1-2. Nama patut digaga sesiku orang sebedau dibaptisa?

 DALAM timpuh lima taun ti udah, lebih ari sejuta iku orang udah dibaptisa nyadi Saksi-Saksi Jehovah. Mayuh ari sida baka Timoti ba abad keterubah, ke diajar pemendar ‘kenyau ari iya agi mit.’ (2 Tim. 3:​14, 15) Ke bukai belajar pasal Jehovah lebuh sida besai tuai, lalu bisi mega belajar lebuh sida udah tuai. Siku indu ke belajarka Bup Kudus enggau Saksi-Saksi Jehovah dibaptisa maya iya beumur 97 taun.

² Enti nuan siku pemelajar Bup Kudus tauka dibesaika apai indai ke Saksi, kati nuan bisi berunding deka dibaptisa? Nya juluk ati ti amat manah! Tang sebedau dibaptisa, nuan patut nyerahka diri ngagai Jehovah. Artikel tu deka berandauka reti nyerahka diri ngagai Jehovah. Artikel tu mega deka nulung nuan meda kebuah nuan enda ibuh takut nyerahka diri ngagai Petara sereta dibaptisa lebuh nuan udah besedia.

NAMA RETI NYERAHKA DIRI?

3. Padahka sekeda chunto ari Bup Kudus pasal orang ke diserahka ngagai Jehovah.

³ Dalam Bup Kudus, orang ke diserahka ngagai Jehovah dipilih kena ngereja sesiti pengawa. Orang Israel nya raban bansa ke diserahka ngagai Jehovah. Tang sekeda individu ari raban bansa nya diserahka ngagai Jehovah kena ngereja sesiti pengawa ke Jehovah. Ambika chunto, Aron ngena serban ke bisi keping emas ti bekilat ke dilekatka ba depan serban iya. Tu siti “tanda kudus ti nunjukka Aron diserahka ngagai Petara.” Keping emas nya nunjukka iya dipilih gawa ke Jehovah enggau  chara ti spesial, iya nya nyadi Imam Besai orang Israel. (Lew. 8:9) Orang Nasir mega diserahka ngagai Jehovah enggau chara ti spesial. Rambai jaku “orang Nasir” datai ari jaku Hebrew nazirʹ, ke mai reti “Diserahka,” tauka “Diseraraka.” Orang Nasir patut ngasika pesan ti spesial ke ditulis ke sida ba Adat Moses.​—P-pau. 6:​2-8.

4. (a) Nama nyadi lebuh nuan nyerahka diri ngagai Jehovah? (b) Nama reti “nulak pengingin diri empu”? (Peda mega gambar.)

⁴ Lebuh nuan nyerahka diri ngagai Jehovah, nuan milih deka nyadi murid Jesus Kristus sereta ngenuluka peneka Petara dalam pengidup nuan. Tu nyengkaum nama? Jesus madah: “Barang sapa deka nitihka aku, awakka iya nulak pengingin diri empu.” (Mat. 16:24) Ketegal kitai udah nyerahka diri ngagai Jehovah, kitai patut nulak sebarang utai ke enda ngerinduka ati Jehovah. (2 Kor. 5:​14, 15) Tu nyengkaum nulak “pengawa ke datai ari pengingin ti bedosa,” baka ulah seks ti kamah. (Gal. 5:​19-21; 1 Kor. 6:18) Enti nuan ngasika pesan nya, kati nya ngenusahka pengidup nuan? Tentu enda. Ketegal nuan rinduka Jehovah sereta yakin adat ke diberi Iya ke penguntung nuan, tu tentu enda ngenusahka nuan. (Mas. 119:97; Isa. 48:​17, 18) Siku menyadi lelaki ke benama Nicholas madahka: “Nuan ulih ngumbai standard Jehovah baka bilik jil ke nagang nuan ari ngereja utai ti dikedekaka nuan, tauka baka sangkar singa ke ngelindung nuan ari bahaya.”

5. (a) Baka ni nuan nyerahka diri ngagai Jehovah? (b) Nama bida entara pengawa nyerahka diri enggau pengawa dibaptisa? (Peda mega gambar.)

