1, 2. (a) Baka ni pengerindu enggau pengarap bekaul? (b) Nama tanya ke deka dikerandauka kitai?

 APAI kitai, Jehovah, besemaya deka merekatka nembiak Iya ti taluk. Tu siti chara Jehovah ngayanka pengerindu Iya ngagai kitai, lalu kitai rinduka Iya laban Iya “udah dulu rinduka kitai.” (1 Jhn. 4:19) Seraya pengerindu kitai ngagai Jehovah nambah, pengarap kitai ba Iya deka tegap agi lalu kitai arap agi ke Jehovah deka meri upah ngagai orang ke rinduka Iya.—Bacha Hebrew 11:6.

² Jehovah endang pemeri upah! Tu nunjukka sapa Iya sereta utai ti dikereja Iya. Nya alai, pengarap kitai ba Petara enda pengabis ati enti kitai enda arapka Iya deka meri upah ngagai orang ke bebendar ngiga Iya. Nama kebuah pia? Laban “pengarap nya arapka utai ti disadang.” (Heb. 11:1) Pengarap reti iya arap bendar Petara deka merekatka nembiak Iya ti taluk. Tang, baka ni pengadang ke siti-siti upah ulih meri penguntung ngagai kitai? Baka ni Jehovah udah  merekatka nembiak Iya menya sereta ke diatu? Aram kitai meda.

 3. Nama semaya ke dibacha kitai ba Malaki 3:10?

³ Petara Jehovah udah besemaya deka merekatka nembiak Iya ke tetap ati. Iya ngasuh kitai ngereja utai ti pemadu manah ke Iya sereta arapka Iya deka merekatka kitai. Jehovah madahka: “Uji meh Aku.” Ku Iya nyambung: “Nya baru kita deka meda Aku nukangka pintu serega, lalu nuang mayuh macham utai ti manah, ti belimpah-limpah ngagai kita.” (Mal. 3:10) Kitai nunjukka diri beterima kasih ngagai Jehovah lebuh kitai nguji Iya baka ke dipinta Iya.

 4. Nama kebuah kitai ulih arapka semaya Jesus ke bisi ba Matthew 6:33?

⁴ Jesus besemaya ngagai bala murid iya, enti sida ngenuluka Perintah Petara, Petara deka nyukung sida. (Bacha Matthew 6:33.) Jesus ulih madah baka tu laban iya nemu semaya Petara seruran deka nyadi. (Isa. 55:11) Nya alai kitai mega tau arap, enti kitai ngayanka pengarap ti pengabis ati ngagai Jehovah, Iya deka ngamatka semaya tu: “Aku enggai sekali-kali ninggalka kita, tauka ngelengkaka kita.” (Heb. 13:5) Semaya Jehovah tu nulung kitai arapka jaku Jesus ke bisi ba Matthew 6:33.

 5. Nama kebuah saut Jesus ngagai Peter meri peransang ngagai semua kitai?

 ⁵ Bisi sekali, rasul Peter nanya Jesus: ‘Kami udah ninggalka semua utai lalu nitihka nuan. Nama utai ulih kami?’ (Mat. 19:27) Jesus enda ngerara Peter laban betanya baka tu. Tang, Jesus madah ngagai bala murid iya, sida deka diberi upah ketegal sida ngelengkaka sekeda utai. Bala rasul enggau sida ke tetap ati ti bukai deka merintah enggau Jesus di serega jemah ila. Tang Jesus mega madahka, indah diatu bisi upah: ‘Genap iku orang ke udah ninggalka rumah, tauka menyadi lelaki, tauka menyadi indu, tauka apai, tauka indai, tauka anak, tauka umai, ketegal nama aku, deka nerima seratus kali mayuh agi, lalu deka diberi pengidup ti meruan belama iya.’ (Mat. 19:29) Semua bala murid Jesus deka bulih apai, indai, bala menyadi sereta bala anak ba eklisia kemaya hari tu. Tu tentu berega agi ari semua utai ke udah dilengkaka kitai ketegal Perintah Petara.

