1. Pengawa belagu nulung kitai ngereja nama?

SEIKU penulis lagu ti tebilang kala madahka: “Lebuh nuan ningaka leka jaku, nya ngasuh nuan berunding. Lebuh nuan ninga musik, nya ngasuh nuan bisi asai ati. Tang lebuh nuan belagu, leka jaku negu ati nuan.” Lagu kitai mandangka puji sereta pengerindu ngagai Apai kitai ti di serega, Jehovah. Lagu nya ngasuh kitai berasai semak agi enggau Iya. Nya alai, kitai senang deka meretika kebuah pengawa belagu nya bisi ungkup ti besai ba sembah ti bendar, enda ngira kitai belagu kediri tauka enggau bala menyadi Kristian kitai.

2, 3. (a) Nama asai ati sekeda orang pasal belagu enggau nyawa ti inggar lebuh enggau bala menyadi Kristian? (b) Nama tanya ke deka dikerandauka kitai ba artikel tu?

² Taja pia, baka ni asai ati nuan pasal belagu enggau nyawa ti inggar lebuh enggau bala menyadi Kristian? Kati tu ngasuh nuan berasai malu? Ba sekeda endur, orang ke lelaki engka nangi deka belagu ba mua orang bukai. Ulah ke baka tu enda manah ke semua orang ba eklisia, kelebih agi enti bala tuai gempuru lembau deka belagu tauka enti sida kisuk enggau pengawa bukai lebuh lagu benung ditebah.—Mas. 30:12.

 ³ Pengawa belagu nya sebagi ari sembah kitai ngagai Jehovah. Nya alai, kitai tentu enggai mindah ke bukai lebuh lagu benung ditebah tauka nadai enggau pengawa nya ba gempuru. Nya alai, semua kitai patut nanya diri empu: ‘Nama runding aku pasal belagu ba gempuru? Nama ulih digaga aku enti aku lembau deka belagu ba mua orang bukai? Lalu baka ni aku ulih belagu enggau pengabis ati?’

4, 5. Nama atur ba pengawa belagu ke digaga ba Rumah Sembiang maya jeman Israel kelia?

⁴ Sepemanjai sejarah, bala penyembah Jehovah udah ngena musik muji Iya. Lebuh orang Israel tetap ati ngagai Jehovah, pengawa belagu nya beguna ba sembah sida. Ambika chunto, lebuh David nyediaka Rumah Sembiang alai nyembah Jehovah, iya ngatur 4,000 iku orang Lewi muji Jehovah ngena musik. Ari semua sida, 288 iku nya “orang ke udah dilatih nebah musik.”—1 Ban. 23:5; 25:7.

⁵ Musik sereta pengawa belagu mega beguna ba pengawa nyerahka Rumah Sembiang. Bup Kudus madah ngagai kitai: ‘Sama enggau sida nya bisi 120 iku bala imam ke nyepu terumpit. Bala orang ke belagu nya diumba ngena munyi terumpit, bebendai, enggau pekekas musik ti bukai, lebuh sida belagu muji Jehovah, . . . Rumah nya lalu ngenyit penuh laban mua hari ti beperenching laban penampak mulia Jehovah.’ Uji gambarka, utai tu tentu udah ngeringka pengarap orang Israel!—2 Ban. 5:11-14; 7:6.

6. Nama atur ba musik sereta pengawa belagu ke digaga Nehemiah lebuh iya nyadi gabenor nengeri Jeruselam?

⁶ Nehemiah, ke ngatur bansa Israel ngaga baru dinding nengeri Jerusalem, mega ngatur orang Lewi belagu sereta nebah musik. Pengawa sida ke belagu sereta nebah musik ngasuh pengawa nyerahka dinding kuta lebih agi ngagaka ati. Nehemiah udah netapka “dua bengkah raban penanyi ke belagu meri terima kasih ti besai.” (Neh. 12:31, NW) Raban ti keterubah bejalai musin ke kanan ba atas dinding kuta, lalu raban kedua bejalai musin ke kiba ba atas dinding kuta. Sida deka bejalai nyentuk ngagai sida sama datai ba kandang Rumah Sembiang. Nyawa sida ke rami nya ulih didinga orang ke diau beberapa batu ari endur nya. (Neh. 12:27, 28, 38, 40, 43) Kitai ulih pechaya, Jehovah lantang ati ninga bala penyembah Iya belagu enggau ati ti ransing muji Iya.

7. Baka ni Jesus nunjukka pengawa belagu nya deka nyadi utai ti beguna ba sembah orang Kristian?

⁷ Maya jeman Jesus, musik mengkang beguna ba sembah ti bendar. Uji pikirka utai ke nyadi ba malam ti pemadu besai reti dalam sejarah mensia. Pengudah Jesus ngatur pengawa Makai Malam Tuan enggau bala murid iya, semua sida belagu muji Jehovah.—Bacha Matthew 26:30.

