1, 2. Nama penemu orang pasal paradais?

 MAYUH bala menyadi Kristian ari beberapa buah menua bukai datai ngulu konvensyen ba Seoul, Korea. Lebuh sida benung ninggalka stadium, bala Saksi di menua nya begelumu ngelingi sida laban berasai tusah ati deka beserara. Sida ngepaika jari lalu nyebut ngagai pangan diri: “Betemu baru ba Paradais!” Nama bansa paradais ti disebut sida?

² Di serata dunya, orang bisi penemu ti enda sama pasal paradais. Sekeda orang ngumbai paradais nya semina mimpi aja. Bisi sekeda madahka paradais nya sebarang endur ke ngasuh sida gaga ati. Lalu bisi mega madahka, lebuh sida ninga leka jaku “paradais”, sida berunding pasal taman ti manah ke bisi pun kayu ti besai sereta bisi jelu. Ba runding nuan, nama utai ti dikumbai Paradais? Kati nuan pechaya iya deka bisi?

 3. Ni maya Paradais terubah-rubah iya disebut ba Bup Kudus?

 ³ Bup Kudus bisi nyebut pasal paradais kelia enggau iya ke jemah ila. Kitai terubah-rubah macha pasal Paradais ba bup Pemungkal 2:8: ‘Udah nya Jehovah Petara ngaga siti kebun di menua Eden [tauka paradais ti ngelantangka ati, Douay Version Katolik], ti muak ke timur, lalu ngengkahka orang ke udah ditempa Iya ba kebun nya.’ Teks jaku Hebrew madahka, leka jaku “Eden” mai reti “Ngelantangka ati.” Kebun Eden endang endur ti ngerinduka ati. Iya endang chukup manah, penuh enggau pemakai lalu mensia sereta jelu ulih begulai enggau pangan diri.—P-kal. 1:29-31.

 4. Nama kebuah kitai ulih ngumbai Kebun Eden nya paradais?

⁴ Leka jaku “kebun” ke disalin nyadi pa·raʹdei·sos dalam jaku Hebrew, mai reti “paradais” dalam jaku Gerika. Bup Cyclopaedia ari M’Clintock enggau Strong madahka, orang Gerika ke ninga leka jaku pa·raʹdei·sos deka ngambarka kebun ti manah sereta lapang, ke dilindung ari utai ti tau nganu, bisi pun kayu ke mansutka mayuh macham bansa buah, sereta ai sungai ti chiru enggau tebing sungai ti tumbuh rumput alai raban kijang enggau bedus ngulam.—Banding Pemungkal 2:15, 16.

5, 6. Nama kebuah Adam seduai Hawa lenyau peluang idup belama iya ba Paradais, lalu nama engka diperundingka sekeda orang?

⁵ Jehovah ngengkahka Adam seduai Hawa ba kebun ke baka paradais. Tang ketegal enda ngasika Jehovah, seduai iya enggau bala anak seduai iya lenyau peluang idup belama iya ba Paradais. (P-kal. 3:23, 24) Taja pan nadai mensia diau ba Paradais, tang iya agi bisi nyentuk ngagai Bah Besai maya jeman Noah.

⁶ Sekeda orang engka berunding, ‘Kati Paradais deka bisi baru ba bumi?’ Nama dipadahka bukti? Enti nuan deka idup ba Paradais enggau orang ti dikesayauka nuan, kati nuan bisi kebuah arapka nya? Ulih nuan nerangka kebuah kitai pechaya jemah ila deka bisi paradais?

7, 8. (a) Nama semaya ti digaga Petara enggau Abraham? (b) Nama engka diperundingka Abraham pasal semaya Petara?

⁷ Kitai ulih ngiga saut nya ba Bup Kudus, laban bup nya datai ari Jehovah, Petara ke nempa Paradais ti asal. Peratika utai ti dipadah Petara ngagai pangan Iya Abraham. Petara madahka, Iya deka ngaga peturun Abraham ngemayuh “pasir ti ba tebing tasik.” Udah nya Jehovah ngaga semaya ti besai reti enggau Abraham: “Semua bansa deka minta Aku merekatka sida, baka Aku ti udah merekatka peturun nuan, ketegal nuan udah ngasika jaku Aku.” (P-kal. 22:17, 18) Petara mega nandu semaya ti sama ngagai anak enggau uchu Abraham.—Bacha Pemungkal 26:4; 28:14.

