1, 2. Ba taun 2018, nama pengawa spesial ke deka nyerakup kitai, lalu nama kebuah? (Peda gambar ba pun artikel.)

KENA 31 Mac 2018, bejuta iku orang di serata dunya deka datai ngagai pengawa ke diintu sekali setaun. Pengudah mata panas padam, Saksi-Saksi Jehovah sereta sida ke bukai deka begempuru ngingatka genselan Jesus. Tiap taun, pengawa Ngingatka Pemati Jesus nyerakup orang lebih agi ari pengawa ke bukai ke bisi di dunya tu.

² Jehovah enggau Jesus tentu gaga ati lebuh meda bejuta iku orang datai ngagai pengawa ti spesial tu. Bup Kudus madahka “mayuh amat orang, datai ke sida nyau enda ulih diitung. Sida nya datai ari genap bengkah bansa, ari semua raban bansa, menua, enggau jaku,” ngangau: ‘Pengelepas endang datai ari Petara kitai ke duduk ba kerusi diraja, enggau ari Anak Domba!’ (Pem. 7:9, 10) Endang manah amat laban lebuh pengawa Ngingatka Pemati Jesus diintu ninting taun, mayuh amat orang bebasaka Jehovah enggau Jesus ke pemesai pengawa ke udah dikereja seduai iya!

3. Nama tanya ke deka disaut ba artikel tu?

 ³ Ba artikel tu, nuan deka bulih saut ngagai empat iti tanya tu: (1) Baka ni aku ulih nyediaka diri ngambika bulih penguntung ari pengawa Ngingatka Pemati Jesus? (2) Baka ni pengawa Ngingatka Pemati Jesus nulung semua nembiak Petara beserakup? (3) Nama ulih digaga aku kena negapka penyerakup entara nembiak Petara? (4) Kati pengawa Ngingatka Pemati Jesus bisi ke penudi iya? Enti bisi, ni maya?

4. Nama kebuah nya beguna kitai enggau pengawa Ngingatka Pemati Jesus?

⁴ Nama kebuah kitai patut enggau pengawa Ngingatka Pemati Jesus? Siti kebuah iya laban datai ngagai gempuru nya chara kitai nyembah Jehovah. Jehovah enggau Jesus tentu meda tiap iku orang ke bebendar enggau pengawa begempuru nya. Kitai deka Jehovah enggau Jesus nemu, kitai keran deka enggau pengawa Ngingatka Pemati Jesus enti nadai utai nekul. Lebuh kitai beberatka pengawa begempuru, kitai meri Jehovah siti agi kebuah deka ngetanka nama kitai dalam “bup” pengingat, tauka “bup pengidup” Iya. Bup nya ngembuan nama semua orang ke deka diberi Jehovah pengidup ti meruan belama iya.—Mal. 3:16; Pem. 20:15.

5. Beberapa minggu sebedau pengawa Ngingatka Pemati Jesus, baka ni nuan ulih terus ‘meresa diri empu, kena nentuka [nuan] amat idup ngena pengarap tauka enda’?

⁵ Beberapa minggu sebedau pengawa Ngingatka Pemati Jesus, kitai patut suah agi besampi sereta belematika penegap kaul kitai enggau Jehovah. (Bacha 2 Korint 13:5.) Rasul Paul ngasuh orang Kristian: “Peresa diri empu, kena nentuka kita amat idup ngena pengarap tauka enda.” Baka ni kitai ulih ngereja nya? Kitai ulih nanya diri empu: ‘Kati aku amat pechaya, semina gerempung tu aja ke dipilih Jehovah ngereja peneka Iya? Kati aku enggau naka ulih nusui sereta ngajar berita manah? Kati ulah aku nunjukka aku amat pechaya kitai benung idup ba hari ti penudi, lalu mega pechaya pengujung perintah Sitan nyau semak? Kati pengandal aku ba Jehovah enggau Jesus agi sama tegap baka lebuh aku baru berengkah nyembah Jehovah?’ (Mat. 24:14; 2 Tim. 3:1; Heb. 3:14) Berundingka saut ngagai tanya tu deka nulung kitai terus ‘nguji’ diri empu.

6. (a) Nama siti aja chara ke nulung kitai bulih pengidup ti meruan belama iya? (b) Baka ni seiku tuai gempuru besedia ke pengawa Ngingatka Pemati Jesus ninting taun, lalu baka ni nuan ulih ngereja utai ti sama?

