1. Nama kebuah rasul Paul ngansak orang Kristian ke ngena jaku Hebrew ba abad keterubah “bebendar agi” meransang pangan diri?

BA ABAD keterubah, rasul Paul meri jaku ajar ngagai orang Kristian ke ngena jaku Hebrew: ‘Aram kitai berundingka chara kitai tau nyungkak pangan diri ngayanka pengerindu lalu ngereja pengawa ti badas, enda ngelengkaka pengawa begempuru, baka sekeda orang, tang meransang pangan diri, lalu bebendar agi ngereja nya laban kita meda Hari Jehovah nyau semak.’ (Heb. 10:24, 25) Bala menyadi Kristian engka deka nemu kebuah Paul ngasuh sida bebendar agi meransang pangan diri. Kurang ari lima taun udah nya, sida ulih meda kebuah iya. Maya nya, sida meda hari Jehovah ngakim Jerusalem nyau semak. Sida sedar, sida patut rari ari menua nya, baka ke udah diasuh Jesus gaga sida. (Luk. 21:20-22; SKR. 2:19, 20) Hari Jehovah nya datai ba taun 70, lebuh orang Rome ngerusak Jerusalem.

2. Nama kebuah kitai patut bebendar agi meransang pangan diri kemayaharitu?

 ² Kemayaharitu kitai mega napi penanggul ti sama. Hari Jehovah nyau majak semak. (Jol. 2:11) Jaku nabi Sepaniah mega ulih dikena maya jeman kitai: ‘Hari Jehovah nyau semak - semak amat lalu deka datai enggau jampat!’ (Sep. 1:14) Ketegal tu, kitai patut “berundingka chara kitai tau nyungkak pangan diri ngayanka pengerindu lalu ngereja pengawa ti badas.” (Heb. 10:24) Kitai patut ibuh agi ke bala menyadi Kristian ngambika ulih meransang sida maya sida begunaka jaku peransang.

3. Nama dipadah rasul Paul pasal jaku peransang? (Peda gambar ba pun artikel.)

³ “Pengirau ati nuan ulih muai pengelantang, tang jaku ti siru deka ngelantangka ati nuan.” (J-lam. 12:25) Kekadang semua kitai begunaka jaku peransang. Paul enggau terang madahka, indah orang ke patut meransang orang bukai mega begunaka jaku peransang. Iya nulis surat ngagai bala menyadi Kristian iya di menua Rome: ‘Aku balat lelengauka kita, ngambika aku ulih bekunsika berekat roh enggau kita, kena ngeringka kita. Utai ti ku aku nya, ngambika kitai sama diperansang ulih pengarap pangan diri, iya nya pengarap kita, enggau pengarap aku.’ (Rom. 1:11, 12) Indah rasul Paul kekadang begunaka jaku peransang.—Bacha Rome 15:30-32.

4, 5. Sapa begunaka jaku peransang kemayaharitu, lalu nama kebuah?

⁴ Kemayaharitu, kitai patut meransang sida ke gawa penuh jam ke Jehovah, baka bala pengerintis ke tetap ati. Mayuh ari sida udah ngelengkaka sekeda utai ti dikerinduka sida ba pengidup ngambika ulih ngerintis. Sama mega enggau sida ke nyadi pengerintis seberai tasik, tuai ti ngabas enggau bini sida, sereta sida ke gawa ba pampang opis tauka ba opis penyalin. Semua sida ngelengkaka sekeda utai ngambika ulih ngena mayuh agi jam gawa ke Jehovah. Nya alai kitai patut meransang sida. Bisi mega bala menyadi Kristian ke agi deka gawa penuh jam ke Jehovah tang enda ulih agi. Sida mega gaga ati lebuh bulih jaku peransang ari kitai.

⁵ Sapa agi begunaka jaku peransang? Kitai patut meransang bala menyadi Kristian ke milih bedau bebini belaki ketegal deka ngasika Jehovah sereta ketegal deka jadi enggau ‘nembiak Tuan’ aja. (1 Kor. 7:39) Bala bini berasai diperansang lebuh laki sida madahka diri sayauka sida sereta beterima kasih ke semua utai ti udah digaga sida. (J-lam. 31:28, 31) Orang Kristian ke natka pemerinsa tauka ke napi penyakit mega begunaka jaku peransang. (2 Tes. 1:3-5) Jehovah enggau Jesus meri jaku peransang ngagai semua sida ke tetap ati nya.—Bacha 2 Tesalonika 2:16, 17.

6. Nama ditemu kitai pasal tanggung pengawa bala tuai gempuru ke dipadah ba Isaiah 32:1, 2?

⁶ Bacha Isaiah 32:1, 2. Kitai idup ba maya ti tusah lalu ngasuh kitai jampat tusah ati sereta lemi semengat. Jesus Kristus ngena bala menyadi Kristian iya ti dipilih ke serega sereta “bala tuai” ke tetap ati ari bedus ti bukai meransang kitai. Bala tuai gempuru tu ukai “merintah” pengarap kitai tang ‘bekereja enggau kitai’  ke pengaga kitai. Sida deka nulung kitai gaga sereta mengkang tetap ati.—2 Kor. 1:24.

