1. Nama bansa pengerindu ti pemadu besai, lalu baka ni nuan deka nerangka iya? (Peda gambar ba pun artikel.)

 JEHOVAH nya Pun pengerindu. (1 Jhn. 4:7) Pengerindu ti pemadu besai nya bepelasarka prinsip ti ngena. Dalam Bup Kudus, pengerindu ke bansa tu dikumbai a·gaʹpe dalam jaku Gerika. Pengerindu tu ukai semina asai ati aja, tang iya nyengkaum pengerindu ti dalam sereta manah ngagai orang bukai. Pengerindu tu diayanka ngena pengawa ti enda berundingka diri empu ngambika orang bukai tau bulih penguntung. Nya pengerindu ti meransang kitai ngereja utai ti manah ngagai orang bukai. Pengerindu ke bansa tu meri kitai pengaga sereta tuju ba pengidup.

2, 3. Baka ni Jehovah udah ngayanka pengerindu ti enda berundingka Diri Empu ke mensia?

² Jehovah mandangka pengerindu ke mensia indah sebedau Iya nempa Adam seduai Hawa. Iya ngaga dunya ngambika dunya ngembuan semua utai dikena kitai idup. Kelebih agi, Iya  ngaga dunya nyadika rumah alai kitai ulih idup lantang. Jehovah ukai ngereja tu ke Iya Empu, tang ke kitai. Udah dunya tembu digaga, Iya nempa mensia lalu meri sida pengadang idup belama iya ba dunya paradais.

³ Udah nya, Jehovah ngayanka pengerindu Iya ti enda berundingka Diri Empu ke mensia ngena chara ti pemadu besai. Taja pan Adam seduai Hawa ngelaban, Jehovah pechaya sekeda ari peturun seduai iya deka rinduka Iya, nya alai Iya meri Anak Iya nyadika genselan tebus kena nyelamatka sida. (P-kal. 3:15; 1 Jhn. 4:10) Lebuh Jehovah besemaya deka meri tebus, tebus nya baka ke udah nyadi. Lalu 4,000 taun udah nya, Jehovah meri Anak tunggal Iya ke mensia. (Jhn. 3:16) Kitai amat beterima kasihka pengerindu Jehovah!

 4. Baka ni kitai nemu mensia ke enda sempurna ulih ngayanka pengerindu ti enda berundingka diri empu?

⁴ Ulih kitai ngayanka pengerindu ti enda berundingka diri empu taja pan kitai enda sempurna? Ulih. Jehovah nempa kitai neladan gamal Iya, iya nya ngembuan penau ulih neladan Iya. Deka ngayanka pengerindu ti baka nya enda senang, tang nya ulih dikereja. Abel ngayanka pengerindu ngagai Petara lebuh iya meri pemeri ti pemadu manah ke dikemisi iya. (P-kal. 4:3, 4) Noah ngayanka pengerindu ti enda berundingka diri empu lebuh iya enda ngetu nusui pesan Petara bepuluh taun taja pan orang enggai ninga. (2 Pet. 2:5) Lalu Abraham nunjukka diri rinduka Petara lebih agi ari utai bukai lebuh iya sanggup nyerahka Isak, anak lelaki ti dikesayau iya nyadika pemeri ngagai Jehovah. (Jas. 2:21) Baka sida ke tetap ati nya, kitai mega deka ngayanka pengerindu taja pan nya enda senang.

 5. Nama sekeda chara kitai ulih ngayanka pengerindu ti amat?

⁵ Bup Kudus madahka, kitai ngayanka pengerindu ti amat “ukai ngena leka jaku tauka ngena utai ti disebut kitai, tang ngena pemendar enggau pengawa ti dikereja kitai.” (1 Jhn. 3:18) Kati tu reti nya kitai enda ulih ngayanka pengerindu ngena utai ti disebut kitai? Enda. (1 Tes. 4:18) Reti nya semina seruran nyebut “Aku sayauka nuan” enda chukup. Kitai patut ngereja utai ti disebut kitai. Ambika chunto, enti sema bala menyadi Kristian kitai enda chukup pemakai enggau gari, sida begunaka utai nya lebih agi ari jaku ti siru. (Jas. 2:15, 16) Pia mega, ketegal kitai rinduka Jehovah enggau orang bukai, kitai ukai semina besampi minta mayuh agi orang nginjil enggau kitai tang kitai empu mega patut bebendar ba pengawa nginjil.—Mat. 9:38.

