1-3. (a) Nama utai ke ditapi semua orang ke biak, lalu kitai ulih mandingka nya enggau utai nama? (Peda gambar ba pun artikel.) (b) Nama ulih nulung orang Kristian ke biak ba pekara tu?

UJI gambarka, nuan deka ngagai siti pengawa ti spesial ba endur ti jauh. Nuan patut ngena bas kin. Lebuh baru datai ba stesen bas, nuan engka charut runding laban dia bisi mayuh orang sereta mayuh bas. Tang nuan nemu endur ke deka dituju sereta bagi bas ke deka ditepan. Nuan enda nepan sebarang bas, laban nya enda mai ngagai endur ke dituju.

² Pengidup nya baka pejalai ti jauh, lalu kita ke biak nya baka orang ke ba stesen bas. Kekadang bisi mayuh pilih ba pengidup ke ngasuh kita charut runding. Tang enti kita udah nemu endur ke deka dituju, kita tentu senang agi ngaga pilih ti ngena. Ni bagi tunga ke patut dipilih kita?

³ Artikel tu deka nyaut tanya nya sereta deka meransang kita ngena pengidup ngelantangka ati Jehovah. Reti nya kita nitihka jaku ajar ari Jehovah ba semua pemutus ke digaga  kita dalam pengidup, baka bansa pelajar tauka kereja ke deka dipilih, tauka sekalika kita deka berumah-tangga sereta ngembuan anak. Lalu reti nya bebendar deka nyapai juluk ati ba pengarap, iya nya, juluk ati ke nulung kita rapat agi enggau Jehovah. Enti kita mengkang ngenuluka pengawa ke Jehovah, Iya tentu deka merekat sereta nulung kita mujur.—Bacha Jaku Dalam 16:3.

4. Nama deka dipansik kitai ba artikel tu?

⁴ Endang manah enti ulih netapka juluk ati ba pengarap. Nama kebuah? Kitai deka mansik tiga iti kebuah. Kebuah kesatu enggau kedua deka nulung kita nemu, bebendar nyapai juluk ati ba pengarap ulih nulung kita nyadi pangan ti manah agi ke Jehovah. Kebuah ketiga deka nunjukka kebuah nya manah netapka juluk ati nya lebuh kita agi biak.

5. Nama kebuah kesatu patut netapka juluk ati ba pengarap?

⁵ Kebuah kesatu netapka juluk ati ba pengarap nya ketegal deka beterima kasih ngagai Jehovah ke pengerindu sereta utai ke udah dikereja Iya ke kitai. Seiku penulis Masmur madahka: ‘Naka meh pemanah meri terima kasih ngagai Nuan, O Jehovah . . . Pengawa Nuan ti besai, O Jehovah, ngasuh ati aku gaga. Ketegal utai ti udah dikereja Nuan, aku belagu gaga ati.’ (Mas. 92:1, 4) Pikirka pasal semua utai ti udah diberi Jehovah ngagai kita ke biak. Iya udah meri kita pengidup, nulung kita ngelala Iya sereta nemu pemendar pasal Iya, meri kita Bup Kudus, bala menyadi Kristian, sereta ulih idup belama iya di Paradais. Enti kita netapka juluk ati ba pengarap, kita nunjukka diri beterima kasih ngagai Jehovah ke semua utai nya lalu nya nulung kita rapat enggau Iya.

6. (a) Baka ni juluk ati ba pengarap bekait enggau kaul kita enggau Jehovah? (b) Nama sekeda juluk ati ke ulih ditetapka kita lebuh kita agi biak?

⁶ Kebuah kedua nya, kita ngereja pengawa ti manah ke Jehovah lebuh kita bebendar ngulihka juluk ati nya. Lalu tu ulih nulung kita rapat agi enggau Iya. Rasul Paul besemaya: ‘Petara ukai enda lurus. Iya deka mengkang ingatka pengawa ti udah dikereja kita, enggau pengerindu ti dipandangka kita.’ (Heb. 6:10) Kita ulih netapka juluk ati lebuh agi biak. Ambika chunto, Christine beumur 10 taun lebuh iya netapka diri deka enggau tetap macha cherita pengidup pasal bala menyadi Kristian ke tetap ati. Toby beumur 12 taun lebuh iya netapka juluk ati deka macha semua ayat ba Bup Kudus sebedau iya dibaptisa. Maxim beumur 11 taun lalu menyadi indu iya ke benama Noemi beumur 10 taun lebuh seduai iya dibaptisa. Seduai iya netapka juluk ati deka gawa ba Betel. Ngambika ulih seruran ingatka juluk ati nya, seduai iya ngelekatka pom masuk Betel ba dinding rumah. Baka ni enggau kita? Ulih kita berundingka sekeda juluk ati ti tau ditetapka kita lalu berengkah ngulihka nya?—Bacha Pilipi 1:10, 11.

