1. Baka ni kitai ulih ngasika Petara sereta perintah mensia?

BUP KUDUS ngasuh kitai ngasika perintah mensia. Iya mega ngasuh kitai seruran ngasika Petara. (SKR. 5:29; Tit. 3:1) Baka ni tu ulih dikereja? Jesus nerangka prinsip ke nulung kitai nemu ngagai sapa kitai patut ngasi. Iya madahka ‘Utai Raja Besai, beri ngagai Raja Besai, utai Petara, beri ngagai Petara.’ (Mat. 22:21) ‘Utai Raja Besai, diberi ngagai Raja Besai’ enti kitai ngasika undang-undang perintah, bebasaka pegawai perintah sereta mayar chukai. (Rom. 13:7) Tang, enti perintah ngasuh kitai ngereja utai ti enda dikemendarka Petara, kitai patut nulak enggau chara ti bebasa.

2. Baka ni kitai ulih nunjukka diri nadai kaul enggau politik ba dunya tu?

² Siti chara ‘utai Petara, diberi ngagai Petara’ iya nya enti kitai nadai kaul enggau pekara politik ba dunya tu. Kitai neutral ba pekara tu. (Isa. 2:4) Ketegal Jehovah ngemendarka perintah mensia merintah, kitai enda ngelaban sida. Kitai mega enda enggau sebarang pengawa ke bekaul enggau  rinduka tauka ngetanka menua. (Rom. 13:1, 2) Kitai enda nguji deka nukar perintah tauka nguji nguingka runding orang politik, lalu kitai enda ngundi maya bepilih tauka nyadi orang politik.

3. Nama kebuah kitai enda tau enda mengkang neutral?

³ Bisi mayuh kebuah Petara ngasuh kitai neutral. Siti kebuah nya kitai neladan Jesus, ke “ukai enggi dunya.” Iya enda enggau bepolitik tauka beperang. (Jhn. 6:15; 17:16) Siti agi kebuah nya kitai nyukung Perintah Petara. Ketegal kitai enda nyukung perintah mensia, kitai bisi ati ti beresi lebuh kitai nusui semina Perintah Petara ke deka mutarka semua penusah mensia. Pengarap pelesu bisi kaul enggau politik, lalu tu mechah-belahka orang. Tang ketegal kitai neutral, kitai beserakup enggau bala menyadi Kristian di serata dunya.—1 Pet. 2:17.

4. (a) Baka ni kitai nemu deka mengkang neutral nya majak tusah? (b) Nama kebuah kitai patut nyediaka diri diatu ngambika mengkang neutral?

⁴ Kitai engka diau ba endur ke alai orang enda ngarapka kitai bisi kaul enggau politik. Tang semak agi kitai enggau pengunjung dunya Sitan, tusah agi kitai deka mengkang neutral. Orang kemaya hari tu enggai dibai berunding sereta “ngerigangka diri,” lalu sida deka balat agi bepechah-belah. (2 Tim. 3:4) Sekeda bala menyadi Kristian kitai udah kena penanggul ketegal politik ba menua sida ke ngenyit berubah. Nya kebuah kitai patut nyediaka diri diatu ngambika mengkang neutral indah ba maya ti tusah. Aram kitai berandauka empat iti chara ke ulih digaga kitai kena nyediaka diri.

5. Nama runding Jehovah pasal perintah mensia?

⁵ Chara keterubah kitai ulih nyediaka diri diatu ngambika mengkang neutral iya nya bisi runding ti sama baka Jehovah pasal perintah mensia. Jehovah nadai meri mensia hak merintah atas mensia bukai lebuh Iya nempa sida. (Jer. 10:23) Ba runding Iya, semua mensia nya siti ruang bilik. Tang perintah mensia udah mechah-belahka orang laban sida ngumbai bansa sida nya ti pemadu manah. Taja pan perintah mensia baka ke manah, tang sida enda ulih mutarka semua penusah mensia. Pia mega, sida udah nyadi munsuh Perintah Petara, ke berengkah merintah ba taun 1914. Enda lama da agi Perintah Petara deka muai semua perintah mensia.—Bacha Masmur 2:2, 7-9.

