1-2. Nama kebuah bala nembiak Petara gaga ati? (James 1:​22-25)

 JEHOVAH enggau Anak Iya dekaka kitai gaga ati. Penulis Masmur 119:2 madahka: ‘Beberekat meh orang ke nitihka adat Jehovah, ke ngiga Iya enggau pengabis ati sida.’ Jesus mega besemaya: “Iya ke gaga ati nya orang ke ninga sereta ngasika jaku Petara!”—Luk. 11:28.

² Bala nembiak Jehovah orang ti gaga ati. Nama kebuah? Kitai bisi mayuh kebuah gaga ati. Tang siti kebuah ti penting, iya nya kitai seruran macha Jaku Petara sereta bebendar ngena utai ti dipelajar ba pengidup.—Bacha James 1:​22-25.

3. Nama penguntung iya lebuh kitai nitihka utai ti dibacha dalam Bup Kudus?

³ Bisi sekeda penguntung ke diulih kitai lebuh kitai ngereja utai nitihka Jaku Petara. Ambika chunto, lebuh kitai nitihka utai ti dipelajar ari Jaku Petara, kitai ngagaka ati Jehovah. Lalu nya mega deka ngasuh kitai gaga ati. (P-jar. 12:13) Pia mega, lebuh kitai nitihka jaku lalau dalam Bup Kudus, kitai ulih ngemanahka agi kaul kitai enggau diri sebilik sereta bala menyadi ba raban gempuru. Engka nuan empu udah ngasaika penguntung tu. Kelimpah ari nya, kitai mega ulih nyeliah ari penanggul ke ditapi orang ke enda ngasika pesan Jehovah. Nya meh utai ke dipadah Raja David. Pengudah nyebut pasal adat enggau atur Jehovah, David madahka: “Aku diupah ketegal ngasika utai nya.”—Mas. 19:​7-11.

4. Nama kebuah enda seruran senang ngereja utai ti dibacha ari Jaku Petara?

 ⁴ Endang amat, enda seruran senang ngereja utai ti dibacha ari Jaku Petara. Taja pan kitai kisuk, tang kitai mesti meri awak macha sereta belajarka Bup Kudus. Enggau nya, kitai ulih nemu utai ti dikedekaka Jehovah ari kitai. Nyadi, aram kitai beratika sekeda cadangan ke ulih nulung kitai macha Bup Kudus enggau tetap. Kitai mega deka beratika utai ti ulih nulung kitai berundingka utai ti dibacha sereta baka ni kitai ulih ngena nya ba pengidup kitai.

TETAPKA AWAK MACHA BUP KUDUS

5. Nama sekeda utai ke ngasuh kitai kisuk?

⁵ Mayuh ari nembiak Jehovah amat kisuk. Kitai ngena mayuh awak ngereja utai ti dikumbai Bup Kudus penting. Ambika chunto, mayuh ari kitai gawa kena ngintu diri empu sereta diri sebilik. (1 Tim. 5:8) Mayuh bala menyadi Kristian patut nyaga kaban belayan ke sakit tauka ke udah tuai. Lalu semua kitai mega patut nyaga pengerai kitai. Tu pan begunaka awak. Kelimpah ari nya, kitai mega bisi tanggung pengawa ba raban gempuru. Siti ari tanggung pengawa ti penting nya nginjil. Ketegal pengidup nuan amat kisuk, nuan engka berunding: ‘Baka ni aku ulih macha Bup Kudus tiap hari, belematika utai ti dibacha, sereta ngena nya ba pengidup?’

6. Baka ni nuan ulih nentuka diri macha Bup Kudus enggau tetap? (Peda mega gambar.)

⁶ Macha Bup Kudus nya siti ari “utai ke beguna agi” ke orang Kristian. Nyadi, kitai mesti nentuka diri macha Bup Kudus enggau tetap. (Plp. 1:10) Masmur 1 madah pasal lelaki ke gaga ati: ‘[Iya] gaga ati ke Adat Jehovah, lalu belematika Adat nya siang malam.’ (Mas. 1:​1, 2) Terang amat, tu reti iya kitai patut netapka awak macha Bup Kudus. Tang, ni maya ti pemadu manah ke nuan? Tiap iku kitai ulih nentu ke diri empu. Tang utai ti penting nya, kitai milih maya ti ulih nulung kitai macha Bup Kudus enggau tetap. Siku menyadi lelaki ke benama Victor madahka: “Aku  rindu macha Bup Kudus maya pagi. Taja pan aku enda rindu dani tumu pagi, tang tu meh maya iya nadai mayuh utai ke ulih ngelimpangka aku. Nyadi, aku ulih berunding sereta fokus enggau manah agi.” Engka tu mega sama ba nuan. Nyadi, tanya diri empu: ‘Ni maya ti pemadu manah alai aku ulih macha Bup Kudus?’

PERUNDINGKA UTAI TI DIBACHA NUAN

7-8. Nama utai ti engka nagang kitai ari bulih penguntung ti mayuh lebuh macha? Beri siti sempama.

