1. Nama kebuah baptisa nya siti singkang ti beguna? (Peda gambar ba pun artikel.)

NINTING taun beribu iku pemelajar Bup Kudus dibaptisa. Mayuh ari sida nya orang ke nembiak, orang ke beumur bebelas taun tauka indah ke biak agi. Sida engka udah dibesaika dalam pemendar. Kati nuan nya seiku ari sida? Enti ya, nuan udah ngereja utai ti manah amat. Tiap iku orang Kristian patut dibaptisa. Lalu baptisa nya beguna ngambika tau bulih pengelepas sereta idup belama iya.—Mat. 28:19, 20; 1 Pet. 3:21.

2. Nama kebuah nuan enda patut takut nyerahka diri ngagai Jehovah?

² Lebuh nuan dibaptisa, Jehovah berengkah merekatka nuan dalam mayuh chara ti baru. Tang nuan mega bisi tanggungjawap ti baru. Nama tanggungjawap nya? Ba hari nuan dibaptisa, menyadi Kristian lelaki ke meri cheramah baptisa nanya: “Ari genselan nyawa Jesus Kristus, kati nuan udah nesal ati ke dosa nuan, lalu nyerahka diri ngagai Jehovah ngereja peneka  Iya?” Nuan nyaut, ya. Nuan besemaya deka rinduka Jehovah lalu nyadika pengawa nyembah Iya utai ti pemadu beguna ba pengidup nuan. Patut nuan ngesalka semaya besai ti udah digaga nuan nya? Tentu enda! Nuan tentu enda nesal ngawakka Jehovah ngiring pengidup nuan. Orang ke enda ngelala Jehovah agi dipegai dunya Sitan. Sitan enda ibuhka sida tauka nuan. Indah, iya gaga ati enti nuan lenyau pengadang idup belama iya ketegal nuan nyukung iya sereta nulak Jehovah.

3. Baka ni Jehovah udah merekatka nuan ketegal nuan nyerahka diri empu ngagai Iya?

³ Pikirka baka ni Jehovah udah merekatka nuan ketegal nuan nyerahka diri empu ngagai Iya lalu dibaptisa. Nuan nyerahka pengidup diri ngagai Jehovah, nya alai nuan ulih enggau andal madahka: ‘Aku enda takut laban Jehovah bisi ngimbai aku. Nama utai ti ulih dikereja orang ngagai aku?’ (Mas. 118:6) Endang peluang ti besai ulih nyukung Petara sereta nemu Iya temegah ati ke nuan.

4, 5. (a) Nama kebuah kitai ulih ngumbai nyerahka diri ngagai Jehovah nya tanggungjawap diri empu? (b) Nama penanggul ke ditapi orang Kristian enda ngira umur sida?

⁴ Ketegal nyadi orang Kristian ti udah dibaptisa, kaul nuan enggau Jehovah enda bepanggai ba apai indai nuan. Diatu nuan betanggungjawapka pengelepas diri empu, taja pan nuan agi diau enggau apai indai nuan. Nama kebuah nya beguna ingatka utai tu? Nadai seiku ari kitai nemu enggau nyemetak baka ni pengarap kitai deka diuji dudi hari. Ambika chunto, nuan engka dibaptisa sebedau beumur bebelas taun. Tang diatu umur nuan bebelas taun, lalu nuan bisi asai ati sereta penanggul ti baru. Seiku indu ti beumur bebelas taun madahka: “Kesuah iya, anak mit ke nyadi Saksi-Saksi Jehovah enda pedis ati enti enda diberi kek hari pengada ba sekula. Tang beberapa taun udah nya, lebuh bisi pengingin ti balat deka besetubuh, iya patut enggau pengabis ati andal ngasika adat Jehovah nya endang pemutus ti seruran badas.”

⁵ Ukai semina orang ke nembiak aja napi penanggul ti baru. Indah orang ke dibaptisa lebuh sida udah besai tuai mega napi penguji ba pengarap, lalu penguji tu engka ukai utai ti disadang sida. Penguji ke ditapi sida engka datai ari rumah tangga, pengerai tauka kereja sida. Enda ngira berapa umur kitai, genap iku kitai patut tetap ati ngagai Jehovah enda ngira nama penguji ti nuntung kitai.—Jas. 1:12-14.

6. (a) Nama reti nuan nyerahka diri ngagai Jehovah nya nadai syarat? (b) Nama ulih dipelajarka nuan ari Pilipi 4:11-13?

