1-3. (a) Nama kebuah kitai pechaya kitai ulih nyadi kawan Petara? (b) Sapa orang ke deka dikerandauka kitai ba artikel tu?

 DALAM Bup Kudus, tiga kali Abraham dikumbai kawan Petara. (2 Ban. 20:7; Isa. 41:8; Jas. 2:23) Semina iya aja orang ke dikumbai kawan Petara dalam Bup Kudus. Kati semina Abraham aja mensia ke kala nyadi kawan Jehovah? Enda. Bup Kudus madahka semua kitai tau bulih peluang tu.

² Jaku Petara bisi mayuh cherita pasal orang ke tetap ati ti nangika Jehovah, bisi pengarap ba Iya sereta nyadi kawan rapat Iya. (Bacha Masmur 25:14.) Sida nyadi begian ari “mayuh amat saksi” ke dipadah Paul. Semua sida ke enda sebaka tu kawan Petara.—Heb. 12:1.

³ Aram meh kitai beratika tiga iku kawan Jehovah ke dipadah dalam Bup Kudus: (1) Rut, seiku indu balu ke biak ti taluk ari menua Moap, (2) Hesekiah, raja ke tetap ati ari menua Judah, sereta (3) Maria, indai Jesus ke baruh ati. Nama ulih dipelajarka kitai ari chara tiap iku sida ke nyadi kawan Petara?

4, 5. Nama pemutus ti berat ke patut digaga Rut, lalu nama kebuah iya tusah ngaga pemutus nya? (Peda gambar ba pun artikel.)

⁴ Naomi enggau dua iku menantu indu iya, Rut seduai Orpah, bejalai jauh ari menua Moap ngagai menua Israel. Ba rantau jalai, Orpah deka pulai ngagai menua iya, Moap. Tang Naomi keran deka pulai ngagai menua iya empu, Israel. Baka ni enggau Rut? Iya patut ngaga pemutus ti besai. Kati iya deka pulai ngagai menua iya, Moap, ngambika ulih begulai enggau sida sebilik, tauka deka terus enggau Naomi, mentua indu iya, lalu mupuk ngagai nengeri Betlehem?—Rut 1:1-8, 14.

⁵ Bala Rut sebilik diau ba menua Moap. Iya ulih pulai ngagai sida, lalu sida engka ulih nyaga iya. Iya ngelala orang Moap, nemu jaku sida sereta chara pengidup orang Moap. Tang Naomi enda ulih nyamin utai tu ngagai Rut ba nengeri Betlehem. Lalu Naomi irau enggai ke enda tegigaka laki tauka endur diau ke Rut. Nya alai, Naomi ngasuh iya pulai ngagai menua Moap. Baka ke ditemu kitai, Orpah “udah pulai ngagai bala iya empu, ngagai petara iya.” (Rut 1:9-15) Tang Rut mutuska diri enggai pulai ngagai bala iya empu enggau petara pelesu sida.

 6. (a) Nama pemutus ti betul ke digaga Rut? (b) Nama kebuah Boas ngumbai Rut orang ke ngiga pengelikun ari Jehovah?

⁶ Rut engka nemu pasal Jehovah ari laki iya tauka Naomi. Iya nemu Jehovah nya enda baka petara orang Moap. Iya rinduka Jehovah sereta nemu Jehovah patut dikerindu sereta disembah iya. Nya alai, Rut ngaga pemutus ti betul. Ku iya madah ngagai Naomi: ‘Bala nuan deka nyadika bala aku, lalu Petara nuan deka nyadika Petara aku.’ (Rut 1:16) Ati kitai diperansang lebuh kitai berunding pasal pengerindu Rut ngagai Naomi. Tang utai ti ngerinduka ati nya, pengerindu Rut ngagai Jehovah. Tu mega ngerinduka ati Boas, ke muji Rut ‘ngiga pengelikun ari Jehovah.’ (Bacha Rut 2:12.) Jaku ke dikena Boas ulih ngingatka kitai pasal anak burung ke belindung di baruh sayap apai burung. (Mas. 36:7; 91:1-4) Pia mega, Jehovah nyaga sereta merekat Rut ketegal pengarap iya. Rut nadai kebuah deka nesal ati enggau pemutus iya.

 7. Nama ulih nulung sida ke kakang ati nyerahka pengidup sida ngagai Jehovah?

⁷ Mayuh orang nemu pasal Jehovah, tang sida milih enggai belindung ba Iya. Sida kakang ati nyerahka pengidup sida ngagai Iya lalu dibaptisa. Enti nuan ngasaika utai ti sama, pikirka kebuah nuan kakang ati. Semua orang nyembah seiku petara tauka utai bukai. (Jos. 24:15) Pemutus ti betul iya nya nyembah Petara ti bendar. Lebuh nuan nyerahka diri empu ngagai Jehovah, nuan nunjukka diri bisi pengarap, Iya deka nyaga nuan. Lalu Iya deka nulung nuan mengkang nyembah Iya, taja pan bisi napi penanggul. Tu meh utai ti digaga Petara ke Rut.

