1. Nama asai ati ke ngachau sekeda bala nembiak Jehovah ke tetap ati?

 BUP KUDUS madahka: ‘Jehovah gaga ati ke nembiak Iya.’ (Mas. 149:4) Endaka jaku tu ngelantangka ati kitai? Tang kekadang, bisi sekeda bala menyadi ke berasai kakang ati. Sida engka berunding, ‘Kati Jehovah lantang ati enggau aku?’ Kebendar iya, mayuh ari nembiak Jehovah ke tetap ati kelia menya kala ngembuan runding ti sama.​—1 Sam. 1:​6-10; Jop 29:​2, 4; Mas. 51:11.

2. Sapa ulih ngagaka ati Jehovah?

² Bup Kudus enggau terang nunjukka, mensia ti enda sempurna ulih ngagaka ati Jehovah. Baka ni? Kitai patut arapka Jesus Kristus sereta dibaptisa. (Jhn. 3:16) Enggau nya, kitai nunjuk ngagai orang bukai, kitai udah nesal ati ke dosa kitai sereta udah ngaga semaya deka ngereja peneka Petara. (SKR. 2:38; 3:19) Lebuh kitai ngereja semua utai nya ngambika ulih ngembuan kaul ti rapat enggau Iya, Jehovah berasai amat gaga ati. Enti kitai enggau bebendar ngamatka semaya kitai ke deka nyembah Iya, Jehovah deka lantang ati enggau kitai lalu ngumbai kitai kaban rapat Iya.​—Mas. 25:14.

3. Nama tiga iti tanya ke deka dikerandauka kitai?

³ Tang nama kebuah sekeda orang kekadang ngumbai Petara enda lantang ati enggau sida? Baka ni Jehovah ngayanka Diri lantang ati enggau kitai? Lalu, baka ni tiap iku kitai ulih yakin agi Petara lantang ati enggau kitai?

NAMA KEBUAH SEKEDA NGUMBAI JEHOVAH ENDA LANTANG ATI ENGGAU SIDA?

4-5. Taja pan kitai ngasaika diri nadai guna, nama utai ke ulih dikeandalka kitai?

⁴ Kenyau ari mit, mayuh ari kitai ngasaika diri nadai guna. (Mas. 88:15) Siku menyadi lelaki ke benama Adrián madahka: “Aku selalu ngasaika diri nadai guna. Maya aku agi mit, aku  kala besampi ngambika diri sebilik aku ulih diau ba Paradais. Tang, aku selalu ngasaika diri enda layak diau ba dia.” Tony, ke ukai ari ruang bilik Saksi madahka: “Apai indai aku nadai kala madahka seduai iya sayauka aku, tauka temegahka aku. Ketegal nya aku suah ngasaika, enda ngira nama utai ke digaga aku, aku enda ulih ngagaka ati seduai iya.”

⁵ Enti kitai kekadang ngasaika diri nadai guna, kingatka meh, Jehovah ke mai kitai ngagai Iya. (Jhn. 6:44) Iya meda sifat kitai ti manah, ke enda dipeda kitai. Lalu Iya ngelala kitai manah agi ari kitai empu. (1 Sam. 16:7; 2 Ban. 6:30) Nya alai, kitai ulih pechaya lebuh Iya madahka kitai tu berega.​—1 Jhn. 3:​19, 20.

6. Nama asai ati Rasul Paul pasal dosa ke udah dikereja iya?

⁶ Sebedau belajarka pemendar, sekeda ari kitai kala ngereja utai ti salah, lalu asai ati ti besalah agi ngachau kitai nyentukka diatu. (1 Pet. 4:3) Indah sida ke nyembah Jehovah enggau tetap ati agi belaban enggau pengelemi sida. Baka ni enggau nuan? Kati nuan kekadang ngasaika Jehovah enda ulih ngampunka nuan? Enti pia, nuan enda kediri. Sekeda nembiak Jehovah ke tetap ati mega napi asai ati ti sama. Ambika chunto, Rasul Paul balat merinsa lebuh iya berundingka pengelemi diri. (Rom. 7:24) Amat, maya nya Paul udah nesal ati ke dosa diri sereta dibaptisa. Taja pia, iya ngumbai diri “pemadu enda beguna entara semua bala rasul” sereta “ke pemadu balat bedosa.”​—1 Kor. 15:9; 1 Tim. 1:15.

