BA URUNG taun 670 S.M., Asiria nyadi siti perintah dunya ti pemadu besai. Nitihka The British Museum Blog, perintah Asiria “nyengkaum Saiprus ba belah barat ngagai Iran ba belah timur. Lalu ba siti timpuh, menua Ejip mega di baruh kuasa Asiria.” Indu nengeri menua Asiria, iya nya Nineweh, nengeri ti pemadu besai ba dunya. Ba Nineweh, bisi mayuh taman ti manah, istana enggau librari ti besai. Ukir ba dinding ari jeman Nineweh kelia nunjukka baka raja Asiria ke bukai, Raja Ashurbanipal mega ngumbai diri “raja dunya.” Maya iya merintah, Asiria enggau Nineweh bakaka enda ulih dialahka.

Taja pia, lebuh Asiria nyadi perintah ti pemadu bekuasa, nabi Sepaniah madahka: ‘Jehovah deka ngerusak menua Asiria . . . Iya deka ngaga nengeri Nineweh nyadi tembawai ti nadai diuan mensia, nyadi menua puang ti nadai ai.’ Nambahka nya, nabi Nahum madahka: “Rampas perengka pirak! Rampas perengka emas! . . . Nineweh udah rusak, ditinggalka mensia, nadai orang nguan! . . . Semua orang ke meda nuan deka nyurutka diri. Sida deka bejaku munyi tu, ‘Nineweh udah nyadi tembawai!’” (Sep. 2:13; Nah. 2:9, 10; 3:7) Lebuh ninga jaku benabi tu, orang engka berunding: ‘Kati nya amat ulih nyadi? Kati perintah Asiria ti pemadu bekuasa ulih alah?’ Tu tentu tusah deka digambarka!

Taja pia, perintah Asiria dialahka! Enda lama sebedau taun 600 S.M., perintah Asiria dialahka perintah Babilon enggau Mede. Nyau kelama, orang enda agi diau di Nineweh lalu enda ingatka nengeri nya agi. Nitihka siti litaricha ke dikeluarka The Metropolitan Museum of Art, nyau kelama “nengeri Nineweh enda agi ditemu lalu orang semina nemu pasal nengeri Nineweh ari Bup Kudus.” The Biblical Archaeology Society madahka, ba urung taun 1800, “nadai orang nemu sekalika nengeri Asiria amat bisi tauka enda.” Tang udah nya ba taun 1845, seiku pakar arkeologi ke benama Austen Henry Layard berengkah numbak baru nengeri tu. Utai ke ditemu iya nunjukka Nineweh kala nyadi nengeri ti tebilang.

Utai ti nyadi ba Nineweh ulih ngeringka pengarap kitai. Kitai andal jaku benabi ba Bup Kudus pasal pengerusak kuasa dunya mega deka dikeamatka.—Dan. 2:44; Pem. 19:15, 19-21.