Kati Nuan Ngenduh Ngagai Jehovah?
‘Jehovah deka nebus bala nembiak Iya. Nadai siku orang ke ngenduh ngagai Jehovah deka diukum.’—MAS. 34:22.
1. Ketegal bedosa, baka ni asai ati nembiak Petara ke tetap ati?
“NAKA meh penusah aku tu!” ku rasul Paul nulis. (Rom. 7:24) Kemaya hari tu, mayuh nembiak Petara ke tetap ati enda diperansang sereta ditekan baka Paul. Nama kebuah? Laban taja pan kitai deka ngelantangka ati Jehovah, semua kitai ngembuan dosa sereta enda sempurna. Nya alai kitai berasai tusah ati lebuh kitai enda ulih ngelantangka ati Iya. Sekeda orang Kristian ke udah ngereja dosa ti besai indah ngasaika Jehovah enda ngampun sida.
2. (a) Baka ni Masmur 34:22 nunjukka nembiak Petara enda patut berasai ditekan enggau penyalah diri? (b) Nama deka dipelajarka kitai ba artikel tu? (Peda kutak “ Utai ti Dipelajar tauka Reti Bukai?”)
2 Bup Kudus madahka enti kitai ngenduh ngagai Jehovah, kitai enda patut berasai ditekan enggau penyalah diri. (Bacha Masmur 34:22.) Tang nama reti ngenduh ngagai Jehovah? Nama patut digaga kitai enti deka Jehovah kasih sereta ngampun kitai? Kitai tau bulih saut ngagai tanya nya ari belajar pasal atur ke bekaul enggau nengeri alai ngerarika diri maya jeman Israel kelia. Atur nya bisi disedia ba sempekat Adat Moses, taja pia iya udah diganti kena Pentikos ba taun 33. Tang Adat nya datai ari Jehovah. Nya alai, ari atur ke bekaul enggau nengeri alai ngerarika diri, kitai belajar pasal runding Jehovah senentang pengawa bedosa, orang ke ngereja dosa, sereta orang ke nesal ati. Keterubah, aram kitai meresa kebuah menua Israel bisi nengeri alai ngerarika diri lalu baka ni atur ti bekaul enggau nengeri nya dipejalaika.
“PILIH NENGERI ALAI NGERARIKA DIRI”
3. Nama patut digaga orang Israel ngagai pemunuh?
3 Jehovah balat enda lantang ati lebuh bisi orang ke kena bunuh. Enti sema orang Israel munuh orang bukai, kaban belayan ke lelaki ti nyempil ari orang ke mati nya, ke dikumbai orang “ke ngiga balas,” deka betanggungjawap munuh pemunuh nya. (P-pau. 35:12, 19) Enggau nya, pemunuh deka mayar nyawa orang ke enda salah ke udah dibunuh iya ngena nyawa iya empu. Enti pemunuh nya enda jampat dibunuh, Menua ti Udah Disemaya deka nyadi kamah, tauka enda agi kudus. Jehovah madahka: “Kita deka ngamahka menua ti alai kita diau” enti bebunuhka orang.—P-pau. 35:33, 34.
4. Nama nyadi lebuh orang Israel enda sengaja munuh orang?
4 Tang nama nyadi lebuh orang Israel enda sengaja munuh orang? Taja pan pemati orang nya enda disengaja, pemunuh tetap dikumbai salah ketegal munuh orang ke nadai penyalah. (P-kal. 9:5) Taja pia, ba pekara nya, Jehovah madahka deka ngayanka pengasih. Orang ke enda sengaja munuh tau ngerarika diri ari orang ke ngiga balas lalu ngagai sebuah ari nengeri nya. Udah iya dikemendarka diau ba nengeri nya, iya deka dilindung. Tang iya patut mengkang diau ba nengeri nya nyentuk ngagai maya imam besai mati.—P-pau. 35:15, 28.
5. Nama kebuah atur ke bekaul enggau nengeri alai ngerarika diri ulih nulung kitai nemu pasal Jehovah enggau manah agi?
5 Atur bekaul enggau nengeri alai ngerarika diri nya ukai datai ari penemu mensia, tang datai ari Jehovah. Iya ngasuh Josua: ‘Bejaku ngagai orang Israel, “Pilih nengeri alai ngerarika diri.”’ Semua nengeri nya kudus. (Jos. 20:1, 2, 7, 8) Jehovah netapka semua nengeri nya patut diseraraka. Nya alai ari atur tu, kitai ulih belajar mayuh agi pasal Jehovah. Ambika chunto, atur tu nulung kitai nemu pasal pengasih Jehovah enggau manah agi. Lalu atur tu ngajar kitai pasal chara kitai ulih ngenduh ngagai Jehovah kemaya hari tu.
