1. Nama sekeda penanggul ke patut ditatka kitai, tang nama kebuah Jehovah lantang ati enggau nembiak Iya ti tetap ati? (Peda gambar ba pun artikel.)

 PENGIDUP ba dunya tu enda senang. Ambika chunto, mayuh ari bala kita merinsa ketegal penyakit ti raya. Sekeda ari kita ke udah tuai nyau nyaga kaban belayan ke tuai. Sekeda nya tusah nyediaka utai ti diguna diri bilik. Kami nemu, mayuh ari kita, ukai semina napi siti aja penanggul, tang napi beberapa iti penanggul tu serentak! Tu begunaka mayuh awak, pengering, sereta duit. Tang nuan tentu pechaya, Jehovah deka nulung nuan. Nuan nemu gaya utai deka manah agi laban nya meh utai ti udah disemaya Iya. Pengarap nuan tentu ngelantangka ati Jehovah!

 2. Baka ni Isaiah 40:29 meransang kitai, tang nama penyalah besai ke engka digaga kitai?

² Kati nuan kekadang ngasaika penanggul ke ditapi nuan kelalu tusah ditatka? Enti pia nuan enda kediri napi penanggul nya. Sekeda ari nembiak Petara ti tetap ati menya ngasaika  utai ti sama. (1 Raj. 19:4; Jop 7:7) Nama nulung sida mengkang betan? Sida bepanggai ba pengering ari Jehovah. Bup Kudus madahka Petara “meri pengering ngagai orang ke lemi.” (Isa. 40:29) Tang sayau amat, sekeda nembiak Jehovah kemayaharitu ngasaika ngetu nyembah Jehovah enda lama nya chara ti pemadu manah kena napi penanggul sida. Sida ngasaika nyembah Jehovah nya baka ke mai ma ti berat, ukai berekat. Nya alai sida ngetu macha Bup Kudus, datai begempuru, sereta nginjil. Nya meh utai ti dikedekaka Sitan kereja kitai.

 3. (a) Baka ni kitai ulih nagang Sitan ari ngelemika kitai? (b) Nama deka dikerandauka kitai ba artikel tu?

³ Sitan enggai kitai kering. Lalu iya nemu, kitai ulih nyadi kering enti kitai kisuk ngereja pengawa ke Jehovah. Nya alai lebuh nuan ngasaika diri lemi ba tubuh enggau emosi, anang ngenyauhka diri ari Jehovah. Majak semak ngagai Iya. Bup Kudus madahka: ‘Petara . . . ngering sereta negapka kita.’ (1 Pet. 5:10; Jas. 4:8) Ba artikel tu, kitai deka belajar ari Isaiah 40:26-31 pasal penau Jehovah ke ulih ngeringka kitai. Udah nya kitai deka berandauka dua iti penanggul ke ulih ngasuh kitai enda ransing gawa ke Jehovah. Lalu kitai mega deka belajar baka ni ngena prinsip Bup Kudus ulih nulung kitai betan.

 4. Nama ulih dipelajar kitai ari Isaiah 40:26?

⁴ Bacha Isaiah 40:26. Nadai orang ulih ngitung semua bintang ba dunya raya. Bala saintis pechaya ba galaksi kitai aja, bisi 400 biliun igi bintang. Tang Jehovah meri nama ngagai tiap igi bintang. Nama ulih dipelajarka kitai pasal Jehovah? Enti Jehovah ibuhka bintang ti enda idup, uji gambarka asai ati Iya ke nuan! Nuan nyembah Iya ukai ketegal nuan patut ngereja nya, tang ketegal nuan rinduka Iya. (Mas. 19:1, 3, 14) Apai kitai nemu semua utai pasal nuan. Bup Kudus madahka, “indah semua lambar buk ba pala kita deh udah diitung” Iya magang. (Mat. 10:30) Jehovah deka kitai nemu, Iya nemu utai ti ditapi orang ke nadai penyalah. (Mas. 37:18) Amat, Jehovah meda semua penanggul ke ditapi nuan, lalu Iya ulih meri nuan pengering kena nuan napi tiap iti penanggul.

 5. Baka ni kitai nemu Jehovah ulih ngeringka kitai?

⁵ Bacha Isaiah 40:28. Jehovah nya Pun semua tenaga. Ambika chunto, peratika penyampau kuasa ke diberi Iya ngagai mata panas. Penulis sains ke benama David Bodanis madahka, tiap sikin mata panas ngasilka tenaga ti sama mayuh enggau tenaga ti diasilka bebiliun igi bum atom ke meletup. Siti agi pansik ngira penyampau kuasa ke diasilka mata panas dalam satu sikin chukup dikena mensia ba bumi sepengelama 200,000 taun! Enti Jehovah ulih meri tenaga ngagai mata panas, Iya tentu ulih meri kitai pengering  ke diguna kena tan natka penanggul kitai.

