BA orang Hebrew ke diau ba Menua ti Udah Disemaya, taun sida berengkah lebuh sida ngereja pengawa ngeradu tanah enggau betanam. Sida ngereja tu ba bulan September tauka Oktober nitihka kalendar diatu.

Orang ngira pemanjai satu bulan nitihka kitaran bulan. Tu kira-kira 29 tauka 30 hari. Sida ngira pemanjai taun nitihka mata panas. Taja pia, taun ke dikira bepelasarka kitaran bulan, pandak agi ari taun ke dikira bepelasarka mata panas. Nya alai, sida patut ngiga chara ngambika dua iti chara ngira tu sejalai enggau pangan diri. Sida ngereja tu enggau nambah hari, tauka bisi maya iya sida nambahka satu bulan baka ke digaga sida sebedau taun baru berengkah. Enggau chara tu, kalendar nya deka sejalai enggau musin nanam tauka ngetau.

Taja pia ba jeman Moses, Petara madahka, bulan keterubah kena taun orang Israel nya ba bulan Abib tauka Nisan. (P-sut. 12:2; 13:4) Nya kira-kira ba bulan Mac tauka April. Bisi pengerami ke diintu orang Israel ba bulan Nisan, iya nya Pengerami Ngetau.—P-sut. 23:15, 16.

Nitihka bup The History of the Jewish People in the Age of Jesus Christ, (175 B.C.–A.D. 135), Emil Schürer madahka: “Senang aja deka nemu kemaya deka nambahka satu bulan ngagai kalendar.” Iya madah, Pengerami Paska patut diintu lebuh bisi bulan peranama kena bulan Nisan (14 Nisan). Pengudah hari ke bisi timpuh siang enggau malam ti sama nya belalu, nya baru sida ulih ngintu Pengerami Paska. Semua tu mesti nyadi lebuh musin bungai. Tang, enti ujung taun nya udah deka datai lalu haribulan kena Pengerami Paska nya deka nyadi sebedau hari ke betul nya, iya nya lebuh musin bungai, orang Judah deka nambahka satu bulan agi sebedau bulan Nisan.

Saksi-Saksi Jehovah ngena chara tu lebuh nentuka kemaya haribulan ke patut dikena ngintu pengawa Ngingatka Pemati Jesus. Tu nyadi maya musin bungai ke sejalai enggau Nisan 14 nitihka kalendar Hebrew. Eklisia ba serata dunya deka dipadah tumu agi pasal haribulan tu.

Tang baka ni orang Hebrew nemu kemaya bulan nya deka abis lalu bulan ti baru deka berengkah? Kemayaharitu nuan engka meda kalendar nuan ke udah dichelak tauka aplikasi kalendar ke bisi ba perengka elektronik nuan. Tang tu enda senang ba jeman Bup Kudus.

Maya jeman Noah, pemanjai satu bulan nya 30 hari. (P-kal. 7:11, 24; 8:3, 4) Udah nya, ba orang Hebrew timpuh satu bulan nya enda ditetapka ba 30 hari. Ba sida, bulan nya berengkah lebuh anak bulan ulih dipeda. Nya 29 tauka 30 hari pengudah bulan ke sebedau nya berengkah.

Bisi sekali, David enggau Jonatan madahka tu pasal siti bulan. Ayat nya madah: ‘Pengerami Anak Bulan deka nyadi pagila.’ (1 Sam. 20:5, 18) Nyadi, tu reti iya ba maya nya timpuh sebulan udah dikira enggau tumu agi. Tang baka ni orang Israel nemu kemaya bulan baru deka berengkah? Adat enggau atur orang Judah ke dikumbai Mishnah bisi meri kitai sekeda penerang. Nitihka utai ke ditulis nya, pengudah orang Judah pulai ari nyadi orang tangkap ba Babilon, Raban Kunsil, iya nya kot tinggi orang Judah, bisi tanggungjawap senentang tu. Sepemanjai tujuh bulan, Raban Kunsil nya deka baum ba 30 haribulan ninting bulan. Sida bisi tanggungjawap kena nentuka kemaya bulan baru deka berengkah. Baka ni sida nentuka tu?

Sekeda lelaki deka bediri ba endur ti tinggi ngelingi Jerusalem ngambika ulih ngiga anak bulan maya malam hari. Enti sida bisi meda anak bulan, sida deka enggau jejampat madah ngagai Raban Kunsil. Lebuh orang dalam Raban tu bisi bukti ti chukup pasal anak bulan ke udah dipeda, sida deka madahka bulan baru deka berengkah. Tang baka ni enti bisi remang tauka kabus lalu sida enda ulih meda anak bulan nya? Sida deka  madahka, bulan nya bisi 30 hari lalu bulan baru deka berengkah.

Kena madahka bulan baru deka berengkah, sida deka nungkunka api ba atas Bukit Kana ke semak enggau Jerusalem. Lalu, ba endur ti tinggi di Israel, api dikena ngerembaika berita tu. Beberapa taun bekau nya, orang deka dikena mai berita tu. Nya alai, orang Judah ba Jerusalem sereta ba endur bukai ulih nemu kemaya bulan baru deka berengkah. Ketegal nya, semua orang ulih ngintu pengerami ninting taun ba maya ti sama.

Charta tu ulih nulung nuan meretika bulan, pengerami sereta musin ba kalendar orang Hebrew.