1-3. (a) Ni maya Sekariah belabuh benabi, baka ni gaya nembiak Jehovah maya nya? (b) Nama kebuah Jehovah deka nembiak Iya pulai baru ngagai Iya?

SITI gulung surat ti terebai, seiku indu dalam bakul, sereta dua iku indu ke terebai ti bisi sayap baka sayap burung undan. Tu sekeda ari genera nyelai ti dipeda Sekariah. (Sek. 5:1, 7-9) Nama kebuah Jehovah meri genera ngagai nabi Iya? Baka ni gaya orang Israel maya nya? Lalu baka ni kitai tau bulih penguntung ari genera nya kemaya hari tu?

² Maya nya taun 537 sebedau Kristus ada, lalu nembiak Jehovah amat gaga ati. Sida udah nyadi orang tangkap di Babilon pengelama 70 taun, tang diatu sida udah dilepaska! Sida gagit ati ulih pulai baru ngagai Jerusalem ngambika ulih ngaga baru Rumah Sembiang lalu nyembah Jehovah dia. Setaun udah nya, orang Israel nudukka batu pemun Rumah Sembiang. Sida amat gaga ati, lalu sida manjung “inggar  amat, datai ke sida nyau ulih didinga berapa batu ari endur nya.” (Esr. 3:10-13) Tang pengawa nagang ngaga Rumah Sembiang nya majak balat-sebalat. Orang Israel nyadi amat lemi semengat nyentukka sida badu ngaga Rumah Sembiang. Tang sida beberatka pengawa ngaga rumah ke sida empu sereta betanam. Taja pan udah enam belas taun, Rumah Sembiang Jehovah bedau agi tembu. Nembiak Jehovah patut ditangkan pulai baru ngagai Iya sereta badu berunding pasal diri empu. Jehovah deka sida nyembah Iya enggau ransing sereta berani.

³ Nya alai ba taun 520, Jehovah ngasuh nabi Iya Sekariah nulung nembiak Jehovah ingatka kebuah Iya udah ngelepaska sida ari menua Babilon. Lalu reti nama Sekariah nya “Jehovah Udah Ingatka.” Taja pan orang Israel enda ingatka utai ti udah dikereja Jehovah ke sida, Jehovah agi ingatka sida. (Bacha Sekariah 1:3, 4.) Jehovah besemaya deka nulung sida mulaika baru sembah ti tuchi. Tang Iya mega nangkan sida, Iya semina deka nerima sembah sida enti sida meri Iya utai ti pemadu manah. Aram kitai mansik genera keenam enggau ketujuh ti diterima Sekariah. Kitai deka belajar pasal baka ni Jehovah meransang orang Israel sereta baka ni dua iti genera tu ulih nulung kitai kemaya hari tu.

4. Nama dipeda Sekariah dalam genera iya ti keenam? Nama kebuah gulung surat nya bisi tulis ba kedua-dua piak? (Peda gambar 1 ba pun artikel.)

⁴ Bab 5 dalam bup Sekariah berengkah enggau genera ti nyelai. (Bacha Sekariah 5:1, 2.) Sekariah meda siti gulung surat ti terebai ba langit. Gulung surat nya nyauka 9 meter (30 kaki) pemanjai, lalu buka iya 4.5 meter (15 kaki). Gulung surat nya dibuka, lalu bisi pesan ditulis dalam surat nya. (Sek. 5:3) Tu pesan pengawa ngukum ti berat. Kelia menya, orang semina nulis ba sepiak lambar gulung surat aja. Tang pesan nya amat berat, nya alai kedua-dua piak gulung surat nya bisi tulis.

5, 6. Nama runding Jehovah pasal semua bansa pengawa ngenchuri?

⁵ Bacha Sekariah 5:3, 4. * Semua mensia betanggungjawapka pengawa sida ngagai Jehovah. Kelebih agi ngagai nembiak Iya, laban sida dikangauka ngena nama Iya. Sida rinduka Iya, lalu nemu ngenchuri nya ngenyaika nama Iya. (J-lam. 30:8, 9) Sekeda orang engka ngumbai ngenchuri nya enda salah enti sida bisi kebuah ti manah. Tang enda ngira ni pemanah kebuah iya, orang ke ngenchuri nunjukka iya ngenuluka pengamu diri ari Jehovah, nama Iya, sereta adat Iya.

⁶ Bisi nuan beratika, Sekariah 5:3, 4 madahka sumpah deka “tama ngagai rumah penchuri,” lalu sumpah nya “mengkang  dalam rumah nya lalu ngerusak rumah nya”? Nya alai Jehovah ulih ngasuh semua penyalah ditemu sereta ngelabuhka ukum ke semua penyalah ti bisi ba bala nembiak Iya. Taja pan orang ke ngenchuri ulih ngelalaika utai ti dikereja iya ari polis, tuke, bala tuai gempuru, tauka ari apai indai, tang iya enda ulih ngelalaika pengawa nya ari Jehovah. Jehovah deka nentuka semua bansa pengawa ngenchuri ditemu magang. (Heb. 4:13) Kitai amat gaga ati ulih begulai enggau orang ke bebendar lurus dalam semua pekara!—Heb. 13:18.