⁷ Taja pan nuan udah netapka awak macha Bup Kudus, tang bisi siti utai ke mesti diperatika nuan mega. Kati nuan kala macha sesiti utai lalu sepengudah nya, nuan enda ulih ingatka utai ke dibacha nuan? Tu tentu kala nyadi ngagai semua kitai. Tu mega ulih nyadi lebuh kitai macha Bup Kudus. Ambika chunto, kitai engka udah netapka penyampau bagi Bup Kudus ke deka dibacha kitai ninting hari. Nya amat manah. Kitai patut netapka juluk ati lalu bebendar nyapai juluk ati nya. (1 Kor. 9:26) Taja pia, enti kitai deka bulih mayuh agi penguntung ari macha Bup Kudus, kitai ukai semina deka macha aja.

⁸ Perundingka sempama tu: Utai tumbuh begunaka ai tauka ujan ngambika idup. Tang enti balat ujan ba timpuh ti pandak, tanah deka nyadi kelalu basah. Enti ujan enda ngetu, tanah enda ulih nyerap ai nya. Tu nadai mai penguntung ke utai tumbuh nya. Tanah begunaka awak nyerap ai ujan ngambika utai tumbuh ulih idup. Baka nya mega, kitai patut nyeliah ari beguai-guai lebuh macha Bup Kudus. Kitai enggai kelalu jampat macha Bup Kudus nyentukka kitai nadai awak belemati, ingat, sereta ngena utai ti dibacha nya.—Jas. 1:24.

9. Nama patut digaga kitai enti kitai sedar kitai benung macha Bup Kudus enggau kelalu beguai-guai?

⁹ Kati nuan kekadang kelalu beguai-guai lebuh macha Bup Kudus? Nama patut digaga nuan? Bacha meh enggau lubah agi ngambika nuan ulih berundingka utai ti dibacha nuan  tauka utai ti udah dibacha nuan. Nuan engka ulih ngena mayuh agi awak lebuh belajar ngambika nuan ulih berunding enggau dalam agi pasal utai ti dibacha nya. Tauka nuan ulih macha mimit agi ayat Bup Kudus lalu ngena awak ti lebih nya berundingka utai ti udah dibacha nuan. Victor, ke disebut tadi madahka: “Timpuh aku macha Bup Kudus enda panjai. Aku engka semina macha satu bagi aja. Ketegal aku macha maya tumu pagi, aku ulih berundingka utai ti dibacha aku sepemanjai hari.” Enda ngira nama chara ke dikena nuan, utai ti penting nya, nuan macha enggau pengelaju ti ulih nulung nuan berundingka utai ti dibacha nuan.—Mas. 119:97; peda kutak “ Tanya ke Ulih Diperundingka.”

10. Baka ni nuan ulih ngena utai ke dipelajarka nuan ba pengidup? Beri siti chunto. (1 Tesalonika 5:​17, 18)

¹⁰ Lebuh nuan macha Bup Kudus, perundingka chara nuan ulih ngena utai ti dibacha nuan. Maya nuan macha sekeda ayat Bup Kudus, tanya diri empu: ‘Baka ni aku ulih ngena penerang tu diatu tauka dudi hari?’ Ambika chunto, gambarka nuan udah macha 1 Tesalonika 5:​17, 18. (Bacha.) Pengudah macha dua iti ayat tu, nuan ulih ngetu lalu berunding ni penyuah sereta ni penalam sampi nuan. Pia mega, nuan ulih belematika utai ti ngasuh nuan berasai besyukur. Engka nuan milih tiga iti utai alai nuan ulih meri terima kasih ngagai Jehovah. Taja pan nuan semina ngena beberapa minit berundingka utai ti ulih dipelajarka nuan ari Bup Kudus, tang tu deka nulung nuan meretika Jaku Petara sereta ngereja utai ti dibacha nya. Lalu, enti nuan ngena utai ti dibacha nuan ari Bup Kudus ninting hari, nyau kelama, nuan deka nyadi nembiak Jehovah ti manah agi. Tang, baka ni enti bisi mayuh utai ke patut dikemansangka nuan?

TETAPKA JULUK ATI TI ULIH DIJAPAI

11. Nama kebuah kekadang nuan engka berasai asa ati? Beri siti chunto.

¹¹ Lebuh nuan macha Bup Kudus, kekadang nuan engka berasai asa ati, laban nuan sedar bisi mayuh utai ke patut dikemansangka nuan. Perundingka chunto tu: Saritu, nuan macha ayat Bup Kudus ke nangkan pasal ulah ke bepilih mata. (Jas. 2:​1-8) Nuan sedar, nuan ulih ngemanahka agi chara nuan ngintu orang bukai. Nyadi, nuan pan ngaga pemutus deka berubah. Nya amat manah! Pagila, nuan macha ayat Bup Kudus ke madahka kebuah nya penting bejimat enggau utai ti disebut nuan. (Jas. 3:​1-12) Nuan sedar, kekadang jaku nuan engka negatif. Nyadi, nuan ngaga pemutus deka bejaku enggau positif agi sereta meransang orang bukai. Ba hari siti, lebuh nuan macha Bup Kudus, bisi jaku tangkan pasal bekaban enggau dunya. (Jas. 4:​4-12) Tu  ngasuh nuan sedar, nuan patut bejimat enggau pemerindang ke dipilih nuan. Ba hari keempat, nuan engka berasai kelalu stres laban bisi mayuh utai ke patut dikemansangka nuan.

