1, 2. (a) Nama pemaik ke ulih dikembuan kitai diatu? (b) Nama kebuah kitai bedau agi ulih ngembuan pemaik? (Peda gambar ba pun artikel.)

SEMUA kitai dekaka pemaik dalam pengidup, tang kitai mega deka nyeliahka pengirau. Nya alai kitai amat beterima kasih ngagai Jehovah ke meri kitai ‘pemaik Petara.’ Pemaik nya pengelantang ke ulih nyaga ati enggau runding kitai ti irau. (Plp. 4:6, 7) Ketegal kitai udah nyerahka diri ngagai Jehovah, kitai mega ngembuan ‘pemaik enggau Petara.’ Reti nya kitai bisi kaul ti manah enggau Iya.—Rom. 5:1.

² Taja pia, jam Petara deka mai pemaik ngagai dunya bedau agi datai. Kitai diau ba hari ti penudi, nya alai bisi mayuh penusah ke ngasuh kitai irau. Kitai dikelingi orang ke mangah. (2 Tim. 3:1-4) Kitai mega patut ngelaban Sitan sereta ajar ti bula ke dibai iya. (2 Kor. 10:4, 5) Tang utai ke tau ngasuh kitai balat irau iya nya sakal ari kaban belayan ke enda nyembah Jehovah. Sekeda ari sida engka ngeleseka utai ti dipechaya  kitai tauka nuduh kitai mechahka ruang bilik. Sida indah madahka kitai ukai agi diri sebilik tauka kaban belayan enti kitai agi nyembah Jehovah. Nya alai nama runding kitai pasal sakal ari diri sebilik tauka kaban belayan kitai? Lalu baka ni kitai ulih ngetanka pemaik lebuh utai tu nyadi?

3, 4. (a) Nama penyadi ketegal ajar ti dibai Jesus? (b) Kelebih agi ni maya nya tusah nitihka Jesus?

³ Jesus nemu, ukai semua orang deka nerima ajar iya. Iya mega nemu, bala murid iya begunaka pemerani laban sekeda orang deka nyakal sida. Sakal tu deka ngeruga pemaik ba ruang bilik sida. Jesus madahka: ‘Anang ngumbai aku datai mai pemaik ngagai dunya. Aku ukai datai mai pemaik, tang mai pedang. Aku datai laban aku deka nyabung anak lelaki ngelaban apai, anak indu ngelaban indai, menantu indu ngelaban mentua indu. Munsuh kita ke pemadu jai nya kita sebilik empu.’—Mat. 10:34-36.

⁴ Nama reti utai ku Jesus lebuh iya madahka ‘Anang ngumbai aku datai mai pemaik’? Iya deka orang nemu, sida deka napi penusah enti nyadi murid iya. Kebendar, tuju Jesus nya ngajar orang pemendar pasal Petara, ukai mechahka ruang bilik. (Jhn. 18:37) Tang bala murid Jesus patut nemu, nitihka iya enda seruran senang, kelebih agi enti pangan rapat tauka diri sebilik enda nerima pemendar.

5. Nama udah ditapi bala murid Jesus?

⁵ Jesus madahka, sakal ari diri sebilik nya siti ari utai ke patut ditatka bala murid iya. (Mat. 10:38) Kena ngelantangka ati Jesus, bala murid iya patut tan ati lebuh diri sebilik ngeleseka sida tauka enggai nerima sida. Tang sida deka bulih mayuh agi diri sebilik ari ke udah dilenyauka sida.—Bacha Mark 10:29, 30.

6. Nama patut dikingatka kitai enti kaban belayan nyakal kitai?

⁶ Taja pan kaban belayan nyakal kitai ketegal nyembah Jehovah, tang kitai agi sayauka sida. Taja pia kitai patut ingat, pengerindu kitai ke Petara enggau Kristus patut dalam agi ari pengerindu kitai ke orang bukai. (Mat. 10:37) Kitai mega patut bejimat, Sitan ulih ngena pengerindu kitai ke diri sebilik ngasuh kitai enda taluk ngagai Jehovah. Aram kitai berandauka sekeda penanggul lalu beratika baka ni kitai ulih tan.