⁶ Kena nulung nuan mengkang tetap ati, anang enda ingat, semaya ke digaga nuan enggau Jehovah nya nadai syarat. Reti nya nuan besemaya enggau Iya ti Pemadu Tinggi, nuan deka nyembah Iya enda ngira nama utai ti nyadi, taja pan bala pangan tauka apai indai nuan ngetu nyembah Iya. (Mas. 27:10) Lebuh napi semua penguji, anang enda minta Jehovah nulung nuan ngetanka semaya diri ngagai Iya.—Bacha Pilipi 4:11-13.

7. Nama reti bebendar ngulihka pengelepas ke diri empu “enggau ati ti nangi sereta getar-getar”?

⁷ Jehovah deka nuan nyadi pangan Iya. Tang nuan patut bebendar ngetanka kaul ti teguh sereta bebendar ngulihka pengelepas ke diri empu. Pilipi 2:12 madahka: “Bekereja enggau ati ti nangi sereta getar-getar ngenyukupka pengelepas kita.” Reti nya kitai patut mikirka enggau bejimat  baka ni kitai deka mengkang semak ngagai Jehovah sereta mengkang tetap ati enda ngira nama utai ke nyadi. Kitai enda patut kelalu andalka diri ulih ngereja nya. Kingatka, indah sekeda orang ke udah lama nyembah Petara pan enda ulih mengkang tetap ati. Nama sekeda chara ke ulih nulung nuan bebendar ngulihka pengelepas ke diri empu?

8. Belajarka Bup Kudus kediri empu nyengkaum nama? Nama kebuah nya beguna?

⁸ Ngambika ulih nyadi pangan Jehovah, kitai patut mendingka Iya sereta bejaku enggau Iya. Siti chara kitai mendingka Jehovah nya belajarka Bup Kudus. Tu nyengkaum macha enggau belematika Jaku Petara sereta macha litaricha ti bepelasarka Bup Kudus. Tang belajarka Bup Kudus enda sama enggau ngingatka fakta baka ti digaga nuan ke peresa ba sekula. Kebendar, iya baka siti pejalai jauh ti ngagitka ati ke alai nuan ulih belajar sereta tetemuka utai baru pasal Jehovah. Nuan deka semak enggau Petara, lalu Iya mega deka semak enggau nuan.—Jas. 4:8.

9. Nama sekeda perengka ke udah nulung nuan belajarka Bup Kudus kediri empu?

⁹ Gerempung Jehovah nyediaka mayuh perengka ke ulih nulung nuan ba program belajarka Bup Kudus. Ambika chunto, kitai bisi siri ke dikumbai “Menggali Isi Alkitab” dalam jaku Indonesia ba begian “Anak Muda” ba jw.org kena nulung nuan nitihka utai ti dipelajarka nuan ari cherita Bup Kudus. Ba jw.org mega, nuan ulih tetemuka iring ke dikena belajarka bup “Nama Utai ti Bendar Diajar Bup Kudus?” Perengka tu ulih nulung nuan ngemansangka pengarap sereta nerangka  utai ti dipechaya nuan ngagai orang bukai. Nuan ulih tetemuka sekeda chara ke tau dikena lebuh belajar kediri empu ba artikel “Kaum Muda Bertanya . . . Bagaimana Aku Bisa Menikmati Pembacaan Alkitab?” dalam jaku Indonesia, kena April 2009 dalam majalah Sedarlah! Pengawa belajar enggau belemati nya beguna kena nulung nuan bebendar ngulihka pengelepas ke diri empu.—Bacha Masmur 119:105.

10. Nama kebuah orang Kristian ke udah dibaptisa patut besampi?

¹⁰ Lebuh belajarka Bup Kudus, kitai mendingka Jehovah, lalu lebuh besampi, kitai bejaku enggau Iya. Kitai enda patut ngumbai sampi nya utai ke patut suah digaga tauka nyadika “puchau” ke ulih mai pemujur ngagai kitai. Sampi nya randau ti nyengala entara kitai enggau Penempa. Uji pikirka: Jehovah deka ninga utai ti deka disebut nuan! (Bacha Pilipi 4:6.) Nya alai lebuh nuan irau pasal siti-siti utai, Bup Kudus ngasuh ‘nyerahka penusah nuan ngagai Jehovah.’ (Mas. 55:22) Bejuta iku bala menyadi Kristian engka kala madah ngagai nuan jaku ajar tu udah nulung sida. Jaku ajar tu mega ulih nulung nuan!

