1. Baka ni Abraham ngayanka diri arapka pengelurus Jehovah? (Peda gambar ba pun artikel.)

“HAKIM ke ngakim semua dunya enda tau enda ngakim enggau lurus.” (P-kal. 18:25) Abraham nunjukka diri arapka Jehovah deka ngakim nengeri Sodom sereta Gomorah enggau lurus. Iya pechaya Jehovah tentu enggai “munuh sida ke nadai penyalah sama enggau sida ke bepenyalah.” Ba Abraham utai ke baka nya enda patut. Udah nya, ku Jehovah madah pasal Diri Empu: ‘Jehovah nya meh penyaga kita ke kering, lalu semua jalai Iya endang lurus magang. Petara ti tetap ati, enda nipu. Iya ngereja utai ti ngena sereta lurus.’—U-dat. 31:19; 32:4.

2. Nama kebuah kitai pechaya Jehovah seruran lurus?

² Nama kebuah Abraham pechaya Jehovah seruran deka ngereja utai ti ngena? Laban Jehovah nya teladan ti pemadu manah bekaul enggau pengelurus. Nya alai, ketegal standard Jehovah seruran ngena, Iya deka seruran ngakim enggau betul. Bup Kudus madahka: ‘Jehovah rinduka atur ti lurus sereta betul.’—Mas. 33:5.

3. Beri siti chunto pengawa ke enda lurus ba dunya kemaya hari tu.

 ³ Endang ngelantangka ati nemu Jehovah seruran lurus. Taja pia, dunya kemaya hari tu penuh enggau pengawa ke enda lurus. Ngambika chunto, bisi orang didawa ngereja penyalah lalu dijil ketegal utai ke enda digaga sida. Pengudah bisi bukti baru ti tau dikearapka, sekeda ari sida nya nadai penyalah. Tang tu semina ditemu pengudah sida betaun dijil. Pengawa ke enda lurus tu ngasuh pedis ati sereta ringat. Taja pia, bisi sebengkah agi pengawa ke enda lurus ti tusah agi ditatka. Nama nya?

4. Baka ni pengarap orang Kristian engka diuji?

⁴ Orang Kristian nemu, sida deka napi sekeda pengawa ke enda lurus ba luar eklisia Kristian. Taja pia, pengarap kitai engka diuji enti kitai meda tauka napi utai ti baka ke enda lurus dalam eklisia. Enti tu bisi nyadi, nama deka digaga nuan? Kati nuan deka ngelakka pekara nya ngasuh nuan tesangkut?

5. Nama kebuah kitai enda patut tekenyit enti kitai meda tauka napi pengawa ke enda lurus ba eklisia?

⁵ Semua kitai enda sempurna sereta ngereja penyalah, nya alai orang engka enda lurus enggau kitai tauka kitai engka enda lurus enggau orang bukai ba eklisia. (1 Jhn. 1:8) Taja pan tu jarang amat nyadi, orang Kristian ke tetap ati enda tekenyit tauka tesangkut lebuh pengawa ke enda lurus bisi nyadi. Jehovah udah meri kitai jaku ajar dalam Bup Kudus ke ulih nulung kitai mengkang tetap ati, enti napi pengawa ke enda lurus ari menyadi Kristian kitai.—Mas. 55:12-14.

6, 7. Nama pengawa ke enda lurus ti ditapi seiku menyadi Kristian lelaki ba eklisia, lalu nama kualiti ke nulung iya?

⁶ Peratika peneleba Willi Diehl. Ba pun taun 1931, Menyadi Diehl enggau tetap ati gawa ba Betel di Bern, Switzerland. Ba taun 1946, iya enggau kelas kelapan Sekula Gilead di New York, U.S.A. Pengudah tembu belajar, iya dianjung bejalaika pengawa ba pelilih di Switzerland. Ba cherita pengidup iya, Menyadi Diehl madahka, kena Mei 1949, iya madahka diri deka kawin ngagai pampang opis Switzerland. Menyadi Kristian lelaki ke megai pengawa madahka sida deka ngambi semua pengawa ke dipegai iya. Iya semina dikemendarka nyadi pengerintis. Ku Menyadi Diehl: “Aku enda dikemendarka meri cheramah. Mayuh ari sida enda agi meri jaku tabi ngagai kami duai, lalu ngaga kami duai baka orang ke udah dibuai ari gerempung.”

⁷ Nama digaga Menyadi Diehl? Ku iya madahka: “Taja pia, kami duai nemu, kami duai jadi nitihka ajar Bup Kudus, nya alai kami duai ngiga pengering ari sampi sereta manggaika pengarap ba Jehovah.” Taja pan sekeda bala menyadi Kristian lelaki enda meretika penemu Jehovah pasal pengawa jadi melaki-bini, tang nyau kelama penemu sida dikemetulka, lalu Menyadi Diehl bulih baru semua pengawa ke dipegai iya. Jehovah merekatka penaluk iya. * (Peda nota kaki.) Aram kitai nanya diri empu: ‘Enti aku napi pengawa ke enda lurus nya, kati aku mega deka sabar sereta nganti Jehovah ngemetulka penanggul nya? Tauka  kati aku deka bepanggai ba diri empu, lalu nguji ngelaban pengawa ke enda lurus nya?’—J-lam. 11:2; bacha Mikah 7:7.

