ADAT Moses ngemendarka orang ngaga siti-siti sumpah enggau nyebut utai baka, “Aku besumpah ngagai nuan nengah Petara,” tauka “Aku besumpah ngena nama Jehovah.” Taja pia, maya jeman Jesus, pengawa besumpah nyadi utai ke suah digaga nyentukka orang Judah besumpah nyauka dalam semua utai ti disebut sida. Sida ngereja tu ngambika utai ti disebut sida tau agi dipechaya, tang Jesus ngutuk pengawa ke nadai guna tu dua kali. Iya ngajar: ‘Semina sebut aja “Au” tauka “Enggai’’.’—Matthew 5:33-37; 23:16-22.

Nitihka utai ti dipadah Theological Dictionary of the New Testament, bup Talmud nulung kitai meda orang Judah endang selalu besumpah, tauka besumpah madahka jaku sida nya amat. Tu ketegal bup Talmud enggau nyemetak nerangka ni bagi sumpah ke patut dikeamatka sereta ke enda ibuh dipedulika.

Ukai semina Jesus aja ke ngutuk pengawa ti salah tu. Ambika chunto, Flavius Josephus, seiku pakar sejarah orang Judah, nulis pasal seraban orang Judah ke nyeliahka pengawa besumpah. Raban nya pechaya, pengawa besumpah nya jai agi ari bula. Sida ngumbai, enti orang nyau besumpah ngambika orang bukai pechayaka iya, orang nya tentu pemula. Ayat ari apokrifa orang Judah ba Penemu-dalam Jesus anak lelaki Sirakh, tauka Eklesiastikus, (23:11) mega madahka: “Orang ke selalu besumpah endang mayuh dosa.” Jesus ngutuk pengawa besumpah ti bekaul enggau utai ti enda berat. Enti kitai selalu nyebut utai ti bendar, kitai enda patut besumpah ngambika utai ti disebut kitai tau agi dipechaya.