 6. Nama kebuah Jehovah besemaya deka meri upah ngagai nembiak Iya?

⁶ Kelimpah ari ngasaika mayuh berekat ti ngerinduka ati diatu, kitai nganti berekat ti besai agi jemah ila. (1 Tim. 4:8) Jehovah besemaya deka meri upah ngagai nembiak Iya ke tetap ati, lalu ulih nemu tu nulung kitai tan ba maya ti tusah. Enggau arap bendar ke Jehovah “deka ngupah orang ke ngiga Iya,” kitai ulih mengkang tetap ati.—Heb. 11:6.

 7. Baka ni pengadang nya baka sauh?

⁷ Dalam Ajar ba atas Bukit, Jesus madahka: “Lantang sereta gaga meh kita, laban upah ti besai udah disedia ke kita di serega, laban nya mega chara orang merinsaka sida nabi ke dulu ari kita.” (Mat. 5:12) Sekeda ari nembiak Petara deka nerima upah ti di serega. Lalu ke bukai deka nerima upah pengidup ti meruan belama iya ba dunya paradais. Nya mega kebuah ngasuh “lantang sereta gaga.” (Mas. 37:11; Luk. 18:30) Tang ba semua kitai, pengadang kitai tau “nyadika sauh ti tegap ke semengat kitai.” (Heb. 6:17-20) Baka sauh ke ngetanka kapal ngambika enda bekinsit maya bisi kabut, pengadang kitai ti tegap ulih nulung kitai mengkang tan. Pengadang ulih meri kitai pengering ngambika tan ba maya ti tusah.

 8. Baka ni pengadang kitai ngurangka pengirau?

⁸ Pengadang kitai ulih nulung ngurangka asai ati ti irau. Baka minyak angat ke ulih ngurangka pemedis ba kulit, semaya Petara ulih ngelantangka ati ti irau. Endang ngelantangka ati ulih nemu Jehovah deka ngibun kitai enti kitai nyerahka penusah kitai ngagai Iya. (Mas. 55:22)  Kitai andal enggau pengabis ati, Petara ulih ngereja “utai lebih ari ti dipinta.” (Eps. 3:20) Jehovah deka nulung kitai. Iya ukai semina meri mayuh utai ti dipinta kitai, tang meri “lebih ari ti dipinta”!

 9. Nama kebuah kitai tau arap kitai deka nerima berekat ari Jehovah?

⁹ Ngambika bulih upah, kitai patut ngembuan pengarap ti pengabis ati ba Jehovah sereta ngasika iring Iya. Moses madah ngagai bansa Israel: ‘Jehovah Petara kita deka merekatka kita di menua ti diberi Iya ngagai kita. Nadai siku kita deka seranta enti kita ngasika Jehovah Petara kita, lalu bejimat ngereja semua pesan ti diberi aku ngagai kita sehari tu. Lebuh Jehovah Petara kita merekatka kita, munyi ti udah disemaya Iya.’ (U-dat. 15:4-6) Kati nuan amat pechaya Jehovah deka merekatka nuan enti nuan terus nyembah Iya enggau tetap ati? Nuan bisi kebuah ti manah andal baka nya.

10, 11. Baka ni Jehovah meri upah ngagai Josep?

¹⁰ Bup Kudus ditulis pulaika penguntung kitai. Dalam Bup Kudus, kitai bisi mayuh chunto pasal baka ni Jehovah merekatka nembiak Iya ke tetap ati menya. (Rom. 15:4) Josep nya chunto ti pemadu manah. Terubah iya, bala menyadi iya nyual iya nyadika ulun. Udah nya, bini tuan iya betenahka iya lalu iya dianjung ngagai rumah jil ba Ejip. Lebuh Josep dijil, kati iya diseraraka ari Jehovah? Enda! Bup Kudus madahka: ‘Jehovah bisi enggau Josep lalu [‘mengkang ngayanka pengerindu ti taluk ngagai,’ NW] iya,’ lalu ‘Jehovah bisi enggau Josep, lalu ngasuh iya mujur dalam semua utai ti dikereja iya.’ (P-kal. 39:21, 23) Taja pan napi maya ti tusah nya, Josep nganti Jehovah enggau ati ti liat.

