1. Nama dipadah rasul Paul dalam surat ke dituju ngagai orang Kristian di Kolosi? (Peda gambar ba pun artikel.)

 RASUL Paul nulis surat ngagai orang Kristian di Kolosi lebuh iya nyadi orang jil di Rome kira-kira ba taun 60-61. Iya nerang ngagai sida kebuah sida begunaka ‘pemereti ti datai ari roh kudus,’ iya nya, penau beratika utai baka Jehovah. (Kol. 1:9) Paul madahka: “Aku nyebut tu ngambika orang enda ulih nipu kita ngena kelakar ti manah didinga. Anang nejuka orang nipu kita ngena penemu enggau kelakar ti nadai reti, ti datai ari ajar mensia, ti datai ari ajar bala roh ti merintah di langit enggau di dunya tu, ukai ari Kristus.” (Kol. 2:4, 8) Udah nya Paul nerangka kebuah sekeda penemu ke tebilang nya salah sereta kebuah mayuh orang rinduka penemu nya. Ambika chunto, sekeda penemu nya ngasuh orang ngumbai diri bepenemu agi tauka manah agi ari orang bukai. Nya alai Paul nulis surat kena nulung bala menyadi Kristian nya nyeliahka runding dunya lalu nulak pengawa ti salah.—Kol. 2:16, 17, 23.

2. Nama kebuah kitai berandauka sekeda chunto runding dunya?

² Orang ke berunding nitihka chara dunya ngemaruhka prinsip Jehovah, lalu enti kitai enda bejimat, penemu sida ulih belubah-lubah  ngelemika pengandal kitai ngagai penemu-dalam Petara. Semua kitai enda ulih rari ari runding dunya ke bisi ba TV, ba Internet, ba endur gawa, tauka ba sekula. Nama ulih digaga kitai kena nyeliahka runding ti enda manah nya? Ba artikel tu, kitai deka berandauka lima iti chunto pasal runding dunya sereta beratika baka ni kitai ulih nulak semua penemu nya.

3. Nama penemu ti dikerindu orang? Nama kebuah?

³ “Aku ulih nyadi orang ke menyana taja pan enda pechayaka Petara.” Penemu ke baka tu bisi ba mayuh menua kemaya hari tu. Orang ke nyebut tu enda berunding panjai sekalika Petara nya bisi tauka nadai, lalu gaga ati laban sida ulih ngereja semua utai nitihka peneka ati diri. (Bacha Masmur 14:1.) Sekeda ke bukai ngasaika diri pintar enti nyebut, “Aku bisi prinsip ti manah taja pan enda pechayaka Petara.”

4. Nama utai ke ulih disebut kitai kena nulung orang ke pechayaka Penempa nya nadai?

⁴ Nama kebuah penemu ke ngumbai nadai Penempa nya enda betul? Sekeda orang charut runding lebuh sida mansik pasal sains kena ngiga saut iya. Tang utai ti bendar nya senang. Ulih rumah tau bisi kediri empu? Tentu enda! Orang patut ngaga iya. Tang, utai idup lebih agi kompleks ari rumah. Indah sel utai idup ti pemadu mit pan ulih ngasilka sel baru ti sebaka ke diri empu, tang rumah enda ulih. Reti nya sel ulih nyimpan penerang lalu magi penerang nya ngagai sel ti baru ngambika sida ulih ngasilka sel baru ti sebaka ke diri empu. Sapa ke nempa sel idup ngambika bisi penau ulih ngereja utai nya? Ku Bup Kudus nyaut: ‘Semua rumah endang digaga orang, tang Petara ngaga semua utai.’—Heb. 3:4.

5. Nama utai ke ulih disebut kitai pasal penemu ke ngumbai diri ulih nemu bagi utai ti manah taja pan enda pechayaka Petara?

