Aku ada kena taun 1934. Apai indai aku datai ari Switzerland lalu pindah ngagai Timmins, siti bandar ba Ontario, Kanada. Kira-kira ba taun 1939, indai aku berengkah macha majalah Menara Jaga, lalu datai ngagai gempuru Saksi-Saksi Jehovah. Iya mai aku enggau bala menyadi aku ke bukai. Enda lama pengudah nya, iya nyadi siku ari Saksi-Saksi Jehovah.

Apai enda gaga ati enggau pemutus indai, tang indai rinduka pemendar lalu keran deka setia ngagai Jehovah. Iya mengkang tetap ati taja pan pengawa Saksi-Saksi Jehovah ditagang ba Kanada ba pun 1940-an. Indai seruran ngintu apai enggau manah sereta bebasaka iya taja pan apai jai jaku enggau indai. Ketegal teladan manah indai, aku enggau enam iku menyadi aku milih deka nyembah Jehovah mega. Nyau kelama, ulah apai berubah lalu iya berengkah ngintu kami sebilik enggau manah agi. Tu ngagaka ati kami.

Ba Ogos 1950, aku enggau Gempuru Besai Theocracy’s Increase ba New York. Pengudah betemu enggau bala menyadi ari serata dunya, lalu ningaka interbiu ti ngagitka ati ari bala graduet Sekula Gilead, aku diperansang deka ngereja mayuh agi ke Jehovah. Aku keran agi deka gawa penuh jam ke Jehovah. Sepengudah aku pulai, aku minta nyadi pengerintis biasa. Tang pampang opis Kanada malas surat aku, lalu ngasuh aku dibaptisa dulu. Aku pan dibaptisa kena 1 Oktober 1950. Sebulan pengudah nya, aku nyadi pengerintis biasa, lalu nerima tugasan keterubah aku ba Kapuskasing. Endur nya amat jauh ari alai diri sebilik aku diau.

Kena taun 1951, pampang opis nanya enti bisi bala Saksi ke ulih bejaku Perancis, ke ulih pindah ngagai Quebec. Endur nya ngena jaku Perancis, lalu begunaka mayuh penginjil. Aku ulih bejaku  Perancis enggau English. Nyadi, aku madah ngagai pampang opis, aku ulih kin. Aku pan ditugaska ngagai Rouyn. Aku enda ngelala sapa-sapa ba dia. Aku semina diberi siti alamat, baka ke disebut aku ba pun tadi. Semua utai bejalai enggau lanchar. Aku enggau Marcel nyadi kaban rapat. Aku amat rindu nginjil ba Quebec, lalu aku diau ba dia pengelama empat taun. Ba pengujung empat taun nya, aku nyadi pengerintis spesial.

Ba Quebec, aku gaga ati laban nerima kangau ngagai Sekula Gilead ke-26 ba South Lansing, New York. Aku graduet kena 12 Februari 1956, lalu dianjung ngagai Ghana, b Afrika Barat. Tang sebedau aku ulih mupuk, aku patut pulai ngagai Kanada nyentukka aku bisi semua dokumen ke diguna aku kena pindah ngagai Ghana. Aku ngumbai aku semina ba Kanada pengelama dua tauka tiga minggu aja.

Tang, aku nganti ke dokumen nya pengelama tujuh bulan ba Toronto. Maya nya, aku diau enggau ruang bilik Cripps. Ba dia meh aku ngelala Sheila, anak indu seduai iya. Kami duai jatuh cinta. Lebuh aku baru ka nanya Sheila enti iya ka kawin enggau aku, visa aku pan datai. Aku enggau Sheila besampika pekara nya, lalu mutuska aku patut ngagai tugasan nya. Lalu kami mega mutuska kami deka terus nulis surat ngagai pangan diri, lalu meda enti sema kami ulih kawin dudi hari. Nya ukai pemutus ti senang, tang udah nya kami nemu, nya meh pemutus ti betul.

Pengudah sebulan ngena kerita api, kapal kargo, enggau bilun, aku pan datai ba Accra, Ghana. Lebuh aku datai ba dia, aku diberi pengawa nyadi tuai ti ngemataka pengawa ba pelilih. Nyadi, aku patut ngagai serata Ghana, Ivory Coast, (diatu dikumbai Côte d’Ivoire) enggau Togoland (diatu dikumbai Togo). Kesuah iya, aku kediri aja lalu ngena kerita ke disediaka pampang opis. Aku amat rinduka pengawa aku!

Kesuah iya maya ujung minggu, aku bisi pengawa ba gempuru besai. Kami nadai Palan  Gempuru Besai. Nyadi, bala menyadi ngena batang buluh kena ngaga atap sementara. Sida ngengkahka daun engkerema ba atap nya ngambika ulih ngelindung orang ke datai ari panchar mata panas. Ketegal nadai peti ais ba kafeteria, bala menyadi patut mai jelu ti idup. Sida munuh jelu nya ba dia kena nyadika pemakai ke bala menyadi ke datai ngagai gempuru besai nya.

