1. Nama sekeda berekat ke diulih kitai ketegal nyadi sebagi ari gerempung Jehovah?

 KITAI bulih mayuh berekat laban nyadi sebagi ari gerempung Jehovah ba hari ti penudi tu. Pengidup ba dunya tu majak tusah, tang Jehovah udah meri kitai bala menyadi Kristian kena nulung kitai. (Mas. 133:1) Iya nulung kitai ngembuan ruang bilik ti lantang. (Eps. 5:33–6:1) Lalu, Iya meri kitai penemu-dalam ngambika kitai bulih pengelantang ti bendar ba ati.

2. Nama patut dikereja kitai, lalu nama kebuah?

² Tang kitai patut berusaha ngambika ulih terus nyembah Jehovah enggau tetap ati. Nama kebuah? Laban kekadang utai ke dipadah tauka dikereja orang bukai ulih ngemediska ati kitai. Kitai mega engka asa ati lebuh kitai ngaga penyalah, kelebih agi enti kitai bekali-kali ngereja penyalah ti sama. Taja pia, kitai patut terus nyembah Jehovah taja pan napi situasi tu: (1) Lebuh bala menyadi Kristian ngemediska ati kitai, (2) lebuh kaling pengidup ngasaka ati kitai, sereta (3) lebuh kitai asa ati enggau diri empu. Dalam artikel tu, kitai deka beratika utai ke ulih dipelajarka kitai ari teladan tiga iku orang dalam Bup Kudus ke mengkang tetap ati lebuh napi situasi ti sama.

MENGKANG TETAP ATI NGAGAI JEHOVAH TAJA PAN BALA MENYADI NGEMEDISKA ATI NUAN

3. Nama cabaran ke ditapi bala nembiak Jehovah?

³ Cabaran. Sekeda bala menyadi Kristian bisi personaliti ke enda dikerinduka kitai. Ke bukai engka ngereja utai ke ngasaka ati kitai tauka ngemediska ati kitai. Bala tuai gempuru mega ulih ngaga penyalah. Penanggul ke baka tu ulih ngasuh sekeda bala menyadi kakang ati sekalika tu gerempung Jehovah tauka enda. Ari ke terus beserakup nyembah Jehovah enggau  bala menyadi Kristian, sida engka badu agi begulai enggau orang ke ngemediska ati sida, indah badu agi datai begempuru. (Sep. 3:9) Kati nya pemutus ti manah? Peratika utai ke ulih dipelajarka kitai ari siti teladan dalam Bup Kudus ke napi cabaran ti sama.

4. Nama cabaran ke ditapi Rasul Paul?

⁴ Teladan ari Bup Kudus. Rasul Paul nemu, bala menyadi Kristian iya enda sempurna. Ambika chunto, sekeda bala menyadi ba raban gempuru di Jerusalem takutka iya lebuh sida betemu enggau iya. (SKR. 9:26) Kelimpah ari nya, sekeda orang bejaku jai pasal iya kena ngenyaika reputasi iya. (2 Kor. 10:10) Paul mega meda siku tuai gempuru ngaga pemutus ti salah ke engka ulih ngelimpangka pengarap orang bukai. (Gal. 2:​11, 12) Lalu Mark, siku ari kaban rapat Paul, balat ngasaka ati iya. (SKR. 15:​37, 38) Tiap iti situasi tu ulih ngasuh Paul badu agi begulai enggau sida ke ngemediska ati iya. Taja pia, Paul terus ngembuan runding ti positif pasal bala menyadi Kristian iya, lalu mengkang nyembah Jehovah enggau tetap ati. Nama udah nulung Paul?

5. Nama nulung Paul enda putus asa enggau bala menyadi Kristian iya? (Kolosi 3:​13, 14) (Peda mega gambar.)

⁵ Paul rinduka bala menyadi Kristian iya. Pengerindu tu nulung iya befokus ba pemanah sida, ukai ba pengelemi sida. Pengerindu tu mega nulung Paul ngampunka orang bukai, baka ke diasuh iya kereja kitai ba Kolosi 3:​13, 14. (Bacha.) Peratika baka ni Paul ngampunka Mark. Taja pan Mark ninggalka Paul ba pejalai nginjil iya ti keterubah, tang Paul enda mengkang pedis ati. Pengudah nya, lebuh Paul nulis surat ti meransang ngagai raban gempuru ba Kolosi, iya muji Mark ke sama gawa enggau iya, lalu madahka Mark nya “balat ngelantangka ati [iya].” (Kol. 4:​10, 11) Lebuh Paul dijil ba Rome, iya minta Mark datai nulung iya. (2 Tim. 4:11) Endang amat, Paul enda putus asa enggau bala menyadi iya. Nama ulih dipelajarka kitai ari Paul?

