1. Nama utai ke deka ditentuka apai indai ke Kristian sebedau anak sida ulih dibaptisa?

“BEBULAN aku madahka diri deka dibaptisa ngagai Apai enggau Indai, lalu seduai iya suah berandauka utai nya enggau aku. Seduai iya deka aku nemu pemutus ke digaga aku nya ukai utai ti mit. Nya alai kena 31 Disember 1934, hari ke besai reti ba pengidup aku pan datai.” Nitih ku Blossom Brandt, nya meh utai ti nyadi lebuh iya ngaga pemutus deka dibaptisa. Kemayaharitu, apai indai mega deka nulung anak ngaga pemutus ngambika ulih dibaptisa. Enti anak nadai kebuah ti berat deka betangguh dibaptisa, tu ulih ngachau kaul anak enggau Jehovah. (Jas. 4:17) Nya alai sebedau anak ulih dibaptisa, apai indai deka nentuka anak udah sedia megai tanggungjawap nyadi murid Kristus.

2. (a) Nama utai ti ngirauka ati sekeda tuai ti ngabas? (b) Nama deka dipejuraika kitai ba artikel tu?

 ² Sekeda tuai ti ngabas beratika mayuh orang nembiak ke deka manggai umur 20 taun sereta ke baru udah beumur 20 taun bedau agi dibaptisa, taja pan sida dibesaika dalam pemendar. Sida selalu enggau begempuru, nginjil, sereta ngumbai diri empu Saksi-Saksi Jehovah. Taja pia, ketegal sekeda pekara sida bedau nyerahka diri ngagai Jehovah sereta dibaptisa. Bisi nya ketegal apai indai ngumbai anak bedau sedia deka dibaptisa. Ba artikel tu, kitai deka bejuraika empat iti utai ke ngasuh sekeda apai indai enda meransang anak dibaptisa.

3. Nama dikeirauka apai indai Blossom?

³ Apai indai Blossom ke disebut ba genteran satu tentu irau, sekalika Blossom udah nemu reti dibaptisa lalu nya ukai utai ti mit. Baka ni apai indai ulih nemu sekalika anak udah sedia nyerahka diri ngagai Jehovah tauka bedau?

4. Baka ni pesan Jesus ba Matthew 28:19, 20 ulih nulung apai indai kemayaharitu?

⁴ Bacha Matthew 28:19, 20. Bup Kudus nadai madahka berapa umur orang patut dibaptisa. Tang apai indai ulih berundingka reti ngaga orang nyadi murid. Dalam jaku Gerika, rambai jaku ‘ngaga orang nyadi murid’ ke dikena ba Matthew 28:19 reti iya orang ke ngajar patut bisi tuju iya nya nulung orang ke diajar nyadi pemelajar tauka murid. Murid nya orang ke belajar sereta nemu reti utai ti diajar Jesus, lalu deka ngasika Jesus. Nya alai, apai indai patut bisi tuju lebuh ngajar anak, iya nya deka nulung anak nyerahka diri ngagai Jehovah sereta nyadi murid Kristus kenyau ari anak udah ada. Anak ke agi mit bedau layak dibaptisa. Taja pia Bup Kudus madahka orang ke agi mit ulih nemu reti utai ku Bup Kudus sereta rinduka pemendar.

5, 6. (a) Nitihka penerang ari Bup Kudus pasal Timoti, nama ulih ditemu kitai pasal baptisa iya? (b) Baka ni apai indai ulih nulung anak?

⁵ Kenyau ari biak Timoti ngaga pemutus deka gawa ke Jehovah. Rasul Paul madahka Timoti berengkah belajarka pemendar ari Bup Kudus kenyau ari “agi mit.” Apai Timoti enda nyembah Jehovah. Tang indai enggau ini Timoti nulung iya rinduka Bup Kudus. Ketegal tu pengarap Timoti tegap. (2 Tim. 1:5; 3:14, 15) Umur iya engka deka manggai 20 taun tauka baru udah beumur 20 taun lebuh iya layak nerima tanggung pengawa ti spesial ba eklisia.—SKR. 16:1-3.

⁶ Ukai semua anak ulih ngaga pemansang ba pengarap dalam umur ti sama. Sekeda anak ulih nemu reti pemendar, ngaga pemutus enggau manah, lalu deka dibaptisa lebuh agi biak. Sida ke bukai sedia deka dibaptisa lebuh sida nyau udah besai mimit. Apai indai enda tau ngansak anak ngambika ulih dibaptisa. Tang, sida nulung tiap iku anak ngaga pemansang nitihka ulih diri. Apai indai gaga ati lebuh anak ulih nitihka jaku ba Jaku Dalam 27:11. (Bacha.) Tang apai indai patut ingat, tuju sida iya nya nulung anak nyadi murid. Nya alai apai indai patut nanya diri empu, ‘Kati anak aku udah chukup penemu ngambika ulih nyerahka diri ngagai Jehovah sereta dibaptisa?’

