aku ingatka ayat Bup Kudus ke dikunsi nuan. Lalu nya meri aku pengering ngambika mengkang tetap ati.” Ku iya agi: “Dalam timpuh lapan taun nya, surat ke ditulis nuan enggau ayat Bup Kudus ke dikunsi nuan nya meh ke mayuh meransang aku.” Gambarka pengaga ati bini tuai ti ngabas nya lebuh nerima surat nya! Baka nya mega, orang engka madah terima kasih ngagai kitai “dudi hari,” iya nya lama pengudah kitai ngereja utai ti manah ke sida.

21. Nama kebuah nuan keran deka neladan pengerah jari Jehovah?

²¹ Baka ke dipadah ba pun artikel tu, Jehovah ngaga kitai ngambika gaga agi ati lebuh meri ari ke nerima. Kitai berasai gaga ati lebuh ulih nulung bala menyadi Kristian kitai sereta lebuh sida ngayanka diri beterima kasih. Taja pia, enda ngira orang ke nerima nya ngayanka diri beterima kasih tauka enda, kitai agi ulih gaga ati laban udah ngereja utai ti betul. Enda ngira nama utai ke dikereja nuan, ingat meh, Jehovah “ulih meri nuan mayuh agi.” (2 Ban. 25:9) Au, Jehovah jauh gerah jari agi ari kitai. Lalu pengaga ati ti pemadu besai, iya nya lebuh Jehovah merekatka kitai. Nyadi, aram meh kitai neladan pengerah jari Apai kitai ti ba serega.