1, 2. Nitihka Hebrew 13:4, nama patut digaga kitai?

SEMUA kitai deka masa Jehovah. Iya endang patut dipebasa kitai, lalu Iya besemaya deka masa kitai. (1 Sam. 2:30; J-lam. 3:9; Pem. 4:11) Iya mega deka kitai masa orang bukai, baka pegawai perintah. (Rom. 12:10; 13:7) Tang kitai mega patut ngayanka basa ba siti agi pekara, iya nya tikah.

² Rasul Paul nulis: “Awakka adat melaki-bini dibasa semua orang, lalu awakka laki enggau bini meruan tetap ati ngagai pangan diri.” (Heb. 13:4) Paul ukai semina nyebut pasal tikah pia aja. Iya ngasuh orang Kristian masa tikah, iya nya ngumbai iya berega. Kati nuan ngumbai tikah nya berega, kelebih agi enti nuan nya udah nikah?

3. Nama jaku ajar ke diberi Jesus pasal tikah? (Peda gambar ba pun artikel.)

³ Enti nuan ngumbai tikah nya berega, nuan nitihka teladan manah ari Jesus. Iya masa tikah. Lebuh orang Parisi nanya pasal sarak, iya nyebut utai ti udah dipadah  Petara pasal tikah ti keterubah: “Ketegal nya, lelaki deka ninggalka apai indai iya, lalu begulai enggau bini iya, lalu seduai iya deka nyadi setubuh.” Ku Jesus agi: ‘Nadai orang tau nyeraraka utai ti udah ditampilka Petara.’—Bacha Mark 10:2-12; P-kal. 2:24.

4. Nama tuju Petara bekaul enggau tikah?

⁴ Jesus madahka, Petara ti ngepunka tikah lalu tikah patut meruan belama iya. Lebuh Petara ngepunka tikah ti keterubah, Iya nadai nyebut pasal sarak ngagai Adam seduai Hawa. Tuju Petara iya nya deka “seduai iya” meruan begulai belama iya.

5. Baka ni pemati ngubah tikah?

⁵ Tang pengudah Adam bedosa, mayuh utai berubah. Siti ari utai nya mensia belabuh mati, lalu tu ngubah tikah. Rasul Paul madahka, orang Kristian dilepaska ari adat tikah pengudah kaling pengidup mati lalu kaling pengidup ke agi idup ulih jadi enggau orang bukai.—Rom. 7:1-3.

6. Ari Adat Moses, nama ditemu kitai pasal runding Petara bekaul enggau tikah?

⁶ Adat Moses ke diberi Petara ngagai orang Israel madah mayuh utai pasal tikah. Ambika chunto, orang Israel dikemendarka bebini lebih ari seiku. Utai tu endang udah bisi sebedau Petara meri Adat Moses. Taja pia, Adat nya ngelindung bala indu enggau anak ari disiping. Ambika chunto, enti laki jadi enggau ulun lalu udah nya ngambi seiku agi bini, laki tetap nyediaka utai ti diguna bini iya ti keterubah baka selama. Petara deka laki terus ngelindung sereta ngintu bini iya ti keterubah. (P-sut. 21:9, 10) Kitai kemayaharitu enda agi nitihka Adat Moses. Tang ari Adat nya  kitai nemu, tikah nya berega ba Petara. Tu tentu nulung kitai masa tikah.

7, 8. (a) Nitihka Ulang Adat 24:1, nama dipadah Adat Moses pasal sarak? (b) Nama runding Jehovah pasal sarak?

⁷ Nama dipadah Adat Moses pasal sarak? Taja pan Jehovah nadai netapka laki enggau bini tau sarak, tang Adat nya ngemendarka laki muai bini enti “iya bisi tetemuka utai pasal bini iya ti ngasuh ati iya enda lantang.” (Bacha Ulang Adat 24:1.) Adat nya nadai nerangka utai ti tau dikumbai ‘ngasuh ati enda lantang.’ Taja pia, nya tentu utai ti ngemaluka tauka hal ti besai lalu ukai penyalah ti mit. (U-dat. 23:14) Tang sayau amat, maya jeman Jesus, mayuh orang Judah muai bini sida “atas sebarang tegal.” (Mat. 19:3) Kitai tentu enggai nunda ulah ke baka nya.