⁵ Baka ni nuan nyerahka diri ngagai Jehovah? Nuan ngereja nya nengah sampi. Dalam sampi, nuan besemaya deka nyembah Jehovah siku aja sereta ngenuluka peneka Iya dalam pengidup nuan. Nuan besemaya ngagai Jehovah, nuan deka terus rinduka  Iya ‘enggau pengabis ati nuan, enggau pengabis pengidup nuan, enggau pengabis runding nuan, sereta enggau pengabis pengering nuan.’ (Mrk. 12:30) Lebuh nuan nyerahka diri ngagai Jehovah, nya entara nuan enggau Jehovah aja. Tang lebuh nuan dibaptisa, pengawa nya digaga ba mua orang mayuh kena nunjukka nuan udah nyerahka diri ngagai Jehovah. Semaya ke digaga nuan maya nyerahka diri nya semaya ti berat. Jehovah dekaka nuan ngamatka semaya nya, lalu nya patut nyadi juluk ati nuan.​—P-jar. 5:​4, 5.

NAMA KEBUAH NYERAHKA DIRI NGAGAI JEHOVAH?

6. Nama kebuah sesiku orang ngaga pemutus deka nyerahka diri ngagai Jehovah?

⁶ Kebuah ti pemadu penting nuan nyerahka diri ngagai Jehovah, iya nya ketegal nuan rinduka Iya. Pengerindu nuan ukai bepanggai ba asai ati aja. Tang pengerindu nya asil ari “penemu ti betul” pasal Iya enggau tuju Iya ke udah dipelajarka nuan. Tu ngasuh pengerindu nuan ke Iya majak dalam. (Kol. 1:9) Lebuh nuan belajarka Bup Kudus, nuan yakin (1) Jehovah nya amat bisi, (2) Bup Kudus datai ari Iya, lalu (3) Jehovah ngena gerempung Iya ngereja peneka Iya.

7. Nama patut digaga kitai sebedau kitai nyerahka diri ngagai Petara?

⁷ Sida ke nyerahka diri ngagai Jehovah patut nemu ajar ti asas ke bisi dalam Bup Kudus sereta idup nitihka standard Petara. Sida enggau naka ulih madah ngagai orang pasal utai ke udah dipelajarka sida. (Mat. 28:​19, 20) Pengerindu sida ke Jehovah majak dalam, lalu sida keran deka nyembah Iya siku aja. Kati tu sama enggau nuan? Enti nuan rinduka Jehovah enggau pengabis ati, nuan tentu enda  nyerahka diri sereta dibaptisa semina ketegal nuan deka ngagaka ati pengajar Bup Kudus tauka apai indai nuan. Lalu nuan mega enda ngereja nya ketegal deka nitihka bala kaban nuan ke bukai.

8. Baka ni asai ati beterima kasih nulung nuan ngaga pemutus deka nyerahka diri ngagai Jehovah? (Masmur 116:​12-14)

⁸ Lebuh nuan berundingka semua utai ke udah digaga Jehovah ke nuan, nuan deka berasai beterima kasih ngagai Iya sereta diperansang deka nyerahka pengidup nuan ngagai Iya. (Bacha Masmur 116:​12-14.) Bup Kudus madahka, Jehovah meri “tiap iti pemeri ti manah sereta sempurna.” (Jas. 1:17) Pemeri ti pemadu besai nya, genselan tebus Anak Iya, Jesus. Gambarka pemesai reti pemeri nya! Ketegal genselan tebus nya, nuan ulih ngembuan kaul ti rapat enggau Jehovah. Lalu, Jehovah mega udah meri nuan peluang idup belama iya. (1 Jhn. 4:​9, 10, 19) Lebuh nuan nyerahka diri ngagai Jehovah, nya siti chara ti pemadu manah ngayanka asai ati ti beterima kasih ketegal pemeri ti pemadu besai ke udah diterima nuan ari Iya. Pia mega enggau berekat ke bukai ke udah diberi Jehovah ngagai nuan. (U-dat. 16:17; 2 Kor. 5:15) Asai ati ti beterima kasih ke baka nya bisi dipadah ba pelajar 46, poin 4, ari bup Idup enggau Lantang Belama Iya! Tu mega nyengkaum video tiga minit ke betajuk Meri Pemeri Nuan ngagai Petara.

KATI NUAN UDAH BESEDIA NYERAHKA DIRI SERETA DIBAPTISA?