7. Nama runding nuan pasal penanggul nuan enti sema kaling pengidup enda nyembah Jehovah?

⁷ Bup Kudus madahka, semua orang ke bebini belaki “deka dituntung penusah.” (1 Kor. 7:28) Enti nuan jadi enggau orang ke enda nyembah Jehovah, tu deka nambahka mayuh agi penanggul sereta pengirau ba rumah tangga nuan. Taja pia, endang manah enti nuan meda penanggul nuan nya nitihka chara Jehovah meda iya. Jehovah madahka, kitai enda ulih beserara tauka nyarak kaling pengidup ketegal iya enda nyembah Jehovah. (1 Kor. 7:12-16) Enti sema laki nuan enda nyembah Jehovah sereta enda ngulu ba sembah ti bendar, nuan mega patut masa iya nyadika tuai ba ruang bilik nuan. Lalu enti sema bini nuan enda nyembah Jehovah, nuan mega patut rindu sereta mentas enggau iya.—Eps. 5:22, 23, 28, 29.

8. Nama sekeda tanya ke ulih ditanya diri empu enti kaling pengidup nuan nguji nyekat penyampau sembah nuan ngagai Jehovah?

 ⁸ Nama patut digaga nuan enti sema kaling pengidup nuan nguji nyekat penyampau sembah nuan ngagai Jehovah? Laki seiku menyadi Kristian indu madahka, menyadi Kristian indu nya semina ulih pansut nginjil ba siti-siti hari aja dalam seminggu. Enti nuan napi utai ti sama, tanya diri empu: ‘Kati kaling pengidup aku minta aku badu agi nyembah Jehovah? Enti enda, ulih aku ngereja utai ke dipinta iya?’ Enti nuan nya nemu berunding, nuan deka napi kurang agi penanggul dalam rumah tangga.—Plp. 4:5.

9. Baka ni orang Kristian ulih ngajar anak sida bebasaka apai tauka indai ke enda nyembah Jehovah?

⁹ Pengawa ngelatih anak engka tusah enti sema kaling pengidup nuan enda nyembah Jehovah. Ambika chunto, nuan patut ngajar anak nuan ngasika pesan Bup Kudus: “Bebasaka apai enggau indai nuan.” (Eps. 6:1-3) Tang nama patut digaga nuan enti sema kaling pengidup nuan enda nitihka standard Bup Kudus? Nuan ulih netapka chunto ti manah ke anak nuan enggau chara bebasaka kaling pengidup nuan. Perundingka pemanah ulah kaling pengidup nuan, lalu padah ngagai iya nuan beterima kasihka semua utai manah ti dikereja iya. Anang nyebut utai ti enda manah pasal kaling pengidup ba mua anak nuan. Tang terangka ngagai sida, tiap iku orang patut milih sekalika deka nyembah Jehovah tauka enggai. Enti nuan ngelatih anak nuan bebasaka apai tauka indai sida ke enda nyembah Jehovah, chunto manah sida ulih matak kaling pengidup nuan deka belajar pasal Jehovah.

10. Baka ni apai indai ke Kristian ngajar anak sida rinduka Jehovah?

¹⁰ Sekeda kaling pengidup ke enda nyembah Jehovah deka anak sida ngintu hari besai ke bepun ari orang ke enda arapka Petara tauka belajar pasal ajar ari pengarap pelesu. Sekeda laki mega nagang bini sida ke Kristian ngajar anak  pasal Bup Kudus. Tang dalam pekara tu, bini patut naka ulih ngajar anak pasal pemendar. (SKR. 16:1; 2 Tim. 3:14, 15) Ambika chunto, laki ke enda nyembah Jehovah engka nagang bini iya belajarka Bup Kudus ngena chara formal enggau anak tauka mai sida ngagai gempuru. Seraya iya bebasaka pemutus laki iya, iya mega agi ulih berandau enggau anak iya pasal pengarap diri lebuh bisi peluang. Enggau chara nya, sida ulih belajar pasal Jehovah sereta standard Iya pasal utai ti betul enggau salah. (SKR. 4:19, 20) Ke penudi iya, anak patut ngaga pemutus sekalika sida deka nyembah Jehovah tauka enggai. * (Peda nota kaki.)—U-dat. 30:19, 20.

11. Nama tau ngasuh penanggul nyadi entara kitai enggau kaban belayan kitai ke enda nyembah Jehovah?

¹¹ Lebuh kitai berengkah belajar enggau Saksi-Saksi Jehovah, kitai engka enda madah ngagai kaban belayan. Tang lebuh pengarap kitai mansang, kitai nyau sedar kitai patut madah ngagai sida pasal diri ke deka nyembah Jehovah. (Mrk. 8:38) Penaluk nuan ngagai Petara tau ngasuh penanggul nyadi entara nuan enggau kaban belayan. Aram kitai berandauka sekeda utai ke ulih digaga nuan kena ngetanka pemaik sereta mengkang tetap ati ngagai Jehovah.

