1, 2. (a) Nama ulih dipelajarka kitai ari Gideon enggau 300 iku bala iya ke ngembuan ati ti tan? (Peda gambar ba pun artikel.) (b) Nitihka Luke 21:19, nama kebuah ati ti tan nya beguna?

UJI gambarka perang ti tusah sereta ngelelakka ke nyadi entara soldadu Israel ke diuluka Pengulu Gideon maya belaban enggau munsuh sida. Gideon enggau bala soldadu iya begagaika orang Midian sereta orang ke setanah enggau sida. Sida ngagai orang nya semalam-malam kira-kira penyauh 32 kilometer (20 batu)! Bup Kudus madahka nama nyadi udah nya: “Gideon enggau bala iya ke tiga ratus iku udah datai ba Sungai Jordan, lalu udah meraka sungai nya. Sida nyau lelak amat.” Tang sida bedau agi menang beperang, lalu sida agi patut ngalahka 15,000 iku soldadu. Bala munsuh tu udah nekan orang Israel betaun, ketegal tu orang Israel enda tau nyurutka diri. Nya alai, Gideon enggau bala iya majak begagaika munsuh sida, lalu menang ngelaban sida.—P-ulu. 7:22; 8:4, 10, 28.

² Kitai mega napi perang ti tusah sereta ngelelakka. Munsuh kitai nyengkaum Sitan, dunya iya sereta kitai empu ti enda  sempurna. Sekeda ari kitai udah ngelaban munsuh tu betaun-taun. Ketegal tulung ari Jehovah, kitai udah menang mayuh perang. Taja pia, kitai bedau agi ulih menang perang ke penudi. Kekadang kitai engka lelak beperang. Tauka kitai engka lelak nganti pengujung dunya ti jai tu. Jesus madahka kitai deka napi penguji sereta pemerinsa ti balat maya hari ti penudi. Tang iya mega madahka enti kitai bisi ati ti tan, kitai ulih menang. (Bacha Luke 21:19.) Nama reti ati ti tan? Nama deka nulung kitai tan? Nama ulih dipelajarka kitai ari sida ke ngayanka ati ti tan? Lalu baka ni kitai ulih ‘ngawakka ati ti tan nya nembuka pengawa iya’?—Jas. 1:4.

3. Nama reti ati ti tan?

³ Dalam Bup Kudus, ati ti tan ukai semina liat ati ba maya ti tusah. Iya nyengkaum chara kitai berunding sereta baka ni asai ati kitai pasal penguji. Ati ti tan nulung kitai nyadi berani, tetap ati sereta liat ati. Siti bup penerang madahka, ati ti tan nya kualiti ke nulung kitai ngembuan pengadang ti tegap sereta nulung kitai enda nyurutka diri lebuh kitai bisi penguji. Iya mega nulung kitai mengkang bediri tegap sereta enda bekinsit indah maya penusah ti pemadu balat. Lalu iya mega nulung kitai ngubah penguji nya nyadi pemenang sereta beratika juluk ati kitai, ukai beratika pemedis kitai.

4. Nama kebuah kitai ulih ngumbai ati ti tan nya diperansang ulih pengerindu?

⁴ Pengerindu meransang kitai tan. (Bacha 1 Korint 13:4, 7.) Pengerindu ngagai Jehovah meransang kitai tan natka sebarang utai ti sejalai enggau peneka Iya. (Luk. 22:41, 42) Pengerindu ngagai menyadi Kristian nulung kitai liat ati enggau pengurang sida ke enda sempurna. (1 Pet. 4:8) Pengerindu ngagai kaling pengidup nulung kitai liat ati natka “penusah” ke indah ditapi laki bini ke bisi pengelantang sereta nulung negapka ruang bilik kitai.—1 Kor. 7:28.

5. Nama kebuah semina Jehovah aja ke ulih nulung kitai tan?

⁵ Minta pengering ari Jehovah. Jehovah nya “pun pengeliat ati enggau peransang.” (Rom. 15:5) Semina Iya aja ke nemu gaya kitai, asai ati kitai sereta chara pengidup kitai. Nya alai Iya nemu utai ti diguna kitai ngambika ulih tan. Bup Kudus madahka: “Iya meri utai ti dipeguna orang ke ngemesaika Iya. Iya ninga sabak sida, lalu nyelamatka sida.” (Mas. 145:19) Tang, baka ni Petara deka nyaut sampi kitai ke minta pengering ngambika ulih tan?

