1, 2. (a) Nama prais ke dianti nembiak Petara? (b) Nama ulih nulung kitai mengkang beratika prais nya? (Peda gambar ba pun artikel.)

ORANG Kristian ke dipilih bisi pengadang ti berega. Sida nganti pengidup diau di serega. Rasul Paul ngumbai pengadang tu ‘ngulihka prais, iya nya kangau Petara, . . . ke serega.’ (Plp. 3:14) Di serega, sida deka merintah enggau Jesus Kristus ba Perintah iya, sereta gawa enggau iya nulung mensia nyadi sempurna. (Pem. 20:6) Tu endang pengadang ti badas! Bedus ke bukai nganti prais ti bebida. Pengadang sida iya nya idup belama iya ba Paradais di dunya, lalu pengadang tu amat ngagaka ati sida!—2 Pet. 3:13.

² Paul deka nulung bala menyadi Kristian ke dipilih ngagai serega mengkang tetap ati sereta ngulihka prais. Iya ngasuh sida: “Berundingka utai serega.” (Kol. 3:2) Sida patut beberatka pengadang ke serega laban nya berega. (Kol. 1:4, 5) Berundingka berekat ari Jehovah nulung semua nembiak Petara mengkang beratika prais nya. Tu amat enda ngira sida bisi  pengadang diau di serega tauka ba dunya.—1 Kor. 9:24.

3. Paul nangkan orang Kristian pasal utai nama?

³ Paul mega nangkan orang Kristian pasal penanggul ke ulih nekul sida ngulihka prais nya. Ambika chunto, iya nulis ngagai orang Kolosi pasal orang Kristian ti pelesu ke nguji deka ngenyamaika ati Petara enggau nitihka Adat Moses, tang ukai arapka Kristus. (Kol. 2:16-18) Paul mega bejuraika penanggul ke agi bisi kemaya hari tu, lalu ke mega ulih nekul kitai ngulihka prais. Iya nerangka baka ni ulih ngelaban pengingin ti kamah sereta utai ke ulih digaga enti kitai bisi penanggul ba ruang bilik tauka enggau bala menyadi Kristian ba eklisia. Jaku ajar Paul ti berega nya ulih nulung kitai kemaya hari tu. Nya alai aram kitai mansik sekeda ari jaku tangkan ke ulih ditemu kitai ba surat iya ngagai orang Kolosi.

4. Nama kebuah pengingin ti kamah ulih nekul kitai ngulihka prais?

⁴ Pengudah Paul ngingatka bala menyadi Kristian iya pasal pengadang sida ti badas, ku iya nulis: “Nya alai bunuh semua pengingin dunya ti dalam kita, baka: pengawa bambai, ulah ti kamah, runding ti kamah, pengingin ti jai, enggau pengamu.” (Kol. 3:5) Pengingin ti kamah kekadang enda ulih ditagang lalu ulih ngasuh kitai lenyau kaul enggau Jehovah sereta pengadang kitai ke jemah ila. Seiku menyadi Kristian ke alah laban pengingin iya ti kamah lalu udah nya pulai baru ngagai eklisia madahka, pengingin nya balat amat nyentukka iya “enda sedarka diri nyau udah tekelanjur.”