6, 7. (a) Nama reti “pengerindu ti bendar”? (b) Nama sekeda chunto pengerindu ti pelesu?

⁶ Rasul John madahka, kitai patut ngayanka pengerindu “ngena pemendar enggau pengawa ti dikereja kitai.” Nya alai pengerindu kitai patut “enggau pengabis ati,” tauka “bendar.” (Rom. 12:9; 2 Kor. 6:6) Kekadang orang engka pepura ngayanka pengerindu. Tang kati pengerindu orang nya amat sereta ari ati? Nama tuju iya? Pengerindu enda tau diayanka enggau  pepura. Pengerindu ti pelesu nya nadai guna.

⁷ Aram kitai berandauka sekeda chunto pasal pengerindu ti pelesu. Lebuh Sitan bejaku enggau Hawa ba Kebun Eden, utai ti disebut Sitan ngaga iya baka utai ti pemadu badas ke Hawa. Tang pengawa Sitan nunjukka iya enda. (P-kal. 3:4, 5) Lebuh David nyadi raja, iya bisi pangan ke benama Ahitopel. Tang Ahitopel mudi David ke penguntung diri empu. Pengawa Ahitopel nunjukka iya ukai pangan ti bendar. (2 Sam. 15:31) Kemaya hari tu, orang ke limpang ari nyembah Jehovah sereta sida ke bukai ngasuh eklisia bepechah ngena “jaku ti manis enggau jaku kelangkung.” (Rom. 16:17, 18) Sida engka pepura ibuhka orang bukai, tang kebendar, sida berundingka diri empu aja.

 8. Nama tanya ke patut ditanya kitai ngagai diri empu?

⁸ Pengerindu ti pelesu amat jai laban dikena nipu orang. Kitai engka ulih nipu orang, tang kitai enda ulih nipu Jehovah. Jesus madahka, orang ke pepura ngapa deka diukum “enggau berat.” (Mat. 24:51, NW) Ketegal kitai nembiak Jehovah, kitai enggai sekali-kali pepura. Nya alai kitai patut nanya diri empu, ‘Kati pengerindu aku amat, tauka kati aku berundingka diri empu aja sereta enda lurus?’ Aram kitai beratika semilan iti chara kitai ulih ngayanka pengerindu ti “bendar.”

 9. Pengerindu ti amat deka meransang kitai ngereja nama?

⁹ Gaga ati ngintu orang bukai taja pan nadai orang meda utai ti digaga nuan. Kitai patut sanggup ngereja utai ti manah sereta ngembuan pengerindu ke orang bukai, iya nya utai ke enda ditemu orang bukai. (Bacha Matthew 6:1-4.) Ananias seduai Sapira ngembuan penemu ti bebida. Lebuh seduai iya meri pemeri, seduai iya deka orang bukai nemu pasal pemeri nya. Seduai iya bula pasal penyampau ke diberi, lalu seduai iya ditinggang penusah ketegal pepura. (SKR. 5:1-10) Tang enti kitai amat rinduka bala menyadi Kristian, kitai deka gaga ati ngereja utai ti manah ke sida lalu enggai orang bukai nemu utai ke udah digaga kitai. Kitai ulih belajar ari bala menyadi Kristian ke nulung Raban ti Ngiring nyediaka pemakai beroh. Sida enggai minta diperatika orang, lalu enda madahka projek ke udah digaga sida.

10. Baka ni kitai ulih ngayanka basa ngagai orang bukai?

¹⁰ Ngayanka basa ngagai orang bukai. (Bacha Rome 12:10.) Jesus ngayanka basa ngagai bala rasul iya lebuh iya masu kaki sida. (Jhn. 13:3-5, 12-15) Kitai patut bebendar ngambika baruh ati baka Jesus lalu ngintu orang bukai. Bala rasul semina ulih meretika utai ti udah dikereja Jesus pengudah sida nerima roh kudus. (Jhn. 13:7) Kitai ngayanka basa ngagai orang bukai enti enda ngumbai diri manah agi ari sida ketegal kitai tepelajar, kaya, tauka bisi pengawa ti spesial. (Rom. 12:3)  Kitai enda pedis ati lebuh orang bukai nerima puji, tang kitai gaga ati ke sida taja pan kitai ngasaika diri patut dipuji.

