1. Nama penanggul ke ditapi orang Kristian ba abad keterubah?

URUNG entara taun 62 enggau 64, rasul Peter nulis ngagai ‘nembiak Petara ke tasah lalu diau ngachir ba sebelah menua Pontus, Galatia, Kapadosia, Asia, enggau Bitinia.’ (1 Pet. 1:1) Bala menyadi tu datai ari mayuh bengkah endur. Sida napi “pemerinsa ti balat,” sereta begunaka jaku peransang enggau iring. Sida mega diau ba maya ti balat charut. Ku Peter nulis: “Pengujung semua utai nyau semak.” Kurang ari sepuluh taun, Jerusalem deka dirusak. Nama ulih nulung orang Kristian di semua endur napi maya ti tusah nya?—1 Pet. 4:4, 7, 12.

2, 3. Nama kebuah Peter ngasuh bala menyadi iya nyambut pangan diri? (Peda gambar ba pun artikel.)

² Siti utai ke diasuh Peter kereja bala menyadi nya ‘nyambut pangan diri.’ (1 Pet. 4:9) Leka jaku “sambut” dalam jaku Gerika reti iya “rinduka, tauka manah enggau, orang ke enda dikelala.” Tang Peter ngasuh bala menyadi iya nyambut “pangan diri,” taja pan sida udah ngelala pangan diri  sereta sama begulai ngereja utai. Baka ni ulah ke deka nyambut bala menyadi meri penguntung ngagai sida?

³ Ulah nya nulung sida rapat agi enggau pangan diri. Kati baka nuan? Agi nuan ingatka maya ti ngagaka ati lebuh orang ngangau nuan datai ngagai rumah iya? Pia mega lebuh nuan ngangau orang datai ngagai rumah nuan, tu nulung nuan rapat agi enggau sida. Siti chara kitai ulih ngelala bala menyadi iya nya enggau nyambut sida ngagai rumah kitai. Orang Kristian ke idup maya jeman Peter patut rapat agi enggau pangan diri laban penanggul majak besai-sebesai. Kitai mega patut ngereja utai ti sama ba “hari ti penudi” tu.—2 Tim. 3:1.

4. Nama tanya ke deka dikerandauka kitai ba artikel tu?

⁴ Baka ni chara kitai ulih nyambut “pangan diri”? Nama utai ke nekul kitai nyambut bala menyadi Kristian, lalu baka ni kitai ulih mutarka nya? Nama ulih nulung kitai nyadi temuai ti manah?

5. Baka ni kitai ulih nyambut temuai ba gempuru Kristian?

⁵ Ba gempuru: Jehovah enggau gerempung Iya ngasuh kitai datai begempuru. Kitai deka semua orang, kelebih agi sida ke baru berasai diterima. (Rom. 15:7) Sida mega temuai Jehovah. Nya alai kitai deka sida berasai nyamai, enda ngira baka ni gamal tauka chara sida begari. (Jas. 2:1-4) Ulih nuan minta orang ke datai kediri duduk sama enggau nuan? Iya tentu berasai gaga enti nuan nulung iya nemu utai ti dikerandau sepemanjai program tauka nulung iya ngiga ayat Bup Kudus ke dibacha. Tu chara ti pemadu badas ‘nyambut temuai.’—Rom. 12:13.

6. Kelebih agi, sapa bagi temuai ke patut disambut kitai?

⁶ Mai makai: Orang maya jeman Bup Kudus menya suah mandangka diri deka nerima temuai enggau ngangau orang bukai datai makai ba rumah sida. Nya nunjukka sida deka bebakih sereta begulai enggau temuai sida. (P-kal. 18:1-8; P-ulu. 13:15; Luk. 24:28-30) Kelebih agi, sapa bagi temuai ke patut disambut kitai? Sida nya bala menyadi Kristian kitai ba eklisia. Seraya dunya tu majak jai-sejai, kitai patut bepanggai ba bala menyadi Kristian sereta nyadi pangan ti taluk ke sida. Ba taun 2011, Raban ti Ngiring nukar maya jam belajarka Menara Jaga ke ruang bilik Betel di Amerika Serikat ari jam 6:45 lemai ngagai 6:15 lemai. Nama kebuah? Ngambika bala menyadi ba Betel senang agi nyambut sereta begulai enggau pangan diri enti sema gempuru tumu tembu. Pampang opis ke bukai mega ngaga ubah ti sama. Tu peluang ti manah ke ruang bilik Betel ngambika ulih ngelala pangan diri.