⁵ Nama utai ke ulih disebut kitai bekaul enggau penemu ke madahka kitai ulih nemu bagi utai ti manah taja pan enda pechayaka Petara? Bup Kudus amat bisi madahka indah orang ke enda pechayaka Petara pan bisi prinsip ti manah. (Rom. 2:14, 15) Ambika chunto, orang engka bebasa sereta rinduka apai indai diri. Tang enti iya enda nitihka standard Jehovah, iya engka ngaga pemutus ti amat enda manah. (Isa. 33:22) Mayuh orang ke pintar kemaya hari tu ngaku, kitai begunaka bantu ari Jehovah kena mutarka penusah dunya ti balat amat. (Bacha Jeremiah 10:23.) Nya alai kitai enda patut ngumbai diri ulih nemu bagi utai ti manah taja pan enda pechayaka Petara sereta enda nitihka stardard Iya.—Mas. 146:3.

6. Nama runding orang pasal jalai pengarap?

⁶ “Nuan ulih gaga ati taja pan nadai jalai pengarap.” Mayuh orang ngumbai jalai pengarap nya utai ti enda ngerinduka sereta nadai guna. Pia mega, mayuh jalai pengarap ngajar pasal api neraka, mejal orang meri duit, tauka nyukung politik. Endang enda ngenyitka ati enti majak mayuh orang ke madahka diri gaga ati taja pan nadai jalai pengarap! Sida engka nyebut utai baka, “Aku bisi ati deka nemu pasal Petara, tang aku enggai dipegai siti-siti jalai pengarap.”

7. Baka ni jalai pengarap ti bendar ulih nulung nuan gaga ati?

⁷ Kati kitai amat ulih gaga ati enti nadai  jalai pengarap? Amat, orang ulih gaga ati enti nadai jalai pengarap ti pelesu. Tang nadai orang amat ulih gaga ati enti iya enda ulih nyadi pangan Jehovah, “Petara ti gaga ati.” (1 Tim. 1:11, NW) Semua utai ti digaga Jehovah nulung orang bukai. Ketegal nyadi nembiak Iya, kitai gaga ati laban kitai mega ngiga chara nulung orang bukai. (SKR. 20:35) Ambika chunto, pikirka baka ni sembah ti bendar ulih nulung diri sebilik bulih pengelantang. Kitai belajar bebasa sereta tetap ati ngagai kaling pengidup kitai, ngemesaika anak ti nemu bebasa, sereta ngembuan pengerindu ti bendar ke diri sebilik. Sembah ti bendar nulung nembiak Jehovah begulai gawa dalam pemaik ba eklisia sereta ngayanka pengerindu ngagai bala menyadi Kristian sida.—Bacha Isaiah 65:13, 14.

8. Baka ni Luke 11:28 ulih nulung kitai nemu utai ti amat ngagaka ati orang?

⁸ Nya alai kati orang amat ulih gaga ati enti enda nyembah Petara? Nama utai ke ngasuh orang gaga ati? Sekeda orang rindu enggau pengawa, lumba enggau main, tauka hobi. Sida ke bukai berasai nyamai lebuh sida nyaga diri sebilik sereta bala pangan sida. Taja pan semua utai tu ngenataika pengaga ba ati, tang bisi utai bukai ke beguna agi ba pengidup. Kitai bebida ari jelu, nya alai kitai ulih ngelala Penempa kitai lalu nyembah Iya. Kitai endang ditempa Iya ngambika kitai gaga ati lebuh ngereja nya. (Bacha Luke 11:28.) Ambika chunto, kitai berasai gaga ati sereta diperansang lebuh begempuru enggau bala menyadi Kristian nyembah Jehovah. (Mas. 133:1) Kitai mega bulih pengaga ati laban ulih enggau bala menyadi Kristian di serata dunya, ngembuan pengidup ti beresi, sereta ngembuan pengadang ti ngerinduka ati ke jemah ila.

9. (a) Nama runding orang pasal pengawa besetubuh? (b) Nama kebuah Jaku Petara ngumbai pengawa besetubuh sebedau jadi melaki-bini nya salah?

