1-2. Nama berekat ke diulih kitai pengudah dibaptisa?

 KITAI gaga ati lebuh kitai dibaptisa, lalu nyadi sebagi ari ruang bilik Jehovah. Tu endang basa ti besai laban kitai tau bisi kaul ti rapat enggau Jehovah. Kitai setuju enggau Pemasmur David ke madahka: “Beberekat meh orang ke dipilih Nuan [Jehovah], orang ke dibai Nuan diau dalam Endur Nuan Ti kudus.”​—Mas. 65:4.

² Jehovah enda mai sebarang orang nyadi sebagi ari ruang bilik Iya. Baka ke udah dikerandauka kitai ba artikel sebedau tu, Iya milih deka datai semak ngagai sida ti keran deka ngembuan kaul ti rapat enggau Iya. (Jas. 4:8) Lebuh nuan nyerahka diri ngagai Jehovah sereta dibaptisa, kaul nuan enggau Jehovah deka majak semak. Nuan ulih andal, pengudah nuan dibaptisa, Iya deka ‘nuang mayuh macham utai ti manah, ti belimpah-limpah ngagai nuan.’​—Mal. 3:10; Jer. 17:​7, 8.

3. Nama tanggungjawap ti besai ke dikembuan orang Kristian ke udah nyerahka diri ngagai Jehovah sereta dibaptisa? (Pengajar 5:​4, 5)

³ Baptisa nya semina pun aja. Pengudah nuan dibaptisa, nuan deka bebendar ngamatka semaya ti digaga nuan lebuh nuan nyerahka diri ngagai Jehovah. Nuan keran deka mengkang tetap ati ngagai Jehovah taja pan napi penanggul tauka diuji ba pengarap. (Bacha Pengajar 5:​4, 5.) Ketegal nuan murid Jesus, nuan deka neladan Jesus sereta keran deka ngasika  pesan iya. (Mat. 28:​19, 20; 1 Pet. 2:21) Artikel tu deka nulung nuan ngereja nya.

“ENDA NGETU NITIHKA” JESUS TAJA PAN NAPI PENANGGUL ENGGAU PENGUJI

4. Nama reti iya lebuh Jesus madahka, bala murid iya deka “ngesan tiang perinsa”? (Luke 9:23)

⁴ Pengudah dibaptisa, anang ngumbai pengidup nuan deka senang aja. Kebendar iya, Jesus madahka, bala murid iya deka “ngesan tiang perinsa.” Sida deka ngereja nya “ninting hari.” (Bacha Luke 9:23.) Kati reti ku Jesus nya, bala murid iya deka seruran merinsa? Enda. Tang iya semina madahka, kelimpah ari berekat ke deka diulih sida, sida mega deka napi penanggul. Sekeda ari penanggul tu amat tusah.​—2 Tim. 3:12.

5. Nama berekat ke disemayaka Jesus ngagai sida ke ngaga pengorbanan?

⁵ Nuan engka bisi napi sakal ari diri sebilik. Tauka, nuan engka ngelengkaka sekeda utai ngambika ulih ngenuluka Perintah Petara. (Mat. 6:33) Enti pia, andal meh, Jehovah beratika semua pengorbanan nuan. (Heb. 6:10) Nuan engka udah ngasaika pengamat jaku Jesus: “Barang sapa ke udah ninggalka rumah, tauka menyadi lelaki, tauka menyadi indu, tauka indai, tauka apai, tauka anak, tauka tanah, ketegal nama aku enggau ketegal Berita Manah, deka nerima 100 kali lipat mayuh agi ba jeman tu, iya nya mayuh agi rumah, menyadi lelaki, menyadi indu, indai, anak, enggau tanah, taja pan kena perinsa. Lalu jemah ila, iya deka bulih pengidup ti meruan belama iya.” (Mrk. 10:​29, 30) Berekat ke diterima nuan deka jauh besai agi ari sebarang pengorbanan ke udah digaga nuan.​—Mas. 37:4.

