1, 2. (a) Baka ni asai ati Jesus pasal Adat Petara? (b) Baka ni bala pengajar Adat sereta orang Parisi ngena Adat enggau chara ti salah?

 JESUS rinduka Adat Moses. Tu enda ngasuh kitai tekenyit laban Adat nya datai ari Apai iya, Jehovah, Orang ti pemadu besai reti ba pengidup Jesus. Ba Masmur 40:8, Bup Kudus madah pasal penalam pengerindu Jesus ke Adat Petara: ‘Naka meh pengerindu ati aku ngereja peneka Nuan, O Petara aku! Aku nyimpan ajar Nuan dalam ati aku.’ Ari jaku sereta pengawa, Jesus nunjukka Adat Petara nya sempurna, meri penguntung, lalu semua utai ke ditulis dalam Adat nya deka dikeamatka.—Mat. 5:17-19.

² Jesus tentu berasai tusah ati lebuh iya meda bala pengajar Adat sereta orang Parisi ngena Adat Apai iya enggau chara ti salah, lalu ngasuh Adat nya tusah diterima. Ku iya madah ngagai sida: “Kita meri sepuluh peratus ari rempah kita, baka telasih, adas manis, enggau jintan,” reti nya sida bejimat amat nitihka utai ti pemadu mit dalam Adat. Nya alai, nama penanggul ari utai tu? Jesus nerangka: “Tang kita enggai ngereja utai ti beguna agi dalam Adat, baka pengelurus, pengasih enggau pengarap  [“penetap ati,” NW].” (Mat. 23:23) Orang Parisi enda beratika reti dalam Adat nya, lalu sida ngumbai diri manah agi ari orang bukai. Tang Jesus nemu reti ke bisi dalam Adat nya lalu nama dipadah tiap iti pesan pasal Jehovah.

 3. Nama deka dikerandauka kitai ba artikel tu?

³ Ketegal nyadi orang Kristian, kitai tau enda ibuh ngasika Adat Moses. (Rom. 7:6) Nya alai nama kebuah Jehovah nyengkaumka Adat nya dalam Jaku Iya, Bup Kudus? Iya deka kitai meretika sereta nitihka “utai ti beguna agi,” iya nya, prinsip dalam Adat nya. Ambika chunto, nama prinsip ke dipelajarka kitai ari atur pasal nengeri alai ngerarika diri? Ba artikel sebedau tu, kitai belajarka sekeda pekara ari mansik utai ti udah dikereja pelari. Ba artikel tu, kitai deka belajar pasal Jehovah sereta baka ni kitai ulih neladan kualiti Iya bekaul enggau semua nengeri alai ngerarika diri. Kitai deka nyaut tiga iti tanya: Baka ni nengeri ke alai ngerarika diri nunjukka Jehovah nya pengasih? Nama runding Petara pasal nyawa? Lalu baka ni nengeri nya mandangka pengelurus Iya ti sempurna? Ba tiap iti pekara nya, uji peratika baka ni nuan ulih neladan Apai nuan ti di serega.—Bacha Epesus 5:1.

4, 5. (a) Nama udah digaga ngambika pelari senang ngerarika diri ngagai nengeri nya, lalu nama kebuah? (b) Nama ulih dipelajarka kitai pasal Jehovah ari atur tu?

⁴ Jehovah ngatur ngambika enam buah nengeri alai ngerarika diri nya senang digagai orang ke ngerarika diri. Iya ngasuh orang Israel milih tiga buah nengeri ba sepiak-sepiak Sungai Jordan. Nama kebuah? Ngambika pelari ulih lengkas sereta senang agi ngerarika diri ngagai sebuah nengeri nya. (P-pau. 35:11-14) Jalai nuju ngagai nengeri nya diintu manah. (U-dat. 19:3) Nitihka penerang pasal pengawa orang Judah, bisi kelai sepemanjai jalai kena nulung pelari ngiga nengeri nya. Ketegal bisi nengeri alai ngerarika diri di menua Israel, orang Israel ke enda sengaja munuh orang tau enda ibuh ngiga lindung ba menua orang bansa bukai, endur alai iya engka alah diuji lalu deka nyembah petara pelesu.

⁵ Pikirka tu: Jehovah udah ngasuh pemunuh nya diukum bunuh. Tang Iya mega nentuka orang ke enda sengaja munuh orang tau bulih pengasih, penyiru, sereta lindung. Nitih ku seiku pakar Bup Kudus, semua jalai enggau atur nya digaga ngambika  senang dimereti sereta dititihka. Jehovah nya ukai hakim ti jai ke begigaka chara deka ngukum nembiak Iya. Tang, Iya penuh enggau pengasih.—Eps. 2:4.