⁶ Siti chara nuan ulih besedia ke pengawa Ngingatka Pemati Jesus nya enggau macha sereta belematika artikel ke nerangka kebuah pengawa tu beguna bendar. (Bacha John 3:16; 17:3.) Kitai enda tau enda ngelala Jehovah sereta arapka anak Iya laban nya aja meh chara kitai tau bulih pengidup ti meruan belama iya. Kena nyediaka diri kitai ulih milih projek  belajar ke nulung kitai semak agi ngagai seduai iya. Tu utai ti digaga seiku menyadi Kristian lelaki ke udah lama nyadi tuai gempuru. Betaun-taun iya udah ngumpul artikel Menara Jaga ke ngenang pasal pengawa Ngingatka Pemati Jesus sereta pengerindu ti udah diayanka Jehovah enggau Jesus ngagai kitai. Beberapa minggu sebedau pengawa Ngingatka Pemati Jesus, iya macha artikel nya baru lalu belematika kebuah pengawa Ngingatka Pemati Jesus nya beguna bendar. Kekadang iya nambahka siti tauka dua iti agi artikel ke digumpul iya. Iya mega macha sereta belematika ayat Bup Kudus ke dibacha maya Ngingatka Pemati Jesus. Tuai gempuru tu madahka, enggau ngereja semua tu iya belajarka utai baru ninting taun. Keberat agi, pengawa belajar nya nulung iya rindu agi ke Jehovah enggau Jesus. Enti nuan belajar baka nya, nuan deka rindu agi ke Jehovah enggau Jesus. Nuan mega deka agi beterima kasih ke utai ti udah digaga seduai iya, lalu nuan deka bulih mayuh agi penguntung ari pengawa Ngingatka Pemati Jesus.

7. (a) Nama utai ti disampika Jesus maya Makai Malam Tuan ti keterubah nya? (b) Nama nunjukka Jehovah udah nyaut sampi Jesus?

⁷ Lebuh Makai Malam Tuan ti keterubah, Jesus ngenataika siti sampi ti spesial. Iya besampi pasal penyerakup ti berega ke bisi entara iya enggau Apai iya. Jesus mega besampi ngambika semua murid iya ngembuan penyerakup ti sama. (Bacha John 17:20, 21.) Jehovah tentu udah nyaut sampi Anak Iya. Enti dibanding enggau pengawa begempuru ke bukai, pengawa begempuru Ngingatka Pemati Jesus enggau terang nunjukka Saksi-Saksi Jehovah amat beserakup. Ba hari nya, bejuta iku orang ari mayuh bengkah menua sereta chura kulit deka begempuru di serata dunya lalu nunjukka sida pechaya Jehovah ke ngirumka Anak Iya. Ba sekeda endur, orang ke enda sama bansa enda begulai nyembah petara sida, enti sema sida bisi begulai begempuru, pengawa nya dikumbai enda patut. Tang Jehovah enggau Jesus enda ngumbai baka nya. Ba seduai iya, penyerakup kitai lebuh Ngingatka Pemati Jesus nya utai ti manah.

8. Nama pesan ti diberi Jehovah ngagai Esekiel?

⁸ Nembiak Jehovah enda tekenyit ati enggau penyerakup ke baka nya. Jehovah bisi madah pasal penyerakup nya dalam pesan ke diberi Iya ngagai Esekiel. Iya ngasuh Esekiel ngambi dua iti kayu, siti kayu ke “Perintah menua Judah” lalu siti agi ke “Perintah menua Israel,” lalu ngaga kayu dua iti nya nyadi baka siti kayu. (Bacha Esekiel 37:15-17.) “Pertanyaan Pembaca” ke dikeluarka ba Menara Pengawal kena Julai 2016 nerangka: “Nengah nabi Esekiel, Jehovah madahka nembiak Iya deka pulai baru ngagai Menua ti Udah Disemaya, lalu sida deka beserakup baru nyadi siti bansa. Semaya nya mega madahka, orang ke nyembah Jehovah maya hari ti penudi deka beserakup nyadi siti bansa.”