7. Nama patut dikingatka kitai pasal dosa ke kala dikereja kitai?

⁷ Apai kitai ti ba serega besemaya deka ngampunka kitai enti kitai nesal ati. (Mas. 86:5) Nyadi, enti kitai amat nesalka penyalah ke udah digaga, kitai ulih pechaya utai ku Jehovah nya endang amat, iya nya Iya udah ngampunka kitai.​—Kol. 2:13.

8-9. Lebuh kitai ngasaika utai ke digaga kitai enda chukup kena ngelantangka ati Jehovah, baka ni kitai ulih mutarka asai ati nya?

⁸ Semua kitai bebendar deka gawa ke Jehovah. Taja pia, sekeda ari kitai engka ngasaika, utai ke digaga kitai enda chukup kena ngelantangka ati Jehovah. Nya meh utai ke diasaika siku menyadi indu ke benama Amanda. Ku iya: “Aku suah ngumbai, enti aku meri Jehovah utai ti pemadu manah, reti nya aku patut meri mayuh agi. Nyadi, aku suah meri lebih ari ke ulih aku. Lebuh aku enda ulih ngereja nya, aku ngumbai Jehovah asa ati enggau aku, baka aku ke asa ati enggau diri empu.”

⁹ Baka ni kitai ulih muai asai ati ke ngumbai diri enda ulih ngagaka ati Jehovah? Kingatka meh, Jehovah enda kala minta utai lebih ari ke ulih dikereja kitai. Iya beterima kasih enggau pengawa kitai, seagi-agi kitai ngereja nya enggau bebendar. Kelimpah ari nya, kitai mega ulih belematika teladan sida ke dalam Bup Kudus ti gawa ke Jehovah enggau pengabis ati. Ambika chunto, peratika teladan Paul. Betaun-taun, iya bebendar gawa ke Jehovah. Iya bejalai jauh sereta numbuhka mayuh raban gempuru. Tang lebuh situasi ba pengidup iya berubah, lalu iya enda ulih agi nginjil mayuh baka suba, kati tu reti iya Jehovah enda agi gaga ati enggau iya? Enda. Iya terus ngereja utai ke ulih iya, lalu Jehovah merekatka iya. (SKR. 28:​30, 31) Baka nya mega, utai ke ulih digaga kitai ke Jehovah ulih berubah. Tang utai ti penting ba Jehovah nya, tuju ati kitai gawa ke Iya. Diatu kitai deka beratika sekeda chara Jehovah ngayanka Diri gaga ati ke kitai.

BAKA NI JEHOVAH NGAYANKA DIRI LANTANG ATI ENGGAU KITAI?

10. Baka ni Jehovah madahka Diri lantang ati enggau kitai? (John 16:27)

¹⁰ Nengah Bup Kudus. Jehovah seruran ngiga chara kena ngayanka Diri rindu sereta lantang  ati ke bala nembiak Iya. Bup Kudus madahka, Jehovah dua kali nyebut pasal Jesus: “Tu Anak ke dikesayauka Aku. Aku gaga ati ke iya.” (Mat. 3:17; 17:5) Kati nuan mega deka ninga Jehovah madahka Iya lantang ati enggau nuan? Sigi amat, Jehovah enda bejaku enggau kitai ari serega. Tang, Iya bejaku enggau kitai nengah Bup Kudus. Lebuh kitai macha utai ke disebut Jesus ngagai bala murid iya, kitai baka ke ninga Jehovah madahka Diri lantang ati enggau kitai. (Bacha John 16:27.) Jesus neladan sifat Apai iya enggau sempurna. Taja pan bala murid Jesus enda sempurna, tang iya madahka diri lantang ati enggau sida. Nyadi, lebuh kitai macha utai ti disebut Jesus, kitai ulih ngambarka Jehovah nyebut utai ti sama ngagai kitai.​—Jhn. 15:​9, 15.

11. Lebuh kitai dituntung penusah, nama kebuah tu ukai reti iya Jehovah enda lantang ati enggau kitai? (James 1:12)

¹¹ Nengah utai ke dikereja Iya. Jehovah keran deka nulung kitai, baka nyediaka utai ke diguna kitai ninting hari. Taja pia, kekadang Jehovah nejuka kitai dituntung penusah, baka ke nyadi ba Jop. (Jop 1:​8-11) Tang lebuh kitai dituntung penusah, tu ukai reti iya Petara enda lantang ati enggau kitai. Kebendar iya, lebuh kitai dituntung penusah, nya meri kitai peluang ngayanka penalam pengerindu kitai sereta pemesai pengarap kitai ngagai Jehovah. (Bacha James 1:12.) Lalu, maya kitai dituntung penusah nya, kitai ulih ngasaika pengerindu enggau sukung ari Jehovah seraya Iya nulung kitai tan napi penusah nya.

