1. Nama semaya Jehovah ngagai orang ke udah nesal ati?

 JEHOVAH meh ke meri Adat ngagai kitai. Iya mega Penempa sereta Hakim kitai. Taja pia, Iya mega dikumbai Apai kitai ti bepengerindu ba serega. (Mas. 100:3; Isa. 33:22) Enti kitai ngereja dosa lalu udah nya nesal ati, Jehovah ukai semina ulih ngampunka kitai, tang Iya mega keran deka ngereja nya. (Mas. 86:5) Nengah nabi Isaiah, Jehovah besemaya: “Kita nyau mirah dibalut dosa, tang Aku deka masu kita tuchi baka seleju.”—Isa. 1:18.

2. Nama patut digaga enti kitai deka bisi kaul ti manah enggau orang bukai?

² Ketegal enda sempurna, semua kitai nyebut sereta ngereja utai ke ngemediska ati orang bukai. (Jas. 3:2) Tang, tu ukai reti iya kitai enda ulih ngembuan kaul ti manah enggau orang bukai. Enti kitai belajar deka ngampun, kitai ulih ngemansangka kaul ti manah enggau orang bukai. (J-lam. 17:9; 19:11; Mat. 18:21, 22) Enti bisi orang nyebut tauka ngereja utai ke ngasuh kitai enda nyamai ati, Jehovah deka kitai ngampunka iya. (Kol. 3:13) Tu ketegal, Jehovah mega “jampat ngampun” kitai.—Isa. 55:7.

3. Nama deka dipejuraika kitai dalam artikel tu?

³ Dalam artikel tu, kitai deka bejuraika baka ni mensia ti enda sempurna ulih neladan Jehovah sereta ngampun orang bukai. Ni bagi dosa ke patut dipadah ngagai bala tuai gempuru? Nama kebuah Jehovah meransang kitai ngampunka orang bukai? Lalu nama ulih dipelajarka kitai ari sekeda bala  menyadi ke balat merinsa ketegal dosa orang bukai?

4. (a) Nama patut digaga seiku orang Kristian lebuh iya ngereja dosa ti besai? (b) Nama tanggungjawap bala tuai gempuru lebuh sida betemu enggau orang nya?

⁴ Enti kitai nemu bisi orang udah ngereja dosa ti besai, kitai patut madah ngagai bala tuai gempuru. Sekeda chunto dosa ti besai bisi dipadah ba 1 Korint 6:9, 10. Dosa ti besai nya amat jai lalu ngelanggar adat Petara. Enti seiku orang Kristian ngereja dosa ti besai, iya patut besampi minta pengampun ari Jehovah. Pia mega, iya patut madahka nya ngagai bala tuai gempuru. (Mas. 32:5; Jas. 5:14) Kitai nemu, semina Jehovah aja bisi hak ngampunka dosa enggau pengabis iya nengah genselan tebus. b Tang Jehovah deka bala tuai gempuru bejalaika tanggungjawap sida. Nama tanggungjawap bala tuai gempuru ba pekara tu? Sida patut ngaga pemutus nitihka ayat Bup Kudus kena nentuka sekalika orang ke bedosa nya ulih terus ba eklisia tauka enda. (1 Kor. 5:12) Kena ngereja tu, bala tuai gempuru nguji ngiga saut ke sekeda tanya tu: Kati iya sengaja ngereja dosa nya? Kati iya ngaga pelan kena ngereja dosa nya? Kati iya nguji ngelalaika dosa nya ari ditemu orang bukai? Kati iya ngereja dosa nya mayuh kali? Keberat agi, kati bisi bukti ke nunjukka iya amat udah nesal ati? Nama utai ke nunjukka Jehovah udah ngampunka iya?—SKR. 3:19.

5. Nama penguntung ke diulih ari pengawa bala tuai gempuru?

⁵ Tuju bala tuai gempuru betemu enggau orang ke besalah nya, laban deka ngaga pemutus ti sama enggau pemutus ke udah digaga Jehovah ba serega. (Mat. 18:18) Baka ni atur tu mai penguntung ngagai eklisia? Atur tu ulih nyaga eklisia. Tu ketegal, orang ke bedosa ti enda nesal ati ulih ngachau nembiak Jehovah ke bukai. (1 Kor. 5:6, 7, 11-13; Tit. 3:10, 11) Atur tu mega ulih nulung orang ke bedosa nesal ati sereta diampunka Jehovah. (Luk. 5:32) Bala tuai gempuru deka besampi ngarika orang ke bedosa ke udah nesal ati nya. Sida mega deka nulung iya ngemanahka baru kaul iya enggau Jehovah.—Jas. 5:15.

