1, 2. Baka ni cherita pasal Tony nunjukka orang ulih ngaga ubah ba pengidup?

 TONY nadai apai. Iya agi ba sekula sekondari, tang iya enda rindu belajar. Indah, iya berunding deka badu besekula. Maya ujung minggu, Tony meda wayang tauka begulai enggau bala pangan iya. Iya ukai orang ke mangah tauka makai dadah, tang iya nadai tuju ba pengidup. Iya indah enda tentu nemu sekalika Petara nya bisi tauka nadai. Bisi sekali, Tony betemu enggau dua iku Saksi-Saksi Jehovah lalu iya madahka diri kakang ati pasal Petara. Seduai iya meri Tony dua iti brosur, siti pasal kati pengidup ditempa, lalu siti agi pasal pun penatai pengidup.

² Lebuh seduai iya datai baru ngabas Tony, iya udah berubah. Ketegal iya suah amat macha brosur nya, nya alai brosur nya belipat sereta bekerunyuk. Ku Tony madah ngagai dua iku Saksi nya: “Petara amat bisi.” Iya berengkah belajarka Bup Kudus, lalu belubah-lubah runding iya pasal pengidup pan berubah. Terubah-rubah iya ukai nembiak ti manah, tang pengudah belajarka Bup Kudus, iya nyadi seiku ari nembiak ti pemadu manah ba  sekula! Indah kepala pengajar alit ati. Ku iya: “Nuan udah mayuh berubah ba ulah enggau pemutus peresa nuan. Kati nya ketegal nuan begulai enggau Saksi-Saksi Jehovah?” Tony madahka au, lalu iya bekunsi utai ti dipelajar iya enggau kepala pengajar. Iya nembuka pelajar ba sekula tinggi lalu diatu iya nyadi pengerintis biasa sereta penulung gempuru. Tony berasai gaga laban diatu iya bisi Apai ti ngembuan pengerindu, Jehovah!—Mas. 68:5.

 3. Nama jaku ajar ke diberi Jehovah ngagai orang ke biak?

³ Ari cherita Tony, kitai nemu Jehovah amat ibuhka orang ke biak. Iya deka nuan ngembuan pengidup ti mujur sereta ngemuaska ati. Nya kebuah Iya meransang nuan ingatka ‘Petara ti udah ngaga nuan kala lebuh nuan agi biak.’ (P-jar. 12:1) Tu enda seruran senang, tang agi ulih digaga. Enggau saup Petara, nuan ulih ngembuan pengidup ti mujur lebuh nuan agi biak sereta lebuh nuan udah besai dudi hari ila. Ngambika ulih meretika utai tu, kitai deka bejuraika utai ke nulung orang Israel ngambi Menua ti Udah Disemaya Jehovah ngagai sida sereta utai ke meri David pengering kena ngalahka Goliat ke besai tinggi.

4, 5. Nama ulih dipelajarka kitai pasal orang Israel ke ngalahka orang Kanaan sereta pasal David ke ngalahka Goliat? (Peda gambar ba pun artikel.)

⁴ Lebuh orang Israel nyau deka tama ngagai Menua ti Udah Disemaya, nama iring ti diberi Jehovah ngagai sida? Kati Iya ngasuh sida nyadi soldadu ke manah agi tauka ngelatih sida beperang? Enda! (U-dat. 28:1, 2) Iya ngasuh sida ngasi sereta arapka Iya. (Jos. 1:7-9) Pesan nya baka ke nyelai ba runding mensia, tang nya pesan ti pemadu manah ke orang Israel. Jehovah seruran nulung nembiak Iya ngalahka orang Kanaan. (Jos. 24:11-13) Ngasika Petara endang begunaka pengarap, lalu pengarap ke baka tu seruran mai pemujur. Nya endang nyata ari suba nyentuk ke diatu.

⁵ Goliat nya soldadu ke kering. Peninggi iya nyauka tiga meter (9.5 kaki), lalu iya mai senyata ti ngenakutka. (1 Sam. 17:4-7) Tang David, semina mai pangwang lalu iya arapka Petara. Orang ke enda arapka Petara engka ngumbai David beli laban nguji ngelaban Goliat! Tang kebendar, Goliat ke beli.—1 Sam. 17:48-51.

 6. Nama deka dipejuraika kitai ba artikel tu?

⁶ Ba artikel sebedau tu, kitai berandau pasal empat iti utai ke tau ngasuh ati kitai gaga sereta mujur agi ba pengidup. Iya nya kitai patut ngintu utai ti diguna kitai ba pengarap, nyadika orang ti rinduka Petara pangan kitai, netapka juluk ati ti manah, enggau beterima kasih ke pengelepas ti diberi Petara ngagai kitai. Ba artikel tu, kitai deka bejuraika chara bukai kitai tau bulih penguntung ari ngereja semua utai manah nya. Diatu aram kitai beratika sekeda prinsip ba Masmur 16.