⁹ “Kati nya salah besetubuh sebedau jadi melaki-bini?” Orang engka nanya: “Nama kebuah kita terit amat? Gaga aja utai dikerindu kita.” Tang Jaku Petara enda ngemendarka ulah seks ti kamah. a (Peda nota kaki.) (Bacha 1 Tesalonika 4:3-8.) Jehovah bisi hak ngaga atur ke kitai laban Iya nempa kitai. Iya madahka, semina seiku lelaki enggau seiku indu ke udah jadi enggau pangan diri aja ke tau besetubuh. Jehovah meri kitai atur laban Iya rinduka kitai. Iya nemu enti kitai nitihka atur nya, pengidup kitai deka menyana agi. Diri sebilik ke ngasika atur Petara deka lebih agi ngembuan pengerindu sereta basa, lalu deka berasai likun. Tang Petara deka ngukum orang ke nemu atur Iya tang enggai ngasika atur nya.—Heb. 13:4.

10. Baka ni orang Kristian ulih ngelaban ulah seks ti kamah?

¹⁰ Bup Kudus ngajar kitai baka ni deka nyeliahka ulah seks ti kamah. Kitai patut bejimat enggau utai ti dipeda kitai. Jesus madahka: “Barang sapa merening ngagai indu enggau ati ti kamah, udah butang enggau indu nya dalam ati iya. Enti mata kanan nuan mai nuan bedosa, keruk lalu buai iya!” (Mat. 5:28, 29) Nya alai kitai patut nyeliahka pornografi sereta  musik ti kamah. Paul nulis: “Bunuh semua pengingin dunya ti dalam kita, baka: pengawa bambai.” (Kol. 3:5) Kitai mega patut nagang utai ti dirunding sereta disebut kitai.—Eps. 5:3-5.

11. Nama kebuah kitai engka dekaka pengawa ti manah?

¹¹ “Pengawa ti manah deka ngagaka ati nuan.” Orang engka ngasuh kitai ngena awak enggau pengering kitai ba pengawa di dunya tu, kelebih agi iya ti ulih ngasuh kitai tebilang, bekuasa, tauka kaya. Ketegal mayuh orang ngumbai pengawa ti manah nya resia kena bulih pengelantang, kitai mega engka berengkah berunding baka nya.

12. Ulih pengawa ti manah ngagaka ati nuan?

¹² Kati pengawa ke ngasuh nuan bekuasa tauka tebilang amat ulih ngagaka ati nuan? Enda. Pikirka tu. Sitan deka bekuasa sereta tebilang. Lalu iya amat bulih utai ti dikedekaka iya. Tang iya pedis ati, ukai gaga ati. (Mat. 4:8, 9; Pem. 12:12) Taja pia kitai enda baka iya. Uji pikirka pengaga ati kitai lebuh nulung orang bukai belajar pasal Petara sereta pengidup lantang ke jemah ila ti disemayaka Iya. Nadai pengawa di dunya ulih meri nuan pengelantang ti baka nya. Pia mega, ngambika bisi pengawa ti manah, selalu iya orang nyau besemekih, kasar, tauka kepapaska orang bukai. Tang pengujung iya sida agi berasai puang. Bup Kudus madahka, sida nya “baka ke begagaika ribut.”—P-jar. 4:4.

13. (a) Nama runding kitai pasal kereja? (b) Nama ngasuh Paul amat gaga ati?

¹³ Endang amat, kitai patut bekereja ngulihka belanja, lalu enda salah milih kereja dikedekaka kitai. Tang kereja kitai enda patut nyadi utai ti pemadu beguna dalam pengidup kitai. Jesus madahka: ‘Nadai orang ulih betuaika dua iku tuan, laban iya deka begedika siku, lalu rinduka siku, tauka angkunka siku, lalu mechat siku. Kita enda ulih betuaika Petara enggau duit.’ (Mat. 6:24) Gawa ke Jehovah sereta ngajar orang bukai pasal Bup Kudus mai pengaga ati ti besai ngagai kitai. Rasul Paul kala napi utai tu. Lebuh iya agi biak, iya beberatka pemujur ba pengawa. Udah nya, iya gaga ati lebuh iya meda pesan Petara ngubah pengidup orang ke alai iya nginjil. (Bacha 1 Tesalonika 2:13, 19, 20.) Nadai pengawa ba dunya ke ulih ngasuh kitai gaga ati baka gawa ke Jehovah sereta ngajar orang bukai pasal Iya!

