1, 2. (a) Baka ni asai ati sekeda apai indai lebuh anak sida deka dibaptisa? (b) Nama kebuah patut nanya chalun baptisa sekalika sida udah nyerahka diri ngagai Jehovah tauka bedau? (Peda gambar ba pun artikel.)

APAI indai Maria beratika Maria ke agi nembiak bediri enggau sida bukai ti deka dibaptisa. Pencheramah nanya dua iti tanya. Maria nyaut enggau nyawa ti inggar sereta terang. Enda lama udah nya, iya dibaptisa.

² Apai indai Maria temegah ati laban Maria udah nyerahka pengidup diri ngagai Jehovah lalu dibaptisa. Tang sebedau nya, indai iya bisi irau mimit. Iya berunding: ‘Kati Maria kelalu biak dibaptisa? Kati iya nemu pengawa nyerahka diri ngagai Jehovah nya ukai utai ti mit? Kati iya patut nganti dulu sebedau dibaptisa? Mayuh apai indai nanya utai ti sama lebuh anak sida madahka diri deka dibaptisa. (P-jar. 5:5) Lalu pemutus nyerahka pengidup diri ngagai Jehovah sereta dibaptisa nya pemutus ti besai.—Peda kutak “ Kati  Nuan Udah Nyerahka Diri ngagai Jehovah?”

3, 4. (a) Baka ni rasul Peter nunjukka baptisa nya ukai utai ti mit? (b) Nama kebuah Peter mandingka baptisa nya enggau pengawa Noah ke ngaga bandung?

³ Rasul Peter mandingka baptisa nya enggau pengawa Noah ke ngaga bandung. Ku iya madahka: ‘Maya Noah menya, lebuh bandung benung digaga, Petara liat ati nganti. Bandung nya mai beberapa iku orang, iya nya lapan iku aja, ngambika sida selamat maya ai bah. Utai ke nyadi nya ngambarka baptisa ti nyelamatka kita diatu nengah pengangkat Jesus Kristus ari mati. Baptisa nya ukai pengawa bebuaika utai ti kamah ari tubuh, tang kena minta ati ti beresi ari Petara.’ (1 Pet. 3:20, 21, NW) Bandung ke digaga Noah enggau terang nunjukka iya deka ngereja peneka Petara enggau pengabis ati. Noah bebendar ngereja pengawa ke diberi Petara. Ketegal Noah arapka Petara, iya enggau sida sebilik selamat maya Bah Besai datai. Tang nama ulih dipelajarka kitai ari ayat ke ditulis Peter?

⁴ Lebuh orang meda bandung nya, sida nemu Noah arapka Petara. Pia mega lebuh orang meda chalun baptisa dibaptisa, sida nemu orang nya udah nyerahka pengidup diri ngagai Petara laban iya arapka Kristus ti udah diangkatka idup baru. Baka Noah, orang ke dibaptisa ngasi sereta ngereja pengawa ke diberi Petara. Petara mega deka nyelamatka nembiak Iya ti taluk lebuh Iya ngerusak dunya ti jai tu, sama baka Iya ke udah nyelamatka Noah maya Bah Besai. (Mrk. 13:10; Pem. 7:9, 10) Nya alai, kitai patut nyerahka pengidup diri ngagai Jehovah  sereta dibaptisa. Enti orang betangguh deka dibaptisa, iya ulih lenyau peluang idup belama iya.

5. Nama deka dipelajarka kitai ba artikel tu?

⁵ Diatu kitai udah nemu, baptisa nya ukai utai ti mit. Nya alai kitai patut nemu saut ngagai tiga iti tanya tu: Nama dipadah Bup Kudus pasal baptisa? Nama patut digaga orang sebedau iya ulih dibaptisa? Nama kebuah kitai patut ingat baptisa nya utai ti beguna, lebuh ngajar anak tauka pemelajar Bup Kudus?

6, 7. (a) Nama reti baptisa ke digaga John? (b) Baptisa sapa ke enda sebaka enggau baptisa orang bukai, lalu nama kebuah?

⁶ Bup Kudus madahka, John Pemaptisa nya orang ti keterubah maptisa orang bukai. (Mat. 3:1-6) Nama kebuah orang minta diri dibaptisa iya? Sida deka nunjukka diri udah nesal ati ke dosa, iya nya, sida ngaku diri enda ngasika Adat Moses sereta balat nesal ati. Tang baptisa ke besai reti ti digaga John nadai kaul enggau nesal ati ke dosa. John diberi peluang ti besai ulih maptisa Jesus, Anak Petara ti sempurna. (Mat. 3:13-17) Jesus nadai kala ngereja utai ti salah. Nya alai iya tau enda ibuh nesal ati. (1 Pet. 2:22) Tang nama kebuah Jesus dibaptisa? Iya nunjukka diri udah sedia ngena pengidup iya ngereja peneka Petara.—Heb. 10:7.