 7. (a) Orang ke ngembuan runding Petara nya orang ke baka ni? b) Nama utai ke enggi David, lalu nama penguntung ke diulih iya?

⁷ Orang ke ngembuan runding Petara arapka Iya lalu nguji berunding baka Iya pasal siti-siti utai. Orang ke baka nya ngawakka Jehovah ngiring pengidup iya lalu keran ngasika Jehovah. (1 Kor. 2:12, 13) David nyadi chunto ti manah. Ku iya belagu: ‘Semina Nuan aja, Jehovah, ke dikemisi [tauka enggi] aku.’  (Mas. 16:5) David beterima kasih ke utai ti enggi iya, iya nya kaul ti rapat enggau Petara, lalu nyadika Petara alai iya belindung. (Mas. 16:1) Ketegal nya, iya ulih madah: ‘Aku gaga ati.’ Amat, nadai utai ke ulih ngagaka ati David kelimpah ari kaul ti rapat enggau Jehovah!—Bacha Masmur 16:9, 11.

 8. Nama sekeda utai ke ulih ngasuh pengidup nuan ngemuaska ati?

⁸ Orang ke beberatka duit tauka berundingka pengelantang diri empu, enda ulih gaga ati baka David. (1 Tim. 6:9, 10) Seiku menyadi Kristian lelaki ari Kanada madah: “Asai ati ti puas, ukai datai ari utai ke diulih kitai ba pengidup, tang ari utai ke diberi kitai ngagai Petara Jehovah ke meri semua pemeri ti menyana.” (Jas. 1:17) Enti nuan ngemansangka pengarap ba Jehovah lalu nyembah Iya, nuan deka ngembuan pengidup ti bisi reti sereta ngemuaska ati. Nya alai, nama ulih digaga nuan ngambika pengarap nuan ba Jehovah tegap agi? Nuan patut macha Jaku Iya, beratika pemanah utai ti ditempa Iya, sereta mikirka kualiti Iya, nyengkaum pengerindu Iya ke nuan.—Rom. 1:20; 5:8.

 9. Baka ni nuan ulih ngawakka runding Jehovah ngiring nuan?

⁹ Baka ke digaga seiku apai ti ngembuan pengasih, kadang-kadang Petara ngerara kitai kena mandangka pengerindu Iya ngagai kitai. David beterima kasih ke jaku ajar ari Iya lalu madahka: ‘Aku muji Jehovah, laban Iya ngiring aku, lalu lebuh malam hari ati aku empu ngajar aku.’ (Mas. 16:7) David belematika runding Petara lalu nyadika nya runding iya. Iya ngawakka runding Petara ngiring iya, iya nya, ngubah iya nyadi orang ke manah agi. Lebuh nuan ngereja utai ti sama, pengerindu nuan ke Petara enggau pengeran nuan ti deka ngenyamaika ati Iya pan nambah, lalu nuan deka nyadi orang Kristian ti bisi kaul ti rapat enggau Petara. Seiku menyadi Kristian indu ke benama Christin madahka, “Lebuh aku ngaga pansik lalu belematika utai ti dibacha, aku ngasaika utai nya endang ditujuka Jehovah ngagai aku!”

10. Baka ke dipelajar ba Isaiah 26:3, nama penguntung ke diulih enti nuan ngembuan runding Petara?

¹⁰ Enti nuan ngembuan runding Petara, runding nuan deka sebaka enggau runding Petara pasal dunya enggau jemah ila. Jehovah meri nuan penemu sereta penajam runding ti amat dalam. Nama kebuah? Jehovah deka nuan nemu utai ti beguna ba pengidup, nemu ngaga pemutus ti manah, sereta nganti pengidup ti badas ke jemah ila enggau ati ti berani! (Bacha Isaiah 26:3.) Seiku menyadi Kristian lelaki ke benama Joshua ke diau di Amerika Serikat madahka, enti nuan mengkang semak enggau Petara nuan ulih nemu utai ti beguna enggau utai ti enda beguna.

11. Baka ni chara David milih bala pangan ti badas?

¹¹ Bacha Masmur 16:3. David nemu chara ngiga pangan ti badas. Iya milih orang ke rinduka Jehovah nyadika pangan, lalu iya “bisi amat ati deka begulai enggau sida.” Iya ngumbai sida “tetap ati [“nembiak ti kudus,” NW]” laban sida nguji nitihka standard moral Jehovah. Seiku agi pemasmur ngasaika utai ti sama pasal milih pangan lalu nulis: “Aku tu pangan semua orang ke nangika Nuan, semua orang ke ngasika adat Nuan.” (Mas. 119:63) Baka ke udah dikerandauka kitai ba artikel tu, nuan mega tau bulih mayuh bala pangan ti badas ari bala orang ke rindu sereta ngasika Jehovah. Lalu bala pangan nuan tau enda ibuh serambau enggau nuan.