IYA PATUT “MADAHKA . . . PASAL UTAI TI UDAH NYADI” NGAGAI BALA TUAI
6, 7. (a) Terangka pengawa bala tuai ke ngatur pechara orang ke enda sengaja munuh orang. (Peda gambar ba pun artikel.) (b) Nama kebuah pelari patut madah ngagai bala tuai?
6 Enti sema orang Israel enda sengaja munuh orang, iya patut ngagai nengeri alai ngerarika diri lalu “madahka . . . pasal utai ti udah nyadi” ngagai bala tuai ba pintu penama ngagai nengeri nya. Bala tuai nya patut nejuka iya tama ngagai nengeri nya, lalu meri iya endur alai diau. (Jos. 20:4) Enda lama udah nya, sida deka nganjung iya pulai baru ngambika dipechara bala tuai ba nengeri alai iya ke udah munuh orang. (Bacha Penyampau 35:24, 25.) Enti bala tuai nya mutuska pemati orang ke dibunuh ukai disengaja, sida deka nganjung pelari nya pulai baru ngagai nengeri alai ngerarika diri.
7 Nama kebuah pelari nya patut madah ngagai bala tuai? Bala tuai nya deka nentuka orang Israel mengkang tuchi lalu deka nulung orang ke enda sengaja munuh nya bulih penguntung ari pengasih Jehovah. Seiku pakar Bup Kudus nulis, enti pelari nya enda betemu enggau bala tuai, iya tau dibunuh. Ku iya agi, pelari nya deka betanggungjawapka pemati iya empu laban enda ngereja utai ti diasuh Petara. Orang ke enda sengaja munuh patut minta bantu lalu nerima bantu nya ngambika mengkang idup. Enti iya enda ngerarika diri ngagai sebuah ari nengeri nya, kaban belayan ke nyempil enggau orang ke udah dibunuh iya, tau munuh iya.
8, 9. Nama kebuah orang Kristian ke udah ngereja dosa ti besai patut madah ngagai bala tuai gempuru?
8 Kemaya hari tu, ngambika bulih kaul ti manah baru enggau Jehovah, orang Kristian ke udah ngereja dosa ti besai patut betemu enggau bala tuai gempuru ngambika sida ulih nulung iya. Nama kebuah nya berat amat? Kesatu, Jehovah ke ngatur bala tuai gempuru mutarka kes ti bekaul enggau dosa ti besai. (Jas. 5:14-16) Kedua, sida ulih nulung orang ke bedosa ti nesal ati ulih diterima Petara baru lalu nyeliah ari ngereja dosa ti sama. (Gal. 6:1; Heb. 12:11) Ketiga, sida dikemendar sereta dilatih ngambika nulung orang ke bedosa ti nesal ati lalu ngurangka pemedis sereta asai ati sida ti besalah. Jehovah ngumbai bala tuai gempuru tu “endur alai belalai ari kabut.” (Isa. 32:1, 2) Tu siti chara Petara mandangka pengasih ngagai kitai.
9 Mayuh nembiak Petara ngasaika pengelantang pengudah madah ngagai tuai gempuru lalu nerima bantu ari sida. Ambika chunto, seiku menyadi Kristian ke benama Daniel udah ngereja dosa ti besai, tang beberapa bulan iya enda ngiga bala tuai gempuru. Ku iya madah: “Nyau pengelama, aku ngumbai diri udah kelalu laun minta bantu ari bala tuai gempuru.” Agi mega, iya seruran nangi enggaika orang nemu pasal dosa iya, lalu iya ngumbai tiap iti sampi iya patut dipunka enggau sampi minta ampun ari Jehovah. Pengujung iya, iya minta bantu ari bala tuai gempuru. Lebuh iya ngenang baru, iya madahka: “Amat, aku takut deka betemu enggau sida. Tang udah nya, aku ngasaika ma ti berat baka ke udah diangkatka orang ari bau aku.” Daniel ulih lantang ati bejaku baru enggau Jehovah. Diatu iya bisi asai ati ti beresi, lalu apin lama ti udah iya nyadi penulung gempuru.