7, 8. (a) Baka ni netapka juluk ati ulih nulung orang ke biak senang agi ngaga pemutus? (b) Nama kebuah seiku nembiak milih enggai nampung pelajar ngagai universiti?

⁷ Kebuah ketiga netapka juluk ati nya bekaul enggau ngaga pemutus. Kita patut mutuska bansa pelajar, kereja ke deka dipilih, sereta ba mayuh agi pekara bukai. Ngaga pemutus ba pekara tu baka ke milih  jalai ti patut ditengah lebuh kita datai ba simpang jalai. Enti kita udah nemu endur ke deka dituju, kita senang agi deka milih jalai. Pia mega, enti kita udah nemu juluk ati diri, kita senang agi deka ngaga pemutus. Jaku Dalam 21:5 madahka: “Bejimat lebuh nuan ngaga pelan, nya baru nuan deka bulih mayuh utai.” Tumu agi kita netapka juluk ati, jampat agi kita deka nyapai iya. Tu meh utai ke diasaika Damaris lebuh iya patut ngaga pemutus ti besai maya iya agi nembiak.

⁸ Damaris bulih pemutus peresa ti amat manah pengudah iya tembu belajar ba sekula sekondari. Lalu iya ulih ngambi kus undang-undang ba universiti enggau enda bebayar. Tang iya milih deka gawa ba bank. Nama kebuah? Laban lebuh iya agi biak, iya berunding deka ngerintis. Ku iya madahka: “Reti nya aku patut gawa part-time. Ngena degree ari universiti, aku senang deka bulih gaji ti besai. Tang nya ngasuh aku tusah deka bulih kereja part-time.” Damaris udah ngerintis sepengelama 20 taun. Kati iya ngasaika diri udah netapka juluk ati sereta ngaga pemutus ti ngena lebuh iya agi biak? Au. Ba bank ke alai iya gawa, iya betemu enggau mayuh luyar ke ngereja pengawa ti dikereja iya enti sema iya nampung pelajar ngagai universiti. Iya madahka, mayuh ari sida enda gaga enggau kereja sida. Sekumbang Damaris ngerintis, iya bulih mayuh pengaga ba ati lalu nya udah nulung iya nyeliahka diri ari enda gaga baka sida.

9. Nama kebuah kitai temegah ati ke bala menyadi Kristian kitai ke biak?

⁹ Beribu iku bala menyadi Kristian kitai ke biak di serata dunya ngaga pemansang ti manah sereta patut dipuji. Sida ngenuluka kaul enggau Jehovah sereta juluk ati ba pengarap dalam pengidup. Sida ke biak tu amat gaga ati enggau pengidup, lalu sida mega belajar nitihka iring ari Jehovah ba semua pekara, ke nyengkaum pelajar, kereja sereta pengidup ba ruang bilik. Ku Solomon madahka: ‘Panggaika diri ba Jehovah enggau pengabis ati nuan.’ Ku iya agi: ‘Awakka Jehovah seruran ngiring nuan, nya baru Iya deka nunjukka jalai ti ngena ngagai nuan.’ (J-lam. 3:5, 6) Kita ke biak, Jehovah sayau amat ke kita! Kita berega ba Iya, lalu Iya deka nyaga, ngiring sereta merekatka kita.

10. (a) Nama kebuah pengawa nginjil nya patut dikenuluka? (b) Baka ni kita ulih landik agi nerangka utai ti dipechaya kita?

¹⁰ Enti kita ngena pengidup diri ngelantangka ati Jehovah, kita tentu deka madah pasal Iya ngagai orang bukai. Jesus Kristus madahka, “Berita Manah enda tau enda dulu ditusui.” (Mrk. 13:10) Nya alai, pengawa nginjil patut digaga enggau lengkas, lalu patut dikenuluka kitai. Ulih kita netapka juluk ati deka suah agi nginjil? Ulih kita ngerintis? Tang baka ni enti kita enda entu rindu nginjil? Lalu baka ni kita ulih landik agi nerangka utai ti dipechaya  kita? Bisi dua iti utai ke ulih nulung kita: Besedia manah, lalu anang nagang diri ari madahka utai ti ditemu kita pasal Jehovah. Kita tentu enda pechayaka diri nyau rindu nginjil.