9. Nama kebuah sesiku orang enda patut berasai ditekan nyerahka diri ngagai Jehovah?

⁹ Nuan engka ngasaika diri bedau besedia deka nyerahka diri sereta dibaptisa. Nuan engka agi patut ngaga sekeda ubah dalam pengidup nuan ngambika ulih ngasika semua standard Jehovah. Tauka, nuan engka begunaka mayuh agi awak kena negapka pengarap nuan. (Kol. 2:​6, 7) Ukai semua pemelajar Bup Kudus mansang enggau pengelaju ti sama, lalu ukai semua bala nembiak besedia deka nyerahka diri sereta dibaptisa ba umur ti sama. Uji beratika ubah ke patut digaga nuan, lalu kereja meh utai ke ulih digaga nuan. Anang mandingka diri enggau orang bukai.​—Gal. 6:​4, 5.

10. Nama ulih digaga nuan enti nuan ngasaika diri bedau besedia deka nyerahka diri sereta dibaptisa? (Peda mega kutak “ Ke Bala Nembiak ti Dibesaika dalam Pemendar.”)

¹⁰ Enti nuan sedar, nuan bedau besedia deka nyerahka diri ngagai Jehovah, terus meh netapka nya nyadika juluk ati nuan. Besampi meh minta Jehovah nulung nuan ngaga ubah ti patut. (Plp. 2:13; 3:16) Andal meh Iya deka ningaka sampi nuan, lalu nulung nuan.​—1 Jhn. 5:14.

NAMA KEBUAH SEKEDA KAKANG ATI?

11. Baka ni Jehovah deka nulung kitai mengkang tetap ati ngagai Iya?

¹¹ Sekeda orang udah besedia deka nyerahka diri sereta dibaptisa, tang sida agi berasai kakang ati. Sida engka berunding, ‘Baka ni enti aku ngereja dosa ti besai, lalu dibuai ari gerempung Jehovah?’ Enti nuan bisi asai ati ke baka nya, andal meh Jehovah deka meri nuan semua utai ke diguna nuan ngambika nuan ulih “idup baka orang ke nyembah [Iya] sereta ngelantangka ati Iya enggau pengabis iya.” (Kol. 1:10) Iya mega deka meri nuan pengering kena ngereja utai ti betul. Nuan ulih pechayaka nya laban Iya udah nulung mayuh orang ngereja nya. (1 Kor. 10:13) Nya meh siti kebuah mimit aja orang dibuai ari raban gempuru Kristian. Jehovah nulung bala nembiak Iya ngambika mengkang tetap ati.

12. Baka ni kitai ulih nyeliahka diri ari ngereja dosa ti besai?

¹² Ketegal kitai enda sempurna, kitai bisi  pengingin deka ngereja utai ti salah. (Jas. 1:14) Taja pia, nuan empu patut ngaga pemutus pasal utai ti deka dikereja nuan lebuh pengingin nya datai. Kebendar iya, nuan aja ke ulih ngawal chara nuan idup. Sekeda orang madah, kitai enda ulih ngawal asai ati enggau utai ke dikereja kitai. Tang utai nya bula. Nuan ulih belajar ngawal pengingin nuan ti salah. Nyadi, taja pan nuan bisi pengingin deka ngereja utai ti salah, nuan ulih milih ngambika enda nitihka pengingin nya. Bisi sekeda utai mega ke deka nulung nuan nyeliah ari ngereja dosa. Ambika chunto, besampi meh ngagai Jehovah ninting hari. Terus ngembuan rutin belajarka Bup Kudus kediri empu. Datai ngagai gempuru Kristian. Bekunsika pengarap nuan enggau orang bukai. Lebuh nuan ngereja semua tu enggau tetap, tu deka meri nuan pengering ngambika mengkang tetap ati ngagai Jehovah. Lalu kingatka meh, Jehovah mega deka nulung nuan ngereja nya.—Gal. 5:16.