6. Kati ulih Jehovah ngampunka orang ke udah dibuai ari gerempung? Terangka.

⁶ Baka ni enti orang ke bedosa nya enda nesal ati lebuh bala tuai gempuru betemu enggau iya? Enti pia, iya deka dibuai ari gerempung. Enti iya ngereja jenayah, bala tuai gempuru enda ngelindung iya ari nerima ukum ari piak bekuasa. Jehovah ngemendarka piak bekuasa ngakim sereta ngukum sapa-sapa aja ke ngelanggar undang-undang, enda ngira iya udah nesal ati tauka enda. (Rom. 13:4) Tang, enti iya sedarka penyalah diri sereta nesal ati, lalu ngubah runding sereta ulah iya, Jehovah sanggup ngampunka iya. (Luk. 15:17-24) Tu ulih nyadi taja pan iya udah ngereja dosa ti besai.—2 Ban. 33:9, 12, 13; 1 Tim. 1:15.

7. Nama reti ngampun orang ke bedosa ngagai kitai?

⁷ Sekalika Jehovah deka ngampunka orang ke bedosa tauka enda, nya ukai tanggungjawap kitai! Taja pia, kati bisi utai ke patut digaga kitai? Ambika chunto, seiku orang engka ngereja penyalah ngagai kitai, nyengkaum penyalah ti besai, lalu udah nya iya minta ampun. Tang ba maya bukai iya engka enda minta ampun. Taja pia, kitai ulih milih deka ngampunka iya. Reti nya, badu agi ringat ngagai iya. Enti kitai balat pedis ati, kitai  engka begunaka mayuh awak sereta usaha kena ngampunka iya. Majalah Menara Jaga, 15 September 1994, madahka: “Lebuh nuan ngampunka orang, nya ukai reti iya nuan nerima penyalah iya. Tang orang ke deka ngampun pechaya, Jehovah deka ngakim pekara nya enggau sempurna. Jehovah nya Hakim ti lurus, lalu Iya deka ngatur pekara nya ba maya ti ngena.” Nama kebuah Jehovah meransang kitai ngampun? Lalu nama kebuah kitai yakin Iya deka ngakim pekara nya enggau chara ti lurus?

8. Enti kitai ngampun orang bukai, baka ni nya nunjukka kitai beterima kasihka pengasih Jehovah?

⁸ Ngampun nunjukka kitai beterima kasihka pengasih Jehovah. Dalam siti sempama, Jesus nyemaka Jehovah baka seiku raja ke muai utang seiku ari orang gaji iya. Utang orang gaji nya kelalu mayuh nyentukka iya enda tebayarka utang nya. Tang, orang gaji nya enda nunjukka pengasih ngagai orang gaji ke bukai, ke semina berutang mimit aja ba iya. (Mat. 18:23-35) Nama utai ke deka diajar Jesus ngagai kitai? Enti kitai amat beterima kasihka pemesai pengasih Jehovah ngagai kitai, kitai deka agi ngampunka orang bukai. (Mas. 103:9) Beberapa taun ti udah, siti majalah Menara Jaga madahka: “Enda ngira berapa mayuh kali kitai udah ngampunka orang bukai, nya enda ulih dibandingka enggau Petara ke udah ngampun tiap iku kitai nengah tebus Jesus.”

9. Ngagai sapa Jehovah ngayanka pengasih? (Matthew 6:14, 15)

⁹ Enti kitai ngampunka orang bukai, Jehovah mega deka ngampunka kitai. Jehovah ngayanka pengasih ngagai orang ke kasihka orang bukai. (Mat. 5:7; Jas. 2:13) Jesus nerangka tu lebuh iya ngajar bala murid iya chara besampi. (Bacha Matthew 6:14, 15.) Kitai mega ulih belajar utai ti sama ari utai ti dipadah Jehovah ngagai Jop. Jop balat pedis ati enggau utai ke dipadah Elipas, Bildat sereta Sopar. Jehovah ngasuh Jop besampika sida. Pengudah nya, Jehovah merekatka iya.—Jop 42:8-10.