14. Nama kebuah orang rinduka penemu ti madahka mensia ulih mutarka penanggul diri empu?

¹⁴ “Mensia ulih mutarka penanggul sida empu.” Mayuh orang rinduka penemu nya. Nama kebuah? Enti nya amat, reti nya kitai enda begunaka iring ari Petara lalu kitai ulih ngereja nama-nama utai ti dikedekaka kitai. Nuan engka bisi ninga orang madahka penanggul baka perang, jenayah, penyakit, sereta penyuntuk majak kurang. Siti riput madahka: “Kebuah pengidup mensia majak manah laban mensia dekaka dunya tu nyadi endur ti manah agi.” Kati nya amat? Kati mensia amat udah tetemuka chara mutarka penanggul ba dunya tu? Aram kitai meresa fakta tu.

15. Nama kebuah kitai ngumbai penanggul ba dunya enda ulih diputarka?

¹⁵ Kati mensia udah mutarka perang? Lebuh maya Perang Dunya I enggau II, lebih ari 60 juta iku orang mati. Ba taun 2015 aja, 12.4 juta iku orang ninggalka rumah sida ketegal perang tauka pemerinsa. Tu ngujungka penyampau orang ke ninggalka rumah nya 65 juta iku orang. Baka ni enggau jenayah? Ba sekeda endur, sekeda bansa jenayah udah kurang. Tang maya nya mega, jenayah ke bukai baka jenayah siber, bejamah ba ruang bilik, pengawa ngelaban perintah, sereta makai suap, majak nambah. Baka ni enggau penyakit?  Mensia amat udah tetemuka chara ngubat sekeda penyakit. Tang ba taun 2013, siti riput madahka, tiap taun semilan juta iku orang ke beumur kurang ari 60 taun mati ketegal penyakit tungkul ati, strok, riman, tusah enseput, sereta kemi manis. Lalu baka ni enggau penyuntuk? Bank Dunya madahka, di Afrika aja, penyampau orang ke balat suntuk ba pengidup udah nambah ari 280 juta iku ba taun 1990 ngagai 330 juta iku orang ba taun 2012.

16. (a) Nama kebuah semina Perintah Petara aja ke ulih mutarka penanggul ba dunya? (b) Nama dipadah Isaiah enggau pemasmur pasal utai ti deka digaga Perintah Petara?

¹⁶ Semua utai tu enda ngasuh kitai tekenyit. Kemaya hari tu, ekonomi enggau gerempung politik dipegai orang ti berundingka diri empu aja. Sida enda ulih muai perang, jenayah, penyakit, sereta penyuntuk. Semina Perintah Petara aja ke ulih mutarka nya. Pikirka utai ti deka dikereja Jehovah ke mensia. Perintah Iya deka muai semua utai ke ngasuh perang nyadi, baka ulah ti berundingka diri empu, makai suap, taluk ngagai menua, pengarap pelesu, sereta Sitan empu. (Mas. 46:8, 9) Perintah Petara deka muai jenayah. Indah kemaya hari tu, Perintah nya ngajar bejuta iku orang rindu sereta arapka pangan diri. Nadai perintah bukai ke ulih ngereja nya. (Isa. 11:9) Enda lama agi, Jehovah deka muai penyakit sereta nulung semua orang ngembuan pengerai ti sempurna. (Isa. 35:5, 6) Iya deka muai penyuntuk lalu nulung semua orang ngembuan pengidup ti lantang sereta kaul ti rapat enggau Iya. Utai tu jauh berega agi ari semua duit ti dikemisi kitai.—Mas. 72:12, 13.

17. Baka ni nuan ulih nulak runding dunya?

¹⁷ Nya alai enti nuan bisi ninga penemu dunya ke nyakal pengarap nuan, pansik meh utai ke dipadah Bup Kudus pasal pekara nya. Berandauka utai tu enggau bala menyadi Kristian ke kering ba pengarap. Pikirka kebuah orang rinduka penemu nya, nama kebuah penemu nya salah, sereta baka ni nuan ulih nulak penemu nya. Kitai ulih nyaga diri empu ari runding dunya enti nitihka utai ti dipadah Paul: “Kita enda tau enda pintar lebuh kita begulai enggau orang ke ukai orang Kristian, . . . Nemu jalai kita patut nyaut semua orang.”—Kol. 4:5, 6.