12. Nama kebuah kaban belayan nyakal kitai, tang baka ni kitai ulih nunjukka diri ibuhka asai ati sida?

¹² Uji meretika asai ati kaban belayan nuan ke enda nyembah Jehovah. Kitai amat gaga ati laban nemu pemendar ari Bup Kudus. Taja pia, kaban belayan kitai engka ngumbai kitai udah kena tipu tauka nyadi raban pengarap ti nyelai. Sida engka ngumbai kitai enda agi rinduka sida laban kitai enda ngintu hari besai enggau sida. Sida indah engka irauka utai ti enda manah deka nyadi ba kitai pengudah kitai mati. Kitai patut nguji meretika asai ati sida sereta mendingka enggau manah utai ke disebut sida ngambika ulih nemu kebuah sida irauka kitai. (J-lam. 20:5) Rasul Paul nguji deka meretika “semua mensia” ngambika iya ulih ngajar sida pasal berita manah. Enti kitai nguji deka meretika kaban belayan, tu ulih nulung kitai nemu baka ni deka ngajar sida pasal pemendar.—1 Kor. 9:19-23.

13. Baka ni chara kitai patut bejaku enggau kaban belayan ke enda nyembah Jehovah?

¹³ Bejaku enggau siru. Bup Kudus madahka, “Awakka jaku kita seruran badas.” (Kol. 4:6) Tu engka enda senang. Kitai ulih minta roh kudus ari Jehovah kena nulung kitai ngambika nelap sereta siru enggau kaban belayan. Kitai enda patut bekelikuh enggau sida pasal semua utai bula ti dipechaya sida. Enti kitai berasai pedis ati enggau utai ti disebut tauka dikereja  sida, kitai ulih neladan bala rasul. Ku Paul madahka: “Lebuh orang mechat kami, kami merekatka sida. Lebuh orang merinsaka kami, kami tan natka diri diperinsa. Lebuh orang bejai kami, kami nyaut sida ngena jaku ti siru.”—1 Kor. 4:12, 13.

14. Nama penguntung ari ulah ti manah?

¹⁴ Ngetanka ulah ti manah. Nama kebuah nya beguna? Taja pan bejaku enggau chara ti siru ulih nulung kitai ngetanka pemaik enggau kaban belayan, tang ulah kitai ti manah lebih agi ulih nulung. (Bacha 1 Peter 3:1, 2, 16.) Awakka kaban belayan nuan meda ari chunto nuan, Saksi-Saksi Jehovah bisi rumah tangga ti lantang, ngintu anak sida enggau manah, idup sejalai enggau standard Bup Kudus, sereta ngembuan pengidup ti bisi reti. Taja pan kaban belayan kitai enda nerima pemendar, kitai ulih berasai gaga laban ulah kitai ti manah ngerinduka ati Jehovah.

15. Baka ni kitai ulih merambu dulu ngambika kitai ulih nyeliah ari bekelikuh enggau kaban belayan?

¹⁵ Merambu tumu. Pikirka utai ke tau ngasuh nuan bekelikuh enggau kaban belayan. Lalu pikirka chara kena mutarka iya. (J-lam. 12:16, 23) Nya meh utai ti dikereja seiku menyadi Kristian indu di Australia. Entua lelaki iya balat nyakal pemendar lalu kekadang iya pedis ati. Nya alai sebedau betelefon, iya enggau laki iya deka minta Jehovah nulung seduai iya nyeliahka diri ari nyaut entua lelaki iya enggau ati ti pedis. Seduai iya deka mikirka pekara manah ti tau dikerandauka. Lalu kena nyeliah ari berandau panjai ke tau ngujungka sida bekelikuh pasal pengarap, seduai iya nyekat pengelama berandau ba telefon enggau iya.

16. Baka ni nuan ulih mutarka asai ati ti besalah bekaul enggau enda ngelantangka ati kaban belayan nuan?

¹⁶ Amat, nuan enda ulih nyeliahka semua kelikuh enggau kaban belayan ke enda nyembah Jehovah. Nya alai lebuh bisi bekelikuh, nuan engka berasai besalah laban nuan rinduka sida sereta deka ngelantangka ati sida. Tang kingatka, penaluk nuan ngagai Jehovah patut besai agi ari pengerindu nuan ke diri sebilik tauka kaban belayan. Lebuh kaban belayan nuan nyau sedar pasal utai tu, sida ulih nemu nyembah Jehovah nya utai ti beguna. Nuan enda ulih mejal orang nerima pemendar. Taja pia, nuan ulih ngawakka orang bukai meda baka ni nitihka jalai Jehovah udah nulung nuan. Lalu Jehovah mega meri sida peluang ti sama baka ke diberi Iya ngagai kitai, iya nya milih deka nyembah Iya tauka enggai.—Isa. 48:17, 18.