6-7. Nama ulih nulung kitai terus ngayanka pengerindu ngagai bala menyadi Kristian taja pan sida bisi pengurang? (1 John 4:7)

⁶ Utai ke ulih dipelajar. Jehovah dekaka kitai terus ngayanka pengerindu ngagai bala menyadi Kristian kitai. (Bacha 1 John 4:7.) Lebuh bala menyadi enda ngintu kitai baka ke patut dikereja orang Kristian, kitai ulih andal, sida enda sengaja deka ngemediska ati kitai, lalu sida mega benung bebendar ngereja utai ke diasuh Jehovah. (J-lam. 12:18) Petara rinduka bala nembiak Iya ti tetap ati, taja  pan sida enda sempurna. Taja pan kitai ngaga penyalah, tang Iya terus nyadi Pangan kitai. Iya mega enda terus ringat enggau kitai. (Mas. 103:9) Kitai amat beterima kasih laban Jehovah ngampunka kitai, lalu kitai patut neladan Iya enggau ngampunka orang bukai.​—Eps. 4:32–5:1.

⁷ Kingatka mega, seraya pengujung dunya tu majak semak, kitai patut mengkang semak enggau bala menyadi Kristian kitai. Kitai nemu, perinsa ke ditapi kitai deka majak balat. Kitai engka dijil ketegal pengarap kitai. Enti nya nyadi, kitai begunaka bala menyadi kitai lebih agi ari ke diatu. (J-lam. 17:17) Peratika utai ke nyadi ngagai Josep, a siku tuai gempuru ba Sepanyol. Iya enggau bala menyadi ke bukai dijil ketegal mengkang neutral. Ku Josep: “Dalam rumah jil, kami semua diau begulai. Nyadi, kekadang kami bisi ngemediska ati pangan diri. Kami patut sabar sereta ngampunka pangan diri ari ati. Tu nulung kami mengkang beserakup sereta nyaga pangan diri. Dalam rumah jil nya mega bisi orang bukai ke enda nyembah Jehovah. Bisi sekali, jari aku telih lalu dibalut. Ketegal nya, aku enda ulih ngena jari nya. Tang siku ari bala menyadi Kristian aku, nuchi gari aku lalu nyaga aku enggau chara ti praktikal. Aku ngasaika pengerindu ti bendar ba maya aku amat begunaka nya.” Tu endang kebuah ti manah kitai patut mutarka penanggul enggau pangan diri ari diatu!

MENGKANG TETAP ATI NGAGAI JEHOVAH TAJA PAN KALING PENGIDUP NGASAKA ATI NUAN

8. Nama cabaran ke ditapi sida ke udah kawin?

⁸ Cabaran. Semua tikah bisi penanggul. Bup Kudus madahka, orang ke udah kawin deka “napi mayuh penusah.” (1 Kor. 7:28) Nama kebuah? Laban laki enggau bini bela enda sempurna. Seduai iya bisi sifat ti enda sama. Utai ti dikerindu enggau utai ti enda dikerinduka seduai iya mega enda sama. Seduai iya engka datai ari budaya tauka chara pengidup ti bebida. Nyau kelama, tebiat tauka ulah ke enda ditemu sebedau kawin deka pansut magang pengudah kawin. Semua utai tu ulih nyadi penanggul. Ari ke bekerejasama mutarka penanggul nya, seduai iya engka belabuh nyalahka pangan diri, taja pan seduai iya bela bisi ngaga penyalah. Seduai iya mega engka berunding deka beserara tauka sarak. Tang, kati tu deka mutarka penanggul seduai iya? b Aram kitai belajar ari teladan siku indu ke mengkang tetap ati ngagai Jehovah taja pan napi penanggul ba tikah iya.

9. Nama cabaran ke ditapi Abigail?

⁹ Teladan ari Bup Kudus. Laki Abigail nya Nabal. Bup Kudus madahka, Nabal nya orang ke jai perangai sereta kasar. (1 Sam. 25:3) Abigail tentu tusah idup enggau laki iya. Kati Abigail bisi peluang ngujungka tikah iya enggau Nabal? Au, bisi. David, ke deka nyadi raja orang Israel, datai deka munuh Nabal laban Nabal udah ngeleseka David enggau bala nembiak iya. (1 Sam. 25:​9-13) Abigail ulih ngena peluang nya ngerarika diri, lalu nejuka David munuh Nabal. Tang, iya enda ngereja nya. Iya mujuk David ngambika enda munuh Nabal. (1 Sam. 25:​23-27) Nama kebuah Abigail ngereja nya?