8. Baka ni orang Kristian ba abad keterubah netapka chunto bekaul enggau muji Petara ngena lagu?

⁸ Orang Kristian ba abad keterubah netapka siti chunto ti manah bekaul enggau muji Petara ngena lagu. Enda baka orang Israel ke ngagai Rumah Sembiang nyembah Jehovah, orang Kristian nya betemu ba rumah pangan diri. Taja pan rumah sida enda manah gaya baka Rumah Sembiang, sida agi belagu enggau ati ti ransing. Indah rasul Paul ngasuh bala menyadi Kristian ke lelaki: ‘Ngajar lalu ngerara pangan diri ngena semua penemu-dalam, lalu belagu  ngena masmur, pantun, enggau ngena lagu roh ngagai Petara, enggau ati ti beterima kasih.’ (Kol. 3:16) Semua lagu dalam bup lagu kitai patut dibai “enggau ati ti beterima kasih.” Lagu nya nyadi sebagi ari “pemakai ba maya ti patut” ti disediaka “ulun ke tetap ati sereta bepenemu-dalam” ke kitai.—Mat. 24:45.

9. (a) Nama kebuah sekeda orang lembau deka belagu enggau nyawa ti inggar ba gempuru sereta gempuru besai? (b) Baka ni chara kitai patut belagu muji Jehovah, lalu sapa ke patut ngulu ba pengawa nya? (Peda gambar ba pun artikel.)

⁹ Nama sekeda kebuah ke ngasuh nuan lembau deka belagu? Pengawa belagu engka ukai utai ti selalu digaga dalam ruang bilik nuan tauka ba menua nuan. Tauka nuan engka mendingka bala penanyi ke landik ba radio tauka ba TV, lalu lebuh nuan mandingka nyawa diri belagu enggau nyawa sida, nuan berasai malu tauka enda diperansang. Tang semua kitai bisi tanggung pengawa belagu muji Jehovah. Nya alai pegai tinggi bup lagu nuan, angkatka pala nuan, lalu belagu enggau ati ti ransing! (Esr. 3:11; bacha Masmur 147:1.) Mayuh Palan Gempuru kemaya hari tu ngembuan skrin ke mandangka leka lagu ti dinyanyi kitai, lalu tu ulih nulung kitai belagu enggau nyawa ti inggar. Pia mega, pengawa mai lagu Perintah Petara diatu bisi diatur ba Sekula Bup Kudus ke Menyadi ti Dipilih, iya nya sekula ke bala tuai gempuru. Tu nunjukka bala tuai gempuru patut ngulu ba pengawa belagu dalam gempuru eklisia.

10. Nama patut dikingatka kitai enti kitai nangi deka belagu enggau nyawa ti inggar?

¹⁰ Mayuh orang nangi deka belagu enggau nyawa ti inggar laban sida ngumbai  nyawa diri kelalu inggar tauka enda manah. Taja pia, pikirka pasal tu. “Semua kitai bela ngereja mayuh macham penyalah” lebuh kitai bejaku, tang nya enda nagang kitai ngetu bejaku. (Jas. 3:2) Nya alai nama kebuah kitai patut ngelakka bunyi nyawa kitai ti enda manah nagang kitai belagu muji Jehovah?

11, 12. Baka ni chara kitai ulih belagu enggau manah?

¹¹ Kitai engka nangi deka belagu ketegal kitai enda nemu chara belagu. Tang bisi sekeda chara ti mudah ke ulih nulung kitai mansang ba pengawa belagu. *—Peda nota kaki.

¹² Nuan ulih belagu enggau nyawa ti terang sereta inggar enti belajarka chara enseput enggau betul. Baka elekterik ke ngidupka mintul lampu, seput nulung nuan nambahka bunyi nyawa lebuh nuan bejaku tauka belagu. Nuan patut belagu sama penginggar baka nuan ke bejaku tauka indah inggar agi. (Peda sekeda chara ba bup Manfaat dari Pendidikan Sekolah Pelayanan Teokratis dalam jaku Indonesia, lambar 181 nyentuk ngagai 185, di baruh anak tajuk “Mengatur Persediaan Udara Saudara dengan Baik.”) Indah, Bup Kudus kekadang ngasuh penyembah Jehovah “belagu gaga ati” lebuh mai lagu puji.—Isa. 24:14.

13. Terangka chara kitai ulih belagu enggau ati ti berani.

¹³ Lebuh belajarka Bup Kudus ba diri sebilik tauka kediri empu, uji titihka chara tu: Pilih siti ari lagu ti dikerinduka nuan ari bup lagu kitai. Bacha lirik lagu nya enggau nyawa ti terang sereta inggar. Udah nya, enggau penginggar ti sama, sebut semua leka jaku nya dalam siti ayat ngena sekali sintak seput. Udah nya, nyanyika ayat nya enggau penginggar ti sama. (Mas. 33:1-3) Bunyi nyawa nuan belagu deka inggar agi, lalu nya utai ti manah. Anang ngelakka bunyi nyawa nuan ngasuh nuan berasai nangi tauka malu belagu!