5. Baka ni kitai ulih nyaga diri empu lebuh napi utai ti tau ngenusahka?

⁵ Kitai patut bejimat enti kitai napi utai ke tau ngujungka kitai enda ngasika standard moral Jehovah. Ambika chunto, endang manah enti orang ke benung bepangan netapka tatak ari pun bekaul enggau utai baka bepegai, besium, sereta lebuh seduai iya kediri aja. (J-lam. 22:3) Sekeda penanggul ke bukai ti ulih nyadi lebuh kitai ngagai endur bukai ketegal kereja tauka lebuh kitai bekereja enggau orang ke enda sama penempa. (J-lam. 2:10-12, 16) Nama ulih digaga nuan kena nyaga diri empu? Madahka diri nya Saksi Jehovah. Jaga ulah diri, lalu anang enda ingat, ulah bekuntik tau ngujungka penusah. Kitai mega patut bejimat enti kitai berasai tusah ati tauka sunyi. Kitai engka ngiga orang ke ibuhka kitai. Kitai engka enda milih nyentukka kitai nerima aja sapa orang ke ibuhka kitai. Tu tau ngenusahka. Enti nuan kala berasai baka tu, anang ngereja sebarang utai ke tau nekul nuan ngulihka prais. Giga tulung ari Jehovah enggau bala menyadi Kristian.—Bacha Masmur 34:18; Jaku Dalam 13:20.

6. Nama patut dikingatka kitai lebuh milih pemerindang?

⁶ Ngambika ulih munuh pengingin ti kamah, kitai patut nulak pemerindang ti kamah. Mayuh pemerindang ke bisi kemaya hari tu ngingatka kitai pasal utai ke bisi di Sodom enggau Gomorah menya. (Jud. 7) Orang ke ngeluarka utai ti bekaul enggau pemerindang ngasuh ulah seks ti kamah nya baka ke enda salah sereta enda nganu. Nya alai kitai patut seruran bejaga. Kitai enda patut nerima sebarang pemerindang ke bisi ba dunya tu. Tang, kitai patut milih pemerindang ke enda nekul kitai ngulihka pengidup ti nyadi prais.—J-lam. 4:23.

7. Nama utai ke ulih nyadi penanggul ba eklisia Kristian?

⁷ Kitai gaga ati ulih enggau eklisia Kristian. Kitai belajarka Jaku Petara ba gempuru, lalu kitai rindu nyukung pangan diri. Tu nulung kitai mengkang beratika prais. Tang kekadang bisi saru penemu ke tau ngasuh penanggul nyadi enggau bala menyadi Kristian. Enti kitai enda mutarka penanggul nya, nya tau ngasuh jampat ringat.—Bacha 1 Peter 3:8, 9.

8, 9. (a) Nama kualiti ke ulih nulung kitai ngulihka prais? (b) Nama ulih nulung kitai ngetanka pemaik enti bala menyadi Kristian ngemediska ati kitai?

⁸ Kitai enda tau nejuka pengeringat nekul kitai ngulihka prais. Paul madahka utai ti patut dikereja orang Kristian: ‘Nya alai, laban kita udah dipilih Petara nyadi orang ke kudus sereta dikerinduka Iya, rasukka penyiru, penelap, ati ti baruh, ati ti nemu nunduk ngagai pangan diri, enggau ati ti liat. Sabar enggau pangan diri, lalu ampun pangan diri enti kita bisi enda nyamai ati ngagai pangan diri. Baka Tuhan ke udah ngampun kita, baka nya mega kita ngampun pangan diri. Lebih ari semua, rasukka pengerindu kena ngempung semua utai nyadi siti.’—Kol. 3:12-14.

⁹ Pengerindu enggau penelap ulih nulung kitai ngampun orang bukai. Enti kitai berasai pedis ati enggau utai ti udah disebut tauka dikereja orang, kitai ulih mikirka maya lebuh kitai nyebut tauka ngereja utai ti enda manah ngagai orang bukai lalu sida ngampun kitai. Kitai amat beterima kasih ke pengerindu enggau penelap sida! (Bacha Pengajar 7:21, 22.) Kitai berasai beterima kasih laban Kristus enggau ati ti nelap nyerakup bala penyembah ti bendar. (Kol. 3:15) Semua kitai rinduka Petara ti sama, nusui pesan ti sama, sereta ngembuan mayuh penanggul ti sama. Enti kitai nelap, bisi pengerindu sereta ngampun pangan diri, eklisia deka agi beserakup, lalu kitai ulih mengkang beberatka prais.

10, 11. (a) Nama kebuah ati ti kepapas tau ngenusahka? (b) Baka ni kitai ulih nentu ati ti kepapas enda nekul kitai ngulihka prais?