8. Nama kebuah kitai engka salah sangka ngumbai diri tauka orang bukai nya mansa pengawa ke enda lurus?

⁸ Enti nuan ngasaika bisi sekeda pengawa ke enda lurus ba eklisia, kingatka nuan mega engka salah sangka. Nama kebuah? Kitai enda sempurna, lalu engka salah sangka enggau utai ke nyadi. Kitai mega engka enda nemu semua utai. Tang sekalika utai ti disangka kitai betul tauka salah, kitai patut besampi ngagai Jehovah pasal pekara nya, bepanggai ba Iya, sereta mengkang taluk. Tu deka nagang kitai ari ‘besalah Jehovah.’—Bacha Jaku Dalam 19:3.

9. Nama chunto ke deka dikerandauka kitai ba artikel tu enggau iya ke pengudah tu?

⁹ Aram kitai belajar ari tiga iti chunto pengawa ke enda lurus ti ditapi nembiak Jehovah maya jeman Bup Kudus. Ba artikel tu, kitai deka berandau pasal ichit Abraham, Josep sereta peneleba iya enggau bala menyadi iya. Ba artikel pengudah tu, kitai deka berandauka chara Jehovah mutarka penyalah ke digaga Raja Ahap sereta rasul Peter di Antiok Siria. Seraya kitai berandauka chunto tu, peratika chara nuan ulih mengkang betumpu ba Jehovah sereta ngetanka kaul nuan enggau Iya, kelebih agi lebuh nuan ngasaika diri nyadi mansa pengawa ke enda lurus.

10, 11. (a) Nama pengawa ke enda lurus ti ditapi Josep? (b) Nama peluang ke dikemisi Josep lebuh iya dijil?

¹⁰ Josep nya nembiak Jehovah ti tetap ati ke napi pengawa ti enda lurus ari orang ke enda dikelala. Tang utai ti balat ngenusahka ati iya, iya nya pengawa ke enda lurus ari bala menyadi iya empu. Lebuh Josep beumur 17 taun, bala menyadi iya naban, lalu nyual iya nyadi ulun. Udah nya iya dibai ngagai menua Ejip. (P-kal 37:23-28; 42:21) Lebuh ba menua nya, Josep dipetenah masung seiku indu, lalu dianjung ngagai rumah jil enggau enda dipechara. (P-kal. 39:17-20) Josep merinsa nyadi ulun sereta nyadi orang jil pengelama kira-kira 13 taun. Nama ulih dipelajarka kitai ari peneleba Josep ke ulih nulung kitai lebuh napi pengawa ke enda lurus ari bala menyadi Kristian kitai?

¹¹ Lebuh Josep ba rumah jil, orang ke nyaga wain raja mega dianjung ngagai rumah jil. Bisi sekali, orang ke nyaga wain raja nya bisi mimpi, lalu Jehovah nulung Josep nerangka reti mimpi nya. Josep madahka, orang ke nyaga wain raja nya deka dilepaska ari rumah jil lalu gawa baru enggau raja menua Ejip. Josep lalu ngena peluang nya madahka utai ti nyadi ba iya ngagai orang nya. Kitai ulih belajar mayuh utai ari utai ke disebut enggau ke enda disebut Josep.—P-kal. 40:5-13.

12, 13. (a) Baka ni kitai nemu Josep enda nerima aja pengawa ke enda lurus? (b) Nama utai ke enda dipadah Josep ngagai orang ke nyaga wain raja?

 ¹² Bacha Pemungkal 40:14, 15. Peratika, Josep madahka diri udah ‘ditangkap lalu ditaban.’ Tu enggau terang nunjukka, iya mansa pengawa ke enda lurus. Josep mega madahka, iya nadai ngereja penyai baka ke dipetenah orang. Nya kebuah iya minta orang ke nyaga wain raja ngenang pasal iya ngagai raja menua Ejip. Nama tuju Josep? Iya madahka: “Tulung aku pansut ari rumah jil tu.”

¹³ Kati Josep nerima aja utai ke nyadi ba iya enggau enda nguji mutarka nya? Enda! Josep nemu diri nyadi mansa mayuh pengawa ke enda lurus. Nya kebuah iya madahka utai ke nyadi ba iya ngagai orang ke nyaga wain raja, ngarapka orang nya ulih nulung iya. Tang Bup Kudus nadai madahka, Josep bisi nyebut pasal bala menyadi iya ke nangkap iya ngagai orang bukai sereta ngagai raja menua Ejip. Lebuh bala menyadi Josep datai ngagai menua Ejip lalu bebaik enggau iya, raja menua Ejip ngelaluka sida lalu ngemendarka sida diau di menua Ejip sereta deka bempu “utai ti pemadu manah di menua Ejip.”—P-kal. 45:16-20.