14. (a) Baka ni mulut kitai ke dibuka besai agi ulih nulung kitai lebuh belagu? (Peda kutak “ Ngemanahka Chara Nuan Belagu.”) (b) Nama sekeda chara ke ulih dikena nuan mutarka penanggul ti bekaul enggau bunyi nyawa?

¹⁴ Ngambika ulih belagu enggau nyawa ti inggar, nuan patut meranggapka nyawa. Nya alai lebuh nuan belagu, buka mulut  nuan besai agi ari lebuh nuan ke bejaku. Tang nama patut digaga nuan enti nuan ngasaika diri ngembuan nyawa ke enda inggar tauka nyawa ke kelalu tinggi? Nuan tau bulih sekeda chara belagu ba kutak “Mengatasi Problem-Problem Spesifik,” dalam jaku Indonesia, ke bisi ba bup Manfaat dari Pendidikan Sekolah Pelayanan Teokratis, lambar 184.

15. (a) Nama jaku gerah ke digaga ba aum ti diatur ninting taun kena 2016? (b) Nama sekeda kebuah bup lagu nya diaduka baru?

¹⁵ Semua orang ke ngulu aum ti diatur ninting taun kena 2016 gagit ati lebuh Menyadi Stephen Lett ari Raban ti Ngiring meri jaku gerah pasal siti bup lagu ti baru ke betajuk “Belagu Enggau Gaga Ati” ngagai Jehovah. Baka ke dipadah Menyadi Lett, siti kebuah kitai begunaka bup lagu ti baru nya laban New World Translation of the Holy Scriptures udah diaduka baru. Lirik lagu diubah kena muai leka jaku ke nadai dalam New World Translation. Pia mega, lagu baru pasal pengawa nginjil sereta tebus bisi ditambah. Nambahka nya, ketegal pengawa belagu nya utai ti beguna ba sembah kitai, Raban ti Ngiring deka ngeluarka bup lagu ti tinggi kualiti.  Nya alai kulit bup nya sama chura enggau kulit New World Translation.

16, 17. Nama sekeda ubah ke bukai ti bisi dalam bup lagu ti baru?

¹⁶ Ngambika bup lagu nya senang agi dikena, semua lagu dibagi nitihka topik. Ambika chunto, 12 iti lagu ti keterubah nya pasal Jehovah, 8 iti lagu ke nangkanka nya pasal Jesus enggau tebus, lalu pia mega ke bukai. Ba pun bup lagu tu, bisi rintai pasal semua subjek ke bisi dalam bup lagu nya. Tu amat beguna, ambika chunto, menyadi Kristian lelaki senang agi deka milih lagu ke dikena ba cheramah.

¹⁷ Kena nulung semua orang belagu ari ati, sekeda lirik deka diubah ngambika pesan dalam lagu nya terang agi. Ketegal lagu deka berubah ari ngena chara formal ngagai chara ke biasa, lirik lagu deka senang agi dinyanyi laban nadai ngena leka jaku sereta tusun lagu ke mar. Sekeda lagu mega deka diaduka baru ngambika bekaul agi enggau pengawa begempuru sereta pengawa nginjil.

18. Nama kebuah kitai patut belajarka lagu dalam bup lagu ti baru? (Peda nota kaki.)

¹⁸ Mayuh lagu ari bup “Belagu Enggau Gaga Ati” ngagai Jehovah nya baka sampi. Lagu tu ulih nulung nuan madahka asai ati nuan ngagai Jehovah. Lagu ke bukai deka meransang kitai “ngayanka pengerindu lalu ngereja pengawa ti badas.” (Heb. 10:24) Kitai deka nemu tiun, rentak, sereta leka jaku ba lagu kitai. Siti chara kitai ulih ngereja tu iya nya mendingka lagu ke udah dirikut bala menyadi Kristian. Rikut tu bisi ba jw.org. Lebuh nuan belatihka lagu nya ba rumah, nuan ulih belajarka lagu nya enggau ati ti andal sereta pengabis ati. *—Peda nota kaki.

19. Baka ni semua orang ba eklisia ulih nyembah Jehovah?

¹⁹ Kingatka, pengawa belagu nya utai ti beguna ba sembah kitai. Tu meh chara ti manah kena nunjuk ngagai Jehovah, kitai rinduka Iya lalu kitai beterima kasihka semua utai ti udah dikereja Iya ke kitai. (Bacha Isaiah 12:5.) Enti nuan belagu enggau ati ti ransing, nuan meransang orang bukai ngereja utai ti sama. Semua orang ba eklisia, enda ngira tuai, biak, tauka baru dalam pemendar, ulih nyembah Jehovah enggau chara tu. Nya alai anang lembau belagu ari ati. Titihka utai ti diasuh pemasmur ke madahka: ‘Belagu ke Jehovah!’ Nya alai, belagu meh enggau gaga ati!—Mas. 96:1.