6. Nama patut digaga kitai ngagai orang ke bekuasa ba perintah mensia?

⁶ Petara ngemendarka perintah mensia bisi, laban sida ulih nyaga pengelikun sereta atur. Tu nulung kitai nusui berita manah pasal Perintah Petara. (Rom. 13:3, 4) Indah Petara ngasuh kitai besampika sida ke bekuasa ngambika kitai ulih nyembah Iya dalam pemaik. (1 Tim. 2:1, 2) Lebuh orang ngereja utai ti salah  ngagai kita, kitai engka ulih minta bantu ari orang ke bekuasa ba perintah mensia. Tu meh utai ke digaga Paul. (SKR. 25:11) Taja pan Bup Kudus madahka Sitan bekuasa atas perintah mensia, tang iya nadai madahka Sitan bekuasa atas seiku-seiku orang ke bekuasa ba perintah. (Luk. 4:5, 6) Nya alai, kitai enda patut ngumbai sekeda pegawai perintah di baruh kuasa Sitan. Bup Kudus madahka kitai enda patut bejaku jai pasal orang bukai.—Tit. 3:1, 2.

7. Nama runding ke enda tau enda diseliahka kitai?

⁷ Kitai ngasika Petara enti kitai enda temegahka orang politik tauka raban politik, indah lebuh penemu tauka runding sida ulih mai penguntung ke kitai. Kekadang, tu engka enda senang ba kitai. Uji gambarka, orang angkat ngelaban perintah ke mai mayuh pemerinsa, indah ngagai Saksi-Saksi Jehovah. Endang amat, nuan enggai enggau sida ke ngelaban perintah nya, tang kati nuan deka ngumbai sida ke ngelaban tu betul lalu ngarapka sida mujur? (Eps. 2:2) Enti kitai deka mengkang neutral, kitai patut nyeliahka runding ke ngumbai siti piak betul tauka manah ari piak ke siti agi. Kitai ulih nunjukka tu ari jaku enggau utai ti digaga kitai.

8. Lebuh kitai tusah deka mengkang neutral, baka ni kitai ulih “pintar” tang “nelap”?

⁸ Chara kedua ngambika mengkang neutral iya nya “pintar baka ular, sereta nelap baka burung achang.” (Bacha Matthew 10:16, 17.) Kitai “pintar” enti kitai berundingka pasal penanggul ti deka datai. Kitai “nelap” enti kitai mengkang neutral ba maya ti tusah. Aram kitai berandauka sekeda penanggul sereta utai ke ulih digaga kitai ngambika mengkang neutral.

9. Nama patut diperatika kitai lebuh berandau enggau orang bukai?

⁹ Randau. Kitai enda tau enda bejimat lebuh orang berengkah berandau pasal pekara politik. Ngambika chunto, lebuh kitai berandau enggau orang pasal Perintah Petara, kitai enda madahka diri setuju tauka enda setuju enggau runding tauka penemu ari siti-siti raban politik tauka ari seiku-seiku ketuai politik. Ari ke berandau pasal utai ke deka digaga mensia kena mutarka penusah mensia, tunjukka ayat ari Bup Kudus baka ni Perintah Petara deka mutarka penusah belama iya. Enti orang deka beserekang penemu pasal topik, baka kawin sama penempa tauka bebuai anak, padahka ngagai sida jaku ari Bup Kudus sereta baka ni nuan nguji nitihka nya dalam pengidup. Enti orang madahka sekeda undang-undang patut dibuai tauka ditukar, kitai anang kiruh enggau utai tu, tauka ngansak orang nya ngubah penemu iya.

10. Baka ni kitai ulih nentuka diri mengkang neutral lebuh meda tauka macha sebarang utai ke bisi ba media massa?

¹⁰ Media Massa. Kekadang cherita ba berita ditusui enggau chara ke berat sepiak. Tu endang amat, kelebih agi enti berita nya di baruh perintah. Enti gerempung berita tauka pemerita nunjukka diri nyukung, kitai enda tau enda bejimat ngambika enda berengkah berunding baka sida. Ngambika chunto, tanya diri empu, ‘Kati aku rindu mendingka seiku-seiku pemerita ketegal aku setuju enggau utai ti disebut iya pasal politik?’ Kena  nulung nuan mengkang neutral, nyeliahka diri ari meda tauka macha mayuh berita ke nyukung pekara politik. Tang, uji giga berita ke enda nyukung politik. Lalu seruran mandingka utai ti didinga nuan enggau “semua ajar ti udah didinga” nuan ari Bup Kudus.—2 Tim. 1:13.