12. Nama kebuah kaul David enggau Jonatan manah amat?

 ¹² David enda milih orang ke serambau enggau iya aja nyadika pangan. Ulih nuan madahka nama seiku ari pangan rapat iya? Nuan engka berundingka Jonatan. Kaul entara David enggau Jonatan nya siti ari chunto ti pemadu manah ke bisi dipadah ba Bup Kudus. Kati nemu nuan, Jonatan nya kira 30 taun tuai ari David? Tang nama kebuah kaul seduai iya manah amat? Laban seduai iya arapka Petara. Seduai iya mega bebasaka pangan diri sereta rinduka kualiti manah ke dikembuan pangan diri, baka pemerani ke diayanka lebuh ngelaban munsuh Petara.—1 Sam. 13:3; 14:13; 17:48-50; 18:1.

13. Baka ni nuan tau bulih mayuh agi bala pangan? Padahka siti chunto.

¹³ Baka David enggau Jonatan, kitai “bisi amat ati deka begulai enggau” bala pangan ke rinduka Jehovah sereta arapka Iya. Kiera, ke udah lama nyembah Petara, madahka: “Aku bisi mayuh bala pangan ari serata dunya. Sida ngembuan chara idup sereta adat ti enda sama.” Enti nuan bisi mayuh bala pangan ari serata dunya, nuan ulih beratika kebuah semua nembiak Jehovah begempung ketegal ajar ari Bup Kudus sereta roh kudus ari Jehovah.

14. (a) Baka ni nuan ulih netapka juluk ati ti manah ba pengidup? (b) Nama dipadah sekeda orang ke biak pasal juluk ati sida?

¹⁴ Bacha Masmur 16:8. Ba David, nyembah Petara nya utai ti pemadu beguna. Enti nuan neladan David lebuh netapka juluk ati lalu seruran mikirka utai ti dikedekaka Jehovah, pengidup nuan tentu deka ngasuh ati nuan berasai puas. Seiku menyadi Kristian lelaki ke benama Steven madahka: “Netapka juluk ati, ngulihka iya, lalu ngenang pemansang ke udah digaga aku ngenataika ati ti puas ngagai aku.” Seiku menyadi Kristian lelaki ke biak ari menua Jerman ti gawa ke Jehovah ba menua bukai madahka: “Enti aku udah tuai ila, aku enggai ngenang pasal pengidup aku ke suah ngereja utai ke penguntung aku empu aja.” Kati nuan ngasaika baka  nya? Nya alai kena meh penau enggau pengelandik nuan ngemuliaka Petara sereta nulung orang bukai. (Gal. 6:10) Tetapka juluk ati ba pengawa ke Jehovah, lalu minta Iya nulung nuan nyapai juluk ati nya. Iya tentu deka nyaut sampi nuan!—1 Jhn. 3:22; 5:14, 15.

15. Nama sekeda juluk ati ti tau ditetapka nuan ke diri empu? (Peda kutak “ Sekeda Juluk Ati ti Tau Diperundingka.”)

¹⁵ Nama sekeda juluk ati ti tau ditetapka nuan? Baka ni enti nguji meri saut ngena leka jaku nuan empu lebuh begempuru? Tauka netapka juluk ati nyadi pengerintis tauka gawa ba Betel? Nuan tau nguji belajarka bansa jaku bukai ngambika ulih bekunsi berita manah enggau mayuh agi orang. Barak nya seiku menyadi Kristian lelaki ke biak ti gawa penuh jam ke Jehovah madahka: “Lebuh aku dani ninting pagi lalu nemu diri deka meri semua pengering aku ngagai Jehovah, nya ngasuh ati aku puas lalu nadai utai bukai ke ulih ngasuh aku berasai baka tu.”

16. Baka ni asai ati David pasal adat enggau prinsip Jehovah, lalu nama kebuah?

¹⁶ Bacha Masmur 16:2, 4. Baka ke udah dipelajar kitai ba artikel sebedau tu, lebuh kitai idup sejalai enggau adat sereta prinsip Petara, kitai bulih pengelepas ti bendar. Kitai belajar rinduka utai ti manah lalu begedika utai ti jai. (Amo. 5:15) David madahka, semua utai ti manah datai ari Jehovah. Utai ti manah nya moral ti menyana, tauka utai ti pemadu menyana. Semua utai ti dikereja Jehovah menyana magang, lalu tiap iti utai manah ti dikembuan kitai datai ari Iya. David bebendar neladan Jehovah lalu rinduka utai ti dikerinduka Iya. Tang David mega belajar begedika utai ti dikumbai Petara jai. Siti ari utai nya nyembah engkeramba iya nya nyembah orang tauka utai, ukai Jehovah. Pengawa besembahka engkeramba ngemaluka mensia lalu meri mulia ke enggi Jehovah ngagai orang bukai tauka utai bukai.—Isa. 2:8, 9; Pem. 4:11.