⁷ Pengudah Jesus berengkah nginjil, bala murid iya pan berengkah maptisa orang. (Jhn. 3:22; 4:1, 2) Bala orang nya mega dibaptisa laban sida udah nesal ati ke dosa diri ti ngelaban Adat Moses. Tang pengudah Jesus mati lalu diangkatka idup baru, orang ke deka nyadi murid iya ukai dibaptisa ketegal nesal ati.

8. (a) Nama pesan ke diberi Jesus pengudah iya diangkatka idup baru? (b) Nama kebuah orang Kristian patut dibaptisa?

⁸ Enda lama pengudah Jesus diangkat idup baru ba taun 33, iya bejaku enggau lebih ari 500 iku bala lelaki, indu sereta nyengkaum anak mit. Maya nya iya engka bisi nyebut: ‘Nya alai, bejalai kita ngagai semua bansa lalu gaga sida nyadi murid aku, maptisa sida dalam nama Apai, Anak enggau roh kudus, lalu ajar sida ngasika semua pesan ti udah diberi aku ngagai kita.’ (Mat. 28:19, 20; 1 Kor. 15:6) Jesus ngasuh bala murid iya ngaga orang nyadi murid. Nya alai, barang sapa ke deka nyadi murid iya, tauka deka ngesan “tangkun” iya, patut dibaptisa. (Mat. 11:29, 30) Ngambika ulih diterima Petara, orang patut ngaku Jesus nya orang ke dikena Petara ngamatka tuju Iya. Nya baru orang nya ulih dibaptisa. Bup Kudus bisi mayuh bukti ke nunjukka bala murid Jesus ba abad keterubah nemu baptisa nya ukai utai ti mit. Lalu sida enda betangguh deka dibaptisa.—SKR. 2:41; 9:18; 16:14, 15, 32, 33.

9, 10. Nama ulih ditemu kitai pasal baptisa ari seiku lelaki Etiopia enggau ari Saul?

⁹ Bacha Kereja Rasul 8:35, 36. Seiku lelaki Etiopia ke udah enggau pengarap orang Judah benung pulai ke rumah pengudah nyembah Petara ba Rumah Sembiang di Jerusalem. Melikat Jehovah ngasuh Philip nginjil ngagai orang Etiopia nya sereta ngajar iya “Berita Manah pasal Jesus.” Nama digaga orang Etiopia nya? Iya nemu iya patut ngaku Jesus nya Tuan, sereta ngereja utai  ti dikedekaka Petara ba orang Kristian. Nya alai iya minta dibaptisa.

¹⁰ Siti agi chunto iya nya lelaki bansa Judah ke benama Saul. Semua bansa Judah udah diserahka ngagai Jehovah. Tang Jehovah enda agi nerima sida laban sida enda ngasika Iya. Taja pia Saul pechaya bansa Judah agi nyembah Jehovah enggau chara ti ngena, nya alai iya merinsaka orang Kristian. Tang bisi sekali, Jesus ti udah diangkatka idup baru bejaku enggau Saul ari serega. Nama digaga Saul? Iya enggau ati ti gaga nerima bantu ari murid Jesus ke benama Ananias. Bup Kudus madahka: “Udah nya iya [Saul] angkat lalu dibaptisa.” (SKR. 9:17, 18; Gal. 1:14) Udah bekau nya, iya dikelala orang ngena nama rasul Paul. Peratika, sepengudah Saul nemu Jesus nya orang ke dikena Petara ngamatka tuju Iya, Saul enda betangguh deka dibaptisa.—Bacha Kereja Rasul 22:12-16.

11. (a) Nama ngasuh pemelajar Bup Kudus deka dibaptisa? (b) Baka ni asai ati kitai lebuh bisi orang dibaptisa?

¹¹ Sama mega enggau mayuh pemelajar Bup Kudus ke tuai enggau ke biak kemayaharitu. Ketegal sida rindu sereta pechayaka utai ti dipadah Bup Kudus, sida keran deka nyerahka pengidup diri ngagai Jehovah sereta dibaptisa. Lalu cheramah baptisa nya utai ti suah dianti ba gempuru besai sehari enggau konvensyen. Bala Saksi Jehovah gaga ati meda bala pemelajar Bup Kudus nerima pemendar sereta deka dibaptisa. Bala apai indai mega gaga ati lebuh anak sida deka dibaptisa. Maya taun nginjil 2017, lebih ari 284,000 iku orang dibaptisa. Baptisa sida nunjukka sida udah nyerahka pengidup diri ngagai Jehovah. (SKR. 13:48) Sida enggau terang nemu orang Kristian enda tau enda dibaptisa. Tang nama patut digaga sida sebedau ulih dibaptisa?