10. Baka ni kitai ngemediska diri empu enti kitai terus ringat ngagai orang ke ngemediska ati kitai? (Epesus 4:31, 32)

¹⁰ Enti kitai terus ringat, kitai ngemediska diri empu. Pengeringat nya baka ma ti berat. Lalu Jehovah dekaka kitai muai pengeringat ngambika kitai berasai lantang. (Bacha Epesus 4:31, 32.) Jehovah madahka: “Anang ringat, lalu badu agi pedis ati!” (Mas. 37:8) Jaku lalau nya ulih nulung kitai. Enti kitai terus pedis ati enggau orang ke ngemediska ati kitai, kebendar iya kitai ngemediska diri empu ari segi fizikal enggau mental. (J-lam. 14:30) Enti kitai terus ringat, nya engka nadai kesan ba orang nya. Ambika chunto, enti kitai ngirup rachun, kitai empu ke pedis, ukai orang bukai. Nya alai, lebuh kitai ngampunka orang bukai, kitai nguntungka diri empu. (J-lam. 11:17) Ati enggau runding kitai ulih berasai tenang, lalu kitai ulih neruska pengawa kitai ngagai Jehovah.

11. Nama utai ke dipadah Bup Kudus pasal malas dendam? (Rome 12:19-21)

¹¹ Jehovah aja ke ulih malas dendam. Jehovah enda meri kitai hak malas dendam ngagai orang ke bedosa ngagai kitai. (Bacha Rome 12:19-21.) Enda baka Petara, kitai enda sempurna. Nya alai, kitai enda nemu semua utai lalu enda ulih ngakim enggau betul. (Heb. 4:13) Kekadang, asai ati kitai ulih ngachau kitai. Tu ngasuh kitai tusah deka nemu utai ke patut digaga. Nengah roh kudus,  Jehovah ngiring James nulis: ‘Laban pengeringat kita enda ulih mansutka pengelurus ti dikedekaka Petara.’ (Jas. 1:20) Kitai ulih pechaya, Jehovah deka ngereja utai ti betul lalu nentuka semua utai ti enda lurus diputarka.

12. Baka ni kitai ulih nunjukka diri pechayaka pengelurus Jehovah?

¹² Enti kitai ngampunka orang bukai, kitai nunjukka diri pechayaka pengelurus Jehovah. Lebuh kitai arapka Jehovah deka ngakim semua utai enggau lurus, kitai nunjukka diri pechaya Jehovah deka mutarka semua penusah ke udah nyadi ketegal dosa. Ba dunya baru, “semua utai ti lama, enda agi dikingatka.” (Isa. 65:17) Tang lebuh kitai balat dikemediska orang, kati kitai amat ulih badu agi ringat ngagai iya? Peratika baka ni sekeda bala menyadi udah mujur ngereja tu.

13-14. Nama ulih dipelajarka nuan pasal pengampun ari pengalaman Tony enggau José?

¹³ Mayuh ari bala menyadi Kristian kitai mutus deka ngampun taja pan sida balat pedis ati ketegal penyalah orang bukai. Nama berekat ke diulih sida ketegal ngereja nya?

¹⁴ Peratika utai ke nyadi ngagai Tony, c ke diau ba Pilipina. Betaun-taun sebedau iya nyadi Saksi-Saksi Jehovah, seiku ari menyadi tuai iya dibunuh seiku lelaki ke benama José. Maya nya, Tony orang ke amat kasar enggau mangah. Nya alai, iya deka malas dendam. José ditangkap lalu dijil ketegal penyalah ke digaga iya. Pengudah José dilepaska ari jil, Tony amat keran deka ngiga iya lalu munuh iya. Ketegal nya Tony meli pistol. Tang ba maya ti sama, Tony berengkah belajarka Bup Kudus enggau Saksi-Saksi Jehovah. Ku iya, “Ari utai ti dipelajarka aku ba Bup Kudus, aku belajar, aku patut ngubah runding enggau ulah aku. Tu nyengkaum muai pengeringat aku.” Nyau kelama, Tony dibaptisa lalu dipilih nyadi tuai gempuru. Uji ngambarka asai ati Tony lebuh nemu José mega udah dibaptisa nyadi Saksi-Saksi Jehovah! Lebuh Tony enggau José betemu, seduai iya merap pangan diri, lalu Tony madahka iya udah ngampunka José.  Tony mega madahka diri amat gaga ati laban udah ngampunka José. Lalu Tony tusah deka ngambarka asai ati iya ti amat gaga. Au, Jehovah merekatka Tony laban iya deka ngampun.

15-16. Ari pengalaman Peter enggau Sue, nama ulih dipelajarka nuan pasal ngampun orang bukai?