7. Baka ni kitai ulih nyeliah ari sumpah ke bisi ditulis ba gulung surat ti terebai?

⁷ Semua bansa pengawa ngenchuri enda ngelantangka ati Jehovah. Kitai temegah ati ulih nemu sereta ngasika prinsip Jehovah ke bekaul enggau utai ti betul enggau salah sereta idup enggau chara ti enda ngenyaika nama Iya. Enggau ngereja tu, kitai ulih nyeliah ari pengawa ngukum ke dikenataika Jehovah ngagai orang ke enda ngasika Iya.

8-10. (a) Nama reti sumpah? (b) Nama sumpah ke enda dikeamatka Raja Sedekiah?

⁸ Udah nya, gulung surat ti terebai mai pesan ke ngembuan jaku tangkan ngagai orang ke ngaga “sumpah ti pelesu” dalam nama Petara. (Sek. 5:4, NW. Peda nota kaki ba genteran 5.) Sumpah nya jaku ti dikena nunjukka siti-siti utai nya amat, tauka siti semaya ti berat kena nunjukka deka tauka enggai ngereja siti-siti utai.

⁹ Besumpah ngena nama Jehovah nya pekara ti amat berat. Kitai nemu tu ari utai ke nyadi ba Sedekiah, raja ke penudi merintah di menua Jerusalem. Sedekiah  ngaga sumpah ngena nama Jehovah, madahka diri deka nunduk ngagai raja menua Babilon. Tang Sedekiah enda ngamatka semaya diri. Ketegal tu, Jehovah madahka Sedekiah deka “mati di menua Babilon, laban iya ngelanggar sumpah diri empu, enggau sempekat ti udah digaga iya enggau raja menua Babilon, ti udah nyiri iya nyadi raja.”—Esk. 17:16.

¹⁰ Raja Sedekiah udah besumpah ngena nama Jehovah, lalu Jehovah ngarapka iya ngamatka sumpah diri. (2 Ban. 36:13) Tang Sedekiah ngelanggar semaya diri lalu minta menua Ejip nulung iya ngelepaska diri ari menua Babilon. Tang menua Ejip enda ulih nulung iya.—Esk. 17:11-15, 17, 18.

11, 12. (a) Nama semaya ti pemadu berat ke tau digaga kitai? (b) Baka ni pengawa nyerahka diri ngagai Jehovah bekaul enggau pengidup kitai ninting hari?

¹¹ Ari utai ke udah nyadi ba Sedekiah, kitai nemu Jehovah ningaka semaya ti digaga kitai. Ngambika ulih ngelantangka ati Iya, kitai patut ngamatka semaya diri. (Mas. 76:11) Semaya ti pemadu berat ke tau digaga kitai iya nya nyerahka diri ngagai Jehovah. Lebuh kitai nyerahka diri ngagai Iya, kitai besemaya deka gawa ke Iya enda ngira nama utai ke nyadi ba pengidup kitai.

¹² Baka ni kitai ulih ngamatka semaya diri ngagai Jehovah? “Tiap hari” kitai napi penguji ti besai enggau ti mit. Ari chara kitai mutarka penguji nya, kitai ulih nunjukka penegap kaul kitai enggau Jehovah. (Mas. 61:8) Ambika chunto, nama deka digaga nuan enti sema orang ba endur kereja tauka ba sekula deka nguntik nuan? Kati nuan enggai ibuhka iya sereta nunjukka diri deka ngasika Jehovah? (Mas. 128:1) Tauka kati enti semina nuan aja ke nyembah Jehovah ba ruang bilik nuan? Kati nuan minta Jehovah nulung nuan terus ngembuan ulah ke patut ba orang Kristian? Enda ngira nama penanggul ke ditapi nuan, kati nuan beterima kasih ngagai Jehovah tiap hari ke pengerindu sereta iring ari Iya? Bisi nuan nyediaka awak kena macha Bup Kudus ninting hari? Agi mega, kitai besemaya deka ngereja semua nya lebuh kitai nyerahka pengidup diri ngagai Jehovah. Enti kitai ngasika Jehovah lalu meri Iya utai ti pemadu manah, kitai nunjukka diri rinduka Iya sereta enggi Iya. Sembah kitai nya jalai pengidup kitai. Lalu ketegal kitai tetap ati ngagai Jehovah, Iya besemaya deka meri kitai pengidup ti ngerinduka ati jemah ila.—U-dat. 10:12, 13.