12. Nama ulih dipelajarka kitai ari pengalaman Dmitrii?

¹² Peratika pengalaman siku menyadi lelaki ba Asia ke benama Dmitrii. Iya lenyau kereja lalu enda ulih tetemuka kereja pengelama beberapa bulan. Ketegal iya deka ngayanka diri arapka Jehovah, iya ngereja mayuh agi ba pengawa nginjil. Bebulan-bulan pengudah nya, iya agi bedau tetemuka kereja. Udah nya, iya balat sakit nyentukka iya enda ulih angkat. Ketegal utai ti nyadi, iya belabuh berunding, iya ukai laki sereta apai ti manah. Iya mega berunding sekalika Jehovah enda lantang ati enggau iya. Bisi sekali, anak indu iya nyelak Isaiah 30:15 ba siti keretas. Ayat nya madah: “Panggaika pengarap kita ba Aku. Nya baru kita deka kering sereta likun.” Anak indu iya mai keretas nya ngagai apai iya, lalu madah: “Daddy, lebuh nuan tusah ati, ingat meh ayat tu.” Dmitrii nyau sedar, ketegal tulung ari Jehovah,  sida sebilik agi bisi chukup pemakai, gari ke dikena, sereta endur diau. Ku Dmitrii madahka: “Utai ke patut digaga aku nya, mengkang tenang sereta terus manggaika pengarap ba Petara.” Enti nuan benung napi penanggul ti sama, andal meh Jehovah ibuhka nuan sereta deka nulung nuan betan.

13. Sapa ke ulih dikena Jehovah madahka Iya lantang ati enggau kitai, sereta baka ni?

¹³ Nengah bala menyadi Kristian. Jehovah ngena bala menyadi Kristian madahka Iya lantang ati enggau kitai. Ambika chunto, Iya ulih ngasuh bala menyadi meransang kitai ba maya ti ngena. Tu meh utai ke nyadi ngagai siku menyadi indu ba Asia lebuh iya napi utai ti ngasuh iya balat stres. Iya lenyau kereja lalu nyadi balat sakit. Udah nya, laki iya ngereja dosa ti besai lalu enda agi diasuh nyadi tuai gempuru. Ku menyadi indu nya madahka: “Maya nya, aku enda nemu nama kebuah semua utai tu nyadi. Aku ngumbai diri bisi ngereja penyalah, lalu Jehovah ringat enggau aku. Aku bebendar minta Jehovah nunjukka sekalika Iya agi lantang ati enggau aku tauka enda.” Nama digaga Jehovah? Menyadi indu nya madah: “Bala tuai gempuru berandau enggau aku, lalu nulung aku meda Jehovah agi rinduka aku.” Pengudah sesiti timpuh, menyadi indu nya sekali agi minta tulung ari Jehovah. Ku iya: “Ba hari ti sama, aku nerima surat ari bala menyadi ba raban gempuru. Lebuh aku macha jaku sida ti ngelantangka ati, aku ulih ngasaika Jehovah ningaka aku.” Au, Jehovah suah madahka Diri lantang ati enggau kitai nengah jaku ti meransang ari bala menyadi Kristian.​—Mas. 10:17.

14. Nama siti agi chara Jehovah madahka Diri lantang ati enggau kitai?

¹⁴ Siti agi chara Jehovah madahka Diri lantang ati enggau kitai iya nya, Iya ngena bala menyadi Kristian meri kitai jaku lalau lebuh  kitai begunaka nya. Ambika chunto, ba abad keterubah, Jehovah ngena Rasul Paul nulis 14 iti surat ngagai bala menyadi Kristian. Dalam semua surat nya, Paul enggau terus terang meri jaku lalau ngagai bala menyadi Kristian iya, tang enggau chara ti bepengerindu. Nama kebuah Jehovah ngasuh Paul nulis jaku lalau ke baka nya? Jehovah nya Apai ti manah, lalu Iya meri disiplin ngagai bala “anak ke dikemegahka” Iya. (J-lam. 3:​11, 12) Nya alai, lebuh orang meri kitai jaku lalau ari Bup Kudus, tu ukai reti iya Jehovah ringat enggau kitai. Tang tu nunjukka Jehovah agi rinduka kitai. (Heb. 12:6) Nama agi chara bukai ke dikena Jehovah nunjukka Diri lantang ati enggau kitai?

