1, 2. Nama kebuah orang Kristian ke diiri ngena roh kudus rinduka Rome bab 8?

 LEBUH kitai ngingatka pemati Jesus, kitai engka bisi macha Rome 8:15-17. Ayat tu nerangka baka ni orang Kristian ke diiri ngena roh kudus nemu sida bisi pengadang idup belama iya di serega. Rome 8:1 (NW) nyebut pasal orang ke diiri ngena roh kudus nyadi “orang ke beserakup enggau Jesus.” Tang kati Rome bab 8 semina dituju ngagai orang ke diiri ngena roh kudus? Tauka ulih bab nya mega nulung orang ke bisi pengadang idup belama iya ba dunya?

² Rome bab 8 ke batang iya ditulis nuju ngagai orang ke diiri ngena roh kudus. Sida nerima ‘roh kudus’ lalu nyadi orang ke “nganti diri diiru nyadi anak, reti nya dilepaska ari tubuh [fizikal sida].” (Rom. 8:23, NW) Jemah ila, sida deka nyadi anak Petara di serega. Jehovah udah ngampun dosa sida bepelasarka tebus.  Iya udah madahka sida lurus ngambika ulih nyadi anak Iya.—Rom. 3:23-26; 4:25; 8:30.

 3. Nama kebuah orang ke ngembuan pengadang idup belama iya ba dunya mega patut belajarka Rome bab 8?

³ Taja pia, ba pun bup Rome, Paul nulis pasal seiku orang ke ukai diiri ngena roh kudus, tang iya agi dikumbai Jehovah lurus. Orang nya Abraham. Lelaki ke tetap ati nya udah lama dulu idup sebedau Jesus meri nyawa diri nyadika tebus. (Bacha Rome 4:20-22.) Kemaya hari tu, Jehovah mega ulih ngumbai orang Kristian ke tetap ati ke ngembuan pengadang idup belama iya ba dunya nya lurus. Sida mega tau bulih penguntung ari jaku lalau ke bisi ba Rome bab 8.

 4. Lebuh kitai macha Rome 8:21, nama patut ditanya kitai ngagai diri empu?

⁴ Ba Rome 8:21, kitai nemu Jehovah meri jamin, dunya baru Iya deka datai lalu mensia deka dilepaska ari dosa enggau pemati. Ayat tu madahka, sida deka bulih ‘pengelepas ti bemulia ti endang enggi bala anak Petara.’ Kati nuan meda diri empu bisi ba dunya baru nya? Aram kitai berandauka utai ti patut digaga kitai ngambika ulih idup dia.

 5. Nama utai ke disebut Paul ba Rome 8:4-13?

⁵ Bacha Rome 8:4-13. Ba bab kelapan dalam bup Rome, Paul nyebut pasal dua bengkah bansa mensia; orang ke  idup “nitihka peneka mensia” enggau orang ke idup ‘nitihka peneka roh kudus.’ Sekeda orang ngumbai Paul nyebut pasal orang ke ukai Kristian enggau orang ke Kristian. Tang ditu Paul nulis ngagai orang Kristian, ke “dikangauka nyadi nembiak Tuhan ti kudus.” (Rom. 1:7, NW) Nya alai, kedua-dua bengkah bansa orang ke idup “nitihka peneka mensia” enggau orang ke idup ‘nitihka peneka roh kudus’ nya orang Kristian. Baka ni sida bebida ari pangan diri?

6, 7. (a) Nama sekeda reti leka jaku ke disalin nyadi “peneka mensia” dalam Bup Kudus? (b) Baka ni leka jaku ke disalin nyadi “peneka mensia” dikena ba Rome 8:4-13?

⁶ Leka jaku Gerika ti asal ba ayat tu udah disalin nyadi “peneka mensia” ba sekeda ayat. Leka jaku tu mega reti iya batang tubuh kitai. (Rom. 2:28; 1 Kor. 15:39, 50) Reti iya mega nunjukka kaul ba diri sebilik. Ngambika chunto, Bup Kudus madahka Jesus nya “ari peturun David,” lalu Paul ngangauka orang Judah “kaban belayan” iya empu.—Rom. 1:3; 9:3.

⁷ Nya alai, nama reti utai ku Paul lebuh iya nyebut pasal orang ke idup “nitihka peneka mensia” ba Rome 8:4-13? Kena nemu saut iya, kitai ulih meda ba Rome 7:5 (NW). Paul nulis: “Lebuh kitai idup nitihka peneka mensia, pengingin kitai ti bedosa, ti disungkak Adat, mengkang bekereja dalam tubuh kitai.” Ditu Paul nerangka, orang ke idup “nitihka peneka mensia” nya orang ke beratika sereta  nitihka pengingin sida ti bedosa, ngereja sebarang utai ti dikedekaka sida.