12. Lebuh nuan macha Bup Kudus, nama kebuah nuan enda patut asa ati enti nuan sedar, nuan patut ngaga ubah? (Peda mega nota kaki.)

¹² Enti nuan patut ngaga sekeda ubah, anang meh asa ati. Enti nuan sedar nuan patut ngaga ubah, tu nunjukka nuan orang ti baruh ati sereta bisi tuju ati ti betul. Orang ke baruh ati sereta jujur enggau diri empu deka macha Bup Kudus, lalu ngiga chara kena ngaga pemansang. a Kingatka meh, kitai patut terus ngerasukka “pendiau ti baru.” Pengawa tu enda nemu abis. (Kol. 3:10) Nama ulih nulung nuan terus ngereja utai nitihka Jaku Petara?

13. Nama chara ti manah nuan ulih ngena utai ti dipelajarka nuan? (Peda mega gambar.)

¹³ Nuan engka deka nitihka semua utai ke udah dipelajarka nuan tekala nya. Tang ari ke ngereja nya, nuan engka ulih ngemansangka siti tauka dua iti utai dulu. (J-lam. 11:2) Nuan engka ulih nguji chara tu: Tuliska semua utai ke patut dikemansangka nuan ba siti lis. Udah nya, pilih siti tauka dua iti utai ke deka dikemansangka nuan dulu. Lalu ba maya bukai, nuan ulih ngemansangka utai bukai ke bisi dalam lis nya. Tang, ni bagi utai ke patut dikemansangka nuan dulu?

14. Ni bagi utai ke patut dikemansangka nuan dulu?

¹⁴ Nuan engka bisi juluk ati deka ngemansangka utai ke senang dijapai nuan. Tauka, nuan engka milih deka ngemansangka utai ke amat diguna nuan maya nya. Pengudah mutuska utai ke deka dikemansangka nuan, nama patut digaga nuan? Gaga meh pansik ngena litaricha kitai. Nuan engka ulih  ngena Bup Dikena Saksi-Saksi Jehovah Ngiga Pansik tauka Watchtower Librari Online. Besampi meh ngagai Jehovah pasal juluk ati nuan, lalu minta Iya meri nuan “pengingin enggau pengering kena ngereja nya.” (Plp. 2:13) Udah nya, kena meh utai ke udah dipelajarka nuan ba pengidup. Lebuh nuan meda asil ari ubah ke digaga nuan, nuan tentu berasai diperansang deka ngaga ubah ke bukai. Enti nuan sedar, nuan ulih ngaga ubah tauka ngemansangka sifat orang Kristian, nuan deka diperansang terus ngaga pemansang. Lalu, nya deka nulung nuan senang agi ngaga pemansang ke bukai.

AWAKKA JAKU PETARA “NULUNG KITA”

15. Nama bida entara nembiak Jehovah enggau orang mayuh ke macha Bup Kudus? (1 Tesalonika 2:13)

¹⁵ Sekeda orang madah, sida udah macha Bup Kudus mayuh kali. Tang kati sida amat pechayaka ajar Bup Kudus? Kati sida bisi nguji nitihka utai ke diajar Bup Kudus, lalu ngaga ubah ba pengidup? Sayau amat, kesuah iya, sida enda ngereja nya. Tang nembiak Jehovah enda baka nya. Baka orang Kristian ba abad keterubah, kitai ngumbai Bup Kudus nya “amat ari Petara.” Kitai mega enggau bebendar nitihka ajar Bup Kudus ba pengidup kitai.—Bacha 1 Tesalonika 2:13.

16. Nama ulih nulung kitai ngena utai ke dipelajarka kitai ari Bup Kudus?

¹⁶ Endang amat, kitai engka ngasaika enda seruran senang deka macha sereta nitihka ajar Bup Kudus. Kitai engka tusah deka ngiga awak macha Bup Kudus. Tauka, kitai engka macha Bup Kudus enggau beguai-guai, lalu nadai awak berundingka utai ke dibacha kitai. Tauka, kitai engka berasai balat stres laban patut ngemansangka mayuh utai. Enda ngira nama cabaran ke ditapi nuan, cabaran nya ulih diputarka. Jehovah deka nulung nuan mutarka cabaran nya. Nyadi, terima meh tulung ari Iya, lalu ngereja utai nitihka Jaku Iya, ukai semina ninga aja. Andal meh, suah agi kitai macha Bup Kudus, lalu ngena ajar nya ba pengidup kitai, gaga agi ati kitai.—Jas. 1:25.