⁸ Bup Kudus nadai madahka Abraham ngumbai mensia deka bulih upah kepenudi ba paradais ti di serega. Nya alai lebuh Petara besemaya pasal “semua bansa” deka diberekat, Abraham tentu ngumbai berekat nya deka ba  bumi. Tang kati semina tu aja bukti ba Bup Kudus ke nunjukka paradais endang deka bisi ba bumi?

9, 10. Nama semaya bukai ke ngasuh kitai arap jemah ila amat deka bisi paradais?

⁹ Petara ngena roh kudus ngasuh seiku ari peturun Abraham, iya nya David, nyebut pasal maya lebuh “orang ke jai deka abis” jemah ila. (Mas. 37:1, 2, 10) Tang, “orang ke baruh ati deka bempu menua tu lalu diau lantang.” David mega madahka: “Orang ke lurus deka bempu menua tu lalu diau ditu belama iya.” (Mas. 37:11, 29; 2 Sam. 23:2) Ba runding nuan, baka ni asai ati orang ke deka ngereja peneka Petara lebuh ninga semaya nya? Sida bisi kebuah arap dudi hari ila semina orang ke lurus aja ba bumi tu lalu bumi deka nyadi paradais baka Kebun Eden menya.

¹⁰ Nyau kelama, nyauka semua orang Israel ti ngumbai diri nyembah Jehovah nulak Iya sereta sembah ti bendar. Nya alai Petara ngelakka orang Babilon ngalahka nembiak Iya, ngerusak menua sida, lalu nabanka mayuh ari sida nyadi orang tangkap. (2 Ban. 36:15-21; Jer. 4:22-27) Tang sekeda nabi Petara madahka nembiak Iya deka pulai baru ngagai menua diri pengudah 70 taun. Lalu jaku sida dikeamatka. Tang jaku sida nya mega bisi reti ngagai kitai kemayaharitu. Lebuh kitai berandauka sekeda jaku sida nya, peratika baka ni jaku sida nya meri kitai kebuah arap jemah ila amat deka bisi paradais ba bumi.

11. Baka ni Isaiah 11:6-9 terubah-rubah dikeamatka, tang nama tanya ke agi ditanya kitai?

¹¹ Bacha Isaiah 11:6-9. Nengah nabi Isaiah, Petara madahka orang Israel deka pulai ngagai menua diri ke likun. Orang enda irauka diri deka diserang jelu tauka mensia. Orang ke tuai enggau ke biak deka selamat. Endaka tu ngingatka nuan pasal pengelikun ke bisi ba Kebun Eden? (Isa. 51:3) Isaiah mega madahka ukai semina bansa Israel aja ke ‘deka penuh laban penemu Jehovah baka ai ti ngemenuhka tasik,’ tang serata dunya. Ni maya tu deka nyadi? Tu deka nyadi jemah ila.

12. (a) Nama sekeda berekat ke diasaika sida ti pansut ari menua Babilon? (b) Nama nunjukka Isaiah 35:5-10 mega deka dikeamatka jemah ila?

¹² Bacha Isaiah 35:5-10. Isaiah sekali agi madahka orang Israel ke pansut ari menua Babilon enda diserang jelu tauka mensia. Iya madahka menua sida deka penuh enggau pemakai ti manah laban dia bisi mayuh ai, baka Kebun Eden. (P-kal. 2:10-14; Jer. 31:12) Kati ayat nya semina dikeamatka maya jeman orang Israel aja? Peratika, ayat nya mega madahka orang ke buta, orang ke enda ulih bejalai, enggau orang ke  bengal deka digeraika. Tang tu nadai nyadi ba orang Israel ke pansut ari menua Babilon. Tu nunjukka Petara deka ngeraika semua penyakit jemah ila.

13, 14. Baka ni Isaiah 65:21-23 dikeamatka lebuh orang Israel pansut ari Babilon, tang ni bagi utai ba ayat nya deka dikeamatka jemah ila? (Peda gambar ba pun artikel.)