 6. Kati bisi orang Parisi neladan pengasih Jehovah? Terangka.

⁶ Taja pia, orang Parisi enggai ngayanka pengasih ngagai orang bukai. Ambika chunto, penerang pasal pengawa orang Judah madahka orang Parisi enggai ngampun orang ke udah ngereja penyalah ti sama lebih ari tiga kali. Kena nunjukka ulah sida nya salah, Jesus ngena sempama pasal seiku orang Parisi ke besampi sepiak seiku pengumpul chukai. Ku orang Parisi nya madah: ‘Petara, aku meri terima kasih ngagai Nuan, laban aku enda baka orang bukai ke penchuri, ke jai, ke butang, tauka baka pengumpul chukai nyin.’ Nama reti utai ku Jesus? Orang Parisi ngumbai orang bukai nadai guna, lalu ngumbai diri tau enda ibuh kasihka orang bukai.—Luk. 18:9-14.

7, 8. (a) Baka ni nuan ulih neladan pengasih Jehovah? (b) Nama kebuah kitai patut baruh ati ngambika ulih ngampun orang bukai?

⁷ Neladan Jehovah, ukai neladan orang Parisi. Ngayanka pengasih sereta penyiru. (Bacha Kolosi 3:13.) Anang ngasuh orang bukai tusah deka minta ampun ari nuan. (Luk. 17:3, 4) Tanya diri empu: ‘Kati aku jampat sereta senang ngampun orang bukai indah lebuh sida suah ngemediska ati aku? Kati aku keran deka bebaik enggau orang ke ngemediska ati aku?’

⁸ Ngambika ulih ngampun, kitai patut baruh ati. Orang Parisi ngumbai diri manah agi ari orang bukai, nya alai sida enggai ngampun. Tang ketegal nyadi orang Kristian, kitai enggau baruh ati “ngumbai orang bukai pama agi” ari kitai, lalu deka ngampun sida. (Plp. 2:3) Kitai ulih nanya diri empu, ‘Kati aku neladan Jehovah sereta ngayanka ati ti baruh?’ Enti kitai baruh ati, orang bukai deka senang agi minta ampun ari kitai, lalu kitai deka senang agi ngampun sida. Jampat ngayanka pengasih, lalu lubah pedis ati.—P-jar. 7:8, 9.

 9. Baka ni Jehovah nulung orang Israel nemu nyawa nya kudus?

⁹ Siti ari batang kebuah nengeri alai ngerarika diri disediaka iya nya kena ngelindung orang Israel ari berutang darah ketegal munuh orang ke nadai penyalah. (U-dat. 19:10) Jehovah sayauka nyawa, lalu Iya begedika pengawa munuh. (J-lam. 6:16-19) Ketegal Petara nya lurus sereta kudus, Iya enda neju indah pengawa ti enda sengaja munuh orang. Endang amat, orang ke enda sengaja munuh orang tau bulih pengasih. Tang keterubah, iya patut nerangka utai ke nyadi ba iya ngagai bala tuai. Enti bala tuai mutuska pemati nya ukai disengajaka, nya baru pelari patut  mengkang ba nengeri alai ngerarika diri nyentuk maya imam besai mati. Reti nya pelari engka patut diau ba nengeri nya seumur idup. Atur nya nunjuk ngagai semua orang Israel, nyawa nya kudus. Ngambika ulih ngemuliaka Orang ke meri nyawa, sida patut enggau naka ulih nyeliahka utai ti tau nganu nyawa orang bukai.

10. Nitih ku Jesus, baka ni bala pengajar Adat enggau orang Parisi nunjukka diri enda bedulika nyawa orang bukai?

¹⁰ Enda baka Jehovah, bala pengajar Adat enggau orang Parisi ngayanka diri enda bedulika nyawa orang bukai. Ku Jesus madah ngagai sida: “Kita udah naruh [“ngambi,” NW] kunchi penemu. Kita empu enda tama, lalu kita mempang jalai orang ke deka tama!” (Luk. 11:52) Nama reti utai ku Jesus? Bala pengajar Adat enggau orang Parisi patut nerangka Jaku Petara ngagai orang lalu nulung sida bulih pengidup ti meruan belama iya. Tang, sida nguji nagang orang nitihka Jesus ti nyadi “Juruselamat.” (SKR. 5:31) Enggau chara tu, sida mai orang nuju ngagai pengerusak. Bala pengajar Adat enggau orang Parisi nya sumbung sereta berundingka diri empu aja, lalu sida enda bedulika nyawa orang. Sida amat jai sereta nadai pengerindu!