6. Nama kebuah nuan patut terus belaban enggau “pengingin ti bedosa” taja pan udah dibaptisa?

⁶ Taja pan nuan udah dibaptisa, tang nuan agi patut belaban enggau “pengingin ti bedosa.” (1 Jhn. 2:16) Tu ketegal nuan peturun Adam ti bedosa. Kekadang, nuan engka ngasaika utai ti sama baka Rasul Paul. Iya madahka: “Dalam ati aku, aku amat rinduka adat Petara. Tang aku beratika dalam tubuh aku, bisi siti agi adat ke beperang ngelaban adat dalam runding aku, lalu adat nya dosa ke bekuasa dalam tubuh aku.” (Rom. 7:​22, 23) Nuan engka berasai tusah ati laban patut belaban enggau pengingin ti salah. Taja pia, lebuh utai nya nyadi, perundingka baru semaya ke udah digaga nuan lebuh nuan nyerahka diri ngagai Jehovah. Nya deka nulung nuan keran agi ngelaban pengingin ti salah nya. Kebendar iya, lebuh nuan napi penguji, semaya nya meh ke deka nulung nuan. Baka ni?

7. Baka ni nyerahka diri ngagai Jehovah deka nulung nuan mengkang tetap ati ngagai Iya?

⁷ Lebuh nuan nyerahka diri ngagai Jehovah, nya nunjukka nuan nulak pengingin diri empu sereta juluk ati ke enda dikerinduka Jehovah. (Mat. 16:24) Nyadi, lebuh nuan napi penguji tauka situasi ti tusah, nuan enda ibuh agi berunding pasal utai ke deka dikereja nuan. Nuan udah nemu utai ke deka dikereja nuan, iya nya mengkang tetap ati ngagai Jehovah. Nuan keran deka ngagaka ati Jehovah. Nuan deka nyadi baka Jop. Taja pan iya napi penanggul ti balat tusah, tang iya madahka: “Aku deka mengkang tetap ati ngagai Petara!”​—Jop 27:​5, NWT.

8. Baka ni belematika semaya ke digaga nuan ngagai Jehovah nulung nuan ngelaban penguji?

⁸ Lebuh nuan belematika semaya ke udah digaga nuan ngagai Jehovah, nuan deka bulih pengering kena ngelaban sebarang penguji. Ambika chunto, kati nuan deka ngayanka asai ati ti romantik ngagai kaling pengidup orang bukai? Tentu enda. Nuan  udah besemaya ngagai Jehovah, nuan enggai ngereja utai ke baka nya. Enti nuan enda ngelakka asai ati ti salah tumbuh dalam ati nuan, nuan enda ibuh belaban kena muai asai ati nya dudi hari. Enggau nya, nuan ulih nyeliahka ari nitihka jalai “orang ke jai.”​—J-lam. 4:​14, 15.

9. Baka ni belematika semaya ke digaga nuan ngagai Jehovah nulung nuan ngenuluka sembah ngagai Jehovah ba pengidup nuan?

⁹ Baka ni enti nuan nerima tawaran kereja ke ngasuh nuan tusah deka datai begempuru? Nuan nemu utai ti patut digaga nuan. Indah sebedau tawaran kereja nya datai, nuan udah ngaga pemutus enggai nerima sebarang kereja ke deka ngasuh nuan tusah datai begempuru. Enggau nya, nuan ulih nyeliah ari ditinggang penusah ke datai ari pemutus ti salah. Belematika teladan Jesus ulih nulung kitai. Iya keran deka ngagaka ati Apai iya. Baka Jesus, kitai mega keran deka nulak sebarang utai ke enda dikerinduka Petara laban kitai udah nyerahka diri ngagai Jehovah.​—Mat. 4:10; Jhn. 8:29.

10. Pengudah nuan dibaptisa, baka ni Jehovah deka nulung nuan “enda ngetu nitihka” Jesus?

¹⁰ Lebuh nuan napi penanggul tauka penguji, nya siti peluang kena nunjukka diri keran deka nitihka Jesus. Lalu nuan ulih andal, Jehovah deka nulung nuan ngereja nya. Bup Kudus madahka: “Petara ke tetap ati enda nejuka kita napi penguji ke enda ulih ditatka kita. Lebuh diuji, Iya deka meri kita jalai pansut, ngambika kita tan napi penguji nya.”​—1 Kor. 10:13.