¹¹ Betaun udah nya, raja menua Ejip ngelepaska Josep ari rumah jil, lalu ulun ke baruh ati tu nyadi orang ke lumur dua bekuasa ba Ejip. (P-kal. 41:1, 37-43) Lebuh Josep enggau bini iya bisi dua iku anak lelaki, “Ku Josep, ‘Petara udah ngasuh aku badu agi ingatka pemerinsa aku, enggau pemerinsa ruang bilik apai aku.’ Nya alai iya meri nama Manasi ngagai anak iya ke tuai. Ku iya mega bejaku, ‘Petara udah meri aku anak lelaki, dalam menua ti alai aku kena perinsa.’ Nya alai iya meri nama Epraim ngagai anak iya ke lumur dua.” (P-kal. 41:51, 52) Jehovah meri upah ngagai Josep ketegal penaluk iya, lalu Josep ulih nyelamatka orang Israel sereta orang Ejip ari lapar pungkang. Lalu Josep nemu, Jehovah nya meh ke meri iya upah sereta merekatka iya.—P-kal. 45:5-9.

12. Baka ni Jesus mengkang tetap ati lebuh iya diuji?

¹² Jesus Kristus mega mengkang ngasika Petara taja pan napi mayuh penguji, lalu Jehovah meri iya upah. Nama nulung Jesus mengkang tetap ati? Jaku Petara nerangka: ‘Iya enda malu natka diri  [mati ba tiang, NW] ketegal pengaga ti deka diasaika iya.’ (Heb. 12:2) Jesus tentu gaga laban ulih nguduska nama Petara. Lalu Jesus diberi upah, iya nya diterima Apai iya sereta bisi mayuh peluang ti badas. Bup Kudus madahka, iya ‘duduk muak ari kanan kerusi diraja Petara.’ Kitai mega macha: ‘Petara udah ngangkatka iya tinggi lalu meri iya nama ti ari atas semua nama.’—Plp. 2:9.

13, 14. Baka ni asai ati Jehovah pasal utai ti dikereja kitai ke Iya?

¹³ Kitai tau arap, Jehovah beterima kasih ke semua utai ti dikereja kitai kena nyembah Iya. Iya nemu ni maya kitai enda entu pechayaka diri empu tauka ni maya kitai kakang ati enggau penau diri. Iya balat ibuhka kitai lebuh kitai irau pasal kereja tauka nyediaka utai ke diguna diri sebilik. Lalu Iya mega nemu enti kitai enda ulih ngereja mayuh pengawa ke Iya baka ke udah ketegal kitai sakit tauka balat ditekan diatu. Kitai ulih andal enggau pengabis ati, Jehovah beterima kasih ngagai kitai laban tetap ati taja pan napi penanggul.—Bacha Hebrew 6:10, 11.

¹⁴ Kingatka mega, Jehovah “ningaka sampi.” Kitai ulih pechaya, lebuh kitai besampi ngagai Iya, Iya deka ninga kitai. (Mas. 65:2, NW) ‘Apai ti pun semua pengasih, Petara ti pun semua pengelantang,’ deka meri kitai semua utai ti diguna kitai ngambika mengkang semak ngagai Iya. Kekadang Iya ngena bala menyadi Kristian kitai meri utai tu. (2 Kor. 1:3) Jehovah lantang ati enti kitai ngayanka pengasih ngagai orang bukai. ‘Lebuh nuan meri utai ngagai orang ke seranta, nuan baka ke nyali utai ngagai Jehovah, lalu Jehovah deka mayar nuan.’ (J-lam. 19:17; Mat. 6:3, 4) Nya alai, enti kitai gerah jari sereta nulung bala menyadi Kristian kitai, Jehovah ngumbai pemanah ke dikereja kitai nya baka ke nyali utai ngagai Iya. Lalu Iya besemaya deka meri upah ke pemanah ati nya.

15. Nama upah ke dianti nuan? (Peda gambar ba pun artikel.)

¹⁵ Orang Kristian ke diiri ngena roh kudus bisi pengadang deka nerima “makota pengelurus,” siti upah ari Jesus. (2 Tim. 4:7, 8) Taja pia, nuan nadai kurang nama-nama utai taja pan nuan bisi pengadang ke enda sebaka. Bejuta iku “bedus ti bukai” keran nganti upah ke jemah ila, iya nya pengidup ti meruan belama iya ba dunya paradais. Dia, sida deka ngasaika pemaik ti belimpah.—Jhn. 10:16; Mas. 37:11.

