AKU ada ba taun 1923 di Hemsworth, siti nengeri di Yorkshire, England. Aku bisi seiku menyadi lelaki tuai ke benama Bob. Lebuh aku beumur semilan taun, apai kami duai bisi sekeda bup ke nerangka baka ni pengarap pelesu udah nipu orang. Apai rindu bendar enggau utai ti dibacha iya. Iya enda rindu enggau bala tuai pengarap ke enda nitihka utai ti diajar sida. Beberapa taun udah nya, Bob Atkinson datai ngagai rumah kami lalu nebah siti ari cheramah Menyadi Rutherford ke udah dirikut. Kami nemu, cheramah nya ari raban ti sama ke ngeluarka bup ke udah dibacha Apai. Apai indai aku mai Menyadi Atkinson makai lemai enggau kami ninting malam sereta nyaut mayuh tanya pasal Bup Kudus ari kami. Iya mai kami datai begempuru ba rumah seiku menyadi Kristian lelaki ke beberapa batu penyauh ari rumah kami. Kami berengkah ngulu gempuru enggau tetap, lalu siti eklisia ti mit ditumbuhka di Hemsworth. Enda lama udah nya, sekeda ulun zon (diatu dikumbai tuai ti ngabas) bisi diau enda lama enggau kami sereta bala pengerintis ari eklisia ke enda jauh ari rumah kami makai enggau kami. Bala menyadi nya meri peransang ti amat manah ngagai aku.

Maya nya, kami sebilik udah numbuhka siti pengawa dagang. Tang Apai madah ngagai menyadi lelaki aku, “Enti nuan deka ngerintis, kitai enda ulih bedagang agi.” Bob setuju, lalu iya ninggalka rumah nyadi pengerintis lebuh beumur 21 taun. Dua taun udah nya, lebuh umur aku 16 taun, aku mega nyadi pengerintis. Ba ujung minggu, aku ngerintis enggau bala menyadi Kristian ke bukai tang ba hari bukai aku ngerintis kediri. Aku ngena peti rikut sereta kad saksi, iya nya, siti kad mit ke ngembuan pesan pandak sereta mudah ari Bup Kudus. Jehovah merekatka aku enggau seiku pemelajar Bup Kudus ke jampat mansang. Mayuh orang ba ruang bilik iya udah nya nerima pemendar. Ba taun ke nangkanka nya, aku dipilih nyadi pengerintis spesial, sama enggau Mary Henshall. Kami duai dianjung ngagai endur ke enda kala alai nginjil ba genturung pendiau di Cheshire.

Lebuh Perang Dunya II, sida ke indu patut ngereja pengawa ke nyukung perang. Raban ari pengarap Kristian bukai enda enggau beperang, nya alai kami ngumbai diri ke nyadi pengerintis spesial mega enda ibuh enggau beperang. Tang kot enda setuju, lalu aku diukum jil pengelama 31 hari. Ba taun ke  nangkanka nya, lebuh umur aku manggai 19 taun, aku patut ngagai kot dua kali da agi ketegal ati aku agi enda ngemendarka aku nyukung perang. Taja pia, dua kali nya mega piak bekuasa ngelepaska aku. Sekumbang napi penanggul tu, aku nemu roh kudus nulung aku lalu Jehovah negap sereta ngeringka aku.—Isaiah 41:10, 13.

Aku betemu enggau Arthur Matthews ba taun 1946. Arthur baru diletak ukum jil pengelama tiga bulan ketegal iya enggai enggau beperang. Sepengudah iya dilepaska ari rumah jil, iya enggau menyadi iya Dennis ke nyadi pengerintis spesial di Hemsworth. Apai seduai iya udah ngajar pasal Jehovah kenyau ari seduai iya agi biak, lalu seduai iya dibaptisa lebuh agi nembiak. Sepengudah seduai iya belabuh ngerintis, Dennis dianjung ke Ireland. Nya alai Arthur nadai kaling penginjil agi. Apai indai aku rindu enggau ulah pengerintis ti bagas tu. Nya alai apai indai aku mai iya diau enggau seduai iya. Lebuh aku datai nemuai, kami duai Arthur madahka diri deka nuchi pinggai mangkuk pengudah makai. Nyau kelama, kami duai belabuh betulis surat ngagai pangan diri. Ba taun 1948, Arthur diletak ukum jil tiga bulan sekali da agi. Kami duai jadi ba bulan Januari 1949, lalu juluk ati kami duai iya nya mengkang gawa penuh jam seagi-agi kami duai ulih. Kami duai bejimat ngena belanja, lalu ngena awak raun bekereja ngumpul buah kena ngulihka belanja. Enggau berekat ari Jehovah, kami duai ulih terus ngerintis.