11. Nama kebuah jaku puji kitai patut datai ari ati?

¹¹ Meri jaku puji ari ati. Giga peluang kena muji orang bukai. Semua kitai nemu, jaku puji nya “manah kena ngemansangka” pangan diri. (Eps. 4:29) Tang kitai deka nentuka utai ti disebut kitai nya ari ati lalu ukai jaku ke dikena ngelangkung orang bukai. Kitai enda nyebut utai ke enda patut tauka nyeliahka tanggung pengawa ari meri jaku lalau. (J-lam. 29:5) Kitai tentu orang ke pepura enti kitai muji orang bukai tang udah nya bejai sida ari belakang. Pengerindu rasul Paul nya amat. Lebuh iya nulis surat ngagai orang Kristian di Korint, iya muji pengawa manah ke digaga sida. (1 Kor. 11:2) Tang lebuh sida begunaka jaku lalau, iya nerangka kebuah nya enggau manah sereta terang ngagai sida.—1 Kor. 11:20-22.

12. Baka ni kitai ulih ngayanka pengerindu ti amat enti kitai deka gerah jari?

¹² Gerah jari. Jehovah ngasuh kitai gerah jari enggau bala menyadi Kristian kitai. (Bacha 1 John 3:17.) Tang kitai patut bisi tuju ti betul enti deka gerah jari. Kitai ulih nanya diri empu: ‘Kati aku semina deka ngangauka pangan rapat aku aja tauka sida dikumbai aku penting ba eklisia ke rumah aku? Kati aku semina mai orang ke dikumbai aku ulih malas bantu ke diberi aku? Tauka kati aku gerah jari enggau bala menyadi Kristian ke enda entu dikelala aku tauka orang ke enda ulih malas tulung ke diberi aku?’ (Luk. 14:12-14) Uji gambarka utai tu: Baka ni enti sema seiku menyadi Kristian lelaki begunaka bantu ketegal sekeda pemutus ti enda manah ke udah digaga iya? Tauka baka ni enti orang ke dikangau ngagai rumah kitai enda beterima kasih ngagai kitai? Jehovah ngasuh kitai: “Sambut pangan diri ngagai rumah kita, tang anang mut-mut ngereja nya.” (1 Pet. 4:9) Kitai deka gaga ati enti meri enggau tuju ti betul.—SKR. 20:35.

13. (a) Ni maya kitai patut sabar agi? (b) Nama ulih digaga kitai kena nulung orang ke lemi?

¹³ Nulung orang ke lemi. Pesan Bup Kudus ke ngasuh “nulung orang ke lemi, lalu liat ati enggau semua sida” ulih nentuka sekalika pengerindu kitai nya amat tauka enda. (1 Tes. 5:14) Mayuh bala menyadi Kristian ke lemi udah nya nyau tegap dalam pengarap. Tang sekeda ke bukai nya agi begunaka pengeliat ati sereta tulung ari kitai. Baka ni kitai ulih nulung sida? Kitai ulih ngena Bup Kudus meransang sida, kitai ulih mai sida nginjil enggau kitai, tauka kitai ulih nyadi peninga ke sida. Pia mega, kitai enda patut ngumbai bala menyadi Kristian kitai nya “kering” tauka  “lemi.” Tang, kitai patut sedar semua kitai bisi pengering sereta pengelemi. Indah rasul Paul ngaku diri bisi pengelemi. (2 Kor. 12:9, 10) Semua kitai begunaka tulung sereta jaku peransang ari pangan diri.