9. Baka ni pesan ke diberi ngagai Esekiel amat nyadi lebuh pengawa Ngingatka Pemati Jesus ninting taun?

⁹ Berengkah ba taun 1919, Jehovah ngatur sereta nyerakup orang ti dipilih ke serega. Sida baka kayu ke “Perintah menua Judah.” Udah nya, majak mayuh orang ke ngembuan pengadang idup belama iya ba dunya berengkah beserakup enggau orang ti dipilih ke serega. Sida ke  ngembuan pengadang idup ba dunya nya baka kayu ke “Perintah menua Israel.” Jehovah besemaya deka nampung “kayu dua iti nya nyadi baka siti kayu.” (Esk. 37:19) Iya mai orang ti dipilih ke serega enggau “bedus ti bukai” nyadi “siti raban.” (Jhn. 10:16; Sek. 8:23) Kemayaharitu, kedua-dua raban nya beserakup lalu sama begulai nyembah Jehovah. Lalu sida bisi seiku Raja, iya nya Jesus Kristus, ke dikangau Petara “nembiak Aku David” ba semaya ke diberi Jehovah ngagai Esekiel. (Esk. 37:24, 25) Ninting taun lebuh kitai begempuru ba pengawa Ngingatka Pemati Jesus, kitai meda penyerakup dua iti raban tu endang baka ke dipadah nengah Esekiel. Tang nama ulih digaga tiap iku kitai kena nyaga sereta negapka penyerakup nembiak Petara?

10. Baka ni kitai ulih negapka penyerakup ba bala nembiak Petara?

¹⁰ Nama chara kesatu ke dikena kitai negapka penyerakup entara nembiak Petara? Iya nya bebendar baruh ati. Lebuh Jesus ba bumi, iya ngasuh bala murid iya baruh ati. (Mat. 23:12) Orang ba dunya suah ngumbai diri manah agi ari orang bukai. Tang enti kitai baruh ati, kitai deka bebasaka bala menyadi Kristian lelaki ke ngulu ba eklisia, lalu kitai deka ngasika iring ari sida. Nya baru eklisia ulih beserakup. Keberat  agi, enti kitai mengkang baruh ati, kitai deka ngelantangka ati Petara laban Iya “ngelaban orang ke sumbung, tang ngayanka pengasih ngagai orang ke baruh ati.”—1 Pet. 5:5.

11. Lebuh mikirka pasal roti enggau wain ke dikena maya pengawa Ngingatka Pemati Jesus, baka ni tu ulih nulung kitai negapka penyerakup?

¹¹ Nama chara kedua ke dikena kitai negapka penyerakup? Iya nya enggau belematika nama reti roti enggau wain ke bendar. Kitai patut ngereja tu sebedau pengawa Ngingatka Pemati Jesus lalu kelebih agi ba malam nya. (1 Kor. 11:23-25) Roti ke enda beragi ngambarka tubuh sempurna ti diberi Jesus nyadika genselan. Wain mirah ngambarka darah Jesus. Tang kitai ukai semina patut nemu reti utai nya aja. Kitai patut ingat, genselan tebus Jesus nya nyengkaum dua iti pengawa ke mandangka pengerindu ti besai. Jehovah meri Anak Iya ke kitai, lalu Jesus sanggup meri nyawa iya ke kitai. Lebuh kitai mikirka pengerindu seduai iya, nya deka meransang kitai rinduka seduai iya. Lalu pengerindu ke dikembuan semua kitai ke Jehovah deka negapka penyerakup kitai.

12. Dalam cherita pasal seiku raja enggau ulun iya, baka ni Jesus enggau terang madahka Jehovah deka kitai ngampun orang bukai?

¹² Nama chara ketiga ke dikena kitai negapka penyerakup? Iya nya ngampun orang bukai ari ati. Enti kitai ngereja nya, kitai nunjukka diri beterima kasih laban Jehovah ulih ngampun dosa kitai ketegal genselan Jesus. Kena nunjukka kebuah kitai patut ngampun, Jesus nusui cherita pasal seiku raja enggau ulun iya. Bacha meh Matthew 18:23-34 lalu tanya diri empu: ‘Kati aku deka ngereja utai ti diajar Jesus? Kati aku liat ati sereta nemu asai ati bala menyadi Kristian aku? Kati aku sedia deka ngampun orang ke udah ngemediska ati aku?’ Endang amat, sekeda dosa besai agi ari dosa ke bukai. Lalu sekeda dosa tusah deka diampun ketegal mensia enda sempurna. Tang cherita Jesus ngajar kitai utai ti dikedekaka Jehovah kereja kitai. (Bacha Matthew 18:35.) Jesus enggau terang madahka Jehovah enggai ngampun kitai enti kitai enggai ngampun bala menyadi Kristian kitai ke amat-amat nesal ati. Tu utai ti patut dipikirka kitai enggau manah. Ngambika ulih ngetan sereta nyaga penyerakup kitai ti berega, kitai patut ngampun orang bukai baka ke diajar Jesus.