Setaun mimit udah nya, kami duai dianjung ke Ireland Utara. Kami duai ke Armagh dulu, lalu udah nya ke Newry. Mayuh orang ba kedua-dua nengeri nya bepengarap Katolik. Orang ba endur nya balat enda manah runding ngagai pengarap bukai, nya alai kami duai patut bejimat sereta pintar berunding lebuh nginjil. Kami ngatur gempuru ba rumah seiku menyadi Kristian lelaki enggau indu ke penyauh 16 kilometer (10 batu) ari alai kami diau. Kira-kira lapan iku orang ngulu gempuru nya. Kekadang kami bemalam. Kami tinduk ba atas lantai lalu hari siti kami makai pagi. Diatu bisi mayuh Saksi ba kandang endur nya. Tu utai ti ngagaka ati.

Menyadi lelaki aku enggau bini iya, Lottie, udah nyadi pengerintis spesial di Ireland Utara, lalu ba taun 1952 kami empat ngulu konvensyen pelilih di Belfast. Seiku menyadi Kristian lelaki chukup manah ati deka alai kami diau, nya alai kami empat diau ba rumah iya sama enggau Pryce Hughes, ke udah nya nyadi ulun pampang opis di Britain. Bisi sekali, maya malam hari, kami berandau pasal siti bup mit ti baru dikeluarka ke betajuk, God’s Way Is Love. Bup tu diungkup ke orang di Ireland. Menyadi Hughes madahka tusah deka nginjil ngagai orang ke bepengarap Katolik di Republik Ireland. Bala menyadi Kristian dipejal ninggalka endur alai sida diau, lalu bala paderi ngansak orang nyerang sida. Pryce madahka, “Kami begunaka laki bini ke bisi kerita ngambika ulih enggau siti kimpin ke diungkup kena nyadung bup mit nya ke serata genturung pendiau.” a (Peda nota kaki.) Nya meh maya kami nyebut, “Kami ka ngereja pengawa nya!”

 Siti endur ke ulih alai bala pengerintis selalu diau di Dublin nya ba rumah Ma Rutland, seiku menyadi Kristian indu ke tetap ati ti udah lama nyembah Jehovah. Kami mega diau dia enda lama, lalu nyual sekeda barang kami. Udah nya, kami empat ngena motosikal Bob ke betayar tiga ngiga kerita. Kami bulih siti kerita ke udah dikena ti agi manah, lalu kami minta penyual nya nganjung kerita nya laban nadai seiku ari kami nemu deriba. Arthur selemai-lemai nya duduk ba atas katil, ngenuluka diri nukar gear kerita. Pagi siti lebuh iya nguji deriba kerita nya pansut ari endur nyimpan kerita nya, seiku pengerintis seberai tasik ke benama Mildred Willett (ke udah nya jadi enggau John Barr) datai. Iya nemu deriba! Iya nulung kami belajar deriba, lalu udah nya kami sedia mupuk.

Udah nya, kami patut ngiga alai endur diau. Bala menyadi Kristian enda ngasuh kami diau ba treler laban orang ke nyakal deka nunu iya. Nya alai kami ngiga rumah tang nadai bulih. Malam nya kami empat tinduk dalam kerita. Hari siti, kami semina tetemuka rumah treler ke mit ti bisi sesit katil betingkat ti mit. Nya meh alai kami diau. Utai ti ngalitka ati, kami nadai penanggul paking treler kami ba tanah ke diempu orang bumai. Kami deka nginjil ba endur ke penyauh 16 ngagai 24 kilometer (10 ngagai 15 batu) ari treler nya. Pengudah ngagai endur ke baru, kami deka pulai baru nginjil ngagai orang ba endur ke kala alai kami paking treler.

Kami nadai entu disakal lebuh ngelawa semua rumah ke bisi ba tenggara Republik Ireland. Kami nyadung lebih 20,000 iti bup mit, lalu kami ngirumka nama semua orang ke bisi ati deka nemu pasal Bup Kudus ngagai pampang opis di Britain. Endang sigi berekat bisi beratus iku bala Saksi di Ireland diatu!

Beberapa taun udah nya, kami dianjung baru ke selatan London. Pengudah beberapa minggu, bala menyadi Kristian ari pampang opis Britain betelefon ngagai Arthur lalu ngasuh iya belabuh ngereja pengawa pelilih ba hari siti! Pengelama seminggu kami dilatih, lalu udah nya kami mupuk bejalaika pengawa pelilih di Scotland. Nya alai Arthur nadai mayuh awak dikena nyediaka sekeda cheramah iya. Tang iya seruran deka ngereja sebarang pengawa ke Jehovah, taja pan pengawa nya tusah dikereja. Chunto iya amat meransang aku. Kami amat rindu enggau pengawa pelilih. Kami berasai gaga ati ulih begulai enggau mayuh bala menyadi Kristian ba dia pengudah gawa ba endur ke enda kala alai nginjil beberapa taun.