17, 18. (a) Nama dipadah David pasal penusah ke datai ari pengarap pelesu? (b) Nama utai ke ngasuh orang kemayaharitu ditinggang “mayuh macham penusah”?

¹⁷ Maya jeman Bup Kudus, ulah seks ti kamah suah bisi dalam sembah ti pelesu. (Hos. 4:13, 14) Mayuh orang rinduka sembah ti pelesu laban sida rindu ngereja ulah ti kamah. Kati sembah ke baka nya ngagaka ati sida? Enda! David madahka, orang ke nyembah petara pelesu ditinggang “mayuh macham penusah.” Indah sida munuh anak sida empu nyadika pemeri ngagai petara pelesu! (Isa. 57:5) Jehovah begedika penyai ti digaga sida. (Jer. 7:31) Enti sema nuan idup maya jeman nya, nuan tentu berasai gaga laban apai indai nuan nyembah Jehovah!

¹⁸ Kemayaharitu, mayuh pengarap pelesu nerima ulah ti kamah, nyengkaum homoseksual. Ngembuan chara idup ti kamah engka ngasuh orang ngumbai diri bisi pengelepas, tang kebendar sida ditinggang “mayuh macham penusah.” (1 Kor. 6:18, 19) Bisi nuan beratika tu? Nya alai, kita ke biak, pendingka Apai kita ti di serega. Tunjukka ngagai diri empu, ngasika Petara nya manah ke nuan. Pikirka pasal penusah ke datai ari ulah ti kamah. Nuan deka nemu, penusah ke diasaika nuan mayuh agi ari pengelantang diri empu ke enda lama. (Gal. 6:8) Joshua, ke disebut ba pun tadi, madahka: “Kitai ulih ngena pengelepas enggau peneka ati, tang enti kitai salah ngena pengelepas nya kitai enda ulih lantang.”

19, 20. Nama berekat ti deka diulih orang ke biak ti arapka Jehovah sereta ngasika Iya?

 ¹⁹ Jesus madahka: ‘Enti kita bepegai ba jaku aku, kita amat murid aku, lalu kita deka nemu pemendar, lalu pemendar deka ngelepaska kita.’ (Jhn. 8:31, 32) Kitai beterima kasih ngagai Jehovah laban kitai udah nemu bida entara utai ti betul enggau salah, lalu udah dilepaska ari pengarap pelesu enggau penemu ti bula. Jemah ila, kitai nganti maya deka bulih ‘pengelepas ti bemulia ti endang enggi bala anak Petara.’ (Rom. 8:21) Nuan tau bulih pengelepas nya indah ari diatu enti nuan nitihka ajar Jesus. Enggau nya, nuan ukai semina deka “nemu pemendar” ari belajar pasal pemendar tang mega ari ngena iya ba pengidup!

²⁰ Kita ke biak, beterima kasih meh ke pengelepas ti diberi Petara ngagai kita. Kena pengelepas enggau manah. Nya deka nulung kita ngaga pemutus ari diatu ngambika kita tau bulih pengidup ti manah ke dudi hari. Seiku menyadi Kristian lelaki madahka: “Ngena pengelepas enggau manah lebuh agi biak endang amat manah kelebih agi lebuh patut ngaga pemutus ti besai dudi hari, baka ngiga kereja ke engkeman tauka deka mengkang rumpas ba siti-siti timpuh.”

21. Baka ni nuan tau bulih “pengidup ti bendar”?

²¹ Pengidup ti dikumbai orang manah kemayaharitu, enda ulih tan lama. Nadai orang nemu utai ti deka nyadi dudi hari. (Jas. 4:13, 14) Nya alai utai ti pemadu manah ke ulih digaga nuan nya, ngaga pemutus ke ulih nulung nuan bulih “pengidup ti bendar”—pengidup ti meruan belama iya ba dunya baru Petara. (1 Tim. 6:19) Jehovah nadai mejal orang nyembah Iya. Nuan empu patut milih kediri empu. Nya alai, nyadika meh Jehovah enggi nuan. Baka ni? Nuan patut bebendar nyemakka diri ngagai Iya ninting hari, lalu beterima kasih ke semua “utai ti manah” ke diberi Iya. (Mas. 103:5) Pechaya meh, Jehovah ulih meri nuan pengaga ba ati sereta pengelantang ti meruan belama iya!—Mas. 16:11.