 6. Nama kebuah tangkun Jesus nyamai disan, lalu nama penguntung iya ba kitai?

⁶ Bacha Isaiah 40:29. Nyembah Jehovah mai mayuh pengaga ati. Jesus ngasuh bala murid iya: ‘Ambi lalu san tangkun aku.’ Tang ku iya mega: ‘Belelakka semengat kita. Laban tangkun aku mudah, lalu ma aku lempung.’ (Mat. 11:28-30) Tu endang amat! Kekadang, kitai engka berasai lelak lebuh begempuru tauka nginjil. Tang baka ni asai ati kitai lebuh kitai pulai? Kitai berasai nyamai sereta besedia agi mutarka penanggul kitai. Amat, tangkun Jesus nyamai disan.

 7. Padahka siti peneleba ti nunjukka jaku ba Matthew 11:28-30 nya amat.

⁷ Peratika peneleba seiku menyadi Kristian indu kitai. Iya merinsa ketegal penyakit raya ti lelak, tusah ati, sereta balat pedis pala. Nya alai kekadang iya tusah amat deka datai begempuru. Taja pia bisi sekali, pengudah iya bebendar datai begempuru, ku iya nulis: “Ai mata aku labuh bekeberai laban cheramah nya pasal pengelemi ba ati. Utai ke disebut dalam cheramah nya dikenataika enggau chara ti bisi penyinu sereta pengibuh. Tu ngingatka aku patut seruran datai begempuru.” Iya gaga amat laban udah bebendar datai begempuru!

8, 9. Nama reti utai ku rasul Paul lebuh iya nulis: “Lebuh aku lemi, aku kering”?

⁸ Bacha Isaiah 40:30. Kitai engka bisi mayuh pengelandik, tang kitai bisi tatak ba utai ke ulih dikereja ngena pengering diri. Tu meh utai ke patut ditemu semua kitai. Rasul Paul ulih ngereja mayuh utai, tang iya enda ulih ngereja semua utai ti dikedekaka iya. Lebuh iya madahka asai ati diri ngagai Jehovah, Jehovah madah ngagai iya: “Kuasa Aku nyadi pemadu badas lebuh nuan lemi.” Paul nemu reti utai ku Jehovah. Nya kebuah iya nyebut: “Lebuh aku lemi, aku kering.” (2 Kor. 12:7-10) Nama reti utai ku Paul nya?

⁹ Paul nemu iya bisi tatak ba utai ke ulih dikereja iya kediri. Iya begunaka bantu ari orang ke kering agi. Roh kudus Petara ulih meri Paul pengering lebuh iya lemi. Lalu roh kudus ulih ngereja mayuh agi utai. Roh kudus Petara mega meri Paul pengering kena nembuka utai ti enda ulih dikereja ngena pengering diri. Utai ti sama ulih nyadi ba kitai. Lebuh Jehovah meri kitai roh kudus Iya, kitai deka kering!

10. Baka ni Jehovah nyaup David tan natka penanggul iya?

¹⁰ Pemasmur David suah ngasaika roh kudus Petara ngeringka iya. Iya belagu: “Nuan meri aku pengering kena aku nyerang munsuh aku enggau kuasa kena aku ngalahka kuta sida.” (Mas. 18:29) Kitai bisi penanggul ke disema baka munsuh ti enda ulih “dialahka” ngena pengering diri. Kitai begunaka saup ari Jehovah.

11. Baka ni roh kudus nulung kitai tan natka penanggul?

¹¹ Bacha Isaiah 40:31. Burung menaul enda ulih mengkang terebai ba langit ngena pengering diri. Kuasa ke datai ari angin angat nulung burung menaul terebai tinggi ba langit. Tu nulung iya ulih terebai jauh sereta enda masau tenaga iya. Nya alai lebuh nuan napi penanggul ti besai, pikirka burung menaul. Minta Jehovah meri nuan mayuh agi pengering nengah ‘penyaup, iya nya roh kudus.’ (Jhn. 14:26) Kitai ulih minta Jehovah meri kitai roh kudus Iya ba sebarang maya, iya nya 24 jam sehari. Kitai patut minta saup Jehovah kelebih agi lebuh kitai bisi  penanggul enggau menyadi Kristian ba eklisia. Tang nama kebuah penanggul tu nyadi?