12. Nama patut digaga pemelajar Bup Kudus sebedau iya ulih dibaptisa?

¹² Sebedau pemelajar Bup Kudus ulih dibaptisa, sida enda tau enda belajarka pemendar pasal Petara, tuju Iya bekaul enggau mensia sereta bumi, sereta utai ti udah digaga Iya kena nyelamatka mensia. (1 Tim. 2:3-6) Kelimpah ari nya, sida patut ngemansangka pengarap sida ngambika ulih nulung sida ngasika adat Petara sereta badu ngereja utai ti dipegedika Iya. (SKR. 3:19) Tu beguna laban taja pan orang nya udah nyerahka diri ngagai Petara, Petara enggai nerima iya enti iya majak ngereja utai ti dipegedika Petara. (1 Kor. 6:9, 10) Tang agi bisi utai bukai ke patut digaga. Pemelajar Bup Kudus patut datai begempuru, lalu enggau tetap nginjil sereta ngajar orang bukai. Tiap iku orang ke deka nitihka Kristus enda tau enda ngereja utai tu. (SKR. 1:8) Enti pemelajar Bup Kudus udah ngereja semua utai nya, nya baru iya ulih nyerahka pengidup diri ngagai Petara dalam sampi iya empu sereta dibaptisa.

13. Nama patut digaga kitai enti kitai nemu sida patut dibaptisa ngambika ulih nyadi orang Kristian ti bendar?

¹³ Lebuh nulung anak kitai sereta pemelajar Bup Kudus ngereja utai ke patut digaga sida, kitai anang enda ingat, orang ke deka nyadi murid Jesus patut dibaptisa. Lalu lebuh bisi maya ti ngena, kitai enda nangi deka madah ngagai sida pasal pemesai reti nyerahka diri ngagai Petara sereta dibaptisa. Kitai deka sida terus ngaga pemansang lalu dibaptisa!

14. Nama kebuah kitai enda tau ngansak orang ngambika ulih dibaptisa?

¹⁴ Nadai orang tau ngansak anak tauka pemelajar Bup Kudus ngambika ulih dibaptisa. Jehovah nadai mejal kitai nyembah Iya. (1 Jhn. 4:8) Lebuh ngajar orang bukai, kitai patut nulung sida nemu ngembuan kaul enggau Jehovah nya utai ti beguna. Enti pemelajar Bup Kudus amat beterima kasih ketegal udah nemu pemendar pasal Petara sereta deka ngereja semua utai ke patut digaga orang Kristian ti bendar, iya tentu deka dibaptisa.—2 Kor. 5:14, 15.

15, 16. (a) Kati bisi tatak umur ngagai orang ke deka dibaptisa? Terangka. (b) Nama kebuah pemelajar Bup Kudus patut dibaptisa nyadi Saksi-Saksi Jehovah taja pan iya udah dibaptisa lebuh iya enggau jalai pengarap bukai?

¹⁵ Nadai tatak umur ditetapka ngagai orang ke deka dibaptisa. Pemansang tiap iku pemelajar enda sama. Mayuh ari sida dibaptisa lebuh agi nembiak, lalu mengkang tetap ati ngagai Jehovah seraya sida mansang besai tuai. Bisi nya udah tuai lebuh sida belajarka Bup  Kudus sereta dibaptisa. Bisi mega nyau udah beumur lebih ari 100 taun!

¹⁶ Seiku indu ke belajarka Bup Kudus udah dibaptisa ba beberapa iti jalai pengarap bukai. Nya kebuah iya nanya pengajar Bup Kudus iya sekalika iya patut dibaptisa baru tauka enda. Pengajar iya mandangka ayat Bup Kudus ke ulih nyaut tanya iya. Udah iya nemu utai ti dikedekaka Bup Kudus, iya dibaptisa, taja pan umur iya nyauka 80 taun. Nama ulih dipelajarka kitai ari peneleba iya? Jehovah nerima baptisa kitai enti kitai udah nemu utai ti amat pasal peneka Iya. Taja pan kitai udah dibaptisa lebuh kitai enggau jalai pengarap bukai, tang kitai patut dibaptisa baru ngambika ulih nyadi Saksi-Saksi Jehovah.—Bacha Kereja Rasul 19:3-5.

17. Nama patut dibelematika orang ba hari iya dibaptisa?

¹⁷ Hari orang dibaptisa nya hari ti ngagaka ati. Nya mega maya belematika reti nyerahka diri ngagai Petara sereta dibaptisa. Sida patut bebendar ngereja semua utai ti dikedekaka Petara ba orang Kristian ti bendar. Bala murid Jesus ‘ukai idup ke diri empu agi, tang idup ke iya ke udah mati lalu diangkatka idup baru ngarika sida.’—2 Kor. 5:15; Mat. 16:24.

18. Nama tanya ti deka dikerandauka kitai ba artikel pengudah tu?

¹⁸ Ari artikel tu kitai nemu, pemutus deka nyadi orang Kristian ti bendar nya ukai utai ti mit. Nya kebuah indai Maria berundingka tanya ti disebut ba pun artikel tu. Kita ke apai indai engka kala nanya diri empu: ‘Kati anak aku amat udah sedia deka dibaptisa? Kati anak aku amat udah ngelala Jehovah ngambika ulih nyerahka diri ngagai Iya? Kati anak aku patut bulih pelajar sereta kereja ti manah sebedau dibaptisa? Baka ni enti anak aku ngereja dosa ti besai pengudah dibaptisa?’ Kitai deka berandauka semua tanya tu ba artikel pengudah tu. Kitai mega deka nemu baka ni apai indai ke Kristian ulih ngembuan runding ti patut pasal baptisa.