 8. Padahka sejarah pengidup Hesekiah.

⁸ Sejarah pengidup Hesekiah enda sebaka enggau enggi Rut. Iya nyadi sebegian ari bansa ke udah nyerahka diri ngagai Petara. Tang ukai semua orang Israel mengkang tetap ati. Apai Hesekiah, Raja Ahas nya jai. Iya enda bebasaka  Rumah Sembiang Petara, lalu ngansak orang nyembah petara bukai. Ahas indah nyerahka sekeda menyadi lelaki Hesekiah ditunu idup-idup nyadika pemeri ngagai seiku petara pelesu. Tu ngenakutka Hesekiah lebuh iya agi mit!—2 Raj. 16:2-4, 10-17; 2 Ban. 28:1-3.

9, 10. (a) Nama kebuah Hesekiah jampat ringat? (b) Nama kebuah kitai enda patut ringat ngagai Petara? (c) Nama kebuah kitai enda patut ngumbai sejarah pengidup kitai nentuka kitai deka nyadi orang ke baka ni?

⁹ Pengawa Ahas ke jai engka ngasuh anak iya Hesekiah ringat ngagai Jehovah. Kemaya hari tu, sekeda orang ke natka penanggul ti mit agi ari enggi Hesekiah ngasaika diri bisi kebuah ‘nyalahka Jehovah’ tauka ringat ngagai gerempung Iya. (J-lam. 19:3) Sida ke bukai ngasaika sejarah pengidup sida sebilik ke enda manah ulih ngasuh sida bisi pengidup ke enda manah tauka ngulang penyalah apai indai sida. (Esk. 18:2, 3) Kati tu amat?

¹⁰ Pengidup Hesekiah nunjukka saut iya enda! Nadai kebuah tau ringat ngagai Jehovah. Iya nadai ngereja utai ti enda manah ngagai orang. (Jop 34:10) Endang amat, apai indai ulih ngajar bala anak sida ngereja utai ti manah tauka enda manah. (J-lam. 22:6; Kol. 3:21) Tang tu ukai reti sejarah pengidup diri sebilik ulih nentuka kitai deka nyadi orang ke baka ni. Nama kebuah? Laban Jehovah udah meri kitai pemeri ulih bebas milih. Reti nya kitai ulih milih ngereja utai ti manah tauka enda manah. (U-dat. 30:19) Baka ni Hesekiah ngena pemeri ti berega nya?

11. Nama ngasuh Hesekiah nyadi seiku ari raja menua Judah ti pemadu manah?

¹¹ Taja pan apai Hesekiah nya seiku ari raja ti pemadu jai ba menua Judah, tang Hesekiah nyadi seiku ari raja ti pemadu manah. (Bacha 2 Raja 18:5, 6.) Iya milih enda nitihka pengawa apai iya ti jai. Tang, iya milih mendingka bala nabi Jehovah iya nya Isaiah, Mikah sereta Hosia. Iya beratika jaku lalau enggau jaku ajar ari sida. Tu meransang iya mutarka mayuh penusah ke udah digaga apai iya. Iya nuchi Rumah Sembiang, minta Petara ngampunka dosa orang Israel sereta muai semua engkeramba ke  bisi ba menua nya. (2 Ban. 29:1-11, 18-24; 31:1) Udah nya, lebuh raja Senakrip menua Asiria ngemba deka nyerang Jerusalem, Hesekiah nunjukka diri ngembuan pemerani sereta pengarap ti besai. Iya arapka jaga ari Jehovah sereta ngeringka rayat iya. (2 Ban. 32:7, 8) Hesekiah kala nyadi sumbung, tang lebuh Jehovah ngajar iya, iya ngemaruhka diri empu. (2 Ban. 32:24-26) Endang amat, Hesekiah nya teladan ti manah ke patut dititihka kitai. Iya enda ngelakka sejarah pengidup sida sebilik ngerusakka pengidup iya. Tang, iya nunjukka diri kawan Jehovah.

12. Baka Hesekiah, baka ni mayuh orang Kristian kemaya hari tu nunjukka diri kawan Jehovah?

¹² Dunya kemaya hari tu jai sereta nadai pengerindu. Nya alai, mayuh anak mit dibesaika apai indai ke nadai pengerindu sereta pengibuh. (2 Tim. 3:1-5) Taja pan mayuh orang Kristian kemaya hari tu datai ari sejarah pengidup diri sebilik ke enda manah, tang sida udah milih ngemansangka kaul enggau Jehovah. Baka Hesekiah, sida nunjukka sejarah pengidup sida sebilik enda ulih nentuka sida deka nyadi orang ke baka ni dudi hari ila. Petara udah meri kitai pemeri ulih bebas milih, lalu kitai ulih milih nyembah sereta bebasaka Petara, baka ke digaga Hesekiah.

13, 14. Nama sekeda utai ke ngirauka ati Maria, tang baka ni iya nyaut jaku melikat Gabriel?