11, 12. (a) Baka ni kita tau besedia manah ngambika ulih madah pasal Jehovah ngagai orang bukai? (b) Baka ni seiku nembiak ngena peluang ke dikemisi iya madah pasal Jehovah ba sekula?

¹¹ Kita ulih berengkah enggau nyediaka siti saut ngagai sekeda tanya ke engka ditanya orang ke sama sekula enggau kita, ambika chunto, “Nama kebuah kita pechayaka Petara?” Bisi artikel ba laman web jw.org ke ulih nulung kita nyaut tanya nya. Enti kita meda ba AJAR BUP KUDUS > BALA NEMBIAK, kita bisi meda keretas kereja ke betajuk “Nama Kebuah Aku Pechayaka Petara?” Titihka chara ke bisi ba keretas kereja tu kena nyediaka saut kita. Bisi tiga iti ayat Bup Kudus ke ulih dikena: Hebrew 3:4, Rome 1:20, enggau Masmur 139:14. Lalu bisi mega keretas kereja bukai ke ulih nulung kita nyaut mayuh agi tanya bukai.—Bacha 1 Peter 3:15.

¹² Padah ngagai orang ke sama sekula enggau kita pasal sida ke ulih meda utai ke bisi ba laman web jw.org kediri empu. Lalu nya meh utai ti digaga seiku nembiak lelaki ke benama Luca. Sida sekelas berandau pasal mayuh bengkah jalai pengarap. Luca beratika bup teks sekula sida bisi nyebut utai ti enda betul pasal Saksi-Saksi Jehovah. Taja pan Luca takut, iya minta pemendar deka ngemetulka penemu ti salah nya, lalu pengajar ngemendarka iya nerangka utai ti dipechaya iya. Lalu Luca mega nunjukka laman web kitai ngagai sida sekelas. Pengajar minta semua orang ba kelas nya meda video Chara Ngalahka  Orang Ke Ngachau nyadika kereja rumah sida. Ulih nuan ngambarka pengaga ati Luca ketegal iya udah madah pasal Jehovah ba sekula?

13. Nama kebuah kitai enda patut lemi semengat lebuh napi penanggul?

¹³ Lebuh napi penanggul, anang lemi semengat tang terus bebendar ngulihka juluk ati kita. (2 Tim. 4:2) Tu meh utai ti digaga Katharina. Iya beumur 17 taun lebuh iya netapka juluk ati deka nginjil ngagai tiap iku orang ke bekereja enggau iya. Seiku ari sida udah beberapa kali ngeleseka iya. Tang Katharina seruran ingatka juluk ati diri. Ulah iya ti manah udah narit ati, Hans, seiku lelaki ke sama endur kereja enggau iya. Hans berengkah macha litaricha kitai, belajarka Bup Kudus, sereta dibaptisa. Katharina enda nemu pasal utai tu laban iya udah pindah. 13 taun udah bekau nya, lebuh iya enggau sida sebilik ngulu siti gempuru, iya berasai tekenyit ati laban pencheramah nya Hans! Katharina gaga amat laban iya enda ngelengkaka juluk ati ti deka nginjil ngagai bala ke bekereja enggau iya.

14, 15. (a) Nama patut digaga kita lebuh orang ngansak kita ngereja utai ti digaga sida? (b) Nama nulung kita mengkang tegap lebuh diansak orang bukai?

¹⁴ Naka ke diatu, artikel tu udah meransang kita ngena pengidup diri ngelantangka ati Jehovah sereta netapka juluk ati ba pengarap. Tang mayuh orang ke biak ke serambau enggau kita semina deka ngelantangka ati diri aja. Lalu sida engka deka mai kita ngereja utai ti digaga sida. Nyau kelama, kita patut nulung sida nemu kebuah kita keran deka nyapai juluk ati diri. Anang ngelakka orang bukai ngelimpangka kita ari juluk ati diri. Enti sema kita nya orang ke ba stesen bas ti disebut ba pun artikel tu, kati kita deka nepan sebarang bas ketegal kita meda orang ke nepan bas nya rami gaga ati? Tentu enda!