⁸ Maya jeman nabi Malaki, sida ke laki suah muai bini sida ti keterubah ngambika ulih jadi enggau indu ke biak agi ti enda nyembah Jehovah. Tang Petara enggau terang madahka runding Iya pasal sarak. Iya madahka: “Aku begedika pengawa sarak.” (Mal. 2:14-16) Runding Petara pasal tikah enda berubah kenyau ari pun, lebuh Iya madahka lelaki deka “begulai enggau bini iya, lalu seduai iya nyadi siku.” (P-kal. 2:24) Lalu Jesus nyukung runding Apai iya pasal tikah lebuh iya madahka: ‘Nadai orang tau nyeraraka utai ti udah ditampilka Petara.’—Mat. 19:6.

9. Nama reti jaku Jesus ba Mark 10:11, 12?

⁹ Sekeda orang engka nanya, ‘Kati bisi kebuah ke tau ngasuh orang Kristian sarak lalu udah nya ulih jadi enggau orang bukai?’ Peratika utai ku Jesus: “Barang sapa muai bini, lalu jadi enggau indu bukai, butang ngelaban bini iya, lalu enti bini muai laki, lalu jadi enggau lelaki bukai, iya butang.” (Mrk. 10:11, 12; Luk. 16:18) Jesus endang masa tikah, lalu iya deka orang bukai mega baka nya. Enti laki muai bini ke tetap ati lalu jadi enggau indu bukai, laki butang. Sama mega enggau indu ke muai laki iya ti tetap ati. Sarak ukai reti nya seduai iya enda agi jadi melaki-bini, laban ba mata Petara, seduai iya agi “setubuh.” Jesus mega madahka, enti laki muai bini ke enda salah, nya tau ngujungka bini butang. Baka ni nya? Suba, indu ke udah sarak engka ngumbai diri patut belaki baru ketegal begunaka belanja. Nya mega sama enggau butang.

10. Nama siti aja kebuah ke tau ngasuh orang Kristian sarak lalu ulih jadi enggau orang bukai?

¹⁰ Jesus semina madahka siti aja kebuah ke tau ngasuh orang sarak: ‘Aku madah ngagai kita, barang sapa muai bini, kelimpah ari butang, lalu orang nya bebini baru, iya butang.’ (Mat. 19:9) Iya ngajar utai ti sama dalam Ajar ba atas Bukit. (Mat. 5:31, 32) Jesus dua kali madahka “butang,” tauka ulah seks ti kamah. Ulah seks ti  kamah nyengkaum dosa baka nyundal, beleman entara dua iku orang ke bedau jadi enggau pangan diri, beleman enggau kaling pengidup orang bukai, homoseksual, sereta beleman enggau jelu. Enti sema laki ngereja ulah seks ti kamah, bini ulih mutus sekalika deka sarak tauka enggai. Enti bini muai laki iya, Petara enda agi ngumbai seduai iya jadi melaki-bini.

11. Nama kebuah orang Kristian engka milih deka mengkang jadi enggau kaling pengidup ke ngereja ulah seks ti kamah?

¹¹ Peratika, Jesus nadai madahka laki tauka bini ke enda salah patut minta sarak enti kaling pengidup iya ngereja ulah seks ti kamah. Ambika chunto, bini engka milih deka mengkang jadi enggau laki iya ke ngereja ulah seks ti kamah. Nama kebuah? Iya engka agi sayauka laki iya lalu deka ngampun sereta sama enggau laki iya ngemanahka agi rumah tangga. Pia mega, enti iya sarak lalu enda belaki baru, iya tentu napi sekeda penanggul. Ambika chunto, baka ni enggau utai ti diguna iya ba pengidup besehari-sehari sereta ba seks? Kati iya sunyi? Baka ni sarak ulih ngachau bala anak? Kati ngemesaika sida dalam pemendar deka tusah agi? (1 Kor. 7:14) Nyadi, laki tauka bini ke enda salah ti minta sarak deka bisi penanggul ti besai.