11. (a) Baka ni rasul Paul nunjukka diri ngembuan runding ti sama baka Jehovah pasal nyawa? (b) Nama deka nulung kitai neladan pengeransing Paul ba pengawa nginjil?

¹¹ Baka ni kitai ulih neladan Jehovah sereta nyeliah ari nyadi baka bala pengajar Adat enggau orang Parisi? Kitai neladan Jehovah enti kitai masa sereta sayauka nyawa. Rasul Paul ngereja tu ari nusui berita manah pasal Perintah Petara ngagai mayuh orang enggau naka ulih. Nya meh kebuah iya ulih nyebut: “Aku enda betanggungjawapka nyawa kita.” (Bacha Kereja Rasul 20:26, 27.) Tang kati Paul nginjil semina ketegal iya enggai berasai besalah tauka ketegal Jehovah ke ngasuh iya ngereja nya? Enda. Paul rinduka orang. Ba iya, nyawa sida berega, lalu iya dekaka sida bulih pengidup ti meruan belama iya. (1 Kor. 9:19-23) Kitai mega patut ngembuan runding ti sama baka Jehovah pasal nyawa. Iya deka semua orang nesal ati ngambika sida ulih idup. (2 Pet. 3:9) Ngambika ulih neladan Jehovah, kitai patut rinduka orang. Ulah ti pengasih deka meransang kitai nginjil enggau ransing lalu tu deka meri kitai pengaga ba ati seraya kitai ngereja nya.

12. Nama kebuah nyaga pengelikun nya beguna ba nembiak Petara?

¹² Ngambika ngembuan runding ti sama baka Jehovah pasal nyawa, kitai mega patut ngembuan runding ti betul pasal pengelikun. Kitai patut bejimat lebuh deriba sereta gawa, indah lebuh kitai ngaga bengunan, nyeruri, tauka mupuk ngagai palan alai nyembah Jehovah. Anang beberatka awak tauka duit lebih agi ari orang, pengelikun, sereta pengerai. Petara kitai semampai ngereja utai ti ngena, lalu kitai deka neladan Iya. Bala tuai gempuru kelebih agi patut mikirka pengelikun diri sereta orang bukai. (J-lam. 22:3) Enti tuai gempuru nangkan nuan pasal lalau pengelikun, pendingka iya. (Gal. 6:1) Ngembuan runding ti sama baka Jehovah pasal nyawa, lalu nuan enda ditinggang “enggau penyalah munuh orang.”

13, 14. Baka ni bala tuai orang Israel ulih neladan pengelurus Jehovah?

¹³ Jehovah ngasuh bala tuai orang Israel neladan pengelurus Iya. Keterubah, sida patut nentuka semua fakta. Udah nya, sida  patut beratika enggau bejimat tuju, ulah, sereta pengawa ke udah digaga pemunuh nya lebuh mutus sekalika deka ngayanka pengasih. Bala tuai patut mansik sekalika pelari begedika lalu sengaja deka munuh mansa iya. (P-pau. 35:20-24) Enti bisi saksi, abis kurang dua iku saksi diguna sebedau pemunuh diletak ukum bunuh.—P-pau. 35:30.

¹⁴ Pengudah nemu utai ke amat nyadi, bala tuai patut berunding pasal orang nya empu, ukai semina berunding pasal utai di udah digaga iya. Bala tuai begunaka pemereti ati kena nemu utai ti enda ulih dipeda sereta beratika kebuah utai nya nyadi. Kelebih agi, sida begunaka roh kudus Jehovah kena nulung sida nunda pemereti ati, pengasih, sereta pengelurus Iya.—P-sut. 34:6, 7.

15. Nama kebuah runding Jesus enggau runding orang Parisi pasal orang ke bedosa bebida?

¹⁵ Orang Parisi enda ngatur pechara enggau pengasih. Sida beratika utai ti udah digaga orang ke bedosa, ukai beratika sapa orang nya ke bendar. Lebuh sekeda orang Parisi meda Jesus makai ba rumah Matthew, sida nanya bala murid Jesus: “Nama kebuah pengajar kita begulai makai enggau pengumpul chukai sereta enggau orang ke bedosa?” Jesus nyaut: ‘Orang ke gerai enda begunaka lutur, tang semina orang ke sakit. Mupuk kita lalu giga reti jaku tu: “Aku begunaka pengasih, ukai piring.” Laban aku datai ukai ngangauka orang ke lurus, tang ngangauka orang ke bedosa.’ (Mat. 9:9-13) Kati Jesus ngetanka orang ke bedosa? Enda. Iya deka sida nesal ati. Nya siti ari pesan ti beguna ke ditusui iya. (Mat. 4:17) Jesus nemu, sekeda ari “pengumpul chukai enggau orang ke bedosa” deka berubah. Sida ukai semina makai aja ba rumah Matthew. Sida dia laban sida nitihka Jesus. (Mrk. 2:15) Tang sayau amat, mayuh orang Parisi nadai ngembuan runding ti sama baka Jesus pasal orang. Sida enda pechaya orang ulih berubah, lalu sida ngumbai orang ke bedosa enda ulih ditulung agi. Sida endang bebida ari Jehovah, ti lurus sereta bisi pengasih!