6. Baka ke disemaya dalam Bup Kudus, baka ni Jehovah “meri kita jalai kena kita ngelepaska diri” ari penusah?

⁶ Lebuh kitai minta Jehovah nulung kitai tan, Iya besemaya deka “meri kita jalai kena kita ngelepaska diri.” (Bacha 1 Korint 10:13.) Baka ni Iya ngereja nya?  Kekadang Iya engka muai penguji nya. Tang kesuah agi, Iya deka meri kitai pengering ngambika kitai “tan natka semua pemerinsa enggau ati ti liat, lebuh kita, enggau ati ti gaga.” (Kol. 1:11) Lalu ketegal Iya nemu pengurang ba tubuh, runding enggau asai ati kitai, Iya enda ngelakka penusah balat nyadi nyentukka kitai enda ulih mengkang tetap ati.

7. Terangka kebuah kitai begunaka pemakai rohani ngambika ulih tan.

⁷ Awakka pemakai rohani ngeringka pengarap nuan. Nama kebuah pemakai rohani nya beguna? Uji gambarka: Enti deka niki Gunung Everest, dalam sehari orang ke niki gunung nya patut makai pemakai ke diempa iya dalam 3 tauka 4 hari. Pemakai nya lebih ari ke patut diempa orang nya. Ngambika ulih tan sereta ulih ngulihka juluk ati iya, orang ke niki nya patut enggau naka ulih makai mayuh. Pia mega, kitai begunaka mayuh pemakai rohani ngambika ulih tan sereta ulih ngulihka juluk ati. Kitai enda tau enda ngena awak belajarka Bup Kudus kediri empu sereta datai begempuru. Pengawa tu deka ngetanka utai ti diguna kitai kena ngeringka pengarap kitai.—Jhn. 6:27.

8, 9. (a) Nitihka Jop 2:4, 5, nama utai bukai ke bekaul lebuh kitai napi penguji? (b) Lebuh nuan napi penguji, nama utai ti enda ulih dipeda ke tau digambarka nuan?

⁸ Kingatka penaluk nuan ngagai Petara. Lebuh kitai napi penguji, kitai ukai semina aja merinsa. Penaluk kitai ngagai Petara mega diuji. Chara kitai mutarka penguji nunjukka kitai ngaku Jehovah nya Pemerintah dunya raya ti bendar tauka enda. Nama kebuah? Sitan, ke nyadi munsuh Petara sereta ngelaban hak Petara merintah, bejaika Petara lebuh iya ngumbai mensia nyembah Petara ketegal berundingka diri empu aja. Ku Sitan: “Mensia deka ngelengkaka semua utai, asal nyawa iya idup.” Udah nya ku Sitan madah pasal Jop: ‘Tang enti Nuan ngemediska iya, lalu negu tulang enggau isi iya, iya tentu deka nyumpah Nuan mua mata!’ (Jop 2:4, 5) Kati Sitan agi betenahka nembiak Petara? Agi! Betaun-taun udah nya, lebuh Sitan dibuai ari serega, iya agi mengkang bedawaka tauka betenahka nembiak Petara ti tetap ati. (Pem. 12:10) Kemaya hari tu, Sitan agi ngumbai mensia nyembah Petara ketegal berundingka diri empu aja. Iya keran deka meda kitai nulak hak Petara merintah sereta badu agi nyembah Petara.

⁹ Lebuh nuan merinsa maya napi penguji, uji gambarka utai ti enda ulih dipeda tu. Sitan enggau bala antu iya ba sepiak. Sida beratika utai ke deka digaga nuan sereta bedawaka nuan deka nyurutka diri. Ba sepiak da agi nya Jehovah, Raja kitai Jesus Kristus ke dipilih sereta udah diangkatka idup baru, sereta beribu-ribu iku bala melikat. Sida mega meda penusah nuan, tang sida meransang nuan! Sida gaga ati meda nuan ulih tan sereta mengkang taluk ngagai Jehovah. Lalu udah nya nuan ninga Jehovah madah ngagai nuan: “Nuan enda tau enda bepenemu-dalam, anak, nya baru aku deka lantang ati, lalu ulih nyaut semua orang ke nganu aku.”—J-lam. 27:11.