 8. Nama kebuah Paul patut nagang orang Kristian ke diiri ngena roh kudus idup “nitihka peneka mensia”?

⁸ Nama kebuah Paul nagang orang Kristian ke diiri ngena roh kudus idup “nitihka peneka mensia”? Lalu nama kebuah semua orang Kristian kemaya hari tu begunaka jaku tangkan tu? Laban nembiak Petara ke tetap ati ulih berengkah ngemeratka pengingin diri ba pengidup iya. Ngambika chunto, Paul madahka sekeda bala menyadi Kristian ba Rome nyadi ulun “pengingin sida empu.” Reti utai ku Paul nya, sida ngemeratka seks, pemakai tauka utai bukai ke ngelantangka ati ba pengidup sida. (Rom. 16:17, 18; Plp. 3:18, 19; Jud. 4, 8, 12) Lalu ba siti timpuh, bisi utai ke nyadi ba eklisia di Korint. Seiku menyadi Kristian lelaki “tinduk enggau indai-tiri iya empu.” (1 Kor. 5:1) Endang amat, orang Kristian ba kurun keterubah begunaka jaku tangkan Paul pasal idup “nitihka peneka mensia.”—Rom. 8:5, 6.

 9. Rome 8:6 enda berandau pasal nama?

⁹ Jaku tangkan tu mega dikena kemaya hari tu. Indah orang ke udah lama nyembah Jehovah engka berengkah idup “nitihka peneka mensia.” Nya alai, kati Paul ngumbai kitai enda patut berunding pasal pemakai, kereja, main tauka pekara ti romantik? Enda. Tu utai ke selalu digaga ba pengidup. Indah Jesus rindu ke pemakai sereta meri orang bukai makai. Iya mega nemu iya patut belelak. Lalu Paul nulis, pengawa besetubuh nya beguna ba pengawa jadi melaki-bini.

10. Nama reti rambai jaku “runding ti ditumpuka ngagai”?

¹⁰ Nama reti rambai jaku “runding ti ditumpuka ngagai” ke disebut Paul? Leka jaku Gerika ke dikena Paul nya reti iya orang numpuka semua runding enggau pelan iya ngagai sebengkah utai. Seiku pakar nerangka, rambai jaku nya dituju ngagai orang ke “balat rinduka, seruran bejaku pasal” sereta balat betumpu ngagai pengingin sida ti berundingka diri empu aja. Sida ngelakka pengingin ke baka nya bekuasa atas pengidup sida.

11. Nama sekeda utai ke engka nyau beguna bendar ba kitai?

¹¹ Orang Kristian ba Rome patut meresa sereta nguji nemu runding sida ditumpuka ngagai utai nama. Kati nya “utai ti dikinginka mensia”? Kemaya hari tu, kitai mega patut berundingka utai ti pemadu beguna ba kitai. Nama utai ti rindu dikerandauka kitai? Nama utai ti amat rindu dikereja kitai? Sekeda orang engka nyau nemu, sida seruran berunding deka nguji ngirup mayuh macham wain, ngias rumah, bebelika gari baru, nambahka duit tauka bekira deka raun. Utai tu enda salah. Utai tu engka utai ke selalu digaga ba pengidup kitai. Ngambika chunto, Jesus nyediaka wain ba pengerami tikah, lalu Paul ngasuh Timoti ngirup “wain mimit” ke pengerai iya. (1 Tim. 5:23; Jhn. 2:3-11) Tang wain ukai utai ti pemadu beguna ba pengidup seduai iya. Baka ni  enggau kitai? Nama utai ti pemadu dikerinduka kitai ba pengidup?

12, 13. Nama kebuah kitai patut bejimat pasal utai ti ditumpuka kitai?

¹² Paul nangkan: “Runding ti ditumpuka ngagai peneka mensia, nuju ngagai pemati.” (Rom. 8:6) Nama reti utai ku iya tu? Enti kitai idup “nitihka peneka mensia,” kitai lenyau kaul enggau Jehovah diatu sereta lenyau pengidup ke jemah ila. Tang tu enda patut nyadi. Orang ulih berubah. Agi nuan ingatka lelaki ke ngereja ulah ti kamah ba Korint ke udah dibuai ari gerempung? Iya berubah lalu badu nitihka pengingin iya ti kamah. Sekali agi, iya nyembah Jehovah enggau chara ti tuchi.—2 Kor. 2:6-8.

¹³ Lelaki nya orang ke idup “nitihka peneka mensia,” tang iya ulih berubah. Nya alai, enti orang Kristian kemaya hari tu nitihka pengingin iya ti bedosa ari ke nitihka standard Jehovah, iya mega ulih berubah. Ngingatka jaku tangkan ari Paul ulih meransang kitai ngaga sebarang ubah ke patut.

14, 15. (a) Paul ngasuh kitai numpuka runding ba utai nama? (b) Nama penemu ti salah pasal ‘runding ti ditumpuka ngagai peneka roh kudus’?