“ORANG NYA TAU NGERARIKA DIRI NGAGAI SEBUAH NENGERI NYA”
10. Ngambika ulih diampun, nama patut digaga orang ke enda sengaja munuh orang?
10 Ngambika ulih diampun, orang ke enda sengaja munuh orang patut lengkas rari ngagai nengeri ti pemadu semak alai ngenduh. (Bacha Josua 20:4.) Nyawa iya bepanggai enggau pengelengkas iya datai ba nengeri nya lalu mengkang dia nyentuk maya imam besai nya mati. Tu penusah ke ditapi pelari nya. Iya deka ninggalka pengawa, rumah iya, sereta enda ulih mindah kin-kitu agi. a (Peda nota kaki.) (P-pau. 35:25) Tang tu bisi penguntung ke iya. Enti iya ninggalka nengeri nya ba sebarang maya, iya nunjukka diri enda bedulika diri udah munuh orang bukai, lalu iya berantuka nyawa diri.
11. Baka ni orang Kristian ti nesal ati ulih nunjukka diri beterima kasihka pengasih ari Petara?
11 Orang ke bedosa ti nesal ati kemaya hari tu mega patut ngereja sekeda utai ngambika ulih diampun Petara. Iya patut badu ngereja pengawa ti bedosa. Tu nyengkaum nyeliahka semua utai ti tau ngujungka iya ngereja dosa ti besai. Rasul Paul madahka utai ti dikereja orang Kristian ti nesal ati di Korint. Iya nulis: ‘Utai ti udah nyadi ari ati kita ti tusah ulih peneka Petara: kita enda empelita agi, kita bebendar deka ngayanka diri nadai penyalah! Peda kita pemalat kita pedis ati, pemalat kita irau, pemalat kita lelengau, pemalat kita angkun, pemalat kita seruran sedia deka ngukum penyalah!’ (2 Kor. 7:10, 11) Nya alai enti kitai enggau naka ulih badu ngereja pengawa ti bedosa, kitai nunjuk ngagai Jehovah, kitai amat bedulika utai ti nyadi ba kitai lalu kitai enda ngumbai diri deka tekala nya bulih pengasih ari Iya.
12. Nama patut dilengkaka orang Kristian ngambika ulih terus bulih pengasih ari Jehovah?
12 Nama patut dilengkaka orang Kristian ngambika ulih terus bulih pengasih ari Jehovah? Iya patut sedia ngelengkaka indah utai ti dikerindu ke tau ngasuh iya bedosa. (Mat. 18:8, 9) Ambika chunto, enti sema bala pangan nuan mai nuan ngereja utai ti enda ngerinduka ati Jehovah, kati nuan deka badu begulai enggau sida? Enti nuan tusah deka natak penyampau ai bisa ke tau diirup nuan, kati nuan deka nyeliahka utai ti tau ngasuh nuan ngirup kelalu mayuh? Enti nuan tusah deka nagang pengingin seks ti kamah, kati nuan deka nyeliah ari meda cherita wayang, laman web, tauka sebarang pengawa ke ngasuh nuan bisi runding ti kamah? Kingatka, semua utai ti dilengkaka kitai ketegal deka ngasika Jehovah nya utai ti mai penguntung. Nadai utai ti merinsa agi ari asai ati ti ditinggalka Jehovah. Lalu nadai utai lebih manah agi ari ngasaika pengerindu Jehovah ti meruan belama iya.—Isa. 54:7, 8.
“SEMUA NENGERI NYA DEKA NYADI ALAI NUAN NGERARIKA DIRI”
13. Terangka kebuah pelari ulih berasai selamat, likun, sereta lantang dalam nengeri alai iya ngerarika diri.
13 Enti pelari udah dalam nengeri alai ngerarika diri, iya deka selamat. Jehovah bisi madah pasal semua nengeri nya: “Semua nengeri nya deka nyadi alai nuan ngerarika diri.” (Jos. 20:2, 3, NW) Jehovah nadai minta pelari nya dipechara baru ke penyalah ti sama. Pia mega, orang ke ngiga balas enda dikemendarka tama ngagai nengeri nya munuh pelari nya. Lebuh pelari dalam nengeri nya, iya likun dijaga Jehovah. Iya ukai dalam rumah jil. Iya ulih gawa, nulung orang bukai, sereta lantang ati nyembah Jehovah. Amat, iya ulih ngembuan pengidup ti lantang sereta ngemuaska ati!