11. Nama kebuah nuan patut seruran beterima kasih ngagai Jehovah?

¹¹ Taja pia, kitai ukai semina besampi lebuh kitai dekaka Jehovah nulung kitai. Bup Kudus ngasuh kitai: “Seruran beterima kasih.” (Kol. 3:15) Kekadang kitai kelalu irau pasal penusah kitai nyentukka kitai enda beratika semua utai manah ti dikemisi kitai. Nya alai uji meh tu: Ninting hari, pikirka abis nadai tiga iti utai ke ngasuh nuan beterima kasih, lalu udah nya beterima kasih ngagai Jehovah ke utai nya. Abigail ke beumur bebelas taun ti dibaptisa lebuh umur iya 12 taun, madahka: “Aku ngasaika Jehovah layak nerima mayuh agi terima kasih ari kitai enti dibanding enggau orang bukai ba dunya raya tu. Kitai patut beterima kasih ngagai Iya tiap kali bisi peluang ke pemeri ti udah diberi Iya ngagai kitai.” Kekadang Abigail nanya diri empu pasal tanya ke kala didinga iya: “Ni pemayuh utai ke dikemisi aku, enti aku semina diberi utai nya lebuh aku bisi beterima kasih ngagai Jehovah?” * (Peda nota kaki.)

12, 13. Baka ni nuan empu udah ngasaika Jehovah nya manah, lalu nama kebuah nya beguna mikirka baka ni Jehovah udah nulung nuan?

¹² Jehovah nulung Raja David tan natka mayuh penanggul. Nya alai David bejaku ngena peneleba diri empu lebuh iya madahka: ‘Awakka kita empu ngasaika pemadas Jehovah. Beberekat meh orang ke nemu pengelikun lebuh sida begulai enggau Iya.’ (Mas. 34:8) Ayat nya nunjukka kitai patut ngasaika pemanah Jehovah ba  kitai empu. Lebuh macha Bup Kudus, litaricha kitai sereta datai begempuru, nuan nemu baka ni Petara udah nulung sida ke bukai mengkang tetap ati. Tang lebuh kaul nuan enggau Jehovah majak teguh agi, nuan ulih meda baka ni Jehovah nulung nuan. Baka ni nuan empu ngasaika Jehovah nya endang manah?

¹³ Tiap iku orang Kristian udah ngasaika pemanah Jehovah enggau chara ti enda sama. Iya mai tiap iku kitai datai semak ngagai Iya enggau Anak Iya. Jesus madahka: ‘Nadai orang ulih datai ngagai aku enti Apai ke udah ngirumka aku, enda ngasuh iya.’ (Jhn. 6:44) Kati nuan ngasaika Jehovah udah narit nuan semak ngagai Iya? Tauka kati nuan ngumbai, ‘Jehovah udah narit apai indai aku semak ngagai Iya lalu aku semina nitih aja’? Kingatka, lebuh nuan nyerahka diri empu ngagai Jehovah lalu dibaptisa, enggau nya nuan empu bisi kaul ti spesial enggau Iya. Bup Kudus madahka: ‘Orang ke rinduka Petara, dikelala Petara.’ (1 Kor. 8:3) Seruran beterima kasih ke ungkup ti udah diberi Jehovah ngagai nuan ba gerempung Iya.

14, 15. Baka ni pengawa nginjil ulih nulung nuan ngembuan pengarap ti teguh agi?

¹⁴ Nuan mega ngasaika pemanah Jehovah lebuh Iya meri nuan pemerani kena bejaku pasal pengarap enggau orang bukai, enda ngira ba pengawa nginjil tauka ba sekula. Nuan engka tusah deka nginjil ngagai orang ke sama sekula enggau nuan. Nuan engka irau pasal baka ni sida nerima utai ti dipadah nuan. Kelebih agi nuan engka takut nerangka pengarap nuan ba mua mayuh orang. Nama ulih nulung nuan?

¹⁵ Pikirka kebuah nuan arapka utai ti dikearapka nuan. Enti iring ke dikena belajar bisi ba jw.org dalam jaku ke dikena nuan, kena meh iya. Iring nya ulih nulung nuan berundingka utai ti dikearapka nuan, nama kebuah nuan arapka utai nya, lalu baka ni nuan ulih nerangka utai ti dikearapka nuan ngagai orang bukai. Enti nuan amat andal sereta udah besedia enggau manah, nuan tentu deka nusui pasal Jehovah.—Jer. 20:8, 9.

