1-2. (a) Nama situasi pengidup orang Kristian ba Judea lebuh Rasul Paul nulis surat ngagai sida? (b) Nama kebuah kitai ulih ngumbai sida nerima surat nya ba maya ti chun?

 PENGUDAH Jesus mati ba taun 33 M., orang Kristian bansa Hebrew ba Jerusalem enggau Judea napi mayuh penanggul. Enda lama pengudah raban gempuru Kristian ditumbuhka, orang Kristian balat diperinsa. (SKR. 8:1) Kira-kira 20 taun pengudah nya, sida napi lapar pungkang ti balat, lalu tu engka siti ari kebuah sida nyadi miskin. (SKR. 11:​27-30) Tang kira-kira ba taun 61 M., perinsa ke ditapi orang Kristian nyau majak kurang. Maya nya, Jehovah ngena kuasa kudus Iya ngasuh Rasul Paul nulis surat ngagai sida. Surat nya datai ba maya ti chun. Nengah surat nya, sida ulih nyediaka diri ke utai ti deka nyadi enda lama da agi. Au, situasi sida deka berubah lalu nyadi tusah agi.

² Dalam surat nya, Paul meri jaku lalau ke ulih nulung orang Kristian maya nya tan napi penusah ke deka datai. Jesus kala madahka, Jerusalem deka dirusak, lalu timpuh nya majak semak. (Luk. 21:20) Paul tauka orang Kristian ba Judea enda nemu ni maya pengerusak nya deka nyadi. Tang sebedau utai nya nyadi, sida agi bisi awak kena nyediaka diri. Sida ulih ngemansangka sekeda sifat, baka ati ti tan sereta arap agi ngagai Jehovah.—Heb. 10:25; 12:​1, 2.

3. Nama kebuah kitai deka belajarka bup Hebrew?

³ Enda lama da agi, kitai deka napi penusah ti balat agi ari  penusah ke ditapi orang Kristian bansa Hebrew kelia menya. (Mat. 24:21; Pem. 16:​14, 16) Kitai deka berandauka sekeda ari jaku lalau ke diberi Jehovah ngagai orang Kristian maya nya ngambika sida ulih tan napi penusah nya. Jaku lalau nya tentu ulih nulung kitai mega.

“BEBENDAR NYADI ORANG KE BESAI TUAI”

4. Nama cabaran ke ditapi orang Judah ke nyadi orang Kristian? (Peda mega gambar.)

⁴ Orang Judah ke nyadi orang Kristian patut ngaga mayuh ubah ti besai, lalu tu ukai pekara ti senang. Orang Judah kala nyadi nembiak ke dipilih Jehovah. Pengelama betaun-taun, Jerusalem nya siti endur ti amat penting. Raja ke dipilih Jehovah merintah ari Jerusalem, lalu orang ke deka nyembah Jehovah deka nyembah Iya ba Rumah Sembiang di Jerusalem. Semua orang Judah ke tetap ati ngasika Adat Moses sereta atur ke ditetapka bala tuai pengarap. Atur nya nyengkaum pemakai, pengawa besunat, sereta chara sida begulai enggau orang ke ukai bansa Judah. Tang pengudah pemati Jesus, Adat Moses nadai agi dikena. Nya alai, orang Judah enda ibuh agi nyerahka korban ba Rumah Sembiang. Tu nyadi siti cabaran ke orang Kristian bansa Judah laban sida udah teleba nitihka Adat Moses. (Heb. 10:​1, 4, 10) Indah orang Kristian baka Rasul Peter, ke bisi pengarap ti tegap, tusah deka ngaga sekeda ari ubah tu. (SKR. 10:​9-14; Gal. 2:​11-14) Ketegal orang Judah tu nyadi orang Kristian, sida diperinsa tuai pengarap orang Judah.

5. Nama utai ke ulih nguji penetap ati orang Kristian maya nya?

⁵ Orang Kristian ba Judea disakal dua raban orang. Raban kesatu iya nya raban tuai pengarap orang Judah. Sida ngumbai orang Judah ke nyadi orang Kristian udah limpang sereta ngelaban pengarap Judah. Raban kedua iya nya sekeda orang Kristian. Sida madahka, orang Kristian agi patut terus nitihka Adat Moses. Tang, tu engka ketegal sida deka nyeliahka diri ari diperinsa. (Gal. 6:12) Nama deka nulung orang Kristian mengkang tetap ati ngagai Jehovah?