12, 13. (a) Nama kebuah orang Kristian kekadang bisi penanggul enggau pangan diri? (b) Nama ulih dipelajarka kitai pasal Jehovah ari pengidup Josep?

¹² Penanggul nyadi laban semua kitai enda sempurna. Kekadang kitai pedis ati enggau utai ti disebut tauka dikereja orang bukai, tauka orang bukai engka pedis ati ketegal kitai. Tu ulih nyadi penguji ti besai. Tang nya meri kitai peluang taluk ngagai Jehovah. Baka ni? Iya nya belajar bekerejasama enggau bala menyadi Kristian kitai. Jehovah rinduka sida taja pan sida enda sempurna, lalu kitai pan patut rinduka sida.

¹³ Jehovah enda nagang nembiak Iya diuji. Kitai belajar pasal utai tu ari pengidup Josep. Lebuh Josep agi biak, menyadi tiri iya kepapaska iya. Sida nyual iya nyadi ulun, lalu iya dibai ngagai menua Ejip. (P-kal. 37:28) Jehovah meda utai ke nyadi lalu Iya tentu berasai tusah ati lebuh meda pangan Iya ti tetap ati, Josep, diperinsa. Tang, Jehovah enda nagang utai nya nyadi. Pia mega, lebuh Josep dipetenah nguji masung bini Potipar lalu dijil, Jehovah mega enda nyelamatka Josep. Kati Petara bisi ninggalka Josep? Nadai. Bup Kudus madahka, ‘Jehovah bisi enggau Josep, lalu ngasuh iya mujur dalam semua utai ti dikereja iya.’—P-kal. 39:21-23.

14. Nama pemanah iya enti kitai nyeliah ari ringat?

¹⁴ Siti agi chunto nya David. Mayuh orang enda kala ngasaika pemedis ke ditapi David. Taja pia, pangan Petara nya enda nejuka diri alah laban pengeringat. Ku iya nulis: “Anang ringat, lalu badu agi pedis ati! Anang irau, laban pengirau semina ngujung ngagai penyai.” (Mas. 37:8) Kebuah ti badas “anang” ringat, tauka nyeliah ari ringat, nya laban kitai deka neladan Jehovah. Iya “enda ngukum kitai nitihka dosa kitai” tang udah ngampun kitai. (Mas. 103:10) Bisi mega penguntung bukai enti kitai nyeliahka pengeringat.  Ambika chunto, pengeringat ulih ngasuh darah tinggi sereta pedis deka enseput. Pengeringat ulih ngerusak atau enggau pancreas, sereta ngasuh perut tusah deka nganchurka pemakai. Pia mega, lebuh kitai ringat, kitai tusah deka berunding enggau manah. Kitai engka nyebut tauka ngereja utai ti ngemediska ati orang bukai, lalu tu ulih ngasuh kitai lama enda lantang ati. Endang manah agi enti kitai enda ringat. Bup Kudus madahka: “Ati ti lantang, ngasuh tubuh nuan bepengerai.” (J-lam. 14:30) Nya alai, nama ulih digaga kitai lebuh orang ngemediska ati kitai, lalu baka ni kitai ulih bebaik enggau menyadi Kristian kitai? Kitai ulih nitihka jaku ajar ari Bup Kudus.

15, 16. Nama patut digaga kitai enti orang ngemediska ati kitai?

¹⁵ Bacha Epesus 4:26. Kitai enda tekenyit ati enti orang ke enda nyembah Jehovah jai enggau kitai. Tang lebuh menyadi Kristian tauka diri sebilik nyebut tauka ngereja utai ti ngemediska ati , kitai berasai balat tusah ati. Tang baka ni enti kitai semampai ingatka penyalah ke digaga sida? Kati kitai deka ngelakka diri majak ringat, indah engka betaun? Tauka kati kitai deka nitihka jaku ajar ari Bup Kudus kena mutarka pekara nya enggau jampat? Lama agi kitai nganti deka bejaku enggau orang nya, tusah agi kitai deka bebaik enggau iya.