BAKA NI DEKA TERUS NITIHKA JESUS?

11. Nama siti chara ti manah ngambika ulih terus nitihka Jesus? (Peda mega gambar.)

¹¹ Jesus gawa ke Jehovah enggau pengabis ati. Lalu iya mega mengkang semak ngagai  Jehovah nengah sampi. (Luk. 6:12) Kebendar iya, siti chara ti manah nuan ulih terus nitihka Jesus pengudah dibaptisa, iya nya terus ngereja utai ke deka ngasuh nuan majak semak ngagai Jehovah. Bup Kudus madahka: “Enda ngira naka ni pemansang kitai, aram meh kitai terus mansang ngena chara ti sama tu.” (Plp. 3:16) Kekadang, nuan engka ninga pengalaman ari bala menyadi ke udah ngereja mayuh agi ke Jehovah. Engka sida udah enggau Sekula Penginjil Perintah Petara, tauka pindah ngagai endur ke begunaka mayuh agi penginjil. Enti situasi nuan ngemendarka nuan ngereja nya, tu mega ulih nyadi siti juluk ati ti manah ke nuan. Nembiak Jehovah seruran ngiga chara deka ngereja mayuh agi ke Iya. (SKR. 16:9) Tang baka ni enti nuan enda ulih ngereja nya diatu? Anang sekali-kali ngumbai diri kurang agi berega ari sida ke ulih ngereja nya. Utai ti pemadu penting nya, nuan terus tan datai ke ujung. (Mat. 10:22) Kingatka meh, lebuh nuan ngereja ni ke ulih nuan, nuan udah ngagaka ati Jehovah. Nya siti chara ti manah nuan ulih terus nitihka Jesus pengudah dibaptisa.​—Mas. 26:1.

12-13. Nama ulih digaga nuan enti nuan ngasaika pengeransing nuan majak kurang? (1 Korint 9:​16, 17) (Peda mega kutak “ Terus Belanda.”)

¹² Nama patut digaga nuan enti nuan ngasaika sampi nuan enda agi datai ari ati? Tauka, nuan enda agi rinduka pengawa nginjil baka suba? Baka ni enti nuan enda agi rindu macha Bup Kudus baka suba? Enti nuan berasai baka tu pengudah dibaptisa, anang meh ngumbai diri udah lenyau kuasa kudus Jehovah. Ketegal kitai enda sempurna, asai ati kitai ulih berubah. Enti pengeransing nuan majak kurang, belematika meh teladan Rasul Paul. Iya bebendar deka neladan Jesus. Taja pia, Paul mega nemu, kekadang iya kurang pengeransing deka ngereja utai ti  patut dikereja iya. (Bacha 1 Korint 9:​16, 17.) Iya madahka: “Taja pan aku lembau ngereja pengawa tu, aku agi dikearapka bejalaika tanggung pengawa ke diterima aku.” Reti iya, Paul keran deka ngereja tanggung pengawa iya enda ngira asai ati ke dikembuan iya maya nya.

¹³ Baka nya mega, anang semina ngaga pemutus bepanggai ba asai ati nuan aja. Terus meh ngereja utai ti betul, enda ngira asai ati ke dikembuan nuan maya nya. Enti nuan terus ngereja utai ti betul, nyau kelama asai ati nuan deka berubah. Tang nyentuk ngagai maya nya, terus meh ngembuan rutin rohani ti manah. Nya deka nulung nuan “enda ngetu nitihka” Jesus pengudah dibaptisa. Lebuh bala menyadi Kristian meda nuan terus nyembah Jehovah enggau ati ti liat, sida mega deka diperansang.—1 Tes. 5:11.

