1. Nama kebuah jeman maya kitai idup tu bebida ari jeman bukai?

 KITAI idup ba jeman ti jauh bebida ari jeman bukai dalam sejarah. Jehovah benung ngumpul mayuh orang “ari genap bengkah bansa, ari semua raban bansa, menua, enggau jaku.” Sida iya diatu lebih ari lapan juta iku lalu nyadi “bansa ti besai kuasa” ke gaga ati “nyembah [Petara] siang malam.” (Pem. 7:9, 15; Isa. 60:22) Nadai kala udah ngemayuh tu orang rinduka Petara sereta orang bukai.

2. Nama bansa pengerindu ti enda patut ke bisi dikembuan orang ke ukai pangan Petara? (Peda gambar ba pun artikel.)

² Taja pia Bup Kudus mega madahka, maya jeman kitai, orang ke ukai pangan Petara ngembuan pengerindu ti enda patut iya nya rinduka diri empu aja. Rasul Paul nulis, ba hari ti penudi orang “rinduka diri empu aja, angkunka duit,” sereta ‘rindu ngelantangka ati diri tang enda rinduka Petara.’ (2 Tim. 3:1-4, NW) Pengerindu ke bansa tu belaban enggau pengerindu Petara. Sekeda orang ngumbai nyapai juluk ati ke penguntung diri ulih ngasuh iya lantang, tang kebendar iya tu nadai mai pengelantang ba ati. Pengingin ke baka tu ngasuh  orang balat berundingka diri empu lalu ulih ngenusahka pengidup orang bukai.

3. Nama deka dipansik kitai ba artikel tu? Nama kebuah?

³ Rasul Paul nemu, ulah ti rinduka diri empu deka bisi ba sebarang endur lalu tu ulih ngenusahka orang Kristian. Nya alai iya nangkan sida “anang begulai” enggau, tauka patut nyeliahka diri ari orang ke ngayanka ulah nya. (2 Tim. 3:5) Tang kitai enda entu ulih nyeliahka diri ari sida. Nya alai, nama ulih digaga kitai kena nyaga diri ari ulah orang ke ngelingi kitai, lalu ngelantangka ati Jehovah? Aram kitai meda bida entara pengerindu ti diasuh Petara kembuan kitai enggau pengerindu ti disebut ba 2 Timoti 3:2-4. Udah nya kitai ulih meresa diri sereta beratika baka ni kitai ulih nunjukka pengerindu ke ulih nulung kitai puas sereta lantang ati.

4. Nama kebuah enda salah enti kitai bisi pengerindu ke diri empu?

⁴ Paul nulis: “Orang deka rinduka diri empu aja.” Kati salah kitai rinduka diri empu? Enda, laban Jehovah nempa kitai ngambika ngembuan pengerindu ke rinduka diri empu. Jesus madahka: “Rinduka pangan nuan, baka nuan ke rinduka diri empu.” (Mrk. 12:31) Indah, kitai enda ulih rinduka orang bukai enti kitai enda rinduka diri empu. Bup Kudus mega madahka: “Laki patut rinduka bini diri, baka iya ke rinduka tubuh diri empu. Laki ke rinduka bini diri, rinduka diri empu. Laban nadai orang kala begedika tubuh diri, tang iya nupi sereta bejimat ngintu tubuh nya.” (Eps. 5:28, 29) Nya alai tu terang nunjukka, kitai patut bisi pengerindu ke diri empu.

5. Baka ni nuan deka nerangka pasal orang ti kelalu rinduka diri empu?

⁵ Ulah ke rinduka diri empu ti dibacha kitai ba 2 Timoti 3:2 nya ukai ulah ti manah. Nya pengerindu ti berundingka diri empu. Enti orang kelalu rinduka diri empu, iya deka ngumbai diri pama agi ari ke patut. (Bacha Rome 12:3.) Iya ibuh agi ke diri empu, ukai ibuhka orang bukai. Enti sema bisi penanggul nyadi, iya nyalahka orang bukai, ukai nyalahka diri empu. Seiku pemansik Bup Kudus madahka, orang ke rinduka diri empu nya “baka seiku landak ke ngulung diri nyadi bul. Iya berasai nyamai lebuh begulung, tang orang ditebak duri iya. Pengidup orang ke baka nya enda lantang.”