14. Nama utai ke patut dikereja kitai ngambika ulih mengkang bebaik enggau bala menyadi Kristian kitai?

¹⁴ Deka bebaik. Bebaik enggau bala menyadi Kristian nya amat berega. Taja pan kitai ngasaika orang bisi saru penemu tauka enda manah enggau kitai, kitai enggau naka ulih deka bebaik enggau orang. (Bacha Rome 12:17, 18.) Enti kitai bisi ngemediska ati orang bukai, kitai patut minta ampun. Tang kitai patut ngereja nya ari ati. Ambika chunto, ari ke nyebut, “Aku minta ampun laban nuan berasai baka nya,” manah agi enti ngaku penyalah diri enggau nyebut, “Aku minta ampun laban ngemediska ati nuan enggau utai ti udah disebut aku.” Deka bebaik nya kelebih agi beguna ba rumah tangga. Laki bini enda patut pepura rinduka pangan diri lebuh ba mua orang bukai, tang lebuh kediri seduai iya enggai bejaku enggau pangan diri, nyebut utai ti ngemediska ati ngagai pangan diri, tauka kasar.

15. Baka ni kitai ulih ngayanka diri ngampun ari ati?

¹⁵ Deka ngampun. Enti orang ngemediska ati kitai, kitai ngampun orang nya lalu badu agi pedis ati. Kitai patut ngereja nya taja pan iya enda sedarka diri udah ngemediska ati kitai. Kitai deka ngampun ngena chara ‘sabar enggau pangan diri dalam pengerindu, lalu enggau naka ulih nyaga penyerakup dalam roh ngena pemaik ti nanggam kita semua.’ (Eps. 4:2, 3) Ngambika ulih ngampun ari ati, kitai patut badu ngenang utai ti udah dikereja orang nya. Pengerindu enda “bedendam.” (1 Kor. 13:4, 5) Amat, enti kitai bedendam, kitai ngerusak kaul kitai enggau menyadi Kristian sereta mega enggau Jehovah.  (Mat. 6:14, 15) Kitai nunjukka diri ngampun ari ati lebuh kitai besampika orang ti udah ngemediska ati kitai.—Luk. 6:27, 28.

16. Nama patut diperundingka kitai pasal sekeda pengawa ti spesial ari Jehovah?

¹⁶ Enda berundingka diri empu. Lebuh kitai nerima pengawa ti spesial ari Jehovah, kitai ulih nunjukka pengerindu kitai nya amat enti enda “berundingka diri empu aja, tang berunding ke orang bukai.” (1 Kor. 10:24) Ambika chunto, ba gempuru besai sereta konvensyen kitai, bala atendan dulu agi tama ngagai palan begempuru ari orang bukai, lalu ingin deka ngalau sekeda penuduk ke diri empu sereta diri sebilik. Tang mayuh ari sida milih penuduk ke enda entu dikerinduka ti enda jauh alai sida bejalaika pengawa. Enggau ngereja nya, sida ngayanka pengerindu ti enda berundingka diri empu aja. Baka ni nuan ulih nunda chunto manah sida?

17. Enti orang Kristian ngereja dosa ti besai, pengerindu ti amat deka meransang iya ngereja nama?

¹⁷ Ngaku sereta badu agi ngereja dosa enggau belalai. Sekeda orang Kristian ke ngereja dosa ti besai nguji ngelalaika dosa nya. Sida engka berasai malu tauka enggai ngelebuka orang bukai. (J-lam. 28:13) Tang ngelalaika dosa nya ulah ti nadai ngembuan pengerindu laban nya ulih ngenusahka orang ke bedosa sereta orang bukai. Baka ni? Jehovah engka badu merekatka eklisia ngena roh kudus Iya, lalu nadai pemaik ba eklisia. (Eps. 4:30) Nya alai, enti orang Kristian ngereja dosa ti besai, pengerindu ti amat deka meransang iya bejaku enggau tuai gempuru, lalu ngulihka bantu ke diguna iya.—Jas. 5:14, 15.

18. Nama kebuah pengerindu ti amat nya beguna?

¹⁸ Pengerindu nya kualiti ti pemadu besai ari semua kualiti. (1 Kor. 13:13) Pengerindu nulung orang meda sapa murid Jesus ti bendar lalu nemu sapa ke amat neladan Jehovah ti Pun pengerindu. (Eps. 5:1, 2) Paul madahka diri nadai guna enti iya nadai ngembuan pengerindu. (1 Kor. 13:2) Arapka tiap iku kitai enda ngetu ngayanka pengerindu diri, ukai aja “ngena leka jaku” tang mega “ngena pemendar enggau pengawa ti dikereja kitai.”