7. Kati orang patut nemu semua utai ke diajar Bup Kudus sebedau iya ulih dibaptisa? Terangka.

⁷ Seraya apai indai ngajar anak, sida nulung anak nemu pemendar enggau manah agi. Penemu nya ulih meransang anak nyerahka diri ngagai Petara. Tang tu ukai reti bala anak patut nemu semua utai ke diajar dalam Bup Kudus sebedau sida ulih nyerahka diri ngagai Petara sereta dibaptisa. Tiap iku murid Jesus patut seruran belajar taja pan udah dibaptisa. (Bacha Kolosi 1:9, 10.) Nya alai ni penyampau penemu ke patut diulih seiku-seiku orang sebedau iya ulih dibaptisa?

8, 9. Nama udah nyadi ngagai jejaga rumah jil di menua Pilipi, lalu nama ulih dipelajarka kitai ari peneleba iya?

⁸ Peneleba ari ruang bilik menya ulih nulung apai indai kemayaharitu. (SKR. 16:25-33) Ba taun 50, Paul dianjung bejalaika pengawa nyadi pengerintis seberai tasik kali kedua di menua Pilipi. Lebuh din, Paul seduai Silas dipetenah, ditangkap, lalu dijil. Malam nya, tanah berenyang balat amat lalu ngujungka semua pintu ba rumah jil nyau abis tebuka. Jejaga rumah jil ngumbai semua orang jil udah rari, lalu iya deka munuh diri. Tang Paul nagang iya. Lalu Paul seduai Silas ngajar pemendar pasal Jesus ngagai jejaga rumah jil nya enggau sida sebilik. Sida sebilik pechayaka utai ti diajar pasal Jesus sereta nemu sida patut ngasika Jesus. Nya alai sida dibaptisa tekala nya. Nama ulih dipelajarka kitai ari peneleba sida?

⁹ Jejaga rumah jil nya engka udah pinchin ari nyadi soldadu Rome. Iya enda entu nemu pasal Bup Kudus. Nya alai ngambika ulih nyadi orang Kristian, iya patut nemu batang ajar pemendar ari Bup Kudus, nemu utai ti dikedekaka Jehovah ba nembiak Iya, sereta ngasika jaku ajar ari Jesus. Utai ke dipelajar iya enda lama udah nulung iya deka dibaptisa. Pia mega, iya patut terus belajar taja pan udah dibaptisa. Nya alai, lebuh anak madahka diri deka dibaptisa ketegal rinduka Jehovah sereta deka ngasika Iya, nama ulih digaga nuan? Nuan tau ngasuh iya berandauka utai tu enggau bala tuai gempuru ngambika sida ulih nemu sekalika iya layak dibaptisa tauka enda. * (Peda nota kaki.) Baka semua orang Kristian ti udah dibaptisa, iya patut terus nambahka penemu pasal Jehovah seagi-agi iya idup.—Rom. 11:33, 34.

10, 11. (a) Nama dikenuluka sekeda apai indai? (b) Nama utai ke amat ulih nyaga anak?

¹⁰ Sekeda apai indai ngumbai anak ulih dibaptisa pengudah anak nampung  pelajar ke tinggi agi sereta bulih kereja ti manah. Bisi tuju ke baka tu endang manah, tang apai indai patut nanya diri empu: ‘Kati utai nya amat ulih nulung anak aku mujur? Kati utai nya sejalai enggau utai ti dipelajarka kami ari Bup Kudus? Baka ni Jehovah deka kitai ngena pengidup diri?’—Bacha Pengajar 12:1.

¹¹ Anang enda ingat, dunya enggau utai ba dunya tu enda sejalai enggau peneka sereta runding Jehovah. (Jas. 4:7, 8; 1 Jhn. 2:15-17; 5:19) Ngembuan kaul ti rapat enggau Jehovah nya utai ti pemadu manah ke ulih nyaga anak ari Sitan, ari dunya Sitan, sereta ari runding dunya ti jai. Enti apai indai ngenuluka pelajar sereta kereja ti manah ba pengidup, anak deka ngumbai utai ba dunya tu beguna agi ari kaul sida ti rapat enggau Jehovah. Tu ulih ngenusahka. Kita ke apai indai, kati kita deka ngelakka dunya tu ngajar anak kita pasal utai ti ulih mai pemujur? Nya alai enti deka mujur sereta ngembuan pengaga ti bendar, kitai patut ngenuluka peneka Petara ba pengidup.—Bacha Masmur 1:2, 3.

12. Nama kebuah sekeda apai indai ngumbai nya manah agi enti anak bedau dibaptisa?

¹² Seiku indai madahka kebuah iya enggai anak indu iya dibaptisa. Ku iya madahka: “Siti kebuah besai nya bekaul enggau atur dibuai ari gerempung.” Baka menyadi indu tu, sekeda apai indai ngasaika manah agi enti anak bedau dibaptisa nyentuk ngagai umur iya chukup tuai sereta nemu nyeliah ari ngereja utai ti beli. (P-kal. 8:21; J-lam. 22:15) Apai indai nya engka ngumbai anak tau enda ibuh dibuai ari gerempung enti anak bedau dibaptisa. Tang kati penemu tu betul?—Jas. 1:22.