¹⁰ Ati ti kepapas ulih nekul kitai ngulihka prais. Sekeda chunto Bup Kudus nunjukka baka ni ati ti kepapas nya tau ngenusahka. Ambika chunto, Kain kepapaska Abel, lalu munuh Abel. Korah, Datan, enggau Abiram kepapaska Moses lalu angkat ngelaban Moses. Raja Saul kepapaska David, lalu nguji deka munuh David. Utai ti dipadah Jaku Petara nya endang amat: “Dia endur alai ati ti kepapas, enggau ati ti semina berundingka diri empu aja, dia meh endur alai penyarut enggau semua pengawa ti jai nyadi.”—Jas. 3:16.

¹¹ Enti kitai bebendar ngambika amat bisi pengerindu enggau penelap, kitai enda jampat kepapas. Jaku Petara madahka: “Pengerindu nya liat ati, nelap, enda kepapas.” (1 Kor. 13:4) Ngambika kitai enda ngembuan ati ti kepapas, kitai patut nguji meda pekara sama baka Jehovah. Kitai patut bisi runding ke ngumbai bala menyadi Kristian baka perengka ba siti tubuh, iya nya eklisia. Bup Kudus madahka: “Enti siti ari perengka nya kena puji, semua perengka tubuh nya deka rami gaga ati enggau iya.” (1 Kor. 12:16-18, 26) Enti bisi utai manah nyadi ba seiku ari menyadi Kristian kitai, kitai deka gaga ati ke iya, ukai kepapaska iya. Pikirka chunto manah pasal anak Raja Saul, Jonatan. Jonatan enda kepapas lebuh David dipilih nyadi  raja nganti iya. Iya indah meransang sereta nyukung David. (1 Sam. 23:16-18) Ulih kitai nelap sereta bisi pengerindu baka Jonatan?

12. Nama jaku lalau ari Bup Kudus ke ulih nulung diri sebilik ngulihka prais?

¹² Lebuh tiap iku orang ba ruang bilik nitihka prinsip Bup Kudus, ruang bilik deka bisi pemaik sereta lantang lalu deka bulih prais. Paul meri jaku ajar ti manah tu ngagai diri sebilik: ‘Kita ke bini, nunduk ngagai laki kita, laban nya endang patut dikereja kita dalam Tuan. Kita ke laki, rinduka bini kita, lalu anang kasar enggau sida. Kita ke anak, ngasika apai indai kita dalam semua utai, laban nya ngerinduka ati Tuan. Kita ke apai, anang ngereja utai ti tau ngasuh anak kita ringat, enggai ke sida alah semengat.’ (Kol. 3:18-21) Bisi nuan beratika baka ni jaku ajar tu ulih nulung nuan enggau diri sebilik?

13. Baka ni menyadi Kristian indu ulih nulung laki iya deka nyembah Jehovah?

¹³ Nuan engka menyadi Kristian indu ke bisi laki ti enda nyembah Jehovah. Nama ulih digaga nuan enti nuan ngasaika iya enda manah enggau nuan? Nuan engka pedis ati lalu belaya enggau iya, tang kati nya ulih mutarka penanggul? Taja pan nuan menang lebuh ke belaya, kati nuan ulih ngasuh iya nyembah Jehovah? Engka enda. Tang enti nuan bebasaka ungkup iya ke nyadi tuai bilik, nuan ulih nulung ruang bilik bisi agi pemaik lalu nuan deka ngenataika mulia ngagai Jehovah. Chunto manah nuan indah ulih narit laki nuan deka nyembah Jehovah, lalu nya nulung seduai sama bulih prais.—Bacha 1 Peter 3:1, 2.