¹³ Bacha Isaiah 65:21-23. Lebuh nembiak Petara pulai ngagai menua diri, sida nadai rumah ti nyamai alai diau tauka nadai kebun anggur sereta tanah alai betanam. Tang ketegal Petara merekatka sida, semua utai berubah. Uji gambarka pengaga ati orang, lebuh sida ngaga rumah lalu diau dia sereta lebuh sida lantang ati makai utai ti udah ditanam sida!

¹⁴ Nitihka ayat tu, kitai “deka idup panjai umur baka kayu.” Sekeda pun kayu idup beribu-ribu taun. Ngambika panjai umur baka pun kayu, mensia patut bisi pengerai ti manah. Lalu enti sida ulih idup ba endur ti likun sereta manah baka ke dipadah Isaiah, nya tentu amat manah, baka paradais! Lalu semaya nya deka dikeamatka!

15. Nama sekeda berekat ke bisi dipadah dalam bup Isaiah?

¹⁵ Semua semaya ke baru udah dikerandauka kitai nunjukka jemah ila amat deka bisi paradais. Uji gambarka, serata bumi deka penuh enggau orang ti diberekat Petara. Nadai orang deka irauka diri diserang jelu tauka mensia ti mangah. Orang ke buta, ke bengal, enggau ke enda ulih bejalai deka digeraika. Orang deka diau ba rumah ke diuan diri empu sereta lantang ati bekebun. Umur sida deka panjai agi ari pun kayu. Au, Bup Kudus meri bukti ke nunjukka paradais amat deka bisi. Tang taja pan bisi bukti ke baka nya, sekeda orang ke enggau kitai berandau engka ngumbai paradais ukai ba bumi. Nama deka dipadah nuan ngagai sida? Nama utai ke ngasuh nuan deka nganti paradais ti nyata ba bumi? Jesus ulih meri kitai penerang ti tau dikarapka.

16, 17. Ni maya Jesus nyebut pasal Paradais?

¹⁶ Taja pan Jesus nadai ngereja penyalah, tang iya diukum lalu dipantang ba tiang nyentuk ke iya mati, sama enggau dua iku penjenayah ke bansa Judah ba sepiak-sepiak iya. Seiku ari penjenayah nya nemu Jesus nya raja lalu ku iya: ‘Jesus, kingatka aku lebuh nuan datai ngagai Perintah nuan!’ (Luk. 23:39-42) Semaya ke digaga Jesus enggau penjenayah nya bisi kaul enggau pengidup nuan jemah ila. Jaku Jesus nya bisi ba Luke 23:43. Sekeda pakar Bup Kudus ngengkahka koma sebedau leka jaku “sehari tu” lalu nyalin ayat nya: ‘Enggau bendar aku madah ngagai nuan, sehari tu nuan deka sama enggau aku di Paradais.’ Bisi penemu ti enda sama pasal dini alai koma nya patut diengkah ba ayat nya. Tang nama utai ku Jesus lebuh iya nyebut “sehari tu”?

¹⁷ Dalam mayuh bansa jaku kemayaharitu, tanda koma dikena ngambika reti siti-siti ayat nya terang. Tang ba manuskrip jaku Gerika kelia, tanda bacha enda seruran dikena. Nya alai kitai engka berunding: Kati Jesus madahka, ‘Aku madah ngagai nuan, sehari tu  nuan deka sama enggau aku di Paradais’? Tauka iya madahka, ‘Aku madah ngagai nuan sehari tu, nuan deka sama enggau aku di Paradais’? Sekeda penyalin ngengkahka koma sebedau tauka pengudah leka jaku “sehari tu” nitihka utai ti diperundingka sida pasal jaku Jesus, lalu nuan agi meda tu ba sekeda Bup Kudus kemayaharitu.

18, 19. Nama nulung kitai meretika utai ku Jesus?