16. Nama patut diperatika komiti pechara?

¹⁶ Bala tuai gempuru kemaya hari tu patut neladan Jehovah ke “rinduka atur ti lurus.” (Mas. 37:28) Keterubah, sida patut ‘mansik berita nya enggau silik’ kena nentuka penyalah nya amat bisi nyadi tauka enda. Enti bisi, sida deka nitihka iring ari Bup Kudus kena mutuska utai ti patut digaga. (U-dat. 13:12-14) Lebuh sida nyadi komiti pechara, a sida patut bejimat nentuka sekalika orang ke ngereja dosa ti besai nya udah nesal ati tauka bedau. Tu enda seruran senang dikereja. Nesal ati nyengkaum nama penemu iya pasal utai ti udah dikereja iya sereta nama utai ke bisi dalam ati iya. (Pem. 3:3) Orang ke bedosa patut nesal ati ngambika tau bulih pengasih. b—Peda nota kaki.

17, 18. Baka ni bala tuai gempuru ulih nemu sekalika orang amat nesal ati tauka enda? (Peda gambar ba pun artikel.)

¹⁷ Jehovah enggau Jesus endang nemu utai ti dirunding sereta diasai orang laban seduai iya ulih meda ati. Tang bala tuai gempuru enda ulih meda ati. Nya alai enti nuan nya tuai gempuru, baka ni nuan ulih nemu sekalika orang nya amat nesal ati? Kesatu, besampi minta penemu-dalam  sereta minta pengelandik kena ngelala utai ti manah enggau jai. (1 Raj. 3:9) Kedua, ngena Jaku Petara sereta litaricha ari ulun ke tetap ati kena nulung nuan meda bida entara “ati ti tusah ulih peneka mensia” sereta ‘ati kita ti tusah ulih peneka Petara,’ iya nya, amat nesal ati. (2 Kor. 7:10, 11) Uji peda baka ni Bup Kudus ngambarka orang ke nesal ati sereta orang ke enda, lalu pansik baka ni asai ati, runding, sereta pengawa sida.

¹⁸ Ketiga, pikirka pasal orang nya, ukai semina mikirka utai ti udah dikereja iya. Baka ni chara pengidup iya? Nama tuju iya? Nama penanggul sereta pengurang ke bisi ba iya? Bup Kudus madahka, Jesus ke nyadi kepala eklisia Kristian, “enda ngakim beduduk ba utai ti dipeda iya, tauka ba utai ti ditusui orang ngagai iya. Iya deka ngakim orang ke seranta ngena atur ti lurus, lalu nyaga hak orang ke nadai daya.” (Isa. 11:3, 4) Kita ke tuai gempuru, Jesus udah nyiri kita ngambika nyaga eklisia, lalu iya deka nulung kita mutarka kes ti bekaul enggau penyalah ngena pengelurus sereta pengasih. (Mat. 18:18-20) Kitai amat beterima kasih laban bisi bala tuai gempuru ke nyaga kitai! Sida mega nulung kitai ngayanka pengelurus sereta pengasih ngagai pangan diri.

19. Nama utai ti dipelajar ari semua nengeri alai ngerarika diri ke deka dikena nuan?

¹⁹ Adat Moses ngundan “semua penemu enggau pemendar.” Adat nya ngajar kitai pasal Jehovah enggau prinsip Iya. (Rom. 2:20) Ari semua nengeri alai ngerarika diri ti dipadah dalam Adat, bala tuai gempuru ulih belajar baka ni “atur ti lurus dipejalaika,” lalu ari semua nengeri nya, semua kitai ulih belajar ngayanka “penelap [“pengerindu ti meruan,” NW] enggau pengasih” ngagai pangan diri. (Sek. 7:9) Taja pan kitai tau enda ibuh nitihka Adat nya, tang Jehovah mengkang enda berubah. Pengelurus enggau pengasih agi nyadi utai ti berat ba Iya. Endang sigi peluang ti manah ulih nyembah Petara ke baka nya. Aram meh semua kitai neladan kualiti Iya ti badas lalu bulih pengelikun sereta jaga ari Iya!