6. Nama asil enti kitai rinduka Petara?

⁶ Sekeda pakar Bup Kudus pechaya, Paul nyebut pasal ulah ke rinduka diri empu nya dulu laban ulah nya ngasilka kualiti ti enda manah ke disebut iya udah nya. Tang, pengerindu ke diasuh Petara kembuan kitai ngasilka kualiti ti manah. Pengerindu nya bekaul enggau pengaga, pemaik, pengeliat ati, penyiru, pemadas, pengarap, penelap, sereta ulih nagang diri. (Gal. 5:22, 23) Ku pemasmur nulis: ‘Lantang meh mensia ti ngaku Petara nyadika Jehovah sida!’ (Mas. 144:15) Jehovah nya Petara ti  lantang ati, lalu nembiak Iya mega lantang ati. Pia mega, enti dibanding enggau orang ke kelalu rinduka diri empu sereta semina berundingka utai ti ulih diterima sida, nembiak Jehovah lantang ati laban sida meri ngagai orang bukai.—SKR. 20:35.

7. Nama sekeda tanya ke ulih nulung kitai meresa pengerindu diri ngagai Petara?

⁷ Baka ni kitai ulih nemu sekalika pengerindu kitai ke diri empu lebih agi ari pengerindu kitai ke Petara? Pikirka jaku ajar ti badas tu: “Anang ngereja utai semina berundingka diri empu aja, tauka beduduk ba ati ti deka ngenyumbungka diri, tang enggau ati ti baruh, seruran ngumbai orang bukai pama agi ari kita. Anang semina berundingka diri empu aja, tang berunding mega ke orang bukai.” (Plp. 2:3, 4) Kitai ulih nanya diri empu: ‘Bisi aku mendingka jaku ajar tu? Kati aku bisi nguji ngereja utai ti dikedekaka Petara? Kati aku ngiga chara ngambika ulih nulung orang bukai ba eklisia sereta ba pengawa nginjil?’ Endang enda seruran senang kitai deka meri awak sereta pengering. Reti nya kitai patut bebendar sereta ngelengkaka sekeda utai ti dikerindu kitai. Tang utai ke ngasuh kitai gaga agi ati nya laban nemu Pemerintah dunya raya lantang ati ngagai kitai!

8. Nama udah digaga sekeda orang Kristian ketegal rinduka Petara?

⁸ Ketegal rinduka Petara sereta deka gawa ke Iya enggau pengabis ati, sekeda orang Kristian ngelengkaka kereja sekular ke ulih ngasuh sida kaya. Ericka, ke nyadi lutur, milih nyadi pengerintis ari ke betumpu ba pengawa nyadi lutur. Iya enggau laki iya ulih gawa ke Jehovah ba sekeda menua. Ku iya madah: “Peneleba ke diulih kami duai lebuh nulung nginjil ba  endur ke ngena jaku menua bukai, sereta kaul enggau bala menyadi Kristian, udah ngemanahka agi pengidup kami.” Ericka agi gawa nyadi lutur, tang iya ngena mayuh agi jam enggau pengering ngajar orang pasal Jehovah sereta nulung bala menyadi Kristian. Iya madahka nya mai “pengaga sereta ati ti puas.”

9. Nama kebuah orang ke angkunka duit enda lantang ati?

⁹ Paul nulis, orang deka “angkunka duit.” Beberapa taun ti udah, seiku pengerintis di Ireland bejaku enggau seiku lelaki pasal Petara. Lelaki nya ngebak dumpit iya, megai sekeda duit keretas, lalu madahka: “Tu meh petara aku!” Mayuh orang bisi runding ke baka nya taja pan sida enda ngaku. Sida angkunka duit sereta utai ke ulih dibeli ngena duit. Tang Bup Kudus nangkan: “Enti nuan angkunka duit, nuan enda nemu puas ati. Enti nuan ingin deka kaya, nuan enda ulih ngulihka semua utai ti dikinginka nuan.” (P-jar. 5:10) Orang ke angkunka duit enda kala ngasaika diri chukup duit. Iya seruran deka mayuh duit lalu ngena pengidup iya ngulihka mayuh agi duit. Tu mai “mayuh macham pemedis” ngagai iya.—1 Tim. 6:9, 10.

