DIANA beumur lebih 80 taun. Pengidup iya balat tusah. Sebedau laki iya mati, laki iya bisi penyakit Alzheimer sereta diibun ba rumah alai nyaga orang tuai. Dua iku anak lelaki iya mega udah mati, lalu iya empu patut ngelaban penyakit kanser tusu. Tang bala menyadi Kristian beratika, Diana seruran gaga ati lebuh iya datai begempuru tauka nurun nginjil.

John udah lebih 43 taun bejalaika pengawa ngabas. Iya sayau amat ke pengawa nya. Tang, ketegal iya patut nyaga kaban belayan iya ke sakit, iya enda agi bejalaika pengawa ngabas. Lebuh bala menyadi Kristian betemu enggau iya ba gempuru besai sehari tauka konvensyen, sida beratika iya agi gaga ati.

Nama kebuah Diana enggau John agi ulih gaga ati? Baka ni orang ke idup tusah ulih gaga? Baka ni orang ulih mengkang gaga taja pan enda agi bejalaika pengawa ti dikerinduka iya? Saut iya bisi ba Bup Kudus. Masmur 64:10 madahka: ‘Semua orang ke lurus deka rami gaga ketegal Jehovah.’ Kitai ulih mereti agi ke ayat tu enti kitai nemu utai ke ulih meri pengaga ti meruan enggau pengaga ti enda lama.

Sekeda utai ulih ngagaka ati. Ambika chunto, pikirka pasal seiku indu enggau seiku lelaki ke bepangan lalu udah nya kawin. Tauka pikirka pasal apai indai ke baru bisi anak, tauka seiku menyadi Kristian ke nerima tanggung pengawa baru ba gerempung Jehovah. Semua nya pemeri ari Jehovah lalu ulih ngagaka ati. Kitai ulih kawin, tau bulih anak, sereta bisi pengawa ba gerempung Jehovah. Semua tu pemeri ari Iya.—Pemungkal 2:18, 22; Masmur 127:3; 1 Timoti 3:1.

Tang, bisi sekeda utai ngasuh ati gaga enda lama. Ambika chunto, kitai deka tusah ati lebuh kaling pengidup enda tetap ati tauka mati. (Esekiel 24:18; Hosia 3:1) Apai indai deka tusah ati lebuh anak enda ngasika sida enggau Petara, tauka lebuh anak sida dibuai ari gerempung Jehovah. Ambika chunto, dua iku anak lelaki Samuel enda nyembah Jehovah enggau chara ti diterima Iya,  lalu David bisi mayuh penanggul ba ruang bilik ketegal iya butang enggau Batseba. (1 Samuel 8:1-3; 2 Samuel 12:11) Lebuh utai ke baka tu nyadi, nya enda ngagaka ati. Tang ngasuh balat agi pedis sereta tusah ati.

Pia mega, kadang-kadang kitai enda agi ulih bejalaika pengawa ke Jehovah ketegal kitai sakit tauka patut ngintu diri sebilik, tauka ketegal bisi ubah ba gerempung Jehovah. Mayuh bala menyadi Kristian ke enda agi ulih bejalaika pengawa sida madahka diri selalu ngenang pengawa nya, laban nya ngagaka ati.

Kitai nemu, pengaga ke baka nya enda lama. Nya alai, ulih kitai mengkang gaga ati taja pan napi penanggul? Tentu ulih. Kitai nemu tu laban Samuel, David, sereta orang bukai agi ulih gaga ati lebuh napi penanggul.

Jesus amat nemu reti pengaga. Sebedau Jesus datai ke bumi, Bup Kudus madahka iya “seruran lantang ati begulai enggau [Jehovah].” (Jaku Dalam 8:30) Taja pia, lebuh iya ba bumi, kadang-kadang iya napi penanggul ti besai. Tang Jesus bulih pengaga lebuh ngereja peneka Apai iya. (John 4:34) Taja pan Jesus nyau deka napi pemati ti balat ngemediska, kati asai ati iya maya nya? Ku Bup Kudus: ‘Iya enda malu natka diri ba tiang perinsa ketegal pengaga ti deka diasaika iya.’ (Hebrew 12:2) Mayuh utai ulih dipelajarka kitai ari dua iti utai ti disebut Jesus pasal pengaga ti amat.

Bisi sekali, 70 iku murid pulai baru ngagai Jesus pengudah nginjil. Sida gaga ati enggau utai ti udah dikereja sida, tu nyengkaum muru bala antu. Tang Jesus madah ngagai sida: “Anang kita gaga ati ketegal antu nunduk ngagai kita, tang awakka ati kita gaga laban nama kita ditulis di serega.” (Luke 10:1-9, 17, 20) Amat, ulih diterima Jehovah nya beguna agi sereta mai pengaga ti besai agi ari sebarang pengawa ti manah ke dikereja kitai.