Nuan ulih arapka Jehovah ngampun nuan (Peda genteran 14-16)
14. Orang Kristian ke nesal ati tau arapka nama?
14 Sekeda nembiak Petara ke udah ngereja dosa ti besai agi berasai besalah indah pengudah sida nesal ati. Sekeda ke bukai indah ngasaika Jehovah seruran ingatka dosa ti udah dikereja sida. Enti nuan ngasaika baka nya, nuan patut pechaya, enti Jehovah udah ngampun nuan, Iya amat ngereja nya. Nuan tau enda ibuh berasai besalah agi. Tu meh utai ke udah nyadi ba Daniel, ke disebut ba pun tadi. Pengudah tuai gempuru mutarka pekara nya lalu nulung iya bulih baru asai ati ti beresi, iya berasai lantang agi ati. Ku iya madahka: “Ati aku nadai ngukum aku agi. Sepengudah dosa nya lenyau, iya nadai agi. Munyi ku Jehovah, Iya deka ngambi penusah nuan, lalu ngengkahka nya jauh ari nuan. Nuan enda ulih meda dosa nya agi.” Pengudah pelari nya dalam nengeri alai ngerarika diri, iya tau enda ibuh nangika orang ke ngiga balas deka datai lalu munuh iya. Pia mega, pengudah Jehovah ngampun dosa kitai, kitai enda patut nangika Iya deka ingatka penyalah nya tauka ngukum kitai ketegal penyalah nya.—Bacha Masmur 103:8-12.
15, 16. Nama kebuah kitai tau arapka pengasih ari Jehovah?
15 Indah kitai bisi mayuh agi kebuah arapka pengasih ari Jehovah enti dibanding enggau orang Israel. Pengudah Paul madahka diri berasai ‘tusah’ ketegal iya enda ulih ngasika Jehovah enggau pengabis ati, iya udah nya madahka: ‘Aku meri terima kasih ngagai Petara ulih Jesus Kristus Tuan kitai!’ (Rom. 7:25) Nama reti utai ku iya? Taja pan Paul ngelaban pengingin ti bedosa lalu suba udah bedosa, iya udah nesal ati. Nya alai iya pechaya, Jehovah udah ngampun iya bepelasarka genselan tebus Jesus. Ketegal Jesus udah mayar tebus, kitai bisi ati ti beresi sereta pengelantang ba ati enggau runding. (Heb. 9:13, 14) Ketegal nyadi Imam Besai kitai, Jesus ‘ulih, ke diatu enggau ke belama-lama iya, nyelamatka orang ke datai ngagai Petara, ulih iya, laban iya idup belama iya lalu bejaku ngarika sida ngagai Petara.’ (Heb. 7:24, 25) Maya kelia menya, imam besai nulung orang Israel arapka Jehovah deka ngampun dosa sida. Ketegal Jesus nyadi Imam Besai kitai, kitai bisi mayuh agi kebuah arapka “kitai ulih nerima pengasih lalu nemu berekat, kena nulung kitai lebuh kitai begunaka iya.”—Heb. 4:15, 16.
16 Nya alai, ngambika ulih ngenduh ngagai Jehovah, kitai patut bisi pengarap ba genselan Jesus. Anang ngumbai tebus nya ke orang mayuh aja. Nuan patut arapka diri bulih penguntung ari tebus. (Gal. 2:20, 21) Nuan patut arap, ketegal tebus, Jehovah ngampun dosa nuan. Nuan patut arapka tebus meri nuan pengadang idup belama iya. Genselan Jesus nya pemeri ari Jehovah ke nuan!
17. Nama kebuah nuan deka ngenduh ngagai Jehovah?
17 Nengeri alai ngerarika diri nulung kitai meretika pengasih ari Jehovah. Ari atur Petara tu, kitai nemu nyawa nya kudus. Atur tu mega nunjukka ngagai kitai baka ni bala tuai gempuru ulih nulung kitai, nama reti amat nesal ati, lalu nama kebuah kitai amat pechaya Jehovah ngampun kitai. Kati nuan ngenduh ngagai Jehovah? Semina Iya aja ke likun alai ngenduh! (Mas. 91:1, 2) Ba artikel pengudah tu, kitai deka beratika baka ni nengeri alai ngerarika diri ulih nulung kitai neladan Jehovah, chunto ti pemadu badas pasal pengelurus sereta pengasih.
a Nitih ku sekeda pakar pasal pengidup orang Judah, diri sebilik ke nyempil enggau pelari engka diau ba nengeri nya enggau iya.