10. Baka ni nuan ulih neladan Jesus enggau beratika berekat ti datai ari ati ti tan?

 ¹⁰ Beratika berekat. Uji gambarka, nuan benung bejalai jauh. Sepemanjai jalai nya, nuan enda tau enda nengah siti lubang gua ti panjai dalam tanah. Lubang gua nya petang. Tang nuan nemu, enti nuan terus bejalai nyentuk ke ujung lubang gua nya, nuan deka meda penampak baru. Pengidup kitai baka pejalai jauh nya. Nuan engka deka napi maya ti tusah, lalu nuan engka ngasaika penusah nuan balat nating nuan. Indah Jesus pan engka ngasaika utai ti sama. Lebuh iya benung diukum bunuh ba tiang, iya dikeduan sereta balat pedis. Tu engka maya ti pemadu tusah ba pengidup iya! Nama nulung iya tan natka penusah nya? Bup Kudus madahka, iya beratika ‘pengaga ti deka diasaika iya.’ (Heb. 12:2, 3) Beratika berekat nya utai ti pemadu beguna ba Jesus, laban iya deka sama enggau nguduska nama Petara sereta nyukung hak Iya merintah. Jesus nemu penguji nya enda lama, tang berekat iya ti di serega deka meruan belama iya. Kemaya hari tu, penguji ke ditapi nuan engka ngenusahka sereta ngemediska nuan, tang kingatka penguji nya enda lama.

11. Nama kebuah kitai patut beratika peneleba “sida ke ngayanka ati ti tan”?

¹¹ Kitai enda ibuh natka penusah kediri aja. Kena meransang orang Kristian ngambika ulih natka mayuh penguji ari Sitan, rasul Peter nulis: “Laban meh Sitan, bediri tegap dalam pengarap, laban kita nemu, semua orang bukai ke arap di serata dunya tu sama natka pemerinsa nya baka kita.” (1 Pet. 5:9) Peneleba “sida ke ngayanka ati ti tan” ngajar kitai chara ulih mengkang tetap ati, ngasuh kitai pechaya kitai ulih mujur sereta ngingatka kitai penaluk kitai deka diberekatka. (Jas. 5:11) Aram kitai beratika sekeda chunto. ^[1]—Peda nota penutup.

12. Nama dipelajarka kitai ari teladan bala melikat cherubim ke diengkahka ba Kebun Eden?

¹² Bala melikat cherubim ngembuan penuduk ti tinggi. Pengudah Adam seduai Hawa bedosa, Jehovah meri sekeda bala melikat cherubim pengawa ke baru ba dunya. Pengawa nya enda sebaka enggau pengawa ke digaga sida ba serega. Teladan sida ulih ngajar baka ni kitai tau tan lebuh kitai bisi pengawa ti tusah. Bup Kudus madahka Jehovah “ngengkahka melikat cherubim enggau pedang ti beapi-api, ti mantap kia-kia, ba tisi timur kebun nya kena nyaga jalai ngagai kayu pengidup nya.”  ^[2] (Peda nota penutup.) (P-kal. 3:24) Bup Kudus nadai madahka bala melikat  cherubim nya mutap tauka ngasaika diri beguna agi ngereja pengawa ti baru. Sida enda leju tauka nyurutka diri. Tang, sida mengkang bejalaika pengawa nya nyentuk ke iya tembu, engka maya Bah Besai, lebih 1,600 taun udah nya!

13. Baka ni Jop ulih tan natka penusah iya?

¹³ Jop ke tetap ati. Kekadang nuan engka berasai pedis ati laban kawan tauka diri sebilik nyebut utai ti ngelemika semengat. Tauka nuan engka balat sakit tauka merinsa ketegal orang ke dikesayau nuan udah nadai. Tang enda ngira nama utai ke nyadi, nuan tau bulih pengelantang ati ari teladan Jop. (Jop 1:18, 19; 2:7, 9; 19:1-3) Jop enda nemu kebuah iya ditinggang mayuh penusah enggau ngenyit, tang iya enda lemi semengat. Nama nulung iya ulih tan? Ari semua utai, iya rinduka Jehovah sereta nangi enggaika enda ngelantangka ati Iya. (Jop 1:1) Jop deka ngelantangka ati Jehovah ba maya ti senang tauka tusah. Nambahka nya, Jehovah nulung Jop meda kuasa Iya ngena chara madah ngagai iya pasal sekeda utai ti ngalitka ati ke ditempa Iya. Tu ngasuh Jop pechaya Jehovah deka muai penusah iya ba maya ti ngena. (Jop 42:1, 2) Lalu nya meh utai ke nyadi. ‘Jehovah lalu merekatka iya nyadi kaya-raja baru, lalu meri iya dua kali lipat mayuh agi utai ari ti dikemisi iya sebedau nya.’ Jop mati “lebuh umur iya nyau tuai amat.”—Jop 42:10, 17.