12, 13. (a) Nama nyadi enggau tikah Hosea? (b) Nama kebuah Hosea ngambi pulai baru Gomer, lalu nama ulih dipelajarka kitai ari tikah Hosea?

¹² Utai ke nyadi ba nabi Hosea nulung kitai nemu runding Petara pasal tikah enggau mayuh agi. Petara ngasuh Hosea jadi enggau Gomer, seiku indu ke nyau nyadi indu sundal lalu ngadaka anak ari pengawa butang iya. Gomer seduai Hosea bisi seiku anak lelaki. (Hos. 1:2, 3) Udah nya, Gomer bisi seiku anak indu enggau seiku agi anak lelaki, engka ari lelaki bukai. Taja pan Gomer butang lebih ari sekali, Hosea agi jadi enggau iya. Nyau kelama, iya ninggalka Hosea lalu nyadi ulun. Taja pia, Hosea ngambi iya pulai baru. (Hos. 3:1, 2) Bansa Israel enda tetap ati ngagai Jehovah lalu nyembah petara bukai. Tang Jehovah ngena Hosea nunjukka Iya suah ngampun sida. Nama ulih dipelajarka kitai ari tikah Hosea?

¹³ Enti laki tauka bini ke Kristian butang, kaling pengidup ke enda salah patut ngaga pemutus. Jesus madahka kaling pengidup ke enda salah bisi kebuah minta sarak lalu udah nya iya ulih jadi enggau orang bukai. Taja pia, iya ulih milih deka ngampun kaling pengidup ti butang. Hosea ngambi pulai baru Gomer. Pengudah pulai, Hosea ngasuh iya badu butang. Hosea nadai “beleman” enggau Gomer enda lama. (Hos. 3:3) Tang udah nya, Hosea tentu bisi besetubuh enggau bini iya baru. Tu ngambarka baka ni Petara sanggup nerima orang Israel baru lalu neruska kaul Iya enggau sida. (Hos. 1:11; 3:3-5) Nama ulih dipelajarka kitai pasal tikah kemayaharitu? Enti kaling pengidup ke enda salah besetubuh baru enggau laki tauka bini iya ti butang, nya nunjukka kaling pengidup ke enda salah udah ngampun laki tauka bini iya. (1 Kor. 7:3, 5) Lalu seduai iya nadai agi kebuah tau sarak. Udah nya, seduai iya patut besaup lalu nulung pangan diri ngembuan  runding ti sama baka Petara pasal tikah.

14. Nitihka 1 Korint 7:10, 11, nama engka nyadi ba siti-siti tikah?

¹⁴ Semua orang Kristian patut masa tikah baka Jehovah enggau Jesus. Tang ketegal semua kitai enda sempurna, kadang-kadang sekeda ari kitai enda masa tikah. (Rom. 7:18-23) Nya alai kitai enda tekenyit, lebuh sekeda orang Kristian ba abad keterubah bisi penanggul ti besai ba tikah sida. Paul madahka “bini enda tau ninggalka [tauka beserara enggau] laki.” Tang kadang-kadang utai tu bisi nyadi.—Bacha 1 Korint 7:10, 11.

15, 16. (a) Nama patut digaga laki bini lebuh bisi penanggul ba tikah, lalu nama kebuah? (b) Baka ni jaku ajar nya mega nyengkaum kaling pengidup ke enda nyembah Jehovah?