7, 8. Baka ni kitai ulih nyambut bala pencheramah ke datai ngagai Palan Gempuru?

⁷ Kekadang bala menyadi lelaki ari eklisia bukai, tuai ti ngabas, tauka pengari ari Betel datai meri cheramah ba eklisia kitai. Ulih kitai ngena peluang tu nyambut sida? (Bacha 3 John 5-8.) Siti chara kitai ulih nyambut sida iya nya enggau mai sida makai ba rumah kitai.

⁸ Seiku menyadi indu di Amerika Serikat ngenang: “Betaun kami duai laki aku udah mai mayuh pencheramah enggau bini sida ngagai rumah kami.” Tiap iti  peneleba nya ngeringka pengarap seduai laki iya lalu seduai iya mega berasai gaga. Ku iya madahka: “Kami enda nesalka utai nya.”

9, 10. (a) Sapa ke engka diau lama ba rumah kitai? (b) Ulih orang ke bisi rumah ti mit nulung? Beri siti chunto.

⁹ Temuai ke diau lama: Maya jeman Bup Kudus menya, orang selalu nyediaka alai endur diau ke bala temuai. (Jop 31:32; Plm. 22) Kemayaharitu, kitai mega patut baka nya. Bala tuai ti ngabas suah begunaka alai endur diau lebuh sida ngelawa eklisia. Pia mega enggau bala pemelajar sekula teokratik sereta bala sukarela ke nirika bengunan. Lalu baka ni enggau sida ke nadai agi rumah ketegal pengerusak alam? Sida engka begunaka endur alai diau lebuh ke nganti rumah sida tembu digaga. Kitai enda tau ngumbai semina sida ke bisi rumah besai aja ke tau nulung. Sida engka udah suah nulung sebedau tu. Ulih nuan nyediaka rumah nuan alai diau taja pan rumah nya enda besai?

¹⁰ Seiku menyadi lelaki ari Korea Selatan ngenang pasal bala pemelajar sekula teokratik ke diau ba rumah iya. Ku iya nulis: “Terubah iya, aku berasai lembau laban kami duai bini aku baru jadi lalu diau ba rumah ti mit. Tang lebuh bala pemelajar diau enggau kami, kami berasai gaga amat. Laban baru berumah-tangga, kami ulih beratika, laki bini ulih lantang ati enti sama begulai gawa ke Jehovah sereta ngulihka juluk ati ba pengarap.”

11. Nama kebuah patut nyambut orang ke baru enggau eklisia nuan?

¹¹ Bala menyadi Kristian ke baru ba eklisia: Sekeda bala menyadi Kristian tauka ruang bilik ari eklisia bukai engka pindah ngagai menua nuan. Sida engka pindah ketegal eklisia nuan begunaka bantu. Tauka sida engka pengerintis ke diasuh enggau eklisia nuan. Tu ubah ke besai ba sida. Sida patut nelebaka diri enggau endur ke baru, eklisia ke baru, sereta jaku tauka chara pengidup ti baru. Ulih nuan mai sida sama enggau nuan makai tauka ngagai endur bukai? Tu deka nulung sida bulih bala pangan ti baru sereta nelebaka diri enggau ubah ke bisi ba sida.

12. Nama peneleba ti nunjukka nuan tau enda ibuh nyediaka mayuh utai kena nyambut temuai?

¹² Nuan tau enda ibuh nyediaka mayuh utai kena nyambut temuai. (Bacha Luke 10:41, 42.) Seiku menyadi lelaki ngenang pasal utai ke nyadi lebuh seduai bini iya baru nyadi pengerintis seberai tasik. Ku iya madahka: “Kami agi biak, nadai peneleba, sereta enda betah diri sebilik. Bisi sekali, bini aku lelengau amat ke sida sebilik lalu aku kasih amat meda iya. Tang urung 7:30 lemai, kami ninga orang ngetuk pintu kami. Seiku pemelajar Bup Kudus indu datai mai tiga igi buah urin ke kami. Iya nyambut penatai pengerintis seberai tasik ti baru. Kami ngelaluka iya tama lalu meri iya segelas ai. Udah nya kami ngaga ai te  enggau ai cokelat ti angat. Kami bedau nemu jaku Swahili, lalu iya enda nemu jaku English.” Menyadi lelaki nya madahka peneleba tu nulung seduai bini iya bebakih enggau bala menyadi ke diau dia sereta bulih pengaga ba ati.