13. Nama ulih dipelajarka kitai ari teladan Josep?

¹³ Nuan deka senang agi mengkang tetap ati ngagai Jehovah enti nuan udah mutuska utai ke deka digaga sebedau nuan diuji. Bup Kudus bisi madah pasal sekeda orang ke ngereja nya. Sida pan enda sempurna baka kitai. Ambika chunto, bini Potipar mayuh kali mai Josep tinduk enggau iya. Tang Josep udah nemu utai ke patut digaga iya. Bup Kudus madahka, “Josep enggai,” lalu Josep madahka: “Enda patut aku ngereja utai ti jai tu lalu bedosa ngelaban Petara.” (P-kal. 39:​8-10) Amat, Josep nemu utai ke patut digaga iya, indah sebedau bini Potipar ngumbuk iya. Ketegal nya, iya ulih ngereja utai ti betul lebuh diuji.

14. Baka ni kitai ulih nulak penguji?

¹⁴ Baka ni nuan ulih neladan Josep, lalu nulak penguji? Gaga meh pemutus ari diatu pasal utai ti deka digaga nuan enti sema nuan diuji. Belajar meh nulak utai ti dipegedika Jehovah enggau jampat, lalu seliahka diri ari berunding pasal utai nya. (Mas. 97:10; 119:165) Tu deka nulung nuan enda alah lebuh diuji laban nuan udah nemu utai ke patut digaga nuan.

15. Baka ni sesiku orang ulih nunjukka diri “bebendar ngiga” Jehovah? (Hebrew 11:6)

¹⁵ Nuan nemu, nuan udah tetemuka pemendar, lalu nuan deka nyembah Jehovah enggau pengabis ati. Tang, bisi utai ke nagang nuan ari nyerahka diri sereta dibaptisa. Nuan ulih  belajar ari teladan Raja David. Iya besampi lalu minta Jehovah: ‘Peresa meh aku, O Petara, ngambika Nuan nemu ati aku. Uji meh ati aku, ngambika Nuan nemu runding aku. Giga meh ulah ti jai dalam aku lalu iring aku niti jalai ti meruan belama iya.’ (Mas. 139:​23, 24) Jehovah merekatka sida ti “bebendar ngiga Iya.” Nuan nunjukka diri bebendar ngiga Iya seraya nuan enggau naka ulih nyapai juluk ati deka nyerahka diri sereta dibaptisa.​—Bacha Hebrew 11:6.

TERUS DATAI SEMAK NGAGAI JEHOVAH

16-17. Baka ni sida ke dibesaika dalam pemendar dibai Jehovah ngagai Iya? (John 6:44)

¹⁶ Jesus madahka, Jehovah mai tauka narit ati bala murid iya. (Bacha John 6:44 enggau nota kaki.) Endaka utai tu amat ngalitka ati? Nama reti iya ba nuan? Jehovah meda utai ti manah ba tiap iku orang ke dibai Iya ngagai Iya. Iya ngumbai orang nya “nembiak Iya” ti spesial. (U-dat. 7:6) Nya mega runding Iya pasal nuan.

¹⁷ Kati nuan siku nembiak ke dibesaika dalam pemendar? Nuan engka ngasaika diri nyembah Jehovah semina ketegal nuan nitihka apai indai, lalu ukai ketegal Jehovah ke mai nuan ngagai Iya. Tang Bup Kudus madahka: “Semak meh ngagai Petara, lalu Iya pan deka semak ngagai kita.” (Jas. 4:8; 1 Ban. 28:9) Enti nuan dulu datai semak ngagai Jehovah, Iya deka datai semak ngagai nuan. Jehovah enda ngumbai nuan semina sebagi ari ruang bilik nuan, tang Iya ibuhka nuan. Iya mai tiap iku orang, nyengkaum orang ke dibesaika dalam pemendar ngagai Iya. Lebuh orang ke baka nya ngambi langkah keterubah datai semak ngagai Jehovah, Jehovah deka datai semak ngagai iya, baka ke dibacha kitai ba James 4:8.​—Banding 2 Tesalonika 2:13.

18. Nama utai ti deka dikerandauka kitai ba artikel ke nangkanka tu? (Masmur 40:8)

¹⁸ Lebuh nuan nyerahka diri ngagai Jehovah sereta dibaptisa, nuan benung neladan Jesus. Jesus sanggup nyerahka diri ngagai Apai iya, lalu ngereja sebarang utai ke diasuh Apai iya. (Bacha Masmur 40:8; Heb. 10:7) Ba artikel ke nangkanka tu, kitai deka berandauka utai ke deka nulung nuan terus nyembah Jehovah enggau tetap ati pengudah nuan dibaptisa.