“ANANG NGETU MERESA DIRI EMPU”

14. Nama utai ke patut suah diperatika nuan, lalu nama kebuah? (2 Korint 13:5)

¹⁴ Pengudah dibaptisa, nuan patut suah meresa diri empu. (Bacha 2 Korint 13:5.) Endang manah enti kitai ulih meresa pengidup sereta tebiat kitai kena nemu enti kitai bisi besampi ninting hari, macha sereta belajarka Bup Kudus, datai begempuru, sereta nurun nginjil. Giga meh chara nuan ulih rindu sereta bulih mayuh agi penguntung ari pengawa ke baka tu. Ambika chunto, tanya diri empu: ‘Kati aku ulih nerangka ajar Bup Kudus ti asas ngagai orang bukai? Kati bisi chara ke ulih ngasuh aku rindu agi nginjil? Kati sampi aku nyemetak, lalu nunjukka aku bepanggai ba Jehovah enggau pengabis ati? Kati aku enggau tetap datai begempuru? Baka ni aku ulih fokus agi maya begempuru? Baka ni aku ulih ngemansangka agi begian tauka komen aku ba gempuru?’

15-16. Nama ulih dipelajarka nuan ari pengalaman siku menyadi lelaki pasal nulak penguji?

¹⁵ Nuan mega patut nemu nama pengelemi nuan. Kitai ulih belajar pasal pekara tu ari pengalaman Menyadi Robert. Iya madah: “Lebuh aku beumur 20 taun, aku bisi kereja part-time. Bisi sekali, pengudah kereja, siku indu ke sama gawa enggau aku mai aku pulai ke rumah iya. Iya madah, nadai orang bukai ba rumah iya, lalu kami duai ulih beleman. Terubah iya, aku semina meri alasan aja. Tang pengujung iya, aku nulak jemputan iya lalu nerangka kebuah iya.” Robert mujur nulak penguji nya. Tu endang patut dipuji. Tang udah nya, iya berunding baru pasal situasi nya lalu sedar, iya patut mutarka penanggul nya enggau chara ti bebida. Ku iya ngaku: “Aku enda nulak  indu nya enggau jampat baka ke digaga Josep ngagai bini Potipar. (P-kal. 39:​7-9) Kebendar iya, aku tekenyit laban aku amat tusah deka nulak jemputan indu nya. Utai ke nyadi tu nulung aku sedar, aku patut ngemansangka kaul aku enggau Jehovah.”

¹⁶ Baka ke digaga Robert, nuan mega tau bulih penguntung lebuh meresa diri empu. Taja pan nuan udah mujur nulak penguji, tang tanya diri empu, ‘Ni pengelama awak ke diguna aku sebedau aku amat-amat nulak penguji nya?’ Enti nuan sedar nuan bisi utai ke patut dikemansangka, anang asa ati. Besyukur meh laban nuan udah sedar nuan bisi pengelemi tu. Besampi meh ngagai Jehovah pasal pengelemi nuan, lalu kereja utai ke deka negapka pengeran nuan idup sejalai enggau standard Jehovah.​—Mas. 139:​23, 24.

17. Baka ke dipeda ari pengalaman Robert, lebuh kitai mengkang tetap ati ngagai Jehovah, nama kesan iya ngagai nama Jehovah?

¹⁷ Kitai mega belajarka siti agi utai ari pengalaman Robert. Ku iya nampung: “Pengudah aku nulak jemputan indu nya, indu nya madah, ‘Nuan lulus!’ Aku nanya iya nama reti utai ku iya. Indu nya nerangka, kaban iya ke kala nyadi Saksi madahka, semua nembiak ke Saksi belalai ngereja utai ti salah enti sida bisi peluang. Nyadi, iya madah ngagai kaban iya, iya deka nguji aku. Maya nya, aku gaga ati laban aku udah ngemuliaka nama Jehovah.”

18. Nama utai ti keran deka digaga nuan pengudah dibaptisa? (Peda mega kutak “ Dua Artikel ti Deka Dikerinduka Nuan.”)

¹⁸ Lebuh nuan nyerahka diri ngagai Jehovah sereta dibaptisa, nuan nunjukka diri deka nguduska nama Iya enda ngira nama utai ke nyadi. Lalu nuan ulih yakin, Jehovah nemu penanggul ke ditapi nuan sereta penguji ke udah ditulak nuan. Iya tentu merekatka usaha nuan ti deka mengkang tetap ati. Andal meh, Iya deka meri nuan pengering kena ngereja nya nengah kuasa kudus Iya. (Luk. 11:​11-13) Enggau tulung ari Jehovah, nuan ulih terus nitihka Jesus pengudah dibaptisa.