6. Paul meransang bala menyadi Kristian ngereja nama? (Hebrew 5:14–6:1)

 ⁶ Dalam surat Paul ngagai orang Kristian bansa Hebrew, iya meransang sida belajar sereta belematika Jaku Petara. (Bacha Hebrew 5:14–6:1.) Paul ngena ayat ari Bup Kudus Begian Jaku Hebrew kena nerangka kebuah chara orang Kristian nyembah Jehovah jauh manah agi ari chara orang Judah nyembah Jehovah. a Paul meransang bala menyadi Kristian ngenalamka agi penemu sida ngambika sida ulih faham agi pemendar Bup Kudus. Enti sida ngereja nya, sida ulih ngelala ajar ti salah, lalu nulak ajar nya.

7. Nama cabaran ke ditapi kitai kemayaharitu?

⁷ Kemayaharitu, kitai nerima sakal ari orang ke ngerembaika penerang tauka runding ti ngelaban standard Jehovah. Kitai nemu, semina Jehovah aja ke ulih nentuka nama utai ti salah enggau nama utai ti betul. Sekeda orang madah Saksi-Saksi Jehovah nya salah laban sida ngasika standard Bup Kudus pasal seks. Chara orang berunding majak limpang ari chara Jehovah berunding. (J-lam. 17:15) Nya alai, kitai patut belajar ngelala runding ti salah, lalu nulak runding nya. Kitai enggai nejuka bala penyakal ngasuh kitai berasai takut, lalu badu agi nyembah Jehovah.—Heb. 13:9.

8. Nama deka nulung kitai nyadi orang Kristian ke besai tuai ba pengarap?

⁸ Kitai deka nitihka jaku lalau ke diberi Rasul Paul ngagai orang Kristian bansa Hebrew. Iya meransang sida bebendar nyadi orang ke besai tuai tauka matang dalam pengarap. Kitai pan deka ngereja utai ti sama. Reti iya, kitai patut belajarka Bup Kudus enggau dalam agi ngambika kitai ulih ngelala Jehovah sereta nemu chara Iya berunding enggau manah agi. Pengawa tu patut terus dikereja indah pengudah kitai dibaptisa. Enda ngira berapa lama kitai udah dalam pemendar, semua kitai mesti macha sereta belajarka Bup Kudus enggau tetap. (Mas. 1:2) Enti kitai belajarka Bup Kudus enggau tetap, pengarap kitai deka ditegapka. Tu meh sifat ke dipadah Paul patut dikembuan orang Kristian bansa Hebrew.—Heb. 11:​1, 6.

“ARAP, LALU KITAI DEKA MENGKANG IDUP”

9. Nama kebuah orang Kristian bansa Hebrew begunaka pengarap ti tegap?

⁹ Orang Kristian bansa Hebrew begunaka pengarap ti tegap ngambika ulih selamat lebuh napi penusah ti balat ke deka ninggang Judea enda lama da agi. (Heb. 10:​37-39) Jesus kala madah ngagai bala murid iya, enti sida meda Jerusalem dikelulung bala soldadu, bala murid iya patut ngerarika diri ngagai kawasan gunung. Jaku tangkan Jesus dituju ngagai semua orang Kristian, enda ngira sida diau ba kuta Jerusalem tauka ba kawasan kampung ke enda bedinding. (Luk. 21:​20-24) Ba jeman kelia, lebuh bala soldadu datai nyerang, orang ke diau ba kawasan kampung kesuah iya ngelindung diri ba kuta ke bedinding. Nyadi, lebuh Jesus ngasuh sida ngerarika diri ngagai kawasan gunung, iring tu engka enda masuk akal. Nya alai, sida begunaka pengarap ti tegap kena ngasika iring Jesus.

10. Enti orang Kristian ngembuan pengarap ti tegap, nya deka meransang sida ngereja nama? (Hebrew 13:17)

¹⁰ Orang Kristian bansa Hebrew mega patut pechayaka sida ke dipilih Jesus ngiring raban gempuru. Menyadi ke ngiring engka meri  iring ti nyemetak pasal ni maya sida patut ngerarika diri sereta sekeda utai ke patut digaga sida. (Bacha Hebrew 13:17.) Rasul Paul meransang bala menyadi ngasika sida ke ngiring. Tu ukai reti iya, sida ngereja nya ketegal dipejal, tang sida ngasi laban sida pechayaka bala tuai gempuru. Orang Kristian bansa Hebrew maya nya patut belajar pechayaka bala tuai gempuru sereta ngasika iring sida sebedau penusah ti balat nyadi. Enti sida ngasika bala tuai gempuru ba timpuh bisi pemaik, sida deka senang agi ngasika bala tuai gempuru ba maya ti tusah.