13. Baka ni kitai negapka penyerakup lebuh kitai ngetanka pemaik enggau orang bukai?

¹³ Lebuh kitai ngampun bala menyadi Kristian, kitai ngetanka pemaik enggau sida. Rasul Paul madahka, kitai patut bebendar ngetanka penyerakup sereta deka bebaik enggau pangan diri. (Eps. 4:3) Nya alai sepemanjai musin Ngingatka Pemati Jesus, lalu kelebih agi ba malam nya, perundingka chara nuan begulai enggau orang bukai. Tanya diri empu: ‘Kati orang ke ngelala aku nemu, aku udah badu ringat ngagai orang ke ngemediska ati aku? Kati orang nemu aku enggau naka ulih deka bebaik sereta negapka penyerakup?’ Tu tanya ti berat ke patut diperundingka.

14. Baka ni kitai ulih nunjukka diri “sabar enggau pangan diri dalam pengerindu”?

¹⁴ Nama chara keempat ke dikena kitai negapka penyerakup? Iya nya neladan Jehovah ngayanka pengerindu. (1 Jhn. 4:8) Kitai tentu enggai nyebut, “Aku deka ngetanka pemaik enggau bala menyadi Kristian aku, tang aku enggai kelalu rapat enggau sida.” Enti kitai berunding baka nya, kitai enda nitihka jaku lalau ke diberi  Paul ke ngasuh “sabar enggau pangan diri dalam pengerindu.” (Eps. 4:2) Peratika, Paul ukai semina nyebut kitai patut “sabar enggau pangan diri” tang kitai patut ngereja nya “dalam pengerindu.” Tu bisi bida iya. Bisi mayuh bansa orang ba eklisia kitai, lalu Jehovah udah mai semua sida ngagai Iya. (Jhn. 6:44) Nya alai Iya tentu bisi mayuh kebuah ti manah deka rinduka sida. Enti bala menyadi Kristian kitai layak nerima pengerindu Petara, baka ni kitai ulih ngumbai sida enda layak nerima pengerindu ari kitai? Kitai patut rinduka sida baka ti dikedekaka Jehovah.—1 Jhn. 4:20, 21.

15. Baka ni kitai nemu pengawa Ngingatka Pemati Jesus deka bisi ke penudi iya?

¹⁵ Bisi maya iya ila, kitai deka enggau pengawa Ngingatka Pemati Jesus ke penudi iya. Baka ni kitai nemu? Paul madahka, lebuh orang Kristian ti dipilih ke serega enggau pengawa ngingatka pemati Jesus ninting taun, sida majak ‘madahka pemati Tuan, nyentuk ngagai iya datai baru.’ (1 Kor. 11:26) Lebuh Jesus madah pasal pengujung dunya, Jesus mega nyebut pasal diri ke deka “datai.” Ngenang pasal penusah ti besai ke deka datai enda lama agi, iya madahka: ‘Tanda Anak Mensia deka pegari di langit, lalu semua mensia di dunya deka ngulit, lalu sida deka meda Anak Mensia datai ba atas remang ari serega, ngena kuasa enggau mulia ti besai. Terumpit ti besai deka disepu, lalu Anak Mensia deka ngasuh bala melikat iya bejalai, lalu sida deka ngempuruka semua orang ke udah dipilih Petara ari semua sukut dunya.’ (Mat. 24:29-31) Jesus deka ‘ngempuruka semua orang ke udah dipilih Petara’ lebuh iya mai semua orang Kristian ti dipilih ke agi ba dunya ke serega. Tu deka nyadi pengudah penusah ti besai berengkah, tang sebedau perang Armagedon. Ba perang nya, Jesus enggau semua sida 144,000 iku deka angkat ngelaban raja ba dunya lalu menang. (Pem. 17:12-14) Pengawa Ngingatka Pemati Jesus ti penudi ke diintu kitai, iya nya sebedau Jesus “datai” ngempuruka orang ti dipilih ke serega.

16. Nama kebuah nuan deka naka ulih datai enggau pengawa Ngingatka Pemati Jesus taun tu?

¹⁶ Enggau naka ulih datai enggau pengawa Ngingatka Pemati Jesus kena 31 Mac 2018. Lalu minta Jehovah nulung nuan datai ngagai pengawa nya ngambika kitai ulih mengkang beserakup. (Bacha Masmur 133:1.) Bisi maya iya ila, kitai deka enggau pengawa Ngingatka Pemati Jesus ti penudi iya. Sebedau jam nya datai, aram meh kitai nunjukka penyerakup ti ngelantangka ati ke dikembuan kitai tiap taun maya Ngingatka Pemati Jesus nya utai ti amat berega ba kitai.