¹⁵ Ba taun 1985, Peter enggau Sue datai begempuru baka selama. Tang enda memukai, bisi utai meletup enggau balat ba Palan Gempuru nya. Seiku lelaki udah masang bom ba dalam Palan Gempuru nya! Ketegal nya, Sue balat bakal. Tu nyengkaum mata enggau pending iya udah rusak. Iya mega enda agi ulih ensium utai. d Peter enggau Sue suah berunding, ‘Sapa ke sanggup ngereja utai ti jai baka nya?’ Betaun-taun udah nya, orang ke masang bom ditangkap lalu dijil seumur idup. Orang nya ukai Saksi-Saksi Jehovah. Lebuh ditanya sekalika seduai iya udah ngampunka orang nya tauka enda, Peter enggau Sue madah: “Jehovah ngajar, enti kitai terus berunding pasal pengeringat sereta pemedis ati kitai, tu ulih ngachau pengerai kitai ari segi fizikal, emosi sereta mental. Nyadi, kami duai minta Jehovah nulung kami ngampunka orang nya ngambika kami ulih idup enggau lantang.”

¹⁶ Kati Peter enggau Sue senang deka ngampunka orang ke masang bom nya? Enda senang. Seduai iya nampung baru: “Kekadang, kesan ari utai ke nyadi ngagai Sue ngachau pengidup kami duai. Nya alai, bisi maya iya kami berasai ringat. Tang kami enggai terus berundingka utai nya. Nyadi, asai ati ke baka nya nyau nadai agi. Kebendar iya, enti orang ke masang bom nya nyadi Saksi Jehovah dudi hari ila, kami deka ngelaluka iya. Pengalaman tu ngajar kami, prinsip Bup Kudus ulih ngelepaska kitai! Kami mega berasai lantang ati laban nemu Jehovah deka muai semua pemedis ke diasaika kami enda lama da agi.”

17. Ari pengalaman Myra, nama ulih dipelajarka nuan pasal ngampun orang bukai?

 ¹⁷ Myra belajar pasal pemendar lebuh iya udah kawin sereta bisi dua iku anak ti agi mit. Tang laki iya enda nerima pemendar. Beberapa lama udah nya, laki iya butang sereta ninggalka sida sebilik. Ku Myra: “Lebuh laki aku ninggalka kami sebilik, aku ngasaika utai ti sama baka orang bukai ke ditinggalka orang ti dikesayau. Aku berasai tekenyit, tusah deka pechaya, balat tusah ati, ngesal, nyalahka diri empu sereta ringat.” Taja pan seduai ukai laki bini agi, tang Myra agi pedis ati ketegal ditinggalka laki iya. Ku Myra agi: “Taja pan utai nya nyadi bebulan-bulan ti udah, tang aku agi berasai balat irau sereta ringat. Lalu aku sedar asai ati tu ngachau kaul aku enggau Jehovah sereta orang bukai.” Diatu Myra enda agi ringat sereta enda ngarapka utai ti jai nyadi ngagai laki iya ke suba. Iya ngarapka laki iya ke suba ulih nerima pemendar dudi hari ila. Ketegal nya, iya ulih fokus ngagai semua utai ti disemaya Jehovah ke jemah ila. Taja pan Myra seiku indai tunggal, tang iya udah mujur ngemesaika dua iku anak iya nyadi nembiak Jehovah. Diatu, Myra gaga ati nyembah Jehovah enggau dua iku anak iya sereta ruang bilik sida.

18. Ketegal Jehovah nya Hakim ti Pemadu Tinggi, nama utai ke ulih dikearapka kitai ari Iya?

¹⁸ Kitai ulih lantang ati laban nemu kitai enda ibuh mutuska chara ngakim tiap iku orang! Ketegal Jehovah nya Hakim ti Pemadu Tinggi, Iya deka ngatur semua pengawa ngakim. (Rom. 14:10-12) Kitai ulih pechaya enggau pengabis ati, Jehovah deka seruran ngakim sejalai enggau standard Iya ti sempurna, bekaul enggau utai ti betul enggau salah. (P-kal. 18:25; 1 Raj. 8:32) Iya enda sekali-kali ngereja utai ti enda lurus!

19. Nama asil ari pengelurus Jehovah ti sempurna?

¹⁹ Kitai enda sabar nganti lebuh Jehovah deka mutarka semua penyai ke nyadi ketegal mensia enda sempurna sereta bedosa. Maya nya, Jehovah deka muai semua pemedis kitai ba fizikal sereta emosi. (Mas. 72:12-14; Pem. 21:3, 4) Semua pemerinsa ke diasaika kitai diatu deka nadai agi. Tang bisi utai ke ulih digaga kitai seraya nganti maya nya datai. Aram meh kitai terus neladan Jehovah ke ngampun orang bukai.