10. Nama utai ke engka meransang Abigail enda putus asa enggau tikah iya taja pan napi penanggul ba tikah iya?

¹⁰ Abigail rinduka Jehovah sereta bebasaka standard Iya pasal tikah. Iya tentu nemu utai ke dipadah Petara lebuh Petara meri  Awa nyadika bini Adam. (P-kal. 2:24) Abigail nemu, ba Jehovah, atur tikah nya kudus, lalu iya deka ngelantangka ati Petara. Tu utai ke meransang iya ngereja ni ke ulih iya kena nyelamatka diri sebilik iya, nyengkaum laki iya. Iya betindak enggau jampat ngambika ulih nagang David ari munuh Nabal. Iya mega sanggup minta ampun ke penyalah ke enda dikereja iya. Endang amat, Jehovah rinduka Abigail, ke berani sereta enda berundingka diri empu. Nama ulih dipelajarka laki bini ari teladan Abigail?

11. (a) Nama utai ke dikedekaka Jehovah ari sida ke udah kawin? (Epesus 5:33) (b) Nama ulih dipelajarka nuan ari chara Carmen ke berusaha nyelamatka tikah iya? (Peda mega gambar.)

¹¹ Utai ke ulih dipelajar. Jehovah dekaka laki bini bebasaka atur tikah, taja pan sida tusah deka diau enggau kaling pengidup sida. Iya tentu berasai amat gaga ati lebuh meda laki bini bebendar mutarka penanggul sida sereta ngayanka pengerindu ti enda berundingka diri empu enggau basa ngagai pangan diri. (Bacha Epesus 5:33.) Peratika pengalaman Carmen. Pengudah iya kawin pengelama enam taun, Carmen berengkah belajarka Bup Kudus enggau Saksi-Saksi Jehovah lalu dibaptisa. Ku iya: “Laki aku enda rinduka pemutus aku. Iya ringat laban aku enda begulai enggau iya, lalu ngena awak nya datai begempuru. Iya mega ringat laban aku keran deka nyembah Jehovah. Nyadi, iya bejaku jai enggau aku sereta ngugut deka ninggalka aku.” Taja pia, Carmen enda putus asa enggau tikah iya. Pengelama 50 taun, iya bebendar rindu sereta bebasaka laki iya. Ku iya agi: “Nyau kelama, aku nguji meretika agi asai ati laki aku sereta bejaku ngagai iya enggau chara ti manah. Aku nemu, atur tikah nya kudus ba mata Jehovah. Nya alai, aku bebendar deka ngetanka tikah aku. Aku enda kala putus asa enggau tikah aku laban aku rinduka Jehovah.” c Enti penanggul nyadi ba tikah nuan, nuan ulih pechaya Jehovah deka nyukung nuan lalu nulung nuan ngambika enda putus asa.

MENGKANG TETAP ATI NGAGAI JEHOVAH TAJA PAN ASA ATI ENGGAU DIRI EMPU

12. Nama cabaran ke engka ditapi kitai enti kitai ngereja dosa ti besai?

¹² Cabaran. Kitai engka amat asa ati enggau diri empu enti kitai udah ngereja dosa ti besai. Bup Kudus madahka, dosa kitai ulih ngasuh kitai berasai tusah ati lalu baka ke nadai agi pengadang. (Mas. 34:18) Pengelama betaun-taun, siku menyadi lelaki ke benama Robert berusaha ngambika ulih nyadi penulung gempuru. Taja pia, iya ngereja dosa ti  besai ke ngujungka iya ngasaika diri udah ngasaka ati Jehovah. Ku iya: “Lebuh aku sedar enggau utai ke udah dikereja aku, ati aku balat ngachau aku. Pengudah nya, aku berasai amat tusah ati. Aku nyabak lalu besampi ngagai Jehovah. Aku ngumbai Petara enggai agi ningaka sampi aku laban aku udah ngasaka ati Iya.” Enti kitai ngereja dosa ti besai, kitai engka berasai amat tusah ati nyentukka kitai ngumbai Jehovah udah ninggalka kitai. Lalu tu deka ngasuh kitai berunding, kitai nadai agi kebuah deka nyembah Iya. (Mas. 38:4) Enti nuan kala berasai baka tu, peratika teladan siku lelaki dalam Bup Kudus ke mengkang tetap ati ngagai Jehovah, taja pan ngereja dosa ti besai.