CHARA BUKAI JEHOVAH NUNJUKKA DIRI LANTANG ATI ENGGAU KITAI

15. Jehovah meri kuasa kudus Iya ngagai sapa, lalu nama kebuah tu ulih meri kitai pengandal?

¹⁵ Jehovah meri kuasa kudus Iya ngagai sida ke ngelantangka ati Iya. (Mat. 12:18) Kitai ulih nanya diri empu: ‘Kati aku bisi ngayanka sifat-sifat ke datai ari kuasa kudus Petara?’ Kati nuan sabar agi diatu enti dibandingka enggau maya nuan bedau ngelala Jehovah? Majak agi nuan ngemansangka sifat-sifat manah ke datai ari kuasa kudus Petara, nuan ulih andal agi Jehovah lantang ati enggau nuan.​—Peda kutak “ Buah Kuasa Kudus Nya . . . ”

16. Sapa dikena Jehovah nusui Berita Manah, lalu nama asai ati nuan pasal tu? (1 Tesalonika 2:4)

¹⁶ Jehovah meri pengawa nusui Berita Manah ngagai sida ke ngelantangka ati Iya. (Bacha 1 Tesalonika 2:4.) Peratika pengalaman siku menyadi indu ke benama Jocelyn. Iya bulih penguntung lebuh bekunsika Berita Manah enggau orang bukai. Bisi sekali Jocelyn dani lalu berasai balat tusah ati. Ku iya: “Aku ngasaika diri nadai daya sereta nadai guna. Tang aku siku pengerintis, lalu aku patut pansut nginjil ba hari nya. Nya alai, aku besampi lalu pansut nginjil.” Pagi nya Jocelyn betemu enggau Mary, siku indu ti manah ke deka belajarka Bup Kudus. Beberapa bulan udah nya, Mary madahka, iya benung besampi minta tulung ari Petara lebuh Jocelyn ngetuk pintu iya. Nama dipelajarka Jocelyn ari pengalaman tu? Iya madah: “Aku ngasaika baka Jehovah benung madah ngagai aku, ‘Aku lantang ati enggau nuan.’” Endang amat, ukai semua orang deka ninga lebuh kitai nginjil. Tang kitai ulih andal, Jehovah gaga ati lebuh kitai enggau  naka ulih bekunsika Berita Manah enggau orang bukai.

17. Nama ulih dipelajarka nuan ari utai ti dipadah Vicky pasal tebus? (Masmur 5:12)

¹⁷ Jehovah meri genselan tebus ngagai sida ke ngelantangka ati Iya. (1 Tim. 2:​5, 6) Tang baka ni enti kitai agi ngumbai Jehovah enda gaga ati enggau kitai, taja pan kitai arapka tebus sereta udah dibaptisa? Kingatka meh, kitai enda ulih seruran pechayaka asai ati diri. Tang kitai ulih pechayaka Jehovah. Ba mata Iya, sida ke arapka tebus nya lurus, lalu Iya besemaya deka merekatka sida. (Bacha Masmur 5:12; Rom. 3:26) Siku menyadi indu ke benama Vicky bulih penguntung lebuh iya belematika genselan tebus Jesus. Bisi sekali, pengudah belematika genselan tebus nya, iya sedar: “Jehovah lama udah sabar enggau aku. . . . Tang aku baka ke madah ngagai Iya: ‘Pengerindu Nuan enda chukup besai kena narit aku. Genselan Anak Nuan enda chukup kena muai dosa aku.’” Lebuh iya belematika genselan tebus tu, iya berengkah ngasaika pengerindu Jehovah. Pia mega, lebuh kitai belematika genselan tebus Jesus, kitai pan ulih ngasaika pengerindu Jehovah sereta nemu Jehovah gaga ati enggau kitai.

18. Nama utai ke ulih dikeandalka kitai enti kitai terus rinduka Apai kitai ke ba serega?

¹⁸ Taja pan kitai udah nitihka semua utai ti dipelajarka dalam artikel tu, tang bisi maya iya kitai agi berasai asa ati lalu berunding sekalika Jehovah agi lantang ati enggau kitai. Enti utai nya nyadi, kingatka meh, Jehovah lantang ati enggau “sida ke seruran rinduka Iya.” (Jas. 1:12) Nya alai, terus meh datai semak ngagai Jehovah lalu peratika chara Iya nunjukka Diri lantang ati enggau nuan. Seruran ingat, Jehovah “enda jauh ari kitai siku-siku.”​—SKR. 17:27.