11. Nama kebuah kitai begunaka pengarap ti tegap kemayaharitu?

¹¹ Baka orang Kristian bansa Hebrew, kitai mega begunaka pengarap ti tegap. Kemayaharitu, mayuh orang enda pechaya pengujung dunya ti jai tu majak semak. Sida indah ngeleseka kitai laban kitai pechayaka utai tu. (2 Pet. 3:​3, 4) Taja pan Bup Kudus madahka sekeda penerang pasal utai ke deka nyadi maya Penusah ti Besai, tang agi bisi mayuh utai ke enda ditemu kitai. Nyadi, kitai begunaka pengarap ti tegap. Kitai andal, Jehovah udah netapka maya pengujung nya deka datai, lalu kitai mesti pechaya, Iya deka nyaga kitai maya utai nya nyadi.—Hab. 2:3.

12. Nama deka nulung kitai selamat ari Penusah ti Besai?

¹² Kemayaharitu, Jehovah ngena “ulun ke tetap ati sereta bepenemu-dalam” ngiring kitai. Kitai mesti majak pechaya Jehovah benung ngiring kitai nengah sida. (Mat. 24:45) Sama baka orang Kristian ke engka nerima iring lebuh bala soldadu Rome ngelulung Jerusalem, kitai mega engka deka nerima iring ti nyemetak maya Penusah ti Besai berengkah. Iring ti nyemetak nya ulih nyelamatka nyawa kitai. Nyadi, amat penting kitai pechayaka sida ke bisi pengawa ngiring ba gerempung Jehovah. Enti kitai tusah deka pechaya sereta ngasika iring sida diatu, kitai tentu deka tusah agi ngasika iring ke diterima maya Penusah ti Besai.

13. Nama kebuah jaku lalau ba Hebrew 13:5 beguna ke orang Kristian maya nya?

¹³ Nama patut digaga orang Kristian bansa Hebrew seraya sida nganti tanda ke nunjukka sida patut ngerarika diri? Sida ukai semina patut “bibas ari pengerindu ke duit,” tang sida mega patut idup enggau pengumbas iya ngambika ulih terus nyembah Jehovah. (Bacha Hebrew 13:5.) Sekeda ari sida kala idup miskin sereta napi lapar pungkang. (Heb. 10:​32-34) Taja pan suba sida sanggup merinsa ketegal Berita Manah, tang sekeda ari sida nguji ngulihka mayuh agi duit ngambika berasai selamat. Taja pia, enda ngira pemayuh duit ke dikembuan sida, nya enda ulih nyelamatka sida maya Jerusalem dirusakka. (Jas. 5:3) Sida ke rinduka duit engka ngasaika tusah deka ngerarika diri laban sida enda sanggup ninggalka rumah sereta reta tengkira sida.

14. Baka ni pengarap ti tegap nulung kitai ngaga pemutus bekaul enggau duit enggau utai ti dikembuan kitai?

¹⁴ Enti kitai amat pechaya Jehovah deka ngerusakka dunya ti jai tu enda lama da agi, kitai enda ngumbai ngembuan mayuh agi duit tauka reta tengkira utai ti pemadu penting. Maya Penusah ti Besai, duit deka lenyau rega. Bup Kudus madahka, orang deka “nikauka emas enggau pirak sida ngagai jalai raya.” Sida deka sedar, ‘pirak enggau emas sida enda ulih ngelepaska sida lebuh Jehovah mubuhka pengeringat Iya.’ (Esk. 7:19) Ari ke bebendar ngiga mayuh agi duit, kitai patut ngaga pemutus ke ulih nulung kitai idup enggau pengumbas iya. Kitai ukai aja ulih ngintu diri empu enggau diri sebilik, tang mega terus nyembah Jehovah. Siti ari pemutus nya  engka pasal chara kitai bebelanja. Kitai enggai bebelanja lebih ari penyampau gaji kitai, tauka ngena kelalu mayuh awak nyaga utai ti dikembuan kitai. Kitai patut nentuka utai ti dikembuan kitai ukai utai ti pemadu penting ba pengidup kitai. (Mat. 6:​19, 24) Seraya kitai majak semak enggau pengujung dunya ti jai tu, kitai patut milih sekalika kitai deka arapka Jehovah tauka reta tengkira kitai.