14. Nama patut digaga laki ke Kristian enti bini ke enda nyembah Jehovah enda bebasaka iya?

 ¹⁴ Nuan engka menyadi Kristian lelaki ke bisi bini ti enda nyembah Jehovah. Nama ulih digaga nuan enti nuan ngasaika iya enda bebasaka nuan? Enti nuan merak iya ketegal deka nunjukka sapa ke bekuasa ba rumah, kati nya meransang iya bebasaka nuan? Tentu enda! Petara deka nuan nyadi laki ke bisi pengerindu ti neladan Jesus. (Eps. 5:23) Jesus, ke nyadi kepala eklisia, seruran liat ati sereta bisi pengerindu. (Luk. 9:46-48) Enti nuan neladan Jesus, nyau kelama bini nuan mega engka deka nyembah Jehovah.

15. Baka ni laki ke Kristian nunjukka diri rinduka bini iya?

¹⁵ Jehovah ngasuh sida ke laki: “Rinduka bini kita, lalu anang kasar enggau sida.” (Kol. 3:19) Laki ti bisi pengerindu ngayanka basa ngagai bini. Baka ni? Iya mendingka penemu bini lalu deka bini nemu utai ti disebut bini nya beguna ba iya. (1 Pet. 3:7) Taja pan iya enda seruran nitihka utai ti dikedekaka bini, mendingka penemu bini ulih nulung iya ngaga pemutus enggau manah agi. (J-lam. 15:22) Laki ti bisi pengerindu enda minta bini bebasaka iya. Tang, iya nguji ngulihka basa ari bini. Lebuh laki rinduka bini enggau bala anak, sida deka agi gaga ati lebuh sida nyembah Jehovah lalu ngulihka pengidup ti nyadi prais.

16, 17. Enti nuan nya orang ke nembiak, baka ni nuan ulih nyeliahka diri ari kelalu pedis ati ngagai apai indai nuan?

¹⁶ Nuan engka orang ke beumur bebelas taun lalu ngasaika apai indai enda  meretika nuan tauka sida kelalu terit enggau nuan. Tu engka ngasuh nuan balat tusah ati nyentukka nuan deka nemu sekalika nuan deka nyembah Jehovah tauka enggai. Tang enti nuan ninggalka Jehovah, nuan deka nemu, nadai orang di dunya tu ke amat sayauka nuan baka apai indai nuan ke Kristian sereta baka bala pangan nuan ba eklisia.

¹⁷ Pikirka tu: Enti sema apai indai nuan enda kala ngerara nuan, baka ni nuan ulih nemu sekalika sida amat ibuhka nuan tauka enda? (Heb. 12:8) Endang amat, apai indai enda sempurna, nya alai chara sida disiplin nuan engka ngemediska ati nuan. Tang anang beratika nya. Uji meretika kebuah sida ngereja sereta nyebut utai baka nya. Anang ringat, lalu anang nguji deka ngelaban. Jaku Petara madahka: “Orang ke mereti, enda seruran kutap-kutap. Orang ke enda bemunyi nya orang ke bepenemu-dalam.” (J-lam. 17:27) Nuan ulih netapka juluk ati deka nyadi orang ke kering dalam pengarap sereta belajar ari jaku lalau enda ngira baka ni jaku lalau nya diberi. (J-lam. 1:8) Anang enda ingat, bisi apai indai ke rinduka Jehovah nya pemeri ti berega. Sida deka nulung nuan idup belama iya.

18. Nama kebuah nuan mengkang deka beratika prais?

¹⁸ Sekalika kitai ngembuan pengadang idup belama iya di serega tauka ba paradais di dunya, tiap iku kitai tau nganti pengidup ti badas ke jemah ila nya. Pengadang kitai nya amat. Pengadang nya bepelasar ba semaya Penempa dunya raya, ke madahka: ‘Dunya deka penuh laban penemu Jehovah.’ (Isa. 11:9) Enda lama agi, tiap iku orang ba dunya deka diajar Petara. Nya meh prais ke tau dianti kitai. Nya alai seruran ingatka utai ti udah disemayaka Jehovah ngagai nuan, lalu anang nejuka sebarang utai nekul nuan ngulihka prais!