Bisi sekali, bisi utai ti lucu nyadi ba gempuru besai nya. Maya nya, Menyadi Herb Jennings, c ke mega pengerintis ke dianjung ngagai menua nya, benung meri cheramah lebuh siku sapi telepas ari kafeteria. Sapi nya rari entara panggau enggau alai bala menyadi ke datai benung duduk. Lebuh Herb badu bejaku, sapi nya baka ke charut. Baik amat bisi empat iku menyadi lelaki ti kering, ke mujur nangkap sapi nya lalu mai iya pulai baru ngagai kafeteria. Lebuh meda nya, bala menyadi betempik jari.

Maya tengan minggu, aku nunjukka cherita The New World Society in Action ngagai kampung-kampung. Kena nunjukka cherita nya, aku nanchang siti kain burak entara dua batang tiang tauka pun kayu. Bala orang ke diau ba kampung amat rindu meda cherita nya. Mayuh ari sida nadai kala meda cherita wayang. Sida nempik jari lebuh meda begian ke nunjukka orang dibaptisa. Cherita nya nulung orang ke meda sedar, Saksi-Saksi Jehovah nya siti gerempung ti beserakup ba serata dunya.

Pengudah kira-kira dua taun ba Afrika, aku amat gagit ati laban ulih enggau konvensyen entarabansa ba New York kena taun 1958. Aku amat gaga ati laban ulih betemu baru enggau Sheila, ke datai ari Quebec, alai iya nyadi pengerintis spesial. Kami suah nulis surat ngagai pangan diri. Lebuh kami betemu baru, aku nanya iya enti iya ka kawin enggau aku, lalu iya pan setuju. Aku nulis ngagai Menyadi Knorr d lalu nanya enti Sheila ulih enggau Sekula Gilead lalu enggau aku ba Afrika. Menyadi Knorr setuju enggau peminta aku. Udah nya, Sheila pan datai ba Ghana. Kami duai jadi ba Accra kena 3 Oktober 1959. Kami ulih ngasaika Jehovah merekatka kami laban udah ngenuluka Iya ba pengidup kami.

Kena taun 1961, kami dianjung ngagai Cameroon. Bala menyadi minta aku numbuhka siti  pampang opis ti baru ba dia, nyadi aku amat kisuk. Ketegal aku diasuh ngemataka pengawa ba Cameroon, aku bisi mayuh utai ke patut dipelajar. Udah nya, kena taun 1965, kami nyau nemu, Sheila betubuh-bisi. Aku ngaku, kami duai tusah deka ngambarka diri nyadi apai indai. Tang, lebuh kami baru belabuh gagit ati enggau tanggung pengawa ti baru tu sereta ngaga pelan deka pulai ngagai Kanada, bisi utai ti ngenusahka ati nyadi.

Sheila lenyau anak dalam kandung iya. Lutur madah, anak kami ke nadai nya anak lelaki. Taja pan utai nya nyadi lebih ari 50 taun suba, tang kami seruran ngenang nya. Endang amat, utai ke nyadi nya balat ngenusahka ati kami. Taja pia, kami terus ngereja pengawa ti dikerinduka kami ba ditu.

Ba Cameroon, bala menyadi suah diperinsa laban sida enda masuk champur enggau pengawa politik. Situasi tu majak balat, kelebih agi maya musin ngundi. Kena 13 Mei 1970, utai ti dikenangika kami nyadi. Pengawa Saksi-Saksi Jehovah ditagang. Piak perintah ngerampas pampang opis kami ti baru. Kami baru tama kia lima bulan aja. Kurang ari seminggu, semua pengerintis ke dianjung ngagai menua nya diburu ari menua nya. Aku enggau Sheila mega diburu. Enda senang ke kami ninggalka bala menyadi, laban kami amat sayauka sida. Kami irau pasal utai ke deka nyadi ngagai sida.

Pengelama enam bulan, kami gawa ba pampang opis Perancis. Ba dia, aku enggau naka ulih nyaga utai ke diguna bala menyadi ba Cameroon. Kena bulan Disember taun nya, kami dianjung ngagai pampang opis Nigeria. Pampang opis nya berengkah ngemataka pengawa ba Cameroon. Bala menyadi ba Nigeria nyambut penatai kami enggau manah, lalu kami gaga ati gawa ba dia pengelama beberapa taun.

