Maya Jesus ngepunka pengawa Makai Malam Tuan, iya semina mai 12 iku rasul iya enggau pengawa nya. Kati 70 iku murid ke bukai enda dibai ketegal Jesus enda gaga ati enggau sida, tauka ketegal sida udah ninggalka Jesus? Kitai nadai kebuah berunding baka nya.

Ba Jesus, 12 iku rasul enggau 70 iku murid ke bukai nya, sama bela murid iya. Ari bala murid iya, Jesus milih 12 iku lelaki, lalu ngumbai sida nya rasul. (Luk. 6:​12-16) Jesus benung ba Galili lebuh iya “ngangauka 12 iku rasul iya” lalu “ngasuh sida nusui Berita Manah pasal Perintah Petara sereta ngeraika orang.” (Luk. 9:​1-6) Udah nya, maya ba Judea, Jesus “milih 70 iku murid iya ke bukai, lalu ngasuh sida bejalai dua iku dua iku.” (Luk. 9:51; 10:1) Jesus mega bisi bala murid ke bukai, ke nginjil pasal iya ba endur bukai.

Orang Judah ke nyadi murid Jesus deka terus ngintu Pengerami Paska, engka enggau diri sebilik. (P-sut. 12:​6-11, 17-20) Enda lama sebedau pemati Jesus, Jesus enggau bala rasul iya mansang ngagai Jerusalem. Maya nya, Jesus semina deka ngintu Pengerami Paska enggau bala rasul iya aja. Iya madah ngagai sida: “Aku keran amat deka makai enggau kita maya Pengerami Paska tu sebedau aku merinsa.” (Luk. 22:15) Nya alai, iya enda ngatur pengawa ngintu Pengerami Paska ti besai enggau semua murid iya ke bukai ba Judea, Galili, enggau Perea.

Jesus bisi kebuah ti manah ngereja tu. Enda lama agi, iya deka mati nyadi “Anak Bedus Petara ke muai dosa dunya.” (Jhn. 1:29) Iya deka mati ba Jerusalem, endur alai korban jelu kesuah iya diserahka ngagai Petara. Lebuh orang Israel meda anak bedus Paska, sida deka dikingatka pasal Jehovah, ke udah ngelepaska sida ari Ejip. Tang lebuh Jesus nyerahka nyawa iya nyadika tebus, Jesus ulih ngereja mayuh agi, iya nya ngelepaska mensia ari dosa enggau pemati. (1 Kor. 5:​7, 8) Ketegal genselan tebus Jesus, 12 iku rasul nya deka nyadi pugu raban gempuru Kristian. (Eps. 2:​20-22) Bup Pemandang mega madahka, Jerusalem, nengeri ti kudus, “bisi 12 iti batu ke nyadi pugu, lalu ba batu nya bisi ditulis 12 iti nama, iya nya nama 12 iku rasul Anak Bedus.” (Pem. 21:​10-14) Nyadi, bala rasul ti tetap ati nya bisi ungkup ti penting kena ngamatka tuju Petara. Nya alai, kitai ulih faham kebuah Jesus deka ngintu Pengerami Paska ti penudi enggau sida, lalu ditangkan enggau pengawa Makai Malam Tuan.

Tujuh puluh iku murid enggau bala murid ke bukai nadai makai enggau Jesus malam nya. Taja pia, semua murid ti tetap ati deka bulih penguntung ari pengawa Makai Malam Tuan. Semua sida ke nyadi orang Kristian ke dipilih ke serega deka bisi ungkup ba sempekat Perintah, ke dipadah Jesus ngagai bala rasul iya malam nya.—Luk. 22:​29, 30.