Ba maya bukai, lebuh Jesus bejaku ngagai orang mayuh, seiku indu orang Judah ke alit ati enggau ajar Jesus madahka indai Jesus tentu gaga amat ati ngembuan anak ti menyana. Tang  ku Jesus nyaut: ‘Beberekat agi orang ke ninga lalu ngasika jaku Petara!’ (Luke 11:27, 28) Temegah ati ke anak ulih ngagaka ati kitai. Tang utai ke mai pengaga ti meruan nya ngasika Jehovah sereta ngembuan kaul ti manah enggau Iya.

Kitai berasai gaga lebuh nemu Jehovah lantang ati enggau kitai. Lalu taja pan kitai enda rindu napi penguji, tang kitai agi ulih gaga ati. Kebendar iya, lebuh kitai mengkang tetap ati napi penguji, pengaga kitai deka majak nambah. (Rome 5:3-5) Pia mega, Jehovah meri roh kudus ngagai orang ke arapka Iya, lalu pengaga nya sebagi ari buah roh kudus. (Galatia 5:22) Tu nulung kitai meretika kebuah Masmur 64:10 madahka: ‘Semua orang ke lurus deka rami gaga ketegal Jehovah.’

Tu mega madahka kebuah Diana enggau John ulih mengkang gaga taja pan napi penanggul. Diana madahka: “Aku udah ngenduh ngagai Jehovah baka seiku anak ke ngenduh ngagai apai iya.” Ku iya agi: “Aku ngasaika Iya udah merekatka aku ngambika suah tuchum maya nginjil.” Nama nulung John mengkang tetap ati sereta kisuk ba pengawa nginjil pengudah iya enda agi bejalaika pengawa ngabas? Iya madahka: “Kenyau ari taun 1998 lebuh aku diberi pengawa ngajar ba Ministerial Training School, aku mayuh agi mansik Bup Kudus ari ke udah.” Iya madahka iya enggau bini iya senang agi ngaga ubah, laban seduai iya seruran sanggup ngaga pengawa ke diberi Jehovah. Ku iya nambah: “Kami duai enda kala nesal ngereja nya.”

Mayuh orang udah ngasaika jaku ba Masmur 64:10 nya amat. Peratika chunto sepasang laki bini ke gawa lebih 30 taun ba Betel di Amerika Serikat. Udah nya seduai iya diberi pengawa nyadi pengerintis spesial. Seduai iya madahka: “Lenyau utai ti dikerinduka endang ulih ngasuh ati tusah.” Ku seduai iya agi: “Tang kitai enda ulih majak tusah ati.” Pengudah seduai iya bulih pengawa baru ke Jehovah, seduai iya berengkah nginjil enggau bala menyadi Kristian. Seduai iya mega madahka: “Kami duai besampi enggau nyemetak pasal sekeda pekara. Lebuh sampi kami duai disaut, kami duai berasai gaga sereta diperansang. Enda lama pengudah kami duai datai, bala menyadi Kristian ba eklisia dia berengkah nyadi pengerintis, lalu kami duai diberekat enggau dua iku pemelajar Bup Kudus ti jampat ngaga pemansang.”

Endang amat, enda senang deka seruran gaga ati. Bisi maya nya kitai tusah ati. Tang Jehovah meransang kitai ngena jaku ba Masmur 64:10. Taja pan kitai berasai lemi, enti kitai mengkang taluk enda ngira nama utai ke ditapi kitai, kitai ‘deka rami gaga ketegal Jehovah.’ Kitai mega arapka semaya Jehovah ti deka “ngaga langit ti baru enggau dunya ti baru” dikeamatka. Udah nya semua orang deka nyadi sempurna sereta “lantang lalu rami gaga belama iya” ketegal semua utai ti deka digaga Jehovah.—Isaiah 65:17, 18.

Uji gambarka, kitai ngembuan pengidup enggau pengerai ti sempurna. Tiap pagi maya kitai dani, kitai berasai kering. Penusah ke kala nyadi enda ulih ngasuh ati kitai tusah agi, laban Jehovah besemaya “semua utai ti lama, enda agi dikingatka.” Bup Kudus madahka Jesus kala ngidupka seiku anak indu ke udah mati. Apai indai indu nya “amat gaga ati.” (Mark 5:42, NW) Kitai mega ngasaika utai ti sama lebuh betemu enggau orang ti dikesayau ke diangkat idup baru. Tiap iku orang ba bumi ila deka nyadi orang ke lurus lalu deka ‘rami gaga ketegal Jehovah’ belama iya.