¹⁸ Taja pia, kingatka utai ti dipadah Jesus pasal pemati iya ngagai bala murid. Iya madahka: “Anak Mensia deka mengkang dalam tanah tiga hari tiga malam.” Iya mega madahka: ‘Anak Mensia deka diserahka ngagai orang lalu sida deka munuh iya, lalu iya deka diangkatka idup baru ari mati ba hari ti ketiga.’ (Mat. 12:40; 16:21; 17:22, 23; Mrk. 10:34) Rasul Peter madahka utai tu amat nyadi. (SKR. 10:39, 40) Nya alai, Jesus enda ngagai Paradais ba hari lebuh iya enggau penjenayah ba sepiak iya mati. Bup Kudus madahka Jesus ba kubur sepengelama tiga hari, nyentuk ngagai Petara ngangkatka iya ari mati.—SKR. 2:31, 32. a (Peda nota kaki.)

 ¹⁹ Nya alai Jesus muka jaku semaya iya enggau penjenayah ke ba sepiak iya, ‘Enggau bendar aku madah ngagai nuan sehari tu.’ Nya endang chara sida bejaku indah maya jeman Moses. Moses kala nyebut: “Kingatka pesan ti diberi aku ngagai kita sehari tu.”—U-dat. 6:6; 7:11; 8:1, 19; 30:15.

20. Nama bukti bukai ke nyukung utai ti ditemu kitai pasal jaku ke disebut Jesus?

²⁰ Seiku penyalin Bup Kudus ari menua ke semak alai Jesus diau madahka: “Utai ti patut diperatika ba ayat tu nya leka jaku ‘sehari tu’ lalu patut dibacha, ‘Enggau bendar aku madah ngagai nuan sehari tu, nuan deka sama enggau aku di Paradais.’ Semaya nya digaga ba hari nya lalu deka dikeamatka dudi hari.” Penyalin nya madahka, tu meh chara orang ba endur nya bejaku lalu ngumbai “semaya nya digaga ba siti-siti hari lalu deka dikeamatka.” Salin Suryani ari kurun kelima M. nyalin ayat nya: “Amen, aku madah ngagai nuan sehari tu iya nya nuan deka enggau aku ba Kebun Eden.” Nya alai semaya nya patut ngasuh semua kitai berasai diperansang.

21. Nama utai ke enda nyadi ba penjenayah nya, lalu nama kebuah?

²¹ Lebuh Jesus bejaku enggau penjenayah ke ba sepiak iya pasal Paradais, Jesus ukai bejaku pasal paradais ti di serega. Baka ni kitai nemu? Siti kebuah iya laban penjenayah nya enda nemu pasal Jesus ke udah ngaga sempekat enggau bala rasul iya ke tetap ati ngambika merintah enggau iya di serega. (Luk. 22:29) Penjenayah nya mega bedau dibaptisa. (Jhn. 3:3-6, 12) Nya alai lebuh Jesus ngaga semaya enggau penjenayah nya, Jesus tentu bejaku pasal paradais ba bumi. Ba runding nuan, ulih nuan diau dia?

22, 23. Nama utai ti ulih dipechaya nuan?

²² Kingatka, David bisi nyebut pasal maya alai “orang ke lurus deka bempu menua tu.” (Mas. 37:29; 2 Pet. 3:13) David nyebut pasal maya alai semua orang ba bumi deka ngasika prinsip Petara ti lurus. Semaya ba Isaiah 65:22 bisi madahka: “Nembiak Aku deka idup panjai umur baka kayu.” Tu nunjukka orang ke nyembah Jehovah ba dunya baru deka idup beribu-ribu taun. Ulih nuan arapka nya? Au, laban nitihka Pemandang 21:1-4, Petara deka merekatka mensia lalu siti ari berekat nya madahka “pemati nadai agi.”

²³ Utai ti diajar Bup Kudus pasal Paradais endang amat. Adam seduai Hawa lenyau peluang idup belama iya ba Paradais, tang bumi deka nyadi paradais baru. Petara besemaya deka merekatka orang ba bumi. David madahka, orang ke baruh ati enggau ke lurus deka bempu bumi lalu idup dia belama iya. Lalu semaya ba bup Isaiah meransang kitai nganti maya alai kitai deka idup lantang ba bumi paradais ti manah. Ni maya nya deka nyadi? Lebuh semaya Jesus ngagai penjenayah ba sepiak iya dikeamatka. Nuan ulih diau ba Paradais nya. Maya nya ila, utai ke disebut bala menyadi Kristian di Korea deka dikeamatka: “Betemu baru ba Paradais!”