MAYA nya ujung bulan November 1932 di Mexico City ke kisuk, ke alai lebih ari satu juta iku mensia diau. Baru seminggu ti udah, lampu isyarat keterubah dipasang ditu. Tang diatu orang gagit ati enggau siti agi utai. Bala pemberita enggau kamera sida ba stesen kerita api, nganti penatai seiku temuai ti spesial. Sapa temuai nya? Iya Joseph F. Rutherford, presiden Watch Tower Society. Bala Saksi ke diau dia mega nganti penatai Menyadi Rutherford, ke datai ngulu konvensyen tiga hari dia.

Majalah The Golden Age madahka: “Konvensyen tu endang deka nyadi siti pengawa ti nyulut dalam sejarah” kena ngerembaika pemendar di Mexico. Tang tu siti konvensyen ti mit ke alai semina kira-kira 150 iku orang ke datai ngulu. Tang nama kebuah pengawa nya beguna bendar?

Sebedau konvensyen nya, pemendar bedau entu dikerembaika di Mexico. Kenyau ari taun 1919, bisi gempuru besai ke mit, tang pengudah taun nya penyampau eklisia nyau kurang. Lebuh pampang opis dibuka di Mexico City ba taun 1929, gaya utai deka berubah manah agi. Tang agi bisi sekeda penanggul ke patut diputarka. Gerempung kitai udah ngasuh colporteur, diatu dikumbai pengerintis, enda tau nyengulaika pengawa dagang enggau pengawa nginjil. Seiku colporteur balat ringat enggau utai tu, nya alai iya ninggalka pemendar, lalu numbuhka raban belajarka Bup Kudus ke diri empu. Dalam timpuh nya mega, tuai ti ngemata pampang opis ditukar ketegal iya ngembuan ulah ti enda patut. Bala Saksi ti taluk di Mexico begunaka jaku peransang.

Lebuh Menyadi Rutherford datai ngelawa, iya meransang sida ke tetap ati nya ngena dua iti cheramah ba konvensyen nya sereta lima iti licha ke ditaburka terus nengah radio. Nya keterubah iya bala menyadi Kristian ngena stesen radio ngerembaika berita manah di Mexico. Pengudah konvensyen nya, seiku tuai ti ngemata ke baru ba pampang opis udah dichiri ngatur pengawa nginjil. Bala Saksi nya diatu penuh enggau pengeransing, lalu enggau berekat ari Jehovah, sida terus nginjil.

Ba taun 1933, bisi dua iti konvensyen di menua nya, siti di Veracruz, lalu siti agi di Mexico City. Bala menyadi Kristian bebendar nginjil dia, lalu sida bulih asil ti manah. Ngambika chunto, ba taun 1931, bisi 82 iku penginjil. Ba taun 1941, penyampau nya nyadi sepuluh kali lipat! Kira-kira 1,000 iku orang datai ngulu Gempuru Besai Teokratik 1941 di Mexico City.

Ba taun 1943, bala Saksi berengkah madah pasal “Bansa ti Bibas,” iya nya tema Gempuru Besai Teokratik, ke deka diatur ba 12 buah nengeri di Mexico. * (Peda nota kaki.) Sida ngereja tu ngena sandwich signs. Sandwich signs tu digaga ngena dua iti poster ti besai ke dijantil begulai, lalu dirasuk ba kedua-dua bau. Siti poster begitang ba mua tubuh, lalu siti agi begitang ba belakang tubuh. Bala Saksi udah ngena poster ke baka tu mandangka iklan pasal konvensyen kenyau ari taun 1936.

Mandangka iklan ngena sandwich signs amat mujur dipejalaika di Mexico City, nya alai majalah La Nación nulis pasal bala Saksi ke datai ngulu gempuru besai nya: “Ba hari ti keterubah, sida diasuh mai mayuh agi orang. Ba hari siti, orang ke datai ngelui penyampau ke patut ba palan gempuru besai nya.” Gerija Katolik enda lantang ati enggau asil ke manah nya, nya alai sida ngelaban bala Saksi. Tang bala menyadi Kristian enda takut. Sida terus mandangka iklan pasal konvensyen nya. Siti agi artikel ba La Nación madahka: “Semua orang ba nengeri nya meda sida.” Artikel tu mega mandangka gambar bala menyadi Kristian ba sebelah jalai di Mexico City. Ba baruh gambar bisi tulis: “Kimpin ba jalai.”

Dalam beberapa taun nya, mayuh ari bala Saksi udah enggau naka ulih datai ngulu beberapa iti konvensyen ke diatur di Mexico. Mayuh bala menyadi Kristian datai ari kampung ti jauh ari jalai kerita api tauka indah ari jalai alun. Siti eklisia nulis, “Nadai kerita api ngagai endur tu.” Nya alai sida ke ngulu konvensyen nya nepan jelu baghal tauka bejalai beberapa hari ketegal deka nepan kerita api ke mai sida ngagai nengeri ke ngatur konvensyen nya.

Mayuh ari bala Saksi nya seranta, lalu nadai entu duit dikena ngagai konvensyen nya. Lebuh datai din, mayuh ari sida diau ba rumah bala Saksi ke mandangka pengerindu sereta deka nerima temuai. Sida ke bukai tinduk ba Palan Gempuru. Bisi sekali, kira-kira 90 iku bala menyadi Kristian ke lelaki diau ba pampang opis. Sida tinduk ba atas kutak bup. Bup Taun madahka, bala menyadi Kristian nya berasai gaga ati laban kutak nya “lembut sereta nyamai agi ari lantai semin.”

Ba sida bala Saksi nya, ulih begulai enggau bala menyadi sida berega agi ari penusah ke ditapi lebuh datai ngulu konvensyen nya. Diatu, bisi lebih ari 850,000 iku bala Saksi di Mexico, lalu sida ngembuan pengaga ati ti sama. * (Peda nota kaki.) Siti riput ba Bup Taun 1949 madahka, penusah ke ditapi bala menyadi Kristian lebuh datai ngulu konvensyen enda ngurangka pengeransing sida nyembah Jehovah. Tiap iti gempuru besai ke digulu sida deka nyadi “utai ti suah dikenang sida.” Utai ti suah ditanya bala menyadi Kristian iya nya, “Ni Maya Kitai Deka Bisi Siti Agi Gempuru Besai?”—Ari Arkib Kitai di Amerika Tengah.