16. Nama ulih meri nuan pemerani kena bejaku pasal utai ti dikearapka nuan?

¹⁶ Taja pan nuan udah besedia enggau manah, nuan engka agi berasai takut deka nerangka utai ti dikearapka nuan. Seiku menyadi Kristian indu ke beumur 18 taun, ke udah dibaptisa lebuh iya beumur 13 taun, madahka: “Aku nemu utai ti dikearapka aku, tang kekadang aku tusah deka mansutka utai diperunding aku ngena jaku.” Nya alai iya nguji berandau pasal pemendar ngena chara ti biasa sereta enda beguai. Ku iya madahka: “Orang ke sama kelas enggau aku enda nangi bejaku pasal utai ti dikereja sida. Aku pan enda patut nangi. Nya alai aku deka nyebut siti-siti utai enggau ngelansa, baka, ‘Hari nya aku benung ngajar Bup Kudus, lalu . . . ’ Udah nya aku nampung batang cherita aku. Taja pan utai ke dulu disebut aku ukai pasal Bup Kudus, tang kesuah iya sida deka nemu pasal utai ke digaga aku lebuh ngajar Bup Kudus. Kekadang sida bisi nanya pasal utai ke digaga aku. Suah agi aku ngena  chara tu, senang agi aku nginjil. Lalu udah nya, aku seruran berasai puas!”

17. Nama agi ulih nulung kitai bejaku enggau orang bukai?

¹⁷ Lebuh orang bukai ngasaika nuan amat ibuh sereta masa sida, sida deka senang agi masa nuan sereta utai ti dikearapka nuan. Olivia ke beumur 17 taun lalu dibaptisa lebuh umur iya biak agi, madahka: “Aku seruran irau enggaika orang ngumbai aku keras penemu, enti sema aku nyebut pasal Bup Kudus lebuh berandau.” Udah nya chara iya berunding berengkah berubah. Ari ke kelalu berundingka ati iya ke irau, ku iya berunding: “Mayuh orang ke nembiak nadai nemu pasal Saksi-Saksi Jehovah. Semina kitai aja bala Saksi ke ditemu sida. Nya alai ulah kitai nentuka sekalika sida deka nerima tauka enda. Baka ni enti kitai malu tauka takut tauka tusah deka bejaku pasal pengarap kitai, tauka baka ni enti kitai nadai pemerani lebuh kitai bejaku? Udah nya sida engka ngumbai kitai enda temegahka sapa kitai. Sida indah enda nerima enggau manah laban kitai kurang pengandal. Taja pia, enti kitai bejaku enggau berani sereta andal enggau utai ke dikearapka kitai, ngaga utai tu baka randau besehari-hari, enggau tu sida deka agi masa kitai.”

18. Nama patut digaga nuan ngambika ulih bebendar ngulihka pengelepas ke diri empu?

¹⁸ Kitai udah nemu, bebendar ngulihka pengelepas ke diri empu endang tanggungjawap ti berat. Kena ngereja tu, nuan patut macha sereta belematika Bup Kudus, besampi ngagai Jehovah, sereta berunding enggau dalam pasal semua chara ke udah dikena Iya nulung nuan. Ngereja semua tu deka nulung nuan andal agi ke Jehovah nya endang Pangan nuan. Tu deka meransang nuan berandau enggau orang pasal utai ti dikearapka nuan.—Bacha Masmur 73:28.

19. Nama penguntung enti bebendar ngulihka pengelepas ke diri empu?

¹⁹ Ku Jesus madahka: ‘Enti orang deka nitihka aku, awakka iya badu agi berundingka diri empu, ngesan regang [“tiang pemerinsa,” NW] iya, lalu nitihka aku.’ (Mat. 16:24) Amat, ngambika ulih nitihka Jesus, tiap iku orang Kristian patut nyerahka diri empu ngagai Jehovah lalu dibaptisa. Tang tu semina pun pengidup ti ngerinduka ati diatu, lalu tu deka mai ngagai pengidup ti belama iya ba dunya baru Petara. Nya alai naka ulih meh bebendar ngulihka pengelepas ke diri empu!