14. Nama deka nyaga kitai ari nyebut utai ti ngemediska ati enti kitai napi pengawa ke enda lurus ba eklisia?

 ¹⁴ Enti kitai ngasaika diri bisi napi pengawa ke enda lurus ba eklisia, kitai patut bejimat ngambika enda betusuika utai nya. Endang amat, kitai patut minta bantu ari bala tuai gempuru sereta madah ngagai sida enti menyadi Kristian bisi ngereja dosa ti besai. (Lew. 5:1) Taja pia, ba sekeda pekara ke enda ngaul dosa ti besai, kitai ulih bebaik enggau orang nya enggau enda madahka penyalah ke dikereja iya ngagai orang bukai, indah ngagai bala tuai gempuru. (Bacha Matthew 5:23, 24; 18:15.) Arapka kitai mengkang taluk, lalu ngena prinsip Bup Kudus mutarka pekara nya. Kekadang kitai engka nyau sedarka diri udah salah sangka enggau utai ke nyadi, lalu kebendar kitai ukai mansa pengawa ke enda lurus. Kitai deka besukur laban enda ngemesaika agi utai ke nyadi enggau nyebut utai ti jai pasal bala menyadi Kristian kitai. Kingatka, sekalika kitai betul tauka salah, nyebut utai ti ngemediska ati enda ulih mutarka utai ke nyadi. Penaluk ngagai Jehovah sereta ngagai bala menyadi Kristian kitai deka nyaga kitai ari ngereja penyalah nya. Ku pemasmur madahka, bisi ‘orang ke ngasika Petara dalam semua utai.’ Orang nya “enda betenahka orang. Sida nadai ngereja penyalah ngagai pangan diri.”—Mas. 15:2, 3; Jas. 3:5.

15. Baka ni kaul Josep enggau Jehovah diberekat?

¹⁵ Kitai ulih belajarka siti agi utai ti beguna ari Josep. Sepengelama 13 taun Josep merinsa ketegal pengawa ke enda lurus, iya ngayanka diri ngembuan runding Jehovah ba semua pekara. (P-kal. 45:5-8) Iya enda kala nyalahka Jehovah ketegal utai ke nyadi ba iya. Endang amat, Josep agi ingatka pengawa ke enda lurus ti ditapi iya, tang iya enda pedis ati. Keberat agi, iya enda ngelakka pengurang sereta pengawa salah orang bukai nyeraraka iya ari Jehovah. Penaluk Josep meri iya peluang meda Jehovah ngemetulka pengawa ke enda lurus sereta merekatka iya enggau diri sebilik.

16. Nama kebuah kitai patut majak semak agi ngagai Jehovah enti kitai napi pengawa ke enda lurus ba eklisia?

¹⁶ Baka nya mega, kitai patut masa sereta nyaga kaul kitai enggau Jehovah. Kitai enda patut ngelakka pengurang bala menyadi Kristian nyeraraka kitai ari Petara ti dikerindu sereta disembah kitai. (Rom. 8:38, 39) Tang, enti kitai napi pengawa ke enda lurus ba eklisia, aram meh kitai neladan Josep sereta majak semak agi ngagai Jehovah. Enggau naka ulih ngembuan penemu ti sama baka enggi Jehovah ba semua pekara. Pengudah enggau naka ulih mutarka penanggul ngena prinsip Bup Kudus, kitai  patut nyerahka pekara nya ngagai Jehovah. Kitai ulih pechaya, Iya deka ngemetulka pekara nya ba maya ti ngena sereta nitihka chara Iya.

17. Baka ni kitai ulih ngayanka diri andal ngagai “Hakim ke ngakim semua dunya”?

¹⁷ Seagi-agi kitai idup ba dunya ti jai tu, kitai tentu napi pengawa ke enda lurus. Taja pan jarang amat nyadi, nuan tauka orang ke dikelala nuan engka napi tauka meda utai ti baka ke enda lurus ba eklisia. Anang tesangkut. (Mas. 119:165) Tang, mengkang taluk ngagai Petara, besampi minta tulung ari Iya, sereta bepanggai ba Iya. Kingatka, ketegal enda sempurna, nuan engka salah sangka enggau utai ke nyadi, lalu nuan engka enda nemu semua utai. Tunda chunto Josep, lalu seliahka jaku ti enda manah ke ulih ngasuh utai ke nyadi besai agi. Ke penudi, ari ke bepanggai ba diri empu, enggau naka ulih mengkang taluk sereta enggau sabar nganti Jehovah ngemetulka pekara nya. Udah nya nuan deka diterima Jehovah sereta bulih berekat, sama baka Josep. Nuan ulih pechaya, Jehovah “Hakim ke ngakim semua dunya” deka seruran ngereja utai ti ngena, laban “semua jalai Iya endang lurus magang.”—P-kal. 18:25; U-dat. 32:4.

18. Nama deka dikerandauka kitai ba artikel pengudah tu?

¹⁸ Ba artikel pengudah tu, kitai deka berandauka dua iti agi chunto pengawa ke enda lurus ba bala nembiak Jehovah maya jeman Bup Kudus. Chunto tu deka nulung kitai meda baka ni ati ti baruh sereta ulah ke deka ngampun nulung kitai nunda standard pengelurus Jehovah.