16. Nama jaku ti ngenyamaika ati ke bisi ba 1 John 3:19, 20?

¹⁶ Kekadang kitai engka ngasaika diri enda ngereja mayuh pengawa ke Jehovah, tauka kitai engka berunding sekalika Jehovah lantang ati enggau utai ti dikereja kitai. Kitai indah engka ngasaika diri enda layak nerima sebarang upah. Tang kitai anang enda ingat, ‘Petara besai agi ari ati kitai, lalu Iya nemu semua utai.’ (Bacha 1 John 3:19, 20.) Enti kitai nyembah Jehovah ketegal kitai ngembuan pengarap sereta rinduka Iya, kitai ulih pechaya Iya deka meri kitai upah, taja pan utai ti dikereja kitai baka ke enda entu berega ba kitai.—Mrk. 12:41-44.

17. Nama sekeda upah ke deka diasaika kitai diatu?

 ¹⁷ Indah ba hari ti penudi dunya ti dipegai Sitan tu, Jehovah mengkang merekatka nembiak Iya. Iya nentuka kitai deka nerima mayuh penemu sereta pemaik ketegal nyadi sebegian ari bala menyadi Kristian entarabansa. (Isa. 54:13) Amat, baka ke disemaya Jesus, Jehovah meri kitai upah diatu iya nya siti ruang bilik ti bepengerindu ke ngembuan bala menyadi Kristian di serata dunya. (Mrk. 10:29, 30) Pia mega, orang ke bebendar ngiga Petara deka bulih ati ti puas, pemaik, sereta pengelantang ba ati enggau runding nyadika upah.—Plp. 4:4-7.

18, 19. Baka ni asai ati nembiak Jehovah pasal upah ke diterima sida?

¹⁸ Nembiak Jehovah di serata dunya udah ngasaika upah ti ngerinduka ati ari Apai kitai. Ngambika chunto, Bianca ari menua Jerman madahka: “Aku balat beterima kasih ngagai Jehovah laban nulung aku mutarka pengirau sereta seruran enggau aku ninting hari. Dunya tu charut sereta nadai pengadang. Tang lebuh aku semak agi ngagai Jehovah, aku berasai likun. Tiap kali aku ngelengkaka sekeda utai ketegal Iya, Iya meri aku mayuh agi berekat.”

¹⁹ Tauka peratika Paula ke beumur 70 taun ari menua Kanada ke bisi penyakit tulang belakang ti balat. Iya madahka diri enda ngurangka pengawa nginjil iya taja pan penyakit ke ditapi iya ngasuh iya tusah mindah. Ku iya nambah: “Aku ngena chara nginjil ke bebida baka betelefon sereta nginjil enda formal. Kena meransang aku empu, aku ngembuan siti bup nota ke bisi ayat Bup Kudus sereta poin ari litaricha kitai ke ulih dibacha maya aku lemi semengat. Aku ngangauka bup nya ‘My Survival Notebook.’ Berasai lemi semengat nya enda lama aja enti kitai betumpu ba semaya ari Jehovah. Jehovah seruran nulung kitai enda ngira nama penanggul kitai.” Utai ke ditapi nuan enda sebaka enggau enggi Bianca tauka Paula. Tang, nuan engka bisi berundingka chara Jehovah udah meri upah ngagai nuan sereta sida ke ngelingi nuan. Naka meh pemanah enti berundingka chara Jehovah meri upah ngagai nuan diatu sereta ke jemah ila!

20. Nama ulih dianti kitai enti kitai terus enggau naka ulih nyembah Jehovah enggau tetap ati?

²⁰ Anang enda ingat, sampi nuan ke datai ari ati deka diberekatka enggau “upah ti besai.” Nuan tau arap, ‘lebuh [nuan] udah ngereja peneka Petara,’ nuan deka “nerima utai ti udah disemaya.” (Heb. 10:35, 36) Nya alai, aram meh kitai terus negapka pengarap kitai sereta enggau naka ulih nyembah Jehovah. Kitai pechaya, Jehovah deka meri kitai upah!—Bacha Kolosi 3:23, 24.