13. Nama ulih dipelajarka kitai ari genera Sekariah ti keenam?

¹³ Genera Sekariah ti keenam nulung kitai nemu enti kitai rinduka Jehovah, kitai enda ngenchuri tauka ngelanggar semaya diri. Kitai mega belajar, taja pan orang Israel ngaga mayuh penyalah, Jehovah ngamatka semaya Iya lalu enda ninggalka nembiak Iya. Iya nemu sida napi penanggul ti amat berat laban dikelingi bala munsuh. Ari chunto Iya Empu, Jehovah ngajar kitai, kitai patut ngamatka semaya  diri. Lalu kitai ulih pechaya, Iya deka nulung kitai ngereja nya. Siti chara Jehovah nulung kitai iya nya enggau meri kitai pengadang ke jemah ila. Enda lama agi, Iya deka muai semua penyai ke bisi ba dunya. Kitai ulih macha pasal pengadang tu ba genera Sekariah ti ketujuh.

14, 15. (a) Nama utai ti dipeda Sekariah ba genera iya ti ketujuh? (Peda gambar 2 ba pun artikel.) (b) Sapa indu ba dalam bakul nya? Nama kebuah melikat nudung bakul nya?

¹⁴ Pengudah Sekariah meda gulung surat ti terebai, seiku melikat madah ngagai iya: “Peda nyin!” Udah nya Sekariah meda siti bakul. (Bacha Sekariah 5:5-8.) Tudung bakul ti segala nya digaga ari bangkang. Lebuh bakul nya dikebak, Sekariah meda “siku indu duduk dalam bakul nya!” Melikat nya madah ngagai Sekariah, indu dalam bakul nya “penyai.” Uji gambarka, Sekariah tentu balat takut lebuh iya meda indu nya nguji deka pansut ari bakul nya! Tang melikat nya jejampat ngenyakka indu nya ke dalam bakul nya lalu nudung bakul nya ngena tudung ti berat. Nama reti utai tu?

¹⁵ Genera tu ngasuh kitai pechaya, Jehovah enggai ngelakka sebarang penyai bisi ba bala nembiak Iya. Enti Jehovah meda siti-siti utai ke enda manah, Iya deka jejampat muai utai nya. (1 Kor. 5:13) Melikat nya nunjukka tu amat lebuh iya jejampat nudung bakul nya ngena tudung ti berat.

16. (a) Nama nyadi ngagai bakul nya? (Peda gambar 3 ba pun artikel.) (b) Kini ke tunga dua iku indu ke bisi sayap mai bakul nya?

¹⁶ Udah nya, Sekariah meda dua iku indu ke bisi sayap ti kering baka sayap  burung undan. (Bacha Sekariah 5:9-11.) Dua iku indu nya amat bebida ari indu ke jai dalam bakul nya. Ngena sayap seduai iya ti kering, seduai iya ngangkatka bakul ke bisi “penyai” nya lalu terebai. Kini ke tunga seduai iya mai indu nya? Seduai iya mai bakul nya ngagai “menua Babilon.” Nama kebuah seduai iya mai indu nya kia?

17, 18. (a) Nama kebuah menua Babilon nya endur ke patut alai “penyai”? (b) Nama deka digaga nuan?

¹⁷ Orang Israel ke idup maya jeman Sekariah tentu meretika kebuah menua Babilon nya endur ti patut alai mai “penyai.” Sida nemu menua ti jai nya penuh enggau ulah ti kamah sereta sembah ti pelesu. Tiap hari Sekariah enggau orang Judah ke bukai ti diau dia udah bebendar ngelaban chara pengidup enggau pengarap orang kapir. Nya alai genera tu meri jamin, Jehovah deka nentuka sembah ngagai Iya mengkang tuchi.

¹⁸ Genera tu mega ngingatka orang Judah, sida mega betanggungjawap ngetanka sembah sida ti tuchi. Penyai enda ulih sereta enda dikemendarka ba bala nembiak Jehovah. Kemaya hari tu, Jehovah udah mai kitai ngagai gerempung Iya ti tuchi, alai kitai ngasaika pengerindu sereta jaga ari Iya. Tiap iku ari kitai betanggungjawap nulung gerempung Iya mengkang tuchi. Penyai enda tau bisi ba bala nembiak Jehovah.

19. Nama reti genera Sekariah ti nyelai nya ba kitai kemaya hari tu?

¹⁹ Genera Sekariah ti keenam enggau ti ketujuh ngembuan jaku tangkan ti berat ngagai orang ke ngereja utai ti enda manah. Jehovah enggai ngelakka penyai majak nyadi. Ketegal kitai nyadi nembiak Iya, kitai enda tau enda begedika penyai. Genera nya mega ngasuh kitai pechaya, enti kitai bebendar ngelantangka ati Apai kitai ti bisi pengerindu, kitai enda kena tinggang sumpah ari Iya lalu bulih lindung sereta berekat ari Iya. Taja pan tusah deka mengkang tuchi ba dunya ti jai tu, tang enggau bantu ari Jehovah kitai ulih mujur! Tang baka ni kitai ulih pechaya sembah ti bendar deka meruan bisi? Lalu seraya kitai majak semak enggau penusah ti besai, baka ni kitai nemu Jehovah deka nyaga gerempung Iya? Kitai deka berandauka tanya nya ba artikel pengudah tu.