¹³ Betaun-taun pengudah jeman Hesekiah, seiku indu ke biak ti baruh ati benama Maria, bisi kaul ti istimewa enggau Jehovah sereta diberi pengawa ti istimewa. Iya deka betubuh-bisi, lalu ngadaka sereta ngemesaika Anak Petara! Jehovah tentu balat rinduka sereta arapka Maria nyentukka Maria diberi basa ti besai nya. Tang baka ni asai ati iya, lebuh iya baru ninga pengawa ke diberi ngagai iya?

¹⁴ Kitai suah bejaku pasal basa ti besai ke udah diberi ngagai Maria. Tang, nama sekeda utai ke ngirauka ati iya? Ngambika chunto, melikat Gabriel madahka Maria deka betubuh-bisi taja pan iya nadai besetubuh enggau lelaki bukai. Tang, melikat Gabriel nadai madah ngagai sida sebilik tauka orang bukai pasal baka ni Maria tau betubuh-bisi. Nama deka dipikir sida? Baka ni Maria deka ngasuh Josep pechaya pasal iya ke nadai kala beleman enggau lelaki bukai? Nambahka nya, iya bisi tanggungjawap ti besai ngemesaika Anak Petara nyadi mensia! Kitai enda nemu semua pengirau ati Maria, tang kitai nemu utai ti digaga iya pengudah melikat Gabriel bejaku enggau  iya. Ku Maria: “Aku tu nembiak Tuhan. Awakka utai nya nyadi ba aku nitihka jaku nuan.”—Luk. 1:26-38.

15. Nama kebuah pengarap Maria ngerinduka ati?

¹⁵ Pengarap Maria endang amat ngerinduka ati! Iya sedia deka ngereja sebarang utai ke diasuh sama baka seiku ulun ke indu. Iya arapka Jehovah deka ngintu sereta nyaga iya. Baka ni Maria tau bisi pengarap ti tegap baka nya? Pengarap ukai utai ti dibai kitai ari ada. Tang kitai tau bulih pengarap, enti kitai ngemansangka iya sereta minta Petara merekatka pengawa kitai. (Eps. 2:8) Maria bebendar ngeringka pengarap iya. Baka ni kitai nemu? Aram kitai berandauka chara iya mending sereta pasal utai ti disebut iya.

16. Nama nunjukka Maria nya orang ke jampat mending?

¹⁶ Chara Maria Mending. Bup Kudus madahka, kitai “enda tau enda jampat mending, lubah mansutka jaku.” (Jas. 1:19) Maria orang ke jampat mending. Bup Kudus madahka, iya mending enggau manah utai ti didinga iya, kelebih agi utai ti ditemu iya pasal Jehovah. Iya belematika utai ti pemadu beguna nya. Siti ari chunto nya lebuh maya Jesus ada, bala pengibun bedus madah ngagai Maria pasal pesan ari seiku melikat. Udah nya, lebuh Jesus beumur 12 taun, iya nyebut utai ti ngalitka ati Maria. Ari dua iti pekara tu, Maria mending, ngingatka, sereta berunding enggau dalam pasal utai ti udah didinga iya.—Bacha Luke 2:16-19, 49, 51.

17. Nama ulih dipelajarka kitai pasal Maria ari chara iya bejaku?

¹⁷ Pasal utai ti disebut Maria. Bup Kudus nadai madah mayuh utai ngagai kitai pasal utai ti disebut Maria. Jaku iya ti pemadu panjai bisi ba Luke 1:46-55. Ayat nya nunjukka Maria nemu Sempekat Lama enggau manah. Baka ni? Leka jaku ke dikena Maria sama enggau leka sampi ke disebut Hanah, indai Samuel. (1 Sam. 2:1-10) Tu nunjukka Maria ngambi ayat ari Bup Kudus kira-kira 20 kali lebuh iya bejaku. Endang amat, iya rindu bejaku pasal pemendar ke udah dipelajarka iya ari Kawan iya ti pemadu besai, Jehovah.

18. Baka ni chara kitai ulih neladan pengarap Maria?

¹⁸ Baka Maria, kekadang kitai engka nerima pengawa ke dikumbai kitai kelalu tusah ari Jehovah. Aram meh kitai neladan chunto Maria, enggau baruh ati nerima pengawa sereta arapka Jehovah deka nulung kitai. Kitai mega ulih neladan pengarap Maria, lebuh kitai bejimat mendingka Jehovah sereta belematika utai ti udah dipelajarka kitai pasal Iya enggau tuju Iya. Udah nya kitai ulih enggau gaga ati madah ngagai orang bukai pasal utai ti udah dipelajarka kitai.—Mas. 77:11, 12; Luk. 8:18; Rom. 10:15.

19. Seraya kitai neladan pengarap ti ngerinduka ati ari Bup Kudus, nama ulih dipechayaka kitai?

¹⁹ Endang amat, Rut, Hesekiah, enggau Maria nya kawan Jehovah, sama baka Abraham. Sida nyadi begian ari “mayuh amat saksi” ke mega bisi peluang nyadi kawan Petara. Arapka kitai terus neladan pengarap ti ngerinduka ati nya. (Heb. 6:11, 12) Enti kitai ngereja nya, kitai ulih nganti berekat nyadi kawan Jehovah belama iya!