10. Nama dipadah Bup Kudus pasal pengaya enggau penyeranta?

¹⁰ Semua kitai endang begunaka duit. Duit meri kita pengelikun. (P-jar. 7:12) Tang ulih kitai lantang ati enti sema kitai semina bisi mimit aja duit? Ulih! (Bacha Pengajar 5:12.) Agur anak Jakeh nulis: “Awakka aku ukai kaya tauka seranta. Nya alai, beri ngagai aku pemakai umbas ke guna aku.” Kitai ulih meretika kebuah lelaki tu enggai kelalu seranta. Iya madahka diri enggai bisi pengingin deka ngenchuri, laban ngenchuri ulih ngemaluka Petara. Tang nama kebuah iya enggai nyadi kaya? Ku iya nulis: “Enti aku diberi lebih ari nya, enggai ke aku ngumbai diri enda begunaka Nuan.” (J-lam. 30:8, 9) Nuan engka nemu bagi orang ke manggaika pengarap ba pengaya, ukai ba Petara.

11. Nama dipadah Jesus pasal duit?

¹¹ Orang ke angkunka duit enda ulih ngelantangka ati Petara. Jesus madahka: ‘Nadai orang ulih betuaika dua iku tuan, laban iya deka begedika siku, lalu rinduka siku, tauka angkunka siku, lalu mechat siku. Kita enda ulih betuaika Petara enggau duit.’ Iya mega madahka: “Anang nyimpan pengaya ke diri empu di dunya, alai indu gegat enggau tegar deka ngerusak, lalu perumpak tama lalu ngenchuri, tang simpan pengaya ke diri empu di serega, alai indu gegat, enggau tegar enda ngerusak, lalu perumpak enda tama lalu ngenchuri.”—Mat. 6:19, 20, 24.

12. Baka ni idup ti pengumbas iya ulih nulung kitai gawa ke Petara? Beri siti chunto.

¹² Mayuh ari nembiak Petara nguji deka ngembuan pengidup ti pengumbas iya. Sida nemu, ngereja nya meri sida mayuh agi awak gawa ke Jehovah sereta mega ngasuh sida lantang agi ati. Jack, ke diau di Amerika Serikat, nyual bisnis sereta rumah iya ti besai ngambika ulih ngerintis enggau bini iya. Ku iya nerangka: “Kami tusah deka ninggalka tanah sereta rumah kami ti manah ba menua kami.” Tang betaun-taun iya pulai ke rumah enggau ati ti lebu ketegal penanggul ba endur gawa. Ku iya madah: “Bini aku ke nyadi pengerintis biasa seruran lantang ati. Ku bini aku madahka, ‘Aku bisi tuke ti pemadu badas!’ Diatu aku mega nyadi pengerintis, kami  duai gawa ke Orang ti sama, iya nya Jehovah.”

13. Nama ulih nulung kitai mansik runding diri pasal duit?

¹³ Lebuh meresa runding diri pasal duit, kitai ulih nanya diri empu: ‘Kati pengidup aku nunjukka aku amat pechayaka utai ti dipadah Bup Kudus pasal duit? Kati ngulihka duit nya utai ti pemadu beguna ba aku? Kati aku ibuh agi pasal reta ari ibuhka kaul aku enggau Jehovah sereta enggau orang bukai? Kati aku amat pechaya, Jehovah deka nyediaka utai ti diguna aku?’ Pechaya meh Iya enda ngelebuka orang ti arapka Iya!—Mat. 6:33.

14. Nama runding ti patut pasal ngelantangka ati?

¹⁴ Bup Kudus mega madahka, ba hari ti penudi orang “rindu ngelantangka ati diri.” Baka ke ditemu kitai, endang enda salah ngembuan runding ti patut pasal diri empu enggau duit. Kitai mega nemu, enda salah enti deka ngelantangka pengidup enggau chara ti patut. Sekeda orang ngumbai sida enda patut ngelantangka diri, tang tu ukai utai ti dikedekaka Jehovah ba kitai. Bup Kudus meransang nembiak Petara ti tetap ati: “Empa meh pemakai nuan, lalu ngelantangka diri. Irup meh wain nuan, lalu gaga ati.”—P-jar. 9:7.