¹⁵ Nyadi, nama deka digaga kita ngambika mengkang tegap lebuh orang bukai ngansak kita ngereja utai ti digaga sida? Seliahka utai ke tau ngasuh kita tetempuhka penusah. (J-lam. 22:3) Pikirka penanggul ti deka ditapi ketegal ngereja utai ti salah. (Gal. 6:7) Lalu enggau baruh ati ngaku diri begunaka jaku ajar ti manah. Dingaka utai ti dipadah apai indai kita sereta bala menyadi Kristian ke tegap ba pengarap.—Bacha 1 Peter 5:5, 6.

16. Baka ni peneleba Christoph nunjukka ati ti baruh nya beguna?

¹⁶ Ati ti baruh nulung Christoph nerima jaku ajar ti manah. Enda lama pengudah dibaptisa, iya berengkah ngagai palan endur besenam enggau tetap. Orang biak bukai ke bisi dia mai iya nyereta kelab sukan sida. Iya berandau enggau seiku tuai gempuru pasal utai nya, lalu tuai gempuru nya ngasuh iya mikirka penusah ke deka ditapi, baka bisi pengingin deka bepekit. Taja pia, Christoph mutus deka nyereta kelab nya. Tang enda lama udah nya, iya beratika sukan nya kasar sereta ulih nganu nyawa. Sekali agi iya berandau enggau bala tuai gempuru, lalu sida meri iya jaku ajar ari Bup Kudus. Christoph madahka, “Jehovah udah nganjung orang ke nemu meri jaku ajar ngagai aku, lalu aku mendingka Iya, taja pan lubah meretika jaku ajar nya.” Kati nuan baruh ati deka nerima jaku ajar ti manah?

17, 18. (a) Nama dikedekaka Jehovah ba orang ke biak kemayaharitu? (b) Nama patut digaga kita ngambika enda nesal ati enggau pilih ti udah digaga maya kita udah besai dudi hari? Padahka siti peneleba.

 ¹⁷ Bup Kudus madahka: “Kita ke biak, awakka kita ngelantangka diri kala lebuh kita agi biak. Awakka kita gaga kala lebuh kita agi biak.” (P-jar. 11:9) Jehovah deka kita gaga lebuh kita agi biak. Ba artikel tu, kita udah nemu chara kita ulih gaga nya enti kita ngenuluka juluk ati ba pengarap sereta nitihka jaku ajar ari Jehovah ba semua pelan enggau pemutus ke digaga kita. Tumu agi kita ngereja tu, jampat agi kita deka ngasaika Jehovah ngiring, nyaga, sereta merekatka kita. Pikirka semua jaku lalau ke diberi Iya ngagai kita nengah Bup Kudus, lalu titihka jaku ajar tu: ‘Nya alai, kingatka Petara ti udah ngaga nuan kala lebuh nuan agi biak.’—P-jar. 12:1.

¹⁸ Orang ke biak jampat amat besai. Tang sayau amat, mayuh ari sida udah nya nyau nesal ati laban netapka juluk ati ti salah tauka nadai ngembuan juluk ati lebuh sida agi biak. Tang enti kita ngenuluka juluk ati ba pengarap, kita tentu gaga ati enggau pilih ke udah digaga kita maya kita udah besai dudi hari. Nya meh utai ti diasaika seiku menyadi indu ke benama Mirjana. Lebuh iya agi biak, iya landik amat ba sukan. Iya indah dikangau ngambi bagi ba Winter Olympic Games. Tang iya milih gawa ke Jehovah penuh jam. Lebih ari 30 taun udah nya, iya agi gawa penuh jam ke Jehovah tang enggau laki iya. Iya madahka, orang ke deka tebilang, dipebasa, bekuasa, sereta kaya enda ulih ngasaika pengaga ati ti bendar. Iya mega madahka, juluk ati ti pemadu manah nya gawa ke Jehovah sereta nulung orang ngelala Iya.

19. Nama kebuah nya manah ngenuluka juluk ati ba pengarap lebuh agi biak?

¹⁹ Kita ke biak endang patut dipuji. Taja pan napi penusah, kita ngena pengidup diri gawa ke Jehovah. Kita netapka juluk ati ba pengarap, lalu kita ngumbai pengawa nginjil nya utai ti beguna amat ba pengidup. Kita mega enda nejuka dunya tu ngelimpangka kita ari juluk ati diri. Pengawa ke digaga kita nya enda lebu. Kita bisi bala menyadi Kristian ke nyukung sereta sayauka kita. Nya alai ‘serahka utai ti dikereja nuan ngagai Jehovah, nya baru pelan nuan deka mujur.’