13. Nama dosa ti besai ke dikereja Peter? Nama sekeda penyalah ke digaga iya sebedau nya?

¹³ Teladan ari Bup Kudus. Ba malam sebedau Jesus dibunuh, Rasul Peter ngaga sekeda penyalah, lalu tu ngujungka iya ngereja dosa ti besai. Keterubah, Peter kelalu yakin enggau diri empu. Iya bejaku begah, lalu madah, taja pan semua rasul ke bukai ninggalka Jesus, tang iya deka mengkang tetap ati ngagai Jesus. (Mrk. 14:​27-29) Pengudah nya, maya ba taman Getsemani, Peter mayuh kali tusah deka bejaga. (Mrk. 14:​32, 37-41) Udah nya, lebuh seraban orang ke bebaika pedang enggau pemalu datai deka nangkap Jesus, Peter rari ninggalka Jesus. (Mrk. 14:50) Lalu ke penudi iya, tiga kali Peter enggai ngaku diri ngelala Jesus. Iya indah besumpahka pemula nya. (Mrk. 14:​66-71) Nama reaksi Peter lebuh iya sedar iya udah ngereja dosa ti besai? Iya enda ulih ngenatka penusah ati diri, lalu duie-duie nyabak, engka ketegal iya berasai amat besalah. (Mrk. 14:72) Gambarka penusah ati Peter lebuh kaban iya, Jesus, dibunuh beberapa jam pengudah nya. Peter tentu ngasaika diri nadai guna!

14. Nama nulung Peter mengkang tetap ati ngagai Jehovah? (Peda gambar ba majalah.)

¹⁴ Peter ulih mengkang tetap ati ngagai Jehovah ketegal beberapa iti kebuah. Iya enda ngenyauhka diri ari orang bukai. Iya betemu enggau bala menyadi Kristian ke bukai, lalu bulih peransang ari sida. (Luk. 24:33) Nambahka nya, pengudah Jesus diangkatka idup baru, iya ngayanka diri ngagai Peter. Tu engka ketegal iya deka meransang Peter. (Luk. 24:34; 1 Kor. 15:5) Jesus enda nganu Peter ketegal penyalah ke digaga Peter. Tang Jesus madah, Peter deka nerima mayuh agi tanggung pengawa. (Jhn. 21:​15-17) Peter nemu, iya udah ngereja dosa ti besai. Tang, iya enda putus asa enggau diri empu. Nama kebuah? Laban iya andal, Tuan iya Jesus, agi rinduka  iya. Lalu bala menyadi Kristian Peter terus nyukung iya. Nama ulih dipelajarka kitai ari teladan Peter?

15. Jehovah dekaka kitai andal pasal nama? (Masmur 86:5; Rome 8:​38, 39) (Peda mega gambar.)

¹⁵ Utai ke ulih dipelajar. Jehovah deka kitai andal, Iya rinduka kitai sereta sedia deka ngampunka kitai. (Bacha Masmur 86:5; Rome 8:​38, 39.) Lebuh kitai bedosa, kitai tentu berasai besalah. Asai ati tu biasa sereta enda salah. Taja pia, kitai enda patut ngumbai Jehovah enda agi rinduka kitai tauka enda ulih ngampunka kitai. Kitai patut enggau jampat ngiga tulung. Robert, ke dipadah tadi madahka: “Aku ngereja dosa laban aku bepanggai ba pengering diri empu kena ngelaban penguji.” Iya sedar, iya patut bejaku enggau bala tuai gempuru. Iya madahka: “Lebuh aku bejaku enggau bala tuai gempuru, aku ulih ngasaika pengerindu Jehovah ke aku nengah sida. Bala tuai gempuru enda putus asa enggau aku. Sida nulung aku pechaya, Jehovah enda ninggalka aku.” Kitai mega ulih andal, Jehovah amat rinduka kitai lalu deka ngampun kitai enti kitai nesal ati ke dosa kitai, ngiga tulung ke diguna kitai, sereta berusaha ngambika enda ngulang penyalah ti sama. (1 Jhn. 1:​8, 9) Enti kitai andal Jehovah rinduka kitai sereta deka ngampun kitai, kitai deka terus nyembah Jehovah taja pan kitai bisi ngaga penyalah.

16. Nama kebuah nuan keran deka tetap ati ngagai Jehovah?

¹⁶ Jehovah amat beterima kasihka usaha kitai ti deka nyembah Iya ba hari ti penudi tu. Enggau tulung ari Jehovah, kitai ulih terus nyembah Iya enggau tetap ati taja pan napi utai ti ngasaka ati. Kitai ulih terus rinduka bala menyadi Kristian kitai sereta ngampunka sida taja pan sida ngemediska ati kitai. Kitai ulih ngayanka penalam pengerindu kitai ke Petara sereta basa kitai ke atur tikah lebuh kitai bebendar mutarka penanggul ke engka nyadi ba tikah kitai. Lalu enti kitai ngereja dosa, kitai ulih minta tulung ari Jehovah, nerima pengerindu enggau pengampun ari Iya, sereta terus nyembah Iya. Kitai ulih yakin, Jehovah deka merekatka kitai enti kitai enda ngetu ngereja utai ti manah.​—Gal. 6:9.