11. Baka ni kitai engka tusah deka mengkang neutral enti utai ke dikemisi kitai nya beguna bendar ba kitai?

¹¹ Pengangkun ke reta. Enti duit enggau utai ti dikemisi kitai nya kelalu beguna ba kitai, kitai engka ngasaika diri tusah deka mengkang neutral. Pengudah taun 1970, mayuh Saksi ba menua Malawi ngelengkaka semua utai ti dikemisi sida ketegal enggai enggau seraban politik. Sayau amat, sekeda ari sida enggai ngelengkaka pengidup sida ti senang. Seiku menyadi Kristian indu ke benama Ruth agi ingat, “Sekeda ari sida sama kena buru enggau kami, tang udah nya sida enggau parti politik sereta pulai baru ke menua diri laban sida enda tan enggau pengidup ti tusah ba kem pelari perang.” Tang mayuh nembiak Petara enda baka nya. Sida mengkang neutral, taja pan nya ngasuh sida kurang penatai pemisi tauka lenyau semua utai ti dikemisika sida.—Heb. 10:34.

12, 13. (a) Nama penemu Jehovah pasal mensia? (b) Baka ni kitai ulih nemu sekalika kitai balat temegah ati enggau menua diri?

¹² Penyumbung. Orang endang suah temegahka sereta bejaku begah pasal bansa, adat, nengeri tauka menua diri. Tang Jehovah enda ngumbai seiku-seiku orang tauka seraban orang nya manah agi ari ke bukai. Ba Iya, semua kitai sama magang. Endang amat, Jehovah ngaga semua kitai bebida ari pangan diri, tang kitai ulih gaga ati sereta rindu ati enggau semua utai ti bebida tu. Iya enggai kitai muai adat kitai. Iya mega enggai kitai ngumbai diri manah agi ari orang bukai.—Rom. 10:12.

¹³ Kitai enda patut kelalu temegah ati enggau menua tauka bansa diri, ke ngujungka kitai ngumbai menua tauka bansa diri manah agi ari enggi orang bukai. Enti kitai bisi runding ke baka nya, tu ulih ngasuh kitai balat tusah deka mengkang neutral. Tu kala nyadi ba kurun keterubah. Sekeda bala menyadi Kristian Hebrew bechiping enggau bala indu balu Gerika. (SKR. 6:1) Baka ni kitai ulih nemu sekalika kitai berengkah bisi ati ti temegah baka nya? Enti bala menyadi Kristian ari menua bukai madahka runding iya pasal siti-siti utai, kati nuan terus tekala nya berunding, ‘Kami ditu ngereja utai manah agi,’ lalu udah nya nulak runding iya? Enti pia, kingatka jaku lalau ti berat tu: “Enggau ati ti baruh, seruran ngumbai orang bukai pama agi ari kita.”—Plp. 2:3.

14. Baka ni sampi ulih nulung kitai, lalu nama chunto ari Bup Kudus ke ulih nunjukka tu?

¹⁴ Chara ketiga ngambika mengkang  neutral iya nya bepanggai ba Jehovah. Besampi minta roh kudus, ke ulih meri nuan ati ti liat sereta ulih nagang diri. Kualiti tu deka nulung nuan enti sema perintah ngereja utai ti enda lurus tauka bechiping. Minta penemu-dalam ari Jehovah kena nemu pekara ke engka ngasuh nuan tusah deka mengkang neutral. Lalu minta Iya nulung nuan ngereja utai ti ngena ba maya ti tusah. (Jas. 1:5) Nuan engka dianjung ngagai jil tauka diukum ngena sekeda chara bukai ketegal taluk ngagai Jehovah. Enti pia, besampi minta pemerani ngambika nuan ulih nerang ngagai orang bukai kebuah nuan neutral. Nuan ulih pechaya Jehovah deka nulung nuan tan.—Bacha Kereja Rasul 4:27-31.