13. Nama penguntung enti nuan deka nyambut temuai?

¹³ Kala nuan berasai lembau deka nyambut temuai? Enti kala, tu tau ngasuh nuan lenyau maya ti ngagaka ati sereta bulih orang ke tau nyadi bala pangan nuan belama iya. Ulah ti deka nyambut temuai nya chara manah kena muai asai ati ti puang. Tang nama kebuah orang lembau deka nyambut temuai? Bisi beberapa iti kebuah.

14. Nama patut digaga enti kitai ngasaika diri nadai entu chukup awak tauka pengering kena nerima temuai?

¹⁴ Awak enggau pengering: Nembiak Jehovah seruran kiruh sereta bisi mayuh tanggung pengawa. Sekeda sida engka ngasaika diri nadai chukup awak tauka pengering deka nerima temuai laban berasai lelak. Enti nuan ngasaika baka nya, nuan patut ngubah jadual nuan ngambika ulih mandangka diri deka nerima temuai. Tu beguna bendar laban Bup Kudus ngasuh kitai nyambut temuai. (Heb. 13:2) Nya alai ulah ti deka nyambut temuai nya pengawa ti patut digaga kitai. Tang nuan patut ngurangka jam ba pengawa ke enda entu beguna ngambika ulih nyambut temuai.

15. Nama kebuah sekeda orang ngasaika diri enda ulih nerima temuai?

¹⁵ Asai ati pasal diri empu: Kala nuan ngasaika diri deka nerima temuai tang enda ulih? Nuan engka berasai malu sereta irauka temuai nuan berasai leju. Tauka nuan engka nadai entu penatai pemisi sereta irauka diri enda ulih nyediaka utai ti diguna temuai nuan baka bala menyadi Kristian bukai. Tang anang enda ingat, rumah tau enda ibuh kelalu manah. Bala temuai tentu gaga enti rumah nuan beresi sereta kemas, lalu nuan rindu begulai enggau sida.

16, 17. Nama ulih digaga nuan enti nuan irau deka nyambut temuai?

¹⁶ Ukai semina nuan aja ke irau deka nerima temuai. Seiku tuai gempuru di Britain madahka: “Kekadang irau lebuh nyediaka utai ke temuai. Tang enti nya bekaul enggau nyembah Jehovah, penguntung enggau asai ati ti puas ke diulih lebih agi ari ke irau. Aku rindu duduk, ngirup kupi sereta berandau enggau bala temuai.” Endang manah enti kitai mandangka diri ibuhka bala temuai. (Plp. 2:4) Mayuh orang rindu berandau pasal peneleba ba pengidup. Kitai ulih ninga peneleba sida lebuh kitai begelumu enggau sida. Seiku agi tuai gempuru nulis: “Ngangau bala pangan ari eklisia datai ngagai rumah aku nulung aku nemu sapa sida sereta meri peluang ngagai aku ngelala sida, kelebih agi baka ni sida bulih pemendar.” Enti nuan mandangka diri ibuhka bala temuai, semua orang tentu deka gaga ati.

¹⁷ Seiku menyadi indu ke nyadi pengerintis enda kala pungkang bala pemelajar ari sekula teokratik ti bebida diau ba rumah iya. Ku iya madahka: “Terubah iya aku irau laban rumah aku enda besai lalu kereban dalam rumah aku nya ukai kereban ke baru. Tang bini seiku pengajar enda ngasuh aku kelalu irau. Iya madahka  lebuh seduai laki iya bejalaika kereja pelilih, minggu ti ngerinduka ati nya lebuh seduai iya diau enggau menyadi ti nadai mayuh utai, tang bisi tuju ti sama iya nya gawa ke Jehovah sereta ngembuan pengidup ti pengumbas iya. Tu ngasuh aku ingatka jaku ti disebut indai lebuh kami agi mit: ‘Manah agi makai sayur begulai enggau orang ke dikerinduka nuan.’” (J-lam. 15:17) Nya alai anang irau deka nyambut temuai, laban utai ti beguna nya kitai mandangka pengerindu ngagai temuai.

18, 19. Baka ni ulah ti deka nyambut orang ulih nulung kitai muai asai ati ti enda manah ngagai orang bukai?

¹⁸ Asai ati pasal orang bukai: Kati bisi orang ba eklisia ke ngemediska ati nuan? Enti nuan enda muai asai ati ti enda manah tu, asai ati nuan tentu enda berubah. Nuan engka enggai ngangau iya datai ke rumah enti nuan enda rinduka ulah iya. Tauka bisi orang bukai ke engka udah ngemediska ati nuan suba, lalu nuan seruran ingatka utai nya.