Lebuh Arthur dikangau ngagai Sekula Gilead ba taun 1962, kami duai patut ngaga siti pemutus ti besai. Kus nya pengelama sepuluh bulan, tang aku enda ulih enggau iya laban enda dikangau. Kami duai ngasaika Arthur endang patut nerima kangau nya. Ketegal aku nadai kaling penginjil agi, nya alai pampang opis nganjung aku pulai ke Hemsworth nyadi pengerintis spesial. Setaun pengudah Arthur pulai, kami dianjung bejalaika pengawa pelilih. Kandang pelilih nya nyengkaum Scotland, utara England, sereta Ireland Utara.

Ba taun 1964, Arthur dianjung gawa nyadi ulun  pampang opis di Republik Ireland. Terubah iya, aku irau deka ke Betel laban aku balat rindu enggau pengawa ngagai siti-siti endur. Lebuh ngenang baru, aku beterima kasihka peluang ulih gawa ba Betel. Aku pechaya, enti nuan nerima siti-siti pengawa indah lebuh nuan ngasaika diri nadai ati deka ngereja nya, Jehovah mega deka merekatka nuan. Ba Betel, aku ngaga pengawa opis, mungkus litaricha, berapi, sereta meresi. Bisi maya nya, kami mega ngereja pengawa pelilih lalu ulih betemu enggau bala menyadi Kristian di serata menua nya. Tu, nyengkaum meda bala pemelajar Bup Kudus kami duai mansang dalam pemendar, ngasuh kaul ti tegap enggau bala menyadi Kristian di Ireland. Tu endang berekat!

Konvensyen entarabansa ti keterubah di Ireland diatur ba Dublin kena taun 1965. b (Peda nota kaki.) Taja pan balat disakal, konvensyen nya mujur endar dipejalaika. Penyampau orang ke datai nya 3,948 iku, lalu 65 iku orang dibaptisa. 3,500 iku bala menyadi Kristian kitai ari menua bukai diau ba rumah bala menyadi Kristian di Dublin. Tiap iku orang ke bempu rumah nerima siti surat terima kasih. Lalu orang ke bempu rumah nya mega muji ulah manah bala menyadi Kristian nya. Nya endang ubah ti manah di Ireland.

Ba taun 1966, utara enggau selatan Ireland beserakup lebuh dipegai pampang opis di Dublin. Penyerakup tu amat bebida laban orang ba pulau nya bepechah ketegal politik sereta jalai pengarap. Kami alit ati meda mayuh amat orang ari pengarap Katolik nerima pemendar lalu sama nyembah Jehovah enggau bala menyadi Kristian sida ke kala enggau pengarap Protestan.

Ba taun 2011, pengidup kami duai berubah abis lebuh pampang opis Britain enggau Ireland disegulai lalu kami duai dianjung ke Betel London. Maya nya, aku belabuh irauka pengerai Arthur. Iya ditemu bisi penyakit Parkinson. Sayau amat, kena 20 Mei 2015, iya ke nyadi kaling pengidup aku pengelama 66 taun nya udah nadai agi.

Beberapa taun ti udah, aku berasai puang, tusah ati, sereta merinsa. Suba, Arthur selalu bisi enggau aku. Aku lelengau amat ke iya! Tang lebuh nuan napi semua penanggul tu, nuan majak semak ngagai Jehovah. Aku berasai gaga lebuh nemu orang bukai mega rinduka Arthur. Aku bisi nerima surat ari bala menyadi Kristian di Ireland, Britain, sereta Amerika Serikat. Surat sida enggau jaku peransang ke diterima aku ari menyadi Arthur, Dennis seduai bini iya, Mavis, sereta anak menyadi indu aku, Ruth seduai Judy, udah mayuh amat nulung aku.

Ayat Bup Kudus ke udah meransang aku nya Isaiah 30:18. Ayat nya madahka: ‘Jehovah nganti maya Iya deka kasihka kita. Iya sedia deka kasihka kita, laban Iya endang seruran ngereja utai ti ngena. Beberekat meh orang ke manggaika pengarap sida ba Jehovah.’ Aku amat berasai diperansang laban nemu Jehovah nganti maya deka mutarka semua penanggul kitai lalu deka meri kitai pengawa ti ngagitka ati ba dunya baru Iya.

Lebuh aku ngenang pasal suba, aku ulih meda baka ni Jehovah udah ngiring sereta merekatka pengawa nginjil di Ireland! Aku berasai temegah ati nyadi seiku ari pemayuh orang ke nulung ba pengawa tu. Endang amat, ngereja utai ti diasuh Jehovah seruran ngenataika berekat.