14. Nitihka 2 Korint 1:6, baka ni teladan Paul ke tan natka penusah nulung orang bukai?

¹⁴ Rasul Paul. Kati nuan balat disakal tauka diperinsa? Kati nuan nya tuai gempuru tauka tuai ti ngabas ke berasai kelalu irau ati ketegal nuan bisi mayuh tanggungjawap? Enti pia, teladan Paul ulih nulung nuan. Paul balat diperinsa, lalu iya seruran irau pasal bala menyadi Kristian ba gempuru. (2 Kor. 11:23-29) Tang Paul enda lemi semengat, lalu teladan iya ngeringka orang bukai. (Bacha 2 Korint  1:6.) Lebuh nuan tan natka penusah, nya ulih meransang orang bukai tan natka penusah.

15, 16. (a) Nama “pengawa” ke enda tau enda ditembuka ati ti tan? (b) Beri chunto baka ni kitai ulih ‘ngawakka ati ti tan nya nembuka pengawa iya.’

¹⁵ Murid ke benama James diasuh Petara nulis: “Awakka ati ti tan nya nembuka pengawa iya, ngambika kita nyadi orang ke besai tuai sereta nyadi pemadu badas, nadai kurang utai.” (Jas. 1:4) Baka ni ati ti tan ulih nembuka “pengawa” iya ba kitai? Lebuh kitai napi penusah, kitai engka ngasaika diri patut agi liat ati, beterima kasih tauka bepengerindu. Seraya kitai natka penusah, kitai deka belajar ngayanka kualiti tu enggau mayuh agi, lalu enggau tu kitai deka ngemansangka ulah Kristian kitai.

¹⁶ Ketegal ati ti tan ulih meransang kitai nyadi orang Kristian ke manah agi, kitai enggai ngelanggar prinsip ari Jehovah ngambika pemerinsa nya jampat diputarka. Ngambika chunto, enti nuan bisi penanggul bekaul runding ti kamah, anang alah laban penguji nya! Pinta meh tulung ari Jehovah kena nulak runding ti salah nya. Kati bisi diri sebilik ke nyakal nuan? Anang lemi semengat! Terus meh nyembah Jehovah. Asil iya, nuan deka ngeringka pengarap nuan ngagai Jehovah. Kingatka: Ngambika diterima Petara, kitai enda tau enda tan.—Rom. 5:3-5; Jas. 1:12.

17, 18. (a) Terangka kebuah tan nyentuk ke ujung nya beguna. (b) Seraya kitai majak semak enggau pengujung, nama ulih dipechaya kitai?

¹⁷ Kitai ukai semina tan dalam siti timpuh aja, tang kitai enda tau enda tan nyentuk ke ujung. Uji gambarka sebuah kapal ke benung tengelam. Ngambika selamat, bala penumpang enda tau enda nyemerai ke tebing. Orang ke lemi semengat lebuh iya berengkah nyemerai, deka lemas. Orang ke lemi semengat mega deka lemas sebedau iya datai ke tebing, mega deka lemas. Enti kitai deka idup ba dunya baru, kitai patut terus tan. Aram meh kitai ngembuan runding ti sama baka rasul Paul, ke madahka: “Kami enda mantul.”—2 Kor. 4:1, 16.

¹⁸ Baka Paul, kitai pechaya Jehovah deka nulung kitai tan nyentuk ke ujung. Paul nulis: ‘Kitai lebih ari pemenang, ulih Iya ke rinduka kitai! Laban aku nemu, nadai utai, nemuka pemati, tauka pengidup, tauka melikat, tauka bala pemerintah, tauka utai ti diatu, tauka utai ti jemah ila, tauka kuasa, tauka dunya ti di atas enggau dunya ti di baruh, tauka semua utai bukai ti udah digaga Petara, ulih nyeraraka kitai ari pengerindu Petara dalam Jesus Kristus Tuan kitai.’ (Rom. 8:37-39) Endang amat, kekadang kitai ulih lelak. Tang aram meh kitai neladan Gideon enggau bala iya. Sida lelak, tang sida enda nyurutka diri. Sida “agi majak begagaika munsuh”!—P-ulu. 8:4.