¹⁹ Bup Kudus madahka kitai ulih ngemanahka kaul enggau orang bukai, indah enggau munsuh kitai, enti kitai deka nerima sida. (Bacha Jaku Dalam 25:21, 22.) Enti nuan ngangau orang datai ke rumah, nuan ulih muai asai ati ti enda manah ngagai orang nya lalu ulih bebaik enggau iya. Nuan tentu ulih meda kualiti manah ke dipeda Jehovah ba orang nya lebuh Jehovah matak iya ngagai pemendar. (Jhn. 6:44) Kekadang orang engka  enda nyangka kitai deka ngangau sida ke rumah kitai. Tang ketegal pengerindu, kitai nerima sida lalu tu ulih ngasuh kitai bebaik enggau sida. Baka ni nuan ulih nemu tuju nuan nya amat datai ari pengerindu? Nuan ulih nitihka jaku lalau ba Pilipi 2:3: “Enggau ati ti baruh, seruran ngumbai orang bukai pama agi ari kita.” Kitai patut mikirka baka ni bala menyadi Kristian kitai nya pama agi ari kitai. Kitai engka ulih neladan pengarap, pengetan ati, tauka sekeda kualiti Kristian sida ke bukai. Belematika kualiti manah sida ulih ngenalamka pengerindu kitai ke sida sereta nulung kitai senang agi nerima sida.

20. Nama kebuah sereta baka ni kitai patut nunjukka diri tau dikearapka lebuh kitai udah besemaya deka datai?

²⁰ Pemasmur David nanya: ‘Jehovah, sapa tau tama ngagai Rumah Sembiang Nuan?’ (Mas. 15:1) Udah nya, David nyebut pasal kualiti ke patut dikembuan temuai Jehovah. Siti ari kualiti nya, tau dikearapka: “Sida seruran ngamatka semaya sida, enda ngira pemesai ungkus nya.” (Mas. 15:4) Enti kitai udah besemaya deka datai, kitai patut datai enti nadai utai nekul. Orang bempu rumah engka udah nyediaka utai ke kitai. Tang enti kitai enda datai, kitai masau jam enggau pengering sida. (Mat. 5:37) Pengudah besemaya deka datai enggau orang bempu rumah, sekeda orang engka enda nyadi datai. Tu ketegal orang bukai mega bisi ngangau sida ke rumah, lalu sida ngasaika siti tu manah agi ari iya ke dulu. Kati ulah ke baka tu nunjukka kitai bisi pengerindu sereta bebasaka orang? Kitai patut beterima kasih ke sebarang utai ti udah digaga orang bempu rumah ke kitai. (Luk. 10:7) Enti kitai amat enda ulih datai, jejampat meh madah ngagai sida.

21. Baka ni bebasaka adat ba siti-siti menua ulih nulung kitai nyadi temuai ti manah?

²¹ Kitai patut masa adat ba siti-siti menua. Sekeda adat nerima temuai ke datai ngenyit. Sekeda adat deka temuai madah dulu sebedau sida datai. Ba sekeda menua, orang bempu rumah meri temuai iya pemakai ti pemadu manah. Ba sekeda menua bukai, semua orang diintu sama bela. Ba sekeda endur, temuai mai utai ke diempa. Ba sekeda endur bukai, orang bempu rumah deka agi enti temuai sida datai jari kusung. Nitihka sekeda chara pengidup, temuai tau nulak kangau ti keterubah tauka ti kedua. Tang nitihka sekeda chara pengidup bukai, orang dikumbai enda bebasaka orang bempu rumah enti iya nulak kangau ti keterubah. Kitai patut enggau naka ulih ngenyamaika ati orang bempu rumah ke ngangau kitai ngagai rumah iya.

22. Nama kebuah kitai patut ‘nyambut pangan diri’?

²² Peter madahka: “Pengujung semua utai nyau semak.” (1 Pet. 4:7) Diatu kitai napi penusah besai ke nadai kala udah ngemalat nya nyadi. Seraya dunya tu majak jai, kitai patut bisi pengerindu ti dalam ke bala menyadi Kristian kitai. Jaku lalau Peter lebih agi beguna diatu: “Sambut pangan diri ngagai rumah kita.” (1 Pet. 4:9) Ulah ti deka nyambut temuai endang utai ti ngagaka ati sereta patut dikemeranka ari diatu sereta belama iya.