“KITA PATUT TAN”

15. Nama kebuah orang Kristian bansa Hebrew patut ngembuan ati ti tan?

¹⁵ Orang Kristian bansa Hebrew patut tan lebuh pengarap sida diuji laban sida deka napi penusah. (Heb. 10:36) Taja pan sekeda ari sida udah kala balat diperinsa, tang mayuh ari sida bedau kala napi perinsa. Nyadi, Paul ngingatka sida ngambika sedia deka diperinsa. Indah besedia tan enggau tetap ati nyentukka mati, baka Jesus. (Heb. 12:4) Ketegal majak mayuh orang Judah nyadi orang Kristian, orang Judah ke bukai amat ringat sereta kasar. Beberapa taun sebedau Paul nulis bup Hebrew, seraban orang ti amat ringat nyerang iya lebuh iya nginjil ba Jerusalem. Lebih ari 40 iku orang Judah “besumpah enda makai tauka ngirup nyentukka sida udah munuh [Paul].” (SKR. 22:22; 23:​12-14) Taja pan orang Kristian deka dipegedi sereta diperinsa, tang sida patut terus begempuru, nginjil, sereta nentuka pengarap sida mengkang tegap.

16. Baka ni surat Paul ngagai orang Kristian bansa Hebrew nulung kitai ngembuan runding ti betul pasal diperinsa? (Hebrew 12:7)

¹⁶ Nama deka nulung orang Kristian bansa Hebrew tan lebuh disakal? Paul deka nulung sida ngembuan runding ti betul pasal perinsa ke ditapi sida. Paul nerangka, lebuh pengarap orang Kristian diuji, Petara ulih ngena situasi nya ngelatih sida. (Bacha Hebrew 12:7.) Latih nya ulih nulung sida belajar tauka ngemanahka sifat ti ulih ngelantangka ati Jehovah. Lebuh sida berundingka asil ti manah ke diulih  ari penguji nya, tu deka nulung sida senang agi tan.—Heb. 12:11.

17. Nama utai ke ditemu Paul pasal tan napi perinsa?

¹⁷ Paul meransang orang Kristian bansa Hebrew ngambika berani sereta enda putus asa lebuh napi perinsa. Paul ulih meri jaku lalau ti manah pasal tan napi perinsa. Sebedau iya nyadi orang Kristian, iya balat merinsaka orang Kristian. Iya meda chara sida diperinsa. Lalu, pengudah Paul nyadi orang Kristian, iya mega napi mayuh macham perinsa. Nyadi, iya nemu chara tan lebuh diperinsa. (2 Kor. 11:​23-25) Ketegal Paul kala diperinsa, iya ulih meransang bala menyadi pasal utai ke patut digaga sida ngambika ulih tan. Iya ngingatka sida, lebuh sida napi perinsa, sida patut bepanggai ba Jehovah, ukai ba diri empu. Tu meh ke meri Paul pemerani nyentukka iya ulih nyebut: “Jehovah nya penulung aku. Aku enda takut.”—Heb. 13:6.

18. Nama deka nyadi ngagai kitai jemah ila, lalu nama patut digaga kitai diatu?

¹⁸ Sekeda ari bala menyadi kitai benung tan napi perinsa diatu. Siti ari chara kitai ulih ngayanka pengerindu ngagai sida, iya nya besampi ke sida. Kitai mega ulih nulung sida enggau meri utai ke diguna sida. (Heb. 10:33) Taja pia, Bup Kudus enggau terang madahka: “Semua murid Jesus Kristus ke ingin deka nyembah Petara enggau ati ti enda bebagi mega deka diperinsa.” (2 Tim. 3:12) Ketegal nya, semua kitai patut besedia ke penusah ti deka datai. Tu meh maya iya kitai patut belajar arapka Jehovah enggau pengabis ati. Kitai andal, Iya deka nulung kitai tan napi sebarang penusah ke deka datai. Lalu kitai mega yakin, enti kitai tetap ati, Jehovah deka nyelamatka kitai ba maya ti ditetapka Iya.—2 Tes. 1:​7, 8.

19. Nama ulih digaga kitai kena nyediaka diri ke Penusah ti Besai? (Peda mega gambar.)

¹⁹ Surat Paul ngagai orang Kristian bansa Hebrew tentu udah nulung sida nyediaka diri ke penusah ti deka datai. Paul meransang sida belajarka Bup Kudus enggau dalam agi sereta enggau bebendar faham utai ke dipelajar sida. Enti sida ngereja nya, sida ulih ngelala sereta nulak ajar ti ulih ngelemika pengarap sida. Iya mega meransang sida negapka pengarap sida. Enti sida bisi pengarap ti tegap, sida deka enggau lengkas nitihka iring ari Jesus sereta sida ke ngiring ba raban gempuru. Lalu Paul mega meransang orang Kristian ngambika terus tan. Iya nulung sida ngembuan runding ti betul lebuh napi perinsa. Lebuh sida diperinsa, nya baka ke Jehovah benung ngelatih sida. Aram meh kitai nitihka jaku lalau ke diberi Paul ngambika kitai ulih tan enggau tetap ati nyentuk ke ujung.—Heb. 3:14.