15. Baka ni Bup Kudus ulih nulung kitai mengkang neutral? (Peda mega ba kutak “Jaku Petara Neguhka Utai ti Dipechaya Sida.”)

¹⁵ Jehovah udah meri kitai Bup Kudus kena ngeringka kitai. Belematika ayat Bup Kudus ulih nulung nuan mengkang neutral. Uji belajarka ayat nya sereta ngingatka sida, laban sida ulih nulung nuan enti sema nuan nadai Bup Kudus dudi hari. Bup Kudus mega ulih ngeringka pengadang nuan bekaul enggau utai ti dipadah Petara pasal jemah ila. Kitai begunaka pengadang tu kena natka pemerinsa. (Rom. 8:25) Pilih ayat ke nerangka utai ti kelebih agi deka diasaika nuan ba dunya baru, lalu ngambarka diri dia.

16, 17. Nama ulih dipelajarka kitai ari teladan nembiak Petara ke tetap ati ke mengkang neutral? (Peda gambar ba pun artikel.)

¹⁶ Chara keempat ke ulih nulung kitai mengkang neutral iya nya berundingka pasal teladan nembiak Jehovah ke tetap ati. Mayuh ari sida ke idup maya jeman Bup Kudus ngembuan pemerani, lalu sida ngaga pemutus ti manah ke nulung sida mengkang neutral. Pikirka pasal Sadrak, Mesak, enggau Abebnego, ke enggai nyembah engkeramba ti ngambarka perintah Babilon. (Bacha Daniel 3:16-18.) Cherita Bup Kudus tu nulung mayuh bala Saksi kemaya hari tu ngembuan pemerani sereta enggai nabi bendira menua  ba endur sida diau. Jesus nadai enggau politik tauka pekara ke mechah-belahka orang. Iya nemu teladan manah iya deka nulung bala murid iya. Iya madahka: ‘Anang tusah; aku udah ngalahka dunya.’—Jhn. 16:33.

¹⁷ Mayuh bala Saksi maya jeman kitai mengkang neutral. Sekeda ari sida udah diperinsa, dijil, lalu indah dibunuh ketegal sida mengkang tetap ati ngagai Jehovah. Teladan sida ulih nulung kitai ngembuan pemerani. Seiku menyadi Kristian lelaki ari menua Turki madahka: “Franz Reiter nya seiku menyadi Kristian lelaki ke biak ti diukum bunuh ketegal iya enggai nyadi soldadu Hitler. Surat ke ditulis iya nuju indai iya malam sebedau iya mati nunjukka iya bisi pengarap ti besai, lalu iya pechaya ke Jehovah. Aku deka nitihka teladan iya enti sema aku napi penguji ke baka nya.” ^[1]—Peda nota penutup.

18, 19. (a) Baka ni bala menyadi Kristian ba gempuru ulih nulung nuan mengkang neutral? (b) Nama patut digaga nuan?

¹⁸ Bala menyadi Kristian ba gempuru ulih nulung nuan mengkang neutral. Awakka bala tuai gempuru nemu sekalika nuan bisi penanggul tauka nadai. Sida ulih meri nuan jaku lalau ti manah ari Bup Kudus. Pia mega, enti bala menyadi Kristian nemu penanggul nuan, sida ulih meransang nuan. Minta sida besampi ke nuan. Tang kitai mega patut nyukung bala menyadi Kristian kitai sereta besampika sida. (Mat. 7:12) Dalam sampi nuan, sebut nama bala menyadi Kristian ke ditemu tauka didinga nuan, ke dijil ketegal sida neutral. Minta Jehovah meri sida pemerani ngambika sida ulih ngetanka penetap ati sida.—Eps. 6:19, 20.

¹⁹ Seraya kitai majak semak enggau pengunjung, kitai ulih melabaka perintah deka majak agi nekan kitai ngambika nyukung sida. Nya kebuah beguna kitai nyediaka diri diatu ngambika mengkang neutral ba dunya ti bepechah-belah!