¹⁶ Baka ni enti menyadi Kristian bisi ngemediska ati nuan, lalu nuan majak berundingka utai nya? Nama digaga nuan ngambika ulih bebaik? Kesatu, nuan ulih besampi ngagai Jehovah. Minta Iya nulung nuan ulih berandau manah enggau menyadi Kristian nuan. Anang enda ingat, iya mega pangan Jehovah. (Mas. 25:14) Jehovah rinduka iya. Jehovah manah enggau bala pangan Iya, lalu Iya deka kitai ngereja utai ti sama. (J-lam. 15:23; Mat. 7:12; Kol. 4:6) Kedua, pikirka utai ti deka disebut nuan ngagai menyadi Kristian. Anang ngumbai iya deka ngemediska ati nuan. Utai ke nyadi engka enda disengaja tauka nuan salah penemu enggau utai ke nyadi. Nuan mega patut sanggup ngaku penanggul nya nyadi engka ketegal nuan. Nuan tau ngepunka randau enggau nyebut, “Aku engka kelalu jampat pedis ati, tang lebuh nuan bejaku enggau aku kemari, aku berasai . . . ” Tang enti nya enda ulih nulung seduai bebaik, anang badu nguji. Besampi ke menyadi Kristian nuan nya. Minta Jehovah manah enggau iya, nyukung sereta nyaga iya, lalu minta Jehovah nulung nuan beratika kualiti manah iya. Pechaya meh, Jehovah deka lantang ati laban nuan bebendar deka bebaik enggau menyadi Kristian nuan, ke mega pangan Iya.

17. Baka ni Jehovah nulung kitai ngemanahka kaul enggau Iya lebuh kitai bedosa, lalu nama kebuah kitai patut nerima tulung ari Iya?

¹⁷ Sekeda orang ngasaika diri enda layak nyembah Jehovah laban sida kala ngereja dosa ti besai. Asai ati ti besalah ulih ngelenyauka pemaik, pengelantang sereta pengering. Ku Raja David nulis: ‘Lebuh aku enda ngaku dosa aku, aku lelak nyabak sepemanjai hari. Siang malam Nuan ngukum aku, Jehovah.’ Tang David bisi pemerani ngereja utai ti dikedekaka Jehovah. “Udah nya aku ngaku dosa aku ngagai Nuan,” ku David nulis, “lalu Nuan  ngampun semua dosa aku.” (Mas. 32:3-5) Enti sema nuan bisi ngereja dosa ti besai, Jehovah sedia ngampun nuan. Iya deka nulung nuan ngemanahka kaul nuan enggau Iya. Tang nuan patut nerima tulung ti disediaka Iya nengah tuai gempuru. (J-lam. 24:16; Jas. 5:13-15) Nya alai anang betangguh! Pengidup nuan ti belama iya bepanggai ba utai nya. Tang baka ni enti nuan agi berasai besalah taja pan dosa nuan udah lama diampun. Nama patut digaga nuan?

18. Baka ni chunto Paul ulih nulung orang ke ngasaika diri enda layak nyembah Jehovah?

¹⁸ Bisi maya rasul Paul berasai lemi ketegal dosa ti dikereja iya menya. Ku iya madahka: ‘Aku tu rasul ke pemadu mit ari semua bala rasul, lalu enda patut dikumbai rasul, laban aku udah merinsaka eklisia Petara.’ Taja pia, ku Paul agi: ‘Tang ulih pengasih Petara, aku nyadi aku ke diatu.’ (1 Kor. 15:9, 10) Jehovah nemu Paul enda sempurna. Tang Iya nerima Paul taja pan Paul bisi ngereja penyalah menya, lalu Iya deka Paul nemu pasal utai tu. Enti nuan amat nesal ati ke utai ti udah dikereja nuan lalu udah madah ngagai Jehovah pasal utai nya sereta ngagai tuai gempuru enti nya patut, Jehovah tentu deka ngampun nuan. Pechaya meh Jehovah udah ngampun nuan lalu terima meh pengampun ari Iya!—Isa. 55:6, 7.

19. Nama ayat taun 2018, lalu nama kebuah ayat nya engkeman?

¹⁹ Seraya kitai majak semak enggau pengujung dunya tu, kitai tentu nemu diri deka napi mayuh agi penanggul. Tang kitai patut ingat, Jehovah ke “meri pengering ngagai orang ke lemi lalu ngeringka sida ke nadai daya agi,” ulih meri sebarang utai ke diguna nuan ngambika ulih mengkang nyembah Iya enggau tetap ati. (Isa. 40:29; Mas. 55:22; 68:19) Maya taun 2018, kitai deka ingatka pemendar ti beguna bendar tu tiap kali kitai ngulu gempuru ba Palan Gempuru lalu meda ayat taun kitai: ‘Orang ke ngarapka penyaup ari Jehovah, deka dikeringka baru.’—Isa. 40:31.