¹⁴ Pengudah Paul bejaku pasal penusah ke datai ari “runding ti ditumpuka ngagai peneka mensia,” iya nerangka: ‘Runding ti ditumpuka ngagai peneka roh kudus, nuju ngagai pengidup enggau pemaik.’ Naka meh pemanah upah ke deka diulih kitai!

¹⁵ Tang ‘runding ti ditumpuka ngagai peneka roh kudus’ ukai reti iya orang nya nadai kaul enggau utai ti nyata. Tu mega ukai reti iya orang nya semina berunding sereta bejaku pasal Jehovah tauka Bup Kudus. Ngambika chunto, nembiak Petara ba kurun keterubah ngembuan pengidup ti sama baka orang bukai. Sida rindu makai enggau ngirup, jadi melaki-bini, ngintu ruang bilik sereta bisi kereja.—1 Kor. 9:5; 1 Tes. 2:9.

16. Nama utai ti pemadu beguna ba pengidup Paul?

¹⁶ Tang Paul enggau orang Kristian kurun keterubah ke bukai enda ngelakka pengawa ke selalu digaga nyadi utai ti pemadu beguna ba pengidup sida. Ngambika chunto, kitai nemu Paul ngidupka diri enggau begagaka langkau kain. Tang kereja iya nya ukai utai ti pemadu beguna ba pengidup iya. Utai ti pemadu beguna ba pengidup Paul nya gawa ke Petara. Paul betumpu ba pengawa nginjil sereta ngajar. (Bacha Kereja Rasul 18:2-4; 20:20, 21, 34, 35.) Bala menyadi Kristian ba Rome patut neladan Paul, lalu pia mega enggau kitai.—Rom. 15:15, 16.

17. Nama penguntung enti runding kitai ‘ditumpuka ngagai peneka roh kudus’?

¹⁷ Baka ni gaya pengidup kitai enti kitai betumpu ba sembah ngagai Jehovah? Rome 8:6 madahka: ‘Runding ti ditumpuka ngagai peneka roh kudus, nuju ngagai pengidup enggau pemaik.’ Ngereja nya nyengkaum ngawakka runding  kitai ti diiring roh kudus Jehovah sereta belajar berunding baka Iya. Jehovah besemaya deka meri pengidup ti lantang sereta ngemuaska ati ngagai kitai diatu sereta pengidup ti meruan belama iya ke jemah ila.

18. Baka ni kitai tau bulih pemaik enti runding kitai ‘ditumpuka ngagai peneka roh kudus’?

¹⁸ Nama reti utai ku Paul lebuh iya nyebut ‘runding ti ditumpuka ngagai peneka roh kudus’ ulih ngenataika pemaik ke kitai? Semua orang dekaka pemaik, kelebih agi pemaik ba runding, tang mimit aja orang ke tetemuka iya. Kitai beterima kasih ngagai Jehovah laban nulung kitai ngulihka pemaik ti bendar ba runding. Kitai mega bisi pemaik enggau diri sebilik sereta enggau orang ba eklisia. Ketegal kitai enda sempurna, kekadang kitai deka bisi penanggul enggau bala menyadi Kristian kitai. Enti tu nyadi, kitai nitihka jaku ajar Jesus: “Bebaik dulu enggau iya [menyadi Kristian].” (Mat. 5:24) Anang enda ingat, menyadi Kristian lelaki tauka indu mega gawa ke Jehovah, ‘Petara, ke [‘meri,’ NW] pemaik.’—Rom. 15:33; 16:20.

19. Nama bansa pemaik ti ngalitka ati ke ulih diasaika kitai?

¹⁹ Enti runding kitai ‘ditumpuka ngagai peneka roh kudus,’ kitai mega deka bisi pemaik enggau Petara. Nabi Isaiah nulis: ‘Nuan, Jehovah, meri pemaik ti pemadu menyana ngagai orang ke ngembuan juluk ati ti tegap, sereta manggaika pengarap sida ba Nuan.’—Isa. 26:3; bacha Rome 5:1.

20. Nama kebuah nuan beterima kasih ke jaku lalau ba Rome bab 8?

²⁰ Sekalika kitai bisi pengadang idup belama iya di serega tauka ba dunya, semua kitai tau bulih penguntung ari jaku ke bisi ba Rome bab 8. Kitai gaga ati laban Bup Kudus meransang kitai betumpu ba sembah ngagai Jehovah, ukai betumpu ba pengingin kitai empu. Kitai nemu, enti runding kitai ‘ditumpuka ngagai peneka roh kudus,’ kitai tau bulih upah ti ngerinduka ati. Paul nulis: ‘Pemeri ti diberi Petara pechuma nya pengidup ti meruan belama iya dalam Jesus Kristus Tuan kitai.’—Rom. 6:23.