17, 18. Nama ulih nulung nuan enti seiku ari diri sebilik tauka kaban belayan ninggalka Jehovah?

¹⁷ Enti seiku ari diri sebilik tauka kaban belayan dibuai tauka nyeraraka diri ari gerempung, tu tau balat ngenusahka. Nuan engka ngasaika pemedis baka ke diachuk  orang ngena pedang. Baka ni nuan ulih tan natka pemedis tu?

¹⁸ Majak beberatka pengawa nuan ke Jehovah. Lebuh nuan napi pemedis ke baka nya, nuan patut ngeringka pengarap diri. Seruran macha Bup Kudus, nyediaka utai ke dikena begempuru sereta datai begempuru, enda ngetu nginjil, lalu besampi minta pengering ari Jehovah ngambika nuan ulih tan. (Jud. 20, 21) Baka ni enti sema nuan udah ngereja semua utai tu tang pemedis nya agi mengkang bisi? Anang lemi semengat! Majak beberatka pengawa nuan ke Jehovah. Nyau kelama, tu deka nulung nuan bekuasa atas runding enggau asai ati nuan. Tu meh utai ke nyadi ba penulis Masmur 73. Iya napi maya ti tusah deka bekuasa atas runding enggau asai ati iya ba pengidup. Tang nyembah Jehovah udah nulung iya beratika utai enggau chara ti ngena baru. (Mas. 73:16, 17) Pia mega enti nuan ngereja utai ti sama.

19. Baka ni nuan ulih nunjukka diri bebasaka chara Jehovah disiplin nembiak Iya?

¹⁹ Bebasaka disiplin ari Jehovah. Petara nemu, disiplin ke diberi Iya deka meri penguntung ngagai semua orang, nyengkaum orang ke udah dibuai ari gerempung. Taja pan kitai berasai tusah ati lebuh orang ti dikesayauka kitai kena disiplin, tang tu ulih nulung iya pulai baru ngagai Jehovah dudi hari ila. (Bacha Hebrew 12:11.) Seagi-agi iya bedau pulai baru ngagai Jehovah, kitai patut bebasaka iring ari Jehovah ke “enda nyagi kita begulai” enggau orang ke udah dibuai ari gerempung. (1 Kor. 5:11-13) Tu enda senang. Tang kitai patut nyeliah ari begigaka sida ngena telefon, sms, surat, email, tauka media sosial, iya nya, sekeda laman web ke ngasuh nuan ulih bekunsika penerang pasal diri empu ngagai seiku-seiku orang.

20. Nama utai ke patut diarapka kitai?

²⁰ Anang putus pengarap! Pengerindu “ngadang semua utai,” nya alai kitai meruan ngarapka orang ti dikesayauka kitai deka pulai baru ngagai Jehovah. (1 Kor. 13:7) Enti nuan beratika diri sebilik tauka kaban belayan ke semak enggau nuan bisi pemansang ba ulah iya, nuan ulih besampika iya ngambika bulih pengering ke datai ari pengawa macha sereta belajarka Bup Kudus lalu nerima kangau ari Jehovah: “Pulai baru ngagai Aku.”—Isa. 44:22.

21. Nama patut dikereja nuan enti diri sebilik tauka kaban belayan nyakal nuan ketegal nuan nitihka Jesus?

²¹ Jesus madahka, kitai enda tau enda rinduka iya lebih ari kitai rinduka orang bukai. Lalu Jesus pechaya, bala murid iya deka bisi pemerani kena mengkang taluk ngagai iya taja pan diri sebilik tauka kaban belayan nyakal sida. Nya alai, enti sida nyakal nuan ketegal nuan nitihka Jesus, bepanggai meh ba Jehovah. Minta Jehovah nulung nuan ngambika ulih mujur betan. (Isa. 41:10, 13) Nuan bulih pengelantang laban nemu Jehovah enggau Jesus gaga ati ke nuan sereta nemu seduai iya deka meri upah ketegal nuan tetap ati.