Ba taun 1973, kami patut ngaga siti pemutus ti tusah. Maya nya, Sheila benung napi penanggul ba pengerai ti serius. Lebuh kami ba konvensyen di New York, iya nyabak lalu madah ngagai aku: “Aku enda ulih agi ngereja pengawa tu. Aku amat lelak sereta seruran sakit!” Sheila udah enggau aku ba Afrika Barat lebih ari 14 taun. Aku amat temegah ati enggau iya. Tang kami nemu, kami patut ngaga sekeda ubah. Pengudah berandauka situasi kami sereta bebendar besampi, kami mutuska deka pulai ngagai Kanada, alai kami ulih nyaga pengerai iya. Kami amat rinduka pengawa kami sereta gawa penuh jam ke Jehovah. Nyadi, pemutus tu amat tusah sereta berat ba kami.

Pengudah pulai ngagai Kanada, aku kereja enggau siku kaban ti lama. Iya bisi bisnis nyual kerita ba utara Toronto. Kami nyewa siti apartment, meli perabot secondhand, lalu ulih ngepunka pengidup kami ti baru enda berutang. Kami keran deka idup enggau pengumbas iya laban kami ngarapka ulih gawa penuh jam baru ke Jehovah dudi hari. Enda memukai, utai ti dikearapka kami nyadi tumu agi ari ke disadang.

Aku nyadi sukarela ba endur nirika Palan Gempuru Besai ti baru ba Norval, Ontario. Aku ngereja nya tiap Hari Enam. Nyau kelama, aku diasuh  nyadi tuai ngemataka Palan Gempuru Besai. Pengerai Sheila berinsur manah, lalu kami ngasaika iya ulih ngereja tanggung pengawa ti baru tu. Nyadi, kami pindah ngagai apartment ba Palan Gempuru Besai nya kena Jun 1974. Kami amat gaga ati laban ulih gawa penuh jam ke Jehovah baru!

Kami amat gaga ati laban pengerai Sheila majak manah. Dua taun udah nya, kami ulih nerima pengawa ngabas raban gempuru. Pelilih kami ba Manitoba, siti endur ti amat chelap ba Kanada. Bala menyadi ba dia amat bepengerindu, lalu kami rindu begulai enggau sida. Kami belajar, endur gawa ke Jehovah nya enda kelalu penting. Utai ti penting agi iya nya terus gawa ke Jehovah enda ngira dini alai kitai.

Pengudah beberapa taun nyadi tuai ti ngabas, kami dibai gawa ba Bethel Kanada kena taun 1978. Enda lama udah nya, aku napi siti utai ti amat pedis, tang pengalaman nya ngajar aku siti utai ti penting. Ba siti gempuru spesial di Montreal, aku diberi pengawa meri cheramah pengelama satu jam setengah dalam jaku Perancis. Tang bala menyadi tusah deka meri perhatian ngagai cheramah aku. Ketegal nya, siku menyadi ari Opis Penginjil meri aku jaku lalau. Kebendar iya, aku enda landik meri cheramah. Tang maya nya, aku enda sedarka utai nya. Nyadi aku tusah deka nerima jaku lalau nya enggau manah. Kami duai enda sepenemu. Aku nyadi ringat laban aku ngumbai iya kelalu ka ngutuk aku lalu enda meri aku jaku puji. Aku tusah deka nerima jaku lalau nya laban chara lalau nya diberi sereta runding aku ti enda manah pasal menyadi ke meri nya.

Beberapa hari pengudah nya, siku menyadi ari Komiti Pampang Opis bejaku enggau aku pasal pekara nya. Aku ngaku penyalah aku lalu minta ampun. Udah nya, aku mega minta ampun ari menyadi ke meri jaku lalau nya. Iya amat manah lalu ngampunka aku. Ari pengalaman tu, aku belajar kebuah nya penting baruh ati. Aku deka seruran ingatka pekara tu! (J-lam. 16:18) Aku suah besampi ngagai Jehovah pasal pekara tu, lalu aku udah mutuska, enda agi ngembuan runding ti enda manah lebuh diberi jaku lalau.

Diatu, aku udah ba Bethel Kanada lebih ari 40 taun. Lalu kenyau ari taun 1985, aku bisi peluang nyadi siku ari Komiti Pampang Opis. Ba Februari 2021, bini ti dikesayauka aku, Sheila, udah nadai. Aku amat lelengauka iya. Kelimpah ari nya, aku pan bisi penanggul ba pengerai. Tang gawa ke Jehovah ngasuh aku mengkang kisuk sereta gaga ati, lalu aku enda sedar jam amat jampat belalu. (P-jar. 5:20) Taja pan aku bisi mayuh cabaran ba pengidup, tang pengaga ati ke diasaika aku jauh besai agi ari cabaran nya. Aku berasai amat puas ati laban ulih ngenuluka Jehovah ba pengidup aku lalu gawa penuh ke Iya pengelama 70 taun. Aku besampi ngambika bala menyadi ke biak ulih terus ngenuluka Jehovah ba pengidup sida. Aku yakin, sida deka ngembuan pengidup ti ngemuaska ati sereta ngagaka ati, ke semina ulih nyadi enti sida gawa ke Jehovah.