15. Nama reti “rindu ngelantangka ati diri”?

¹⁵ Dua Timoti 3:4 ngenang pasal orang ke semina deka ngelantangka diri lalu enda begunaka Petara ba pengidup sida. Peratika, ayat nya nadai madahka orang deka rindu agi ngelantangka ati diri ari rinduka Petara. Tang ayat nya madahka “enda rinduka Petara.” Seiku pakar nulis, ayat tu “tentu ukai madahka sida bisi mimit pengerindu ke Petara. Tang ayat tu mai reti sida endang enda rinduka Petara.” Tu jaku tangkan ti berat ngagai orang ke rindu ngelantangka ati diri. Bup Kudus madahka orang ke rindu ngelantangka ati diri nya, orang ke “alah laban” pengelantang ba pengidup.—Luk. 8:14.

16, 17. Nama chunto ti ditetapka Jesus pasal ngelantangka ati diri?

¹⁶ Jesus nunjukka reti ngelantangka diri enggau chara ti patut. Iya ngagai pengerami nikah sereta “pengerami makai besai.” (Jhn. 2:1-10 Luk. 5:29) Maya pengerami nikah nya, ai wain enda chukup. Nya alai Jesus ngaga kereja ajih lalu nukar ai nyadi wain. Ba maya bukai, lebuh orang bejai Jesus ketegal makai enggau ngirup, iya enggau terang nunjukka orang nya enda ngembuan runding ti patut.—Luk. 7:33-36.

¹⁷ Taja pia, Jesus enda nyadika pengelantang utai ti pemadu beguna ba pengidup iya. Iya ngenuluka Jehovah lalu enggau naka ulih nulung orang bukai. Iya sanggup mati merinsa ba tiang ngambika ulih nyelamatka mensia. Ku Jesus madah ngagai orang ke deka nitihka iya: ‘Beberekat [“Lantang,” NW] meh kita lebuh orang mechat kita lalu merinsaka kita, lalu nyebut semua macham utai ti bula ngelaban kita ketegal aku. Lantang sereta gaga meh  kita, laban upah ti besai udah disedia ke kita di serega, laban nya mega chara orang merinsaka sida nabi ke dulu ari kita.’—Mat. 5:11, 12.

18. Nama sekeda tanya ke ulih nulung kitai meresa penalam pengerindu kitai ti deka ngelantangka ati diri?

¹⁸ Nama ulih nulung kitai meresa penalam pengerindu kitai ti deka ngelantangka diri? Kitai ulih nanya diri empu: ‘Kati pemerindang nya beguna agi ari pengawa begempuru enggau nginjil? Kati aku sanggup ngelengkaka sekeda utai ke dikerindu aku ketegal deka gawa ke Jehovah? Lebuh aku milih pemerindang, kati aku deka mikirka runding Jehovah pasal pemerindang ke dipilih aku?’ Ketegal kitai rinduka Petara sereta deka ngelantangka ati Iya, kitai ukai semina nyeliahka utai ti ditemu kitai salah, tang kitai mega nyeliahka utai ke dikumbai kitai enda ngelantangka ati Iya.—Bacha Matthew 22:37, 38.

19. Sapa ke enda ulih amat-amat lantang ati?

¹⁹ Dunya Sitan udah ngasuh mensia merinsa kira-kira 6,000 taun. Diatu, ba hari ti penudi dunya tu, dunya penuh enggau orang ke ngira diri empu, angkunka duit, sereta rindu ngelantangka ati diri. Sida mikirka utai ti deka diulih sida lalu nyadika pengingin sida empu utai ti dikenuluka ba pengidup. Tang orang ke baka nya enda amat-amat lantang ati! Bup Kudus madahka: ‘Beberekat [“Lantang,” NW] meh orang ke ditulung Petara Jakop ke manggaika diri ba Jehovah Petara sida.’—Mas. 146:5.

20. Baka ni pengerindu ke Petara udah ngelantangka ati nuan?

²⁰ Nembiak Jehovah amat rinduka Iya, lalu tiap taun penyampau orang ke ngelala sereta rinduka Iya majak nambah. Tu nunjukka Perintah Petara benung merintah, lalu Perintah nya enda lama agi deka mai berekat ti enda ulih digambarka kitai! Enti kitai ngereja utai ti dikedekaka Jehovah, kitai ngelantangka ati Iya, lalu tu mai pengaga ti bendar ngagai kitai. Orang ke rinduka Jehovah deka gaga ati belama iya! Ba artikel pengudah tu, kitai deka meresa sekeda kualiti enda manah ke datai ari ulah ti rinduka diri empu aja. Nya baru kitai deka beratika baka ni kualiti nya belaban enggau kualiti manah ke dikembuan nembiak Jehovah.