APAI John dibaptisa nyadi Saksi Jehovah kira-kira 60 taun suba, ba siti nengeri mit di Gujarat, India. Tang John bisi seiku menyadi indu tuai, dua iku menyadi indu ke biak sereta dua iku menyadi lelaki ke biak. Sida enggau indai sida bepengarap Katolik. Ketegal tu, sida nyakal pengarap apai sida.

Bisi sekali, apai John ngasuh John nganjung siti sarang surat ngagai seiku menyadi Kristian lelaki ba eklisia. Tang pagi nya, tunjuk jari John telih lebuh iya muka tong tin ti besai. Taja pia iya deka nitihka utai ku apai iya, nya alai iya malut tunjuk jari iya ke bedarah ngena gari kain, lalu mupuk nganjung sarang surat nya.

Lebuh John datai ba endur ke dituju, iya nyuaka sarang surat nya ngagai bini menyadi Kristian lelaki nya, ke mega Saksi Jehovah. Iya meda tunjuk jari John ke telih lalu deka nulung John. Iya ngambi peti ubat penabat, meresi abi telih, lalu malut tunjuk jari John. Udah nya iya ngaga sekap ai teh angat ke John. Sekumbang John ke dia, iya berandau pasal Bup Kudus enggau John ngena chara ti siru.

Ketegal penyiru iya, runding John ngagai bala Saksi belabuh berubah. Nya alai John nanya iya dua iti tanya pasal utai ti dipechaya Saksi-Saksi Jehovah ke bebida ari utai ti dipechaya Gerija Katolik. John nanya sekalika Jesus nya Petara sereta sekalika orang Kristian patut besampi ngagai Maria. Menyadi Kristian indu nya bisi belajarka jaku Gujarati lalu ulih nyaut John ngena jaku ke dikena John. Iya mandangka sekeda saut ari Bup Kudus ngagai John lalu meri John bup mit ke betajuk “This Good News of the Kingdom.”

Udah nya, lebuh John macha bup mit nya, iya nyau nemu utai ke dibacha iya endang pemendar. Iya betemu enggau paderi iya lalu nanya dua iti tanya ti sama. Paderi nya balat pedis ati lalu nikauka Bup Kudus ngagai John sereta enggau nyawa ti inggar nyebut: “Nuan udah nyadi Sitan! Pandangka ngagai aku dini ayat Bup Kudus ke madahka Jesus nya ukai Petara. Pandangka ngagai aku dini ayat ke nunjukka nuan enda patut nyembah Maria. Pandangka ngagai aku!” John balat tekenyit enggau ulah paderi nya. Iya madahka diri enda agi ke gerija Katolik ngagai paderi nya. Lalu John amat enda agi!

John berengkah belajar enggau bala Saksi, nerima pemendar, lalu berengkah nyembah Jehovah. Nyau kelama, sekeda ari sida sebilik ngereja utai ti sama. Kira-kira 60 taun udah nya, litan ba tunjuk jari John agi ngingatka iya pasal penyiru orang Kristian ke meransang iya ngena sepemanjai pengidup iya nyembah Jehovah.—2 Korint 6:4, 6.