¹⁵ Paul nadai madahka utai ke ngasuh laki bini beserara. Tang kitai nemu nya ukai ketegal laki udah ngereja ulah seks ti kamah. Laban enti laki bisi ngereja nya, bini tentu bisi kebuah ulih minta sarak lalu jadi enggau orang bukai. Paul madahka, bini ke beserara enggau laki “enda tau jadi enggau lelaki bukai, tauka iya mulaika diri baru ngagai laki iya empu.” Laban Petara agi ngumbai seduai iya jadi melaki-bini. Paul madahka enda ngira nama penanggul tauka penusah ke ditapi laki bini, enti seduai iya bela nadai ngereja ulah seks ti kamah, seduai iya patut bebaik enggau pangan diri, mutarka penanggul nya lalu meruan begulai. Seduai iya ulih minta bantu ari bala tuai gempuru. Sida enda tau nanahka laki tauka bini, tang sida ulih madahka jaku ajar ke ulih dikena ari Bup Kudus.

¹⁶ Taja pia, baka ni enti menyadi Kristian jadi enggau orang ke enda nyembah Jehovah? Lebuh bisi penanggul ba tikah, kati ulih seduai iya beserara? Baka ke dipadah Bup Kudus, laki bini semina ulih sarak ketegal ngereja ulah seks ti kamah. Tang Bup Kudus nadai nyebut kebuah ke tau ngasuh laki bini beserara. Paul nulis: “Enti indu ke orang Kristian bisi laki ke ukai orang Kristian, lalu laki iya besetuju deka begulai enggau iya, iya enda tau muai laki iya.” (1 Kor. 7:12, 13) Jaku ajar tu mega agi dikena nyentuk ke diatu.

17, 18. Nama kebuah sekeda orang Kristian meruan jadi melaki-bini taja pan napi penanggul ti besai?

¹⁷ Taja pia, bisi sekeda kes “laki ke ukai orang Kristian” madahka diri  enggai “begulai enggau” bini iya. Ambika chunto, laki engka udu nyamah, nyentukka bini ngasaika nya tau nganu pengerai tauka nyawa iya. Laki engka enggai nyediaka utai ti diguna anak bini, tauka ngasuh bini tusah deka nyembah Petara. Dalam kes ke baka tu, bini ke Kristian patut ngaga pemutus kediri empu. Bini engka berunding, enda ngira nama utai ke disebut laki iya, laki iya nunjukka diri enggai “begulai enggau” iya lalu seduai iya patut beserara. Tang orang Kristian ke bukai ke napi penanggul ti sama milih deka meruan begulai enggau kaling pengidup sida. Sida natka diri sereta nguji ngemanahka agi tikah sida. Nama kebuah sida deka baka nya?

¹⁸ Taja pan beserara, seduai iya agi jadi melaki-bini lalu deka napi penanggul baka orang ke sarak. Rasul Paul mega meri siti agi kebuah laki bini patut meruan begulai. Iya nulis: “Laki ke enda arap, digaga lurus ulih bini iya, lalu indu ke enda arap, digaga lurus ulih laki iya. Enti enda baka nya, anak kita enda tuchi, tang laban iya baka nya, anak kita kudus.” (1 Kor. 7:14) Taja pan napi penanggul ti besai, mayuh orang Kristian milih deka meruan enggau kaling pengidup sida ke enda nyembah Jehovah. Sida enda ngasaika diri rugi laban nyau kelama kaling pengidup sida pan nyadi Saksi-Saksi Jehovah.—Bacha 1 Korint 7:16; 1 Pet. 3:1, 2.

19. Nama kebuah bisi mayuh tikah ti mujur ba eklisia Kristian?

¹⁹ Jesus meri jaku lalau pasal sarak, lalu rasul Paul meri jaku ajar pasal beserara. Tang seduai iya bela dekaka nembiak Petara masa tikah. Di serata dunya kemayaharitu, bisi mayuh tikah ti mujur ba eklisia Kristian. Nuan ulih beratika mayuh laki bini gaga ati ba eklisia, laki taluk ngagai bini lalu bini masa laki. Semua sida nunjukka diri ulih tetap ati ngagai pangan diri. Lalu kitai ulih gaga ati lebuh bejuta iku laki bini nunjukka jaku Petara nya amat: “Nya kebuah lelaki ninggalka apai indai iya, lalu jadi enggau bini iya, lalu seduai iya nyadi setubuh enggau pangan diri.”—Eps. 5:31, 33.