13. Enti orang enda dibaptisa, kati reti nya iya tau enda ibuh betanggungjawap ngagai Jehovah? Terangka.

¹³ Apai indai tentu enggai anak dibaptisa  enti anak bedau sedia nyerahka pengidup diri ngagai Jehovah. Tang enti sida ngumbai anak tau enda ibuh betanggungjawap ngagai Jehovah seagi-agi anak bedau dibaptisa, tu penemu ti salah. Anak deka betanggungjawap ngagai Jehovah enti anak udah nemu utai ti dikumbai Jehovah betul tauka salah. (Bacha James 4:17.) Apai indai ke nyadi teladan tentu deka meransang anak sida dibaptisa. Taja pan anak agi biak, sida ngajar anak rinduka utai ti dikumbai Jehovah ngena sereta begedika utai ti dikumbai Iya salah. (Luk. 6:40) Pengerindu ke Jehovah deka nyaga anak ari ngereja dosa ti besai, laban anak deka ngereja utai ti dikumbai Jehovah ngena.—Isa. 35:8.

14. Baka ni bala tuai gempuru ulih nyukung utai ke digaga apai indai?

¹⁴ Bala tuai gempuru ulih nyukung utai ke digaga apai indai lebuh nyebut utai ti positif maya berandau pasal juluk ati ba pengawa ke Jehovah. Lebuh seiku menyadi indu beumur enam taun, iya madahka Menyadi Russell bisi berandau enggau iya. Ku iya madahka, “Menyadi Russell ngena awak sepengelama 15 minit berandau enggau aku pasal juluk ati aku ba pengarap.” Nama nyadi? Beberapa taun udah nya, menyadi indu nya nyadi pengerintis, lalu iya udah ngerintis lebih ari 70 taun! Nyadi, jaku ti positif sereta meransang ulih ngubah pengidup orang. (J-lam. 25:11) Bala tuai gempuru ulih meransang bala apai indai enggau bala anak sama nulung enggau pengawa ba Palan Gempuru. Sida ulih ngasuh bala anak ngereja pengawa ke setipak enggau umur sereta penau sida.

15. Baka ni bala menyadi ba eklisia ulih nulung orang ke nembiak?

¹⁵ Baka ni bala menyadi ba eklisia ulih nulung? Sida ulih nulung enggau mandangka diri ibuhka orang ke nembiak. Ambika chunto, nuan ulih beratika utai ke nunjukka sida deka rapat  enggau Jehovah. Kati orang ke nembiak bisi meri saut ti meransang lebuh begempuru? Kati iya bisi enggau sekula ba program gempuru tengan minggu? Kati iya bisi nginjil ngagai orang ba sekula? Kati iya bisi ngereja utai ti ngena lebuh iya diuji ngereja utai ti salah? Enti bisi, jejampat meh muji iya! Kitai ulih netapka juluk ati deka berandau enggau orang ke nembiak sebedau enggau pengudah begempuru. Utai ke baka tu ulih nulung sida ngasaika diri sama enggau raban begempuru ti besai.—Mas. 35:18.

16, 17. (a) Nama kebuah bala anak patut dibaptisa? (b) Nama utai ti ulih ngagaka ati apai indai? (Peda gambar ba pun artikel.)

¹⁶ Siti peluang ti pemadu besai ke dikembuan apai indai iya nya ngajar anak rinduka Jehovah. (Mas. 127:3; Eps. 6:4) Bala anak bansa orang Israel menya diserahka ngagai Jehovah pengudah sida ada. Tang bala anak kitai kemayaharitu enda. Taja pan apai indai rinduka Jehovah sereta pemendar, tu ukai reti bala anak ulih ngereja utai ti sama. Kenyau ari anak ada, apai indai patut bisi tuju iya nya nulung anak nyadi murid, nyerahka diri ngagai Jehovah sereta dibaptisa. Nama utai ke beguna agi? Pengawa anak ti nyerahka diri ngagai Jehovah, dibaptisa, sereta tetap ati gawa ke Iya ulih nyelamatka anak nya lebuh maya penusah ti besai.—Mat. 24:13.

¹⁷ Lebuh Blossom Brandt deka dibaptisa, apai indai iya deka nemu sekalika iya amat udah sedia. Pengudah nemu Blossom udah sedia, seduai iya nyukung pemutus iya. Blossom madahka utai ti digaga apai iya ba malam sebedau iya dibaptisa: “Apai ngempuruka kami semua lalu besampi. Apai madahka diri gaga ati ngagai Jehovah laban aku udah ngaga pemutus deka nyerahka pengidup diri ngagai Jehovah.” Lebih ari 60 taun udah nya, ku Blossom madahka: “Aku seruran ingatka utai ke nyadi malam nya!” Kita ke apai indai mega patut gaga sereta puas ati lebuh meda anak kita udah nyadi nembiak Jehovah ti udah nyerahka diri ngagai Iya sereta dibaptisa.