7, 8. Baka ni bala tuai gempuru meransang orang bukai ngena jaku tauka pengawa sida?

⁷ Bala tuai gempuru ulih neladan rasul Paul, ke seruran meransang bala menyadi Kristian iya. Iya nulis surat nuju orang Kristian di Tesalonika ke benung diperinsa: ‘Kami balat rinduka kita datai ke kami sedia deka bekunsi enggau kita, ukai semina Berita Manah ari Petara, tang mega nyawa kami empu, laban kami balat sayauka kita.’—1 Tes. 2:8.

⁸ Bala tuai gempuru ulih meransang orang ari utai ti disebut sida. Tang kati nya chukup? Paul ngasuh bala tuai gempuru ari nengeri Epesus: ‘Kita ulih nulung nyukung orang ke lemi, laban kitai ingatka jaku Tuan Jesus, laban iya empu ke nyebut, “Beberekat agi orang ke meri, ari orang ke nerima.”’ (SKR. 20:35) Paul sanggup ‘ngabiska semua utai diri, nyengkaum diri empu, kena nulung’ bala menyadi Kristian iya. Iya ngena pengawa nunjukka diri sanggup ngereja utai enggau bebendar ke sida. (2 Kor. 12:15) Pia mega, bala tuai gempuru patut meransang sereta merindang orang bukai ngena jaku tauka pengawa sida. Tu nunjukka sida amat ibuhka kitai.—1 Kor. 14:3.

9. Baka ni bala tuai gempuru ulih meri jaku lalau enggau chara ke ulih meransang orang?

⁹ Kena ngeringka bala menyadi Kristian, bala tuai gempuru kekadang patut meri jaku lalau. Bala tuai gempuru ulih belajar ari Bup Kudus pasal chara meri jaku lalau ke ulih meransang orang. Jesus netapka teladan ti badas bekaul enggau meri jaku lalau lebuh iya ngirumka pesan ngagai sekeda eklisia di Asia Mit pengudah iya mati lalu diangkatka idup baru. Jesus meri sekeda jaku lalau ti berat ngagai eklisia di Epesus, Pergamum, sereta Tiatira. Tang sebedau Jesus meri jaku lalau nya, iya muji semua utai manah ke benung digaga sida. (Pem. 2:1-5, 12, 13, 18, 19) Jesus madah ngagai eklisia di Laudisia: ‘Aku nganu sereta disiplin semua orang ke dikerinduka aku. Nya alai, diau menyana, lalu nesal ati ke dosa nuan.’ (Pem. 3:19) Bala tuai gempuru kitai nguji neladan chara Jesus lebuh sida meri jaku lalau.

10. Baka ni kitai ulih ngeringka pangan diri?

¹⁰ Ukai semina bala tuai gempuru aja ke patut meransang orang bukai. Paul ngasuh semua orang Kristian ngena “jaku ti manah kena ngemansangka pengarap orang, ba maya ti patut, ngambika jaku nya meri berekat” ngagai orang ke ninga. (Eps. 4:29) Tiap iku kitai patut nemu utai ke diguna orang bukai ngambika ulih nulung sida. Paul nulis surat nuju orang Kristian ke ngena jaku Hebrew: “Nya alai, kedarka jari kita ti lelak, lalu keringka patung kita ti lemi, lalu gaga jalai kita rurus, ngambika kaki ti lemi enda selau, tang digeraika.” (Heb. 12:12, 13) Semua kitai ulih ngering sereta meransang pangan diri ngena jaku, taja pan kitai agi biak.

11. Nama udah nulung Marthe lebuh iya berasai tusah ati sereta lemi semengat?

¹¹ Seiku menyadi Kristian indu ke benama Marthe kala berasai tusah ati sereta lemi semengat. * (Peda nota kaki.) Iya nulis: “Bisi sekali, pengudah besampi minta jaku peransang, aku betemu  enggau seiku menyadi indu ke mandangka pengerindu enggau penyinu ati, utai ti amat diguna aku maya nya. Iya mega nusui peneleba diri ke sebaka enggau enggi aku, lalu aku enda entu ngasaika diri kediri.” Menyadi indu nya engka enda sedarka jaku iya udah nulung Marthe!

12, 13. Baka ni kitai ulih ngena jaku ajar ba Pilipi 2:1-4?

¹² Paul nulis surat nuju orang Kristian di Pilipi: ‘Nya alai enti kita berasai diperansang laban kita begempung enggau Kristus, enti kita berasai lantang laban pengerindu iya, enti kita bisi kaul enggau roh kudus, enti kita nelap sereta siru enggau pangan diri, awakka kita ngenyukupka pengaga ati aku: awakka kita sama sepenemu, rinduka pangan diri, besetuju sereta sebaka runding enggau pangan diri. Anang ngereja utai semina berundingka diri empu aja, tauka beduduk ba ati ti deka ngenyumbungka diri, tang enggau ati ti baruh, seruran ngumbai orang bukai pama agi ari kita. Anang semina berundingka diri empu aja, tang berunding mega ke orang bukai.’—Plp. 2:1-4.

¹³ Semua kitai patut ngiga chara kena nulung pangan diri. Kitai ulih meransang bala menyadi Kristian kitai enti mandangka “pengerindu,” ibuhka pangan diri, “nelap sereta siru.”

14. Baka ni kitai ulih meri jaku peransang?

¹⁴ Kitai berasai gaga lebuh ninga pasal orang ke udah dibantu kitai agi mengkang  tetap ati. Rasul John nulis: “Nadai utai bukai ulih ngasuh ati aku lebih agi gaga ari ke ninga bala anak aku diau dalam pemendar.” (3 Jhn. 4) Mayuh pengerintis gaga ati lebuh sida nemu orang ke kala belajarka pemendar enggau sida suba agi nyembah Jehovah enggau tetap ati, lalu bisi nya nyadi pengerintis. Nya alai enti bala pengerintis berasai lemi semengat, kitai ulih ngingatka sida pasal utai manah ke udah digaga sida kena nulung orang bukai.

15. Nama ulih digaga kitai kena meransang sida ke gawa enggau tetap ati?

¹⁵ Mayuh tuai ti ngabas madahka sida enggau bini sida berasai diperansang lebuh nerima nota terima kasih pengudah sida ngelawa siti-siti eklisia. Sama mega enggau bala tuai gempuru, pengerintis seberai tasik, pengerintis, sereta orang ke gawa ba Betel. Semua sida gawa enggau tetap ati ke Jehovah. Lebuh kitai beterima kasih ngagai sida, kitai meransang sida.

16. Nama ulih meransang orang?

¹⁶ Baka ni enti sema nuan tusah deka madah ngagai orang bukai pasal asai ati nuan bekaul enggau sida? Kebendar, enda tusah deka meransang orang bukai. Uji tuchum ngagai orang. Enti sema sida enda malas tuchum nuan, sida engka bisi napi penanggul lalu begunaka orang berandau enggau sida. Nuan ulih merindang ati sida enti nyadi peninga ti manah ke sida.—Jas. 1:19.

17. Nama udah meransang seiku menyadi Kristian lelaki ke biak?

 ¹⁷ Seiku menyadi Kristian ke benama Henri balat tusah ati lebuh sekeda ari kaban belayan iya enda agi nyembah Jehovah. Seiku ari sida nya apai iya, ke udah nyadi tuai gempuru. Seiku tuai ti ngabas beratika Henri tusah ati lalu mai iya ngirup kupi. Iya mendingka Henri lebuh Henri madahka asai ati diri. Henri nyau sedar, iya empu patut mengkang tetap ati enti iya deka nulung sida sebilik pulai baru ngagai pemendar. Ati iya mega berasai lantang lebuh macha Masmur 46, Sepaniah 3:17, enggau Mark 10:29, 30.

18. (a) Nama ditulis Raja Solomon pasal jaku peransang? (b) Nama utai ti diasuh rasul Paul gaga?

¹⁸ Nama ulih dipelajarka kitai ari peneleba Marthe enggau Henri? Semua kitai ulih merindang sereta meransang bala menyadi Kristian ke begunaka utai nya. Raja Solomon nulis: “Leka jaku ba maya ti ngena. Mua ti tuchum ngasuh nuan lantang ati, lalu berita ti manah ngasuh ati nuan berasai nyamai agi.” (J-lam. 15:23, 30) Kati nuan nemu sapa ke lemi semengat tauka tusah ati ba eklisia nuan? Ulih nuan macha artikel ba majalah Menara Jaga tauka ari laman web kitai ke iya? Paul indah bisi madahka, sama nyanyi lagu Perintah Petara enggau pangan diri ulih ngasuh ati kitai lantang. Ku Paul nulis: ‘Ajar lalu rara pangan diri ngena semua penemu-dalam, lalu belagu ngena masmur, pantun, enggau ngena lagu roh ngagai Petara, enggau ati ti beterima kasih.’—Kol. 3:16; SKR. 16:25.

19. Nama kebuah beguna bendar meri jaku peransang, lalu nama patut digaga kitai?

¹⁹ Seraya kitai majak semak enggau hari Jehovah, kitai patut bebendar agi meransang pangan diri. (Heb. 10:25) Kitai tentu gaga ati enti kitai nitihka jaku ajar ari Paul: “Peransang sereta tulung